Category: ताजा अपडेट

काठमाण्डाै – अभिनेता पल शाहले जबरजस्ती करणी गरेको मुद्दामा पीडितको मानमर्दन र चरित्र हत्या हुने गरी अन्तवार्ता दिने शर्मिला वाइबालाई प्रहरीले पक्राउ गरेको छ । 

सेलेब नेपाल र ए वन मिडिया नामक युट्युब च्यानलमार्फत पीडितको मानमर्दन हुने तथा भ्रामक र अनर्गल वक्तव्यबाजी गर्ने सुनसरीको बराहक्षेत्र नगरपालिका घर भएकी शर्मिला वाइबालाई पक्राउ गरिएको प्रहरीको साइबर ब्युरोले जनाएको छ । 

वाइबालाई चितवनबाट पक्राउ गरेर जिल्ला अदालत काठमाण्डौबाट सात दिनको म्याद थप भइ अनुसन्धान भइरहेको प्रहरीले जनाएको छ । 

दाङ, ०६ चैत्र ।
दाङ जिल्लाको घोराहीमा नागरिक आरोग्य कार्यक्रम अन्तर्गतको जिल्ला अभिमुखिकरण कार्यक्रम आइतबार सम्पन्न भएको छ ।

नव गठित जिल्ला नागरिक आरोग्य समितिलाई कार्यक्रम बारे अवगत गराउनका लागि उक्त कार्यक्रमको आयोजना गरिएको जनाइएको छ । कार्यक्रम लुम्बिनी प्रदेश, स्वास्थ्य निर्देशनालय, बुटवलको आयोजनामा सञ्चालन भएको थियो ।

आयुर्वेद तथा वैकल्पिक चिकित्सा महाशाखा, लुम्बिनीका प्रमुख डा.पुष्पराज पौडेलले नागरिक आरोग्य कार्यक्रमको परिचय, उद्देश्य औचित्य, आदिको बारेमा विस्तृत जानकारी गराउनु भएको थियो ।

कार्यक्रममा प्रमुख अतिथि, जिल्ला समन्वय समितिका प्रमुख एवं जिल्ला नागरिक आरोग्य समिति संयोजक जितेन्द्रमान नेपाली, विशिष्ट अतिथि एवं प्रादेशिक आयुर्वेद चिकित्सालय, विजौरीका नि.निर्देशक, आयुर्वेद चिकित्सा परिषद नेपालका अध्यक्ष डा. सन्तोष कुमार ठाकुर, विशिष्ट अतिथि, घोराही उपमहानगरपालिकाका प्रवक्ता एवं वडा नं. १८ का अध्यक्ष भरत अर्याल, वडा नं. १५ का अध्यक्ष रमेश पाण्डे, वडा नं. ७ का अध्यक्ष खोपीराम चौधरी, अतिथिहरू स्वास्थ्य कार्यालय दाङका नि. प्रमुख अंगद बहादुर शाही, राप्ती आयुर्वेद चिकित्सालय तुलसीपुरका प्रमुख डा.मदन बि.सी. प्रादेशिक आयुर्वेद चिकित्सालय विजौरीका कन्सल्टेन्ट शन्य चिकित्सक डा.मदन भण्डारीको उपस्थिति रहेको थियोे।

साथै कार्यक्रममा घोराही उ.म.न.पा स्वास्थ्य शाखा प्रमुख नारायण घर्ती, वन कार्यालयका प्रतिनिधि, शिक्षा शाखा प्रतिनिधि लगायत विभिन्न संघ संस्थाहरूका प्रमुख तथा प्रतिनिधि, स्वास्थ्यकर्मीहरू, पत्रकारहरूको सहभागीता रहेको थियोे।

कार्यक्रममा जितेन्द्रमान नेपाली, डा.सन्तोष कुमार ठाकुर, डा. मदन वि.सी., भरत अर्याल, रमेश पाण्डे, लगायतका वक्ताहरूले बोल्नु भएको थियोे ।
कार्यक्रम आयुर्वेद तथा वैकल्पिक चिकित्सा महाशाखा प्रमुख डा.पुष्पराज पौडेलको अध्यक्षतामा सम्पन्न भएको थियो भने कार्यक्रमको सञ्चालन स्वास्थ्य निर्देशनालयका कविराज निरीक्षक गणेश सापकोटाले गर्नुभएको थियो ।

काठमाण्डाै – आउँदाे वैशाख ३० गते हुने स्थानीय तहको चुनावमा विद्यालय, शिक्षक र विद्यार्थीकाे प्रयाेग गर्न नपाइने भएकाे छ । आयोगले भर्खरै जारी गरेको ‘निर्वाचन आचारसंहिता २०७८’ मा ‘कुनै सरकारी कार्यालय वा सामुदायिक विश्वविद्यालय वा सामुदायिक विद्यालयको क्षेत्र प्रयोग गरी निर्वाचनसम्बन्धी भेला वा प्रचारप्रसार गर्न वा गराउन नहुने’ उल्लेख छ । याे व्यवस्थाले शिक्षालयमा दलगत राजनीतिक हस्तक्षेप रोक्न कडाइ हुने र भने त्यस्तो अवस्था कम हुने सकारात्मक सङ्केत देखिएको छ ।   

निर्वाचन आयोग ऐन २०७३ अनुसार आयोगले यही चैत ३ गते नेपाल राजपत्रमार्फत जारी गरेको चुनाव आचारसंहिता यही चैत १५ गतेदेखि लागू हुँदैछ । आचारसंहिताको परिच्छेद २ को ‘ग’ अनुसार ‘कुनै सरकारी कार्यालय वा सामुदायिक विश्वविद्यालय वा सामुदायिक विद्यालयको क्षेत्र प्रयोग गरी निर्वाचनसम्बन्धी भेला वा प्रचारप्रसार गर्न वा गराउन नहुने’ व्यवस्था कायम गरिएको हो । परिच्छेद ४ को ‘ट’ ले राजनीतिक दल, उम्मेदवार वा दलका भातृ सङ्गठनले १८ वर्ष पूरा नभएका बालबालिकालाई चुनावी प्रचारप्रसार, धर्ना, जुलुस, आमसभामा प्रयोग गर्न नपाइने स्पष्ट व्यवस्था गरेको छ ।   

त्यही आचारसंहिताको परिच्छेद २ को ‘छ’ अनुसार १८ वर्ष पूरा नभएका बालबालिकालाई चुनाव प्रचारप्रसारमा प्रयोग गर्न वा गराउन नहुने, परिच्छेद ३ को ९ अनुसार सामुदायिक विद्यालयका शिक्षकले कुनै पार्टीको प्रचारप्रसार गर्न नपाउने, विद्यालयको भवन दलगत प्रयोग गर्न दिन नहुने, शिक्षकहरूले सामाजिक सञ्जाल प्रयोग गरेर पनि दलगत पक्षधरता लिन र मत माग्न नपाइने उल्लेख गरिएको छ ।   

आयोगका सहायक प्रवक्ता सूर्यप्रसाद अर्यालले आचारसंहिताको अनुगमनका लागि केन्द्रस्तरमा एक आयुक्तको संयोजकत्वमा उच्चस्तरीय अनुगमन समिति र जिल्लास्तरमा पनि अनुगमन समिति तथा केन्द्रबाट नेपाल सरकारका सचिवस्तरको नेतृत्वमा विशेष अनुगमन टोली खटाइने बताउनुभयो । आचारसंहिताको उलङ्घन भएको उजूरी प्राप्त भएमा त्यसको अध्ययन गरी कारबाही गर्न आयोगले उचित निर्णय लिने उहाँले जनाउनुभयो । 

विद्यालयमा मतदान केन्द्र (बुथ) पनि नराख्न आउने गरेका आग्रहलाई भने आफूहरूले अहिलेलाई कार्यान्वयन गर्न नसक्ने उहाँको भनाइ छ । चुनावका समयमा विद्यालय बन्द हुने र  त्यस क्रममा नाबालिगको प्रयोग नहुने भएकाले विद्यालयमा बुथ राखेर बालबालिकाको अधिकार हनन नहुने सहायक प्रवक्ता अर्यालको तर्क छ । बाल संरक्षण र बाल अधिकारमा क्रियाशील नागरिक संस्थाको राष्ट्रिय सञ्जाल बालबालिका शान्ति क्षेत्र राष्ट्रिय अभियान (सिजप) सहित विभिन्न संस्थाले आचारसंहितामा ती विषय समावेश गर्न गएकाे महिना आयोगका पदाधिकारीलाई सुझाव दिएका थिए । 

सिजपका अध्यक्ष राजेश शर्माले निर्वाचन आचारसंहितामा पहिलो पटक दलहरूले प्रचारप्रसारका क्रममा विद्यालयको प्रयोग गर्न नपाइने व्यवस्था हुनु आफूहरूको आवाजको सुनुवाइ भएको बताउँदै यसको कार्यान्वयन पक्षमा जोड दिनुपर्छ भन्नुभयो । उहाँले आफूहरूले बाल अधिकारबारे उठाएका धेरैजसाे माग सम्बोधन भएको जनाउँदै अनुगमनमा सघाउने बताउनुभयो ।

सामुदायिक विद्यालय व्यवस्थापन समिति महासङ्घ नेपालका अध्यक्ष कृष्ण थापाले प्रचारप्रसारका क्रममा विद्यालय, शिक्षक र विद्यार्थीको प्रयोग गर्न नपाइने प्रावधान सकारात्मक भएको जनाउँदै चुनावमा बुथ राख्दा त्यहाँ झै–झगडा र झडप हुनसक्ने भएकाले चुनावमा प्रयोग भएका विद्यालयका कोठा र भौतिक सामानको बीमा वा क्षतिपूर्तिका लागि सोचिनुपर्ने बताउनुभयो ।

नेपालको संविधानको मौलिक हकअन्तर्गत धारा ३१ को शिक्षासम्बन्धी हक, बालबालिकासम्बन्धी ऐन २०७५ को दफा ७ मा शान्तिपूर्ण तथा बालमैत्री वातावरणमा पढ्न पाउने बालबालिकाको हकको व्यवस्था गरिएको छ । विद्यालय शान्ति क्षेत्र राष्ट्रिय ढाँचा र कार्यान्वयन निर्देशिका–२०६८ ले विद्यालयलाई सशस्त्र गतिविधि, हिंसा, दलगत राजनीति तथा अन्य हस्तक्षेप, भेद्भाव, दुर्व्यवहार, बेवास्ता र शोषणबाटमुक्त राख्ने व्यवस्था गरेको छ । विसं २०६३ मङ्सिर ५ को विस्तृत शान्ति सम्झौतापछि नेपाल सरकारले २०६८ जेठ ११ मा मन्त्रिपरिषद्बाट विद्यालय शान्ति क्षेत्रको अवधारणा पारित गरेको थियो ।

बालबालिकासम्बन्धी ऐन २०७५ को दफा ६६ अनुसार विद्यालयमा हुने त्यस्ता गतिविधि बालबालिकाविरुद्धको कसुर हो । यो कसुरका लागि ७५ हजार रुपैयाँसम्म जरिबाना र तीन वर्ष कैद हुन सक्ने प्रावधान छ । यस्तो काम नैतिक पतन हुने फौजदारी कसुर मानिएको छ । 

सिजपले जुलुुस तथा कुनै पनि राजनीतिक क्रियाकलापमा बालबालिकाको प्रयोग नगर्न, कुनै पनि बहानामा विद्यालय बन्दजस्ता गतिविधि नगर्ने, हुन नदिने र शान्तिपूर्ण सुरक्षित तथा बालमैत्री वातावरणमा शिक्षण सिकाइको प्रत्याभूति गराउने वातावरण गराउन स्थानीय सरकारको पनि ध्यानाकर्षण गराउँदै आएको छ । तत्कालीन नेकपा (माओवादी) को सशस्त्र युद्धकालमा २०६० असोज २६ गते डोटीको मुढभरामा रहेकाे शारदा उच्च माध्यमिक विद्यालयमा विद्रोही पक्षको सांस्कृतिक कार्यक्रममा सुरक्षा निकायबाट भएको गोली प्रहारका क्रममा चार विद्यार्थीसहित दश जनाको ज्यान गएकाे र केही विद्यार्थी घाइते भएपछि अधिकारकर्मीले बालबालिका शान्ति क्षेत्र र विद्यालय शान्ति क्षेत्रका लागि आवाज उठाउन थालेका थिए । 

काठमाडौ, ५ चैत । साप्ताहिक उदक लेखन शृङ्खलाको ४३औँ भाग शनिबार सम्पन्न भएको छ । उदक साहित्य समाज, नेपालले उक्त कार्यक्रमको आयोजना गरेको थियो। उक्त शृङ्खलामा नेपाल लगायत विश्वका ४४ जना उदक स्रष्टाहरूको सहभागिता रहेको उदक लेखन शृङ्खलाका प्रशिक्षक एवं उदक साहित्य समाजका उपाध्यक्ष वसन्त अनुभवले बताउनुभयो ।

काव्य विधा अन्तर्गतको नयाँ उदियमान प्रविधा उदक कविताको उन्नयन र विकासका लागि साप्ताहिक रूपमा उदक लेखन शृङ्खला सञ्चालन गर्दै आएको उदकका प्रवर्तक एवं उदक साहित्य समाजका अध्यक्ष आर्त अकुलीनले बताउनुभयो ।

शनिबारको शृङ्खलाका लागि विहान एउटा तस्बिर दिएर उक्त तस्बिर अनुसारको गहन भाव खुल्ने गरि एउटा उदक साझ ५ बजेसम्म लेख्न सहभागी उदक यात्रीहरूलाई भनिएको थियोे ।

शृङ्खलाका लागि राखिएको तस्बिर

तस्बिरमा उदक लेखन शृङ्खलामा सहभागी स्रष्टाहरूका उदकहरू

[१]
होली
खुसी उमङ्ग
खेलेर विविध रङ्ग !

वसन्त अनुभव
घोराही, दाङ

[२]
होली
रङ्गहरूको पर्व
जताततै छ हर्ष !

पूर्णबहादुर श्रेष्ठ “हृदयङकृत”
पनौती न.वा-३,काभ्रे

[३]
होली
सातै रङ्ग
मिलिजुली खेली दङ्ग !

अनुग्रह राना मगर ‘पुष्प’
संखुवासभा हाल मलेसिया

[४]
होली
मायाको रङ्ग
ईश्वरको अंश सँग !

गुणनिधि घिमिरे
पाँचथर मोरङ हाल अमेरिका

[५]
फागु
रङ्गीन हाेली
खेलाैँ माया घाेली !

केशवप्रसाद ढकाल `प्रीतबीज´
गाेरखा

[६]
होली
पर्व रङ्गको
चौतर्फी खुसी उमङ्गको !

हिमाल अम्मै
घोडाघोडी कैलाली

[७]
होली
खुसीको उत्सव
रङ्गको अनुपम पर्व !

आर्त अकुलीन
कैलाली

[८]
हाेली
रङ्गहरुको उत्सव
वसन्त ऋतुकाे आगमन !

श्रद्धा आचार्य
पोखरा

[९]
रङ्ग
फागु पूर्णिमा
रातो पहेँलो शरीरमा !

सोमनाथ लुइटेल “रवि पाल्पाली”

[१०]
होली
रमाइलो पर्व
सबैले गरौँ गर्व !

नारायण कोइराला
तानसेन पाल्पा।

[११]
हाेली
हाेलिका दहन
खुशी रङ्ग अंकमाल !

नवराज भट्ट

[१२]
ढुरहेरी
दिल खुस
रंगीन सारा बस्ती !

सागर कुस्मी `संगत´
कैलारी ८ कैलाली

[१३]
होली
रङ्गको पर्व
रङ्गीन आत्मिक सम्बन्ध!

राजाराम रत्गैंया अमौरा
कैलाली

[१४]
झोली
केही नबोली
भन्दैछन् ह्यापि होली !

दुर्गा अधिकारी भमरकोटे ।

[१५]
होली
मनपेट खोली
रङ्ग दलेर उज्याली !

पुष्पशायरा । बिराटनगर ।

[१६]
फागु
रङ्गको पर्व
मिलिजुली मनाआौ हर्ष !

गोपालप्रसाद पौड्याल
विराटचोक, मोरङ

[१७]
हाेली
मैत्रीपूर्ण खेल
सात रङ्गकाे मेल !

टिकाराम जोशी

[१८]
हाेली
रङ्गकाे पर्व
असत्य माथिकाे बिजय !

गिरी बलराज

[१९]
होली
मनभरिको खुशी
रङ्ग छर्ने उत्साह !

अम्बिका अधिकारी

[२०]
रङ्गको
उत्सव होली
मनाऔँ दिल खोली !

मंगला उपाध्याय

[२१]
रङ्ग
आपसी सम्बन्ध
गाढा बनाउने कार्य !

भवानी घिमिरे
सर्लाही

[२२]
होली
वसन्तको उमङ्ग
खेलौँ सौहार्दले रङ्ग !

सन्तु खत्री
काठमाडौँ

[२३]
होली
मनको भाव
रङ्गीन जीवनको प्रतिबिम्ब !

शिव खनाल जीवम

[२४]
होली
दिल खोली
मनाऔँ रङ्ग दली !

धनमाया चौधरी कैलाली

[२५]
होली
रङ्ग घोली
दलेर गयो नबोली !

पशपती राई
खोटाङ

[२६]
खासमा
होलीको उल्लासमा
उमङ्ग साथीत्वको आभासमा !

प्रेम थापा ” मन ” बागलुङ

[२७]
होली
वर्षमा एकदिन
पवित्र रङ्गको संसार !

विक्रम तिरुवा सलिन
जुम्ला

[२८]
होली
असत्य माथि
सत्यको जित भएको !

संझना कुसुम

[२९]
होली
रङ्गको वर्षा
उमङ्गका साथ खेलिने !

खेमराज पुरी कैलाली

[३०]
हाेली
रङ्गहरूकाे पर्व
सम्बन्ध कायम राख्ने !

रामराजा के. सी.
फर्पिङ, काठमाडौं

[३१]
होली
खुसीको रङ्ग
सारा नेपालीमा उमङ्ग !

बादल गुरुङ’वियोगी’

[३२]
रङ्ग
मन चङ्ग
शिशिरको भो आगमन !

कण्ठराज गिरी
टीकापुरकैलाली हाल अष्ट्रेलिया

[३३]
होली
फागु पुर्णिामा
रङ्गहरूको पर्व मनाइने !

बुद्धिमान चौधरी
कनकाई नगरपालिका ४ झापा

[३४]
होली
मीठो बोली
खेलौँ रङहरू घोली !

वासुदेव ज्ञवाली
पाल्पा तानसेन -१

[३५]
हाेली
रङ्गहरुकाे पर्व
सभ्यता संस्कारमा गर्व ।

नारायण प्रसाद उपाध्याय
कैलाली ।

[३६]
पूर्णिमा
रमाऔँ होलीमा
विकृति हटाई संस्कृतिमा !

उर्मिला पन्त पाण्डेय
ज्ञानेश्वर , काठमाण्डौं

[३७]
सप्तरङ्गी
होलीको आगमन
वसन्तले फेर्यो रङ्ग !

सरिता काफ्ले
कोहलपुर बाँके

[३८]
फागुमा
रङ्गको उमङ्ग
सत्यको विजयले दङ्ग !

सुमित्रा पोखरेल
काठमाडौं

[३९]
होली
उमङ्ग घोली
खेल्यौ रङ्गको लोली !

बिबस पारदर्शी
झापा भद्रपुर,

[४०]
होली
सांस्कृतिक पर्व
नेपाली पहिचानमा गर्व !

जमुना आचार्य
सिन्धुपाल्चोक

[४१]
जीवन
रङ्गीन कल्पना
रङ्गाउने पुरा बिपना !

जमुना कायस्थ
पोखरा

[४२]
रङ्ग
हाेलीमा दङ्ग
फागु मनाइयो उमङ्ग !

प्रद्युम्न चालिसे

[४३]
होलीमा
रमाउ हामी
सबै मिलेर लोलीमा !

सुशीला पौडेल

[४४]
होलीले
उदकको बोलीले
सातै रङ्गको गोलीले !

सविता के.सी.

जय उदक ! जय साहित्य !!

साताका तीन लघुकथाको नवौँ शृङ्खलामा नमस्ते आधुनिक लघुकथा मञ्चमा यो साता प्रेषित गरिएका होली विशेष लघुकथाहरू मध्ये निम्न तीन लघुकथाहरू (होली, होली र जीवनको रङ्ग) छनोट गरी प्रकाशन गरिएको छ।

[१] लघुकथा : होली

✍️ डा.कपिल लामिछाने
उनी बार्दलीमा उभिएर बाहिर हेर्दै थिए । जताततै होलीको उमङ्ग देखिन्थ्यो । श्रीमतीले भनिन्– “फ्रिजमा मासु रै’नछ । तरकारी पनि सकिएछ । आज त झन् होली, मासु नभई भएन ।”

अह्राउन–पठाउनका लागि कोही नभएकाले उनी आफैँ तयार भए । फेरि रोकिए– कसैले छेप्ने हुन् कि ! कसैले रङ्ग दलिदिने पो हुन् कि ! अनुशासन कसैमा छैन ।

अनि फेरि सोचे– ‘कसको हिम्मत ∕ कसैले छेपे–दले भने जान्या छु नि मैले पनि !’
वास्तवमा मानिसहरू उनीसित डराउँथे । धक मान्थे किनकि उनी धाक देखाउँथे । सधैँ त गाडीबाट आउँथे । गाडीबाट जान्थे । आज होली । ठाउँठाउँमा डोरीले बाटो छेकेर पैसा माग्छन् । उनले सोचे र पैदलै निक्ले ।

देखे, जताततै होलीको धुमधाम छ । बाटामा रङ । दुकानमा रङ्ग । टाउकामा रङ्ग । मुखमा रङ्ग । मान्छे रङ्गीन । मान्छेको मन रङ्गीन । कतै मादलुको पक्धुम् ! कतै जोगिरा सररर … । जताततै उमङ्गै उमङ्ग । रङ्गै रङ्ग । उनी बाहेक कोही चोखो छैन । आफूलाई कसैले रङ्ग नदलेकोमा आफूलाई विजेता महसुस गर्दै अघि बढे ।

उनी पसलसम्म पुगे । सामान किने । पैसा बुझाएर फर्के । पसलेका अनुहारमा पनि रङ्ग थियो ।
कसैले उनलाई छेपेन । कसैले उनलाई रङ्ग लगाइदिएन । अहिले भने उनले सारै नमज्जा महसुस गरे । उनले सोचे कि म यस समाजको सदस्य होइन ?

उनलाई बडो दु:ख लाग्यो कि, यस्तो होलीमा पनि उनलाई कसैले छेपेन । कसैले रङ्ग लगाइदिएन ! कसैले वास्तै गरेन ।
घर पुगेर एकाएक उनले श्रीमतीलाई रङ्ग पोतिदिए । श्रीमतीले पनि उनलाई त्यसैगरी रङ्ग पोतिदिइन् । अनि उनी रङ्ग बोकेर निक्ले । भेटेजतिलाई रातो, पहेँलो, निलो, हरियो, सेतो रङ्ग पोत्न थाले – धमाधम ! ‘बुरा नमानो होली है !’
‘विस्थापन’बाट
रुपन्देही

[२] लघुकथा : हाेली

✍️ शेखर अर्याल
पूर्णेका जून टहटह हुँदा प्रह्लाद आनन्द लिन कठिबद्ध देखिन्थे । हिरण्यकशिपुमा भने बेचैन बढेकाे थियाे । सत् चरित्रकाे पूजा गर्नु मूल जड थियाे ।

“ए प्रह्लाद ! तेराे सङ्घर्षले के गर्याे ? जनताले के सुख पाए हँ ?”
“बुबा, मेरो सङ्घर्षले अवश्य सुख पाउने छन् ।”
“अब देख्लास्, नेपाली जनताकाे सङ्घर्ष जस्तै तेराे सङ्घर्ष ।” कशिपु भित्रभित्रै चिढिए।
कशिपु फकाएर, लाेभ्याएर, डर त्रास देखाएर आफ्नाे पूजा गर्न लगाए । तर उनी त्यसतर्फ लागेनन् ।

उनले भने, “हजुर राज्यको मालिक हुनुहुन्छ । नानातरहका वरदान पनि पाउनुभएकाे छ । तर आफ्नै सन्तानमाथि यस्ताे आघात किन ?”
“आफ्नै कुलमा जन्मेर आफूविरुद्ध लाग्ने सन्तान, सन्तान हाेइन, त्याे त कुलद्राेही हाे, विभिषण जस्तै ।” कशिपुले जवाफ दिए ।

“जनचाहनालाई दबाएर शासन गरी आफ्नाे स्वार्थ सिद्ध गर्नु राम्राे हाे ? विभिषण त सत्यवादी थिए । त्यसैले पाे विद्राेह गरे होइन र ?” उनकाे थप प्रश्न थियाे ।
“मेरा आफन्त, सहयाेगी जसले पनि मलाई स्वीकार्दछन् । अन्य मुलुकका नन्दीभृङ्गी मेरै साथमा छन् । तँ जाबाे प्युसोले के गर्न सक्छस् हँ ? हेराैँ न तेराे तागत ?”

“म त सत् चरित्रको भलो गर्ने असल जनका पुजारीको पूजा गर्छु ।”
कशिपु सिंहिका बाेलाएर प्रह्लादको अन्त्य गरी आफ्नो अहङ्कार पूरा गर्न खोज्दै थिए, सिंहिका भस्म भइन् । कशिपु वम अणुवमको गुहार माग्दै गर्दा हाेलीले गति लिइसकेकाे थियाे ।
मदाने ३, सिर्सेनी, लाम्पाटा, गुल्मी
हाल कीर्तिपुर ढल्पा

[३] लघुकथा : जीवनको रङ्ग

✍️ हिरनमयी आचार्य शर्मा
होली खेल्नेहरूको टोली देखेर निशा चुपचाप एकै ठाउँमा उभिएको उभियै भइन् । आफ्नो श्रीमानको वार्षिकी सकिएको दुई दिन मात्र बितेको थियो ।

घरका सबैले होलीको रङ्ग लगाए । त्यो टोलीमा भएका आफ्ना श्रीमानका साथीलाई देखेर निशाको भक्कानो फुटेर आयो । उनी विवाह भएर आएदेखि दुई साथी छुट्टिएको कहिल्यै देखेकि थिइनन् । तर समयसँगै चल्न पर्दो रहेछ ।

ससुरा बाले निशातिर हेरेर भने -“आऊँ, तिमी पनि ! यो हरियो रङ्ग लगाऊँ । सृष्टिको प्रतीक हो, हरियो रङ्ग । जीवनको रङ्ग । यो संसारमा प्राणी भएर आएपछि जानैपर्छ । म बुढोलाई हेर, मेरो काम सकिएको थियो नि ! तर मलाई लगेनन् । भगवान साँच्चै छन् र ? छैनन् होला जस्तो लाग्छ । फेरि सोच्छु, तिम्रो केही काम लाग्ला भनेरै राखे होलान् मलाई भगवानले ।”

“छोरी जन्मिएनन् भनेर दु:ख मान्दथेँ, म । त्यो ईच्छा पनि उनैले पुरा गरे । तिमीले समाजको आँखा अगाडि सबै कर्महरू सक्यौ । अब मेरो कर्म रहेको छ, तिम्रो पिता भएर कन्यादान गर्ने । ल ! आज हरियो रङ्ग लगाऊँ । मैले यहीँ जीवनमा केही सत्कर्म गरेको रहेछुँ भने छिट्टै रातो रङ्गले रङ्गीनेछ, तिम्रो जीवन छोरी !” भन्दै निशाका गालामा बाले हरियो रङ्ग घस्नु भयो । बाको गोडा ढोगेर हर्षित् हुँदै बिदा भए होली खेल्न आएका टोलीहरू ।
गुवाहटी, असम, भारत ।

समर्पण रम्जान

१९ मार्च २०२२, साउदी अरब, ईस्लामिक दावा सेन्टर सनैया जेद्दा द्वारा आयोजित खुल्ला पुरुष भलिबल प्रतियोगिता जेद्दाको सनैयामा समापन भएको छ ।
गत १७ तारिक मार्च बेलुकी ९ बजेदेखि सुरु भएको उक्त प्रतियोगिता शुक्रबार बिहान ११ बजे समापन भएको थियो ।
नेपाली महाबाणिज्य दूतावास जेद्दाका प्रमुख सत्रुधन पोखरेलको प्रमुख आतिथ्यमा युसुफ मियाँद्वारा संचालित उक्त भलिबल प्रतियोगिता कार्यक्रमका आयोजक ईस्लामिक सेन्टरका मुदिर अबु सल्मानको अध्यक्षतामा सम्पन्न भएको थियो ।
औपचारिक रुपमा संचालित उक्त कार्यक्रममा विशेष अतिथिमा नेपाली महाबाणिज्य दूतावास जेद्दाका महाबाणिज्य दुत भुवन पौडेल, सेख मुस्ताक मदनी, अतिथिमा एनआरएनए आरसिसि जेद्दाका अध्यक्ष चेतनाथ निरौला, एनआरएनए आरसिसि अल कासिमका अध्यक्ष रम्जान दिन मियाँ, तथा जेद्दाका आइएमइ प्रतिनिधि प्रदिप रहेका थिए ।
आयोजक टिमका प्रतिनिधि सेख मन्जुर अलि मियाँ को स्वागत मन्तव्य सँगै प्रतियोगिता सुरु हुनु पहिले अतिथि, विशेष अतिथि र प्रमुख अतिथि हरुले आयोजक टिमलाइ धन्यवाद दिदैं छोटो-छोटो मन्तव्य दिएका थिए । मन्तव्यकै क्रममा प्रमुख अतिथि महाबाणिज्य दूतावास जेद्दाका प्रमुख सत्रुधन पोखरेलले यो कार्यक्रम गरि श्रमिकहरुलाई मनोरञ्जनका साथमा नेपालीहरुलाइ भेला गराइ एक आपसी समन्वय गराएको र आफू पनि कर्यक्रममा उपस्थिति हुन पाएर खेलाडीको मनोबल बढाउन पाउँदा खुशी व्यक्त गर्दै आयोजक टिम सेख मन्जुर अलि मियाँलाई बिशेष धन्यवाद दिदै आगामी दिनमा यस्ता कार्यक्रम प्रतियोगिता गर्न पनि सबैमा अनुरोध गर्नु भएको थियो ।
ताइफ,जेद्दा, राबिग क्षेत्रहरूबाट गरि १४ टिमहरुको साथमा करिब १५० जना जति नेपालीहरु सहभागिता रहेको उक्त भलिबल प्रतियोगितामा जेद्दा टिम बिजेता र राबिग टिम उप बिजेता बनेको थियो ।
जेद्दा टिम, राबिग टिमA ,राबिग टिम B, अल मराइ, ताइफ A, ताइफ B, लुलु टिम, पोखरा टिम A, पोखरा टिम B, सुनौलो बिहानी, ग्लास्स कम्पनी,नेस्ले कम्पनी, DP worldip, आयोजक टिम गरि १४ टिमको उपस्थिति रहेको थियो ।
सेमि फाइनलमा ताइफ टिमलाइ हराउदैँ जेद्दा टिम फाइनलमा पुगेको थियो भने सेमि फाइनलमा लुलु टिम लाई हराउँदै राबिग टिम फाइनलमा पुगेको थियो ।
फाइनलमा पुगेका राबिग र जेद्दा टिम बिच भएको फाइनल बेस्ट अफ थ्री खेलमा जेद्दाले दुइटै खेल लगातार जित्दै प्रथम बिजेता बन्न पुगेको र राबिग टिम दोस्रो बिजेता बन्न पुगेको थियो ।

प्रतियोगिताको अन्त्यमा आयोजक टिमका तर्फबाट सेख मन्जुर अलि मियाँ, बिशेष अतिथि सेख मुस्ताक मदनी र अतिथि रम्जान दिन मियाँको हातबाट प्रथम पुरस्कार १५०० रियल, ट्रफी, र प्रमाणपत्र साथै दोस्रो पुरस्कार १००० रियल, ट्रफी र प्रमाणपत्र बिजेता तथा उप बिजेता लाई हस्तान्तरण गरिएको थियो ।

उक्त प्रतियोगिता सफलताका साथ सम्पन्न गराउन आफ्नो निमन्त्रणालाई स्विकार्दै उपस्थित हुनु भएका नेपाली महाबाणिज्य दूतावास जेद्दा का सत्रुधन पोखरेल सर, भुवन पौडेल सर, एनआरएनएका प्रतिनिधिहरु, खेल खेलाउन सहयोग गर्ने सम्पुर्ण आयोजक टिम, तथा उपस्थित खेल प्रेमी नेपालीहरुलाइ सेख मन्जुर अलि मियाँद्वारा धन्यवाद ज्ञापन गरिएको थियो ।

काठमाडाैँ, ३ चैत्र ।
फागु पुर्णिमा अर्थात हाेली पर्व काे अवसर पारेर २०७८ चैत्र २ गते टुक्का साहित्य समाजकाे आयाेजनामा “विशेष टुक्का लेखन अभ्यास श्रृङ्खला-३४” सम्पन्न भएकाे छ ।

टुक्का साहित्य समाजकी सचिव विमुन्स पाैडेलकाे संयाेजकत्वमा सञ्चालन भएकाे उक्त कार्यक्रमकाे प्रशिक्षण समेत उहाँले नै गर्नु भएकाे थियाे । कार्यक्रममा नेपाल, भारत लगायत विश्वका विभिन्न देशहरूबाट ३२ टुक्काकारहरूकाे सहभागिता रहेकाे थियाे । कार्यक्रमका सहभागी टुक्काकारहरूले हाेली सम्बन्धी चाेटिला टुक्काहरू सिर्जना गरेका थिए ।

कार्यक्रमकाे समापन गर्दै सचिव पाैडेलले असत्य माथि सत्यकाे विजय भएकाे खुसियालीमा मनाइने रङ्गहरूकाे पर्व हाेली हर्साेल्लास पूर्वक मनाउने क्रममा टुक्का साहित्य समाजले आयाेजना गरेकाे हाेली पर्व विशेष टुक्का लेखन अभ्यास कार्यक्रममा सहभागी भई चाेटिला टुक्काहरू सिर्जना गर्ने सम्पूर्ण टुक्काकारहरूमा हार्दिक बधाई तथा शुभकामना व्यक्त गर्नु भएकाे थियाे । 

अभ्यासका क्रममा सङ्कलन गरिएका फागु पुर्णिमा अर्थात हाेली पर्व सम्बन्धी टुक्का कविताहरू

[१]
आऊ आज होली खेलौँ रमाएर मनले,
टुटेपछि जिन्दगानी लछार्दैन धनले।

✍️ पौडेल विमुन्स
पोखरा कास्की

[२]
१.
आयो रङ्गको पर्व होली उमङ्ग बोकेर
खेलौँ साथी सबै एकैछिन काम रोकेर ।
२.
मन हुनेलाई मात्रै दलौँ रङ्ग, जबर्जस्ती नगरौँ
रमाइलो गर्ने भन्दैमा कानूनको फन्दामा नपरौँ ।

✍️ राजेशराज गड्तौला
रतुवामाई- १०, मोरङ, हाल- प्रवास

[३]
रङ्गमा रङ्ग घोलेर खेल्नुपर्छ होली ,
जिन्दगानी तिम्रो हाम्रो आज हो कि भोलि ।

✍️ बुद्धिमान चौधरी
कनकाई नगरपालिका ४ झापा

[४]
१.
उमङ्ग र उत्साह बाेकी आउ है साथी सङ्गी,
रङ्हरूले गाला रङ्गाई बनाैँ रङ्गीबिरङ्गी ।
२.
मनकाे मैलाे फाली जीवन रङ्गीन बनाओैँ
यस वर्षकाे हाेली पनि नाची झुमी मनाओैैँ ।

✍️ गाेपालकृष्ण डंगाेल
इटहरी, सुनसरी ।

[५]
१.
दलेर रङ्ग निधार भरी बनौला रुपौली,
होलिको दिन खुसीले प्यारा मज्जाले रमौली।
२.
मानेर पर्व गरेर गर्व होलीमा रमाऊँ,
अाफन्त जन मिलेर झन रंगले सजाऊँ।

✍️ होम प्रसाद न्याैपाने

[६]
१.
आऊ मनका इच्छा र चाहना खोली,
छरेर   रङ्ग  अनकौं   मनाऔँ   होली ।
२.
त्यागेर चिन्ता पीरहरू जो छन् मनमा,
बाडौँ खुसी हर्ष दली अबिर तनमा ।

✍️ वसन्त अनुभव
      घोराही, दाङ

[७]
१.
भ्रष्टचारी नेतागिरी सधैँभरि मनाउँछन् होली,
रगतमा रङ्ग्याउन जनतामा बर्षाउछन् गोली ।
२.
सर्व साधारण जनतामा चैँ दुई दिन आज भोलि,
छुट्टी मिल्यो बल्लतल्ल वर्षदिनमा खेल्न रङ्ग गोली ।

✍️बिबस पारदर्शी भद्रपुर – २  झापा

[८]
१.
के छ र लानु जीवन छोटो नबिर्से छिनमा,
नाचेर  खेलौँ  रङ्गिन होली पूर्णेको दिनमा।

✍️ अच्युत घिमिरे
भुटान ।

[९]
१,
रङ्गै रङ्गको तिहार हो होली,
खेलौँ सबले रङ्गलाई घोली।
२,
एक आपसमा सम्बन्ध गाँसी,
रिसराग द्वैष  जो सबै  मासी।

✍️ लक्ष्मी श्रेष्ट
बिर्तामोड झापा

[१०]
रङ्ग सँग खेली मनाएका छन् होली आज
पहिरेका  छन्  मिलिजुली उमङ्गको ताज।

✍️अनुग्रह राना मगर ‘पुष्प’
संखुवासभा हाल मलेसिया

[११]
हाेली पर्व अनेक रङ्गमा रङ्गिऊ आऊ
पिर चिन्ता छाेडी जीवन रङ्गिन बनाऊ ।

✍️ ताराप्रसाद चापागाई
धुनिबेसी ।

[१२]
१.
हामीलाई मन पर्छ  नेपाली होली,
अबिरका रङ्गमा खेलौँ पानी घोली।
२.
होलीको रङ्ग सजाएर गालामा,
खुसी बाडौँ होली दीप पालामा ।

✍️मेनुका खड्का
धुलिखेल

[१३]
१.
वर्षमा एकपल्ट आउने होली
खेलौं है सबैले लौ! हृदय खोली।
२.
होली एक पर्व अनेक रङ्ग
खेलेर जगाऊँ जोश – उमङ्ग।

✍️ परिक्रमा श्रेस्ठ
धरान, सुनसरी ।

[१४]
१.
साथी साथी मिलीजुली  खेलौं अब  होली
दु:ख दर्द हटाउन आऊ मन खोली।

✍️दुर्गा भट्टराई
मोरङ

[१५]
शुभकामना छ सबलाई रङ्गहरूको त्यौहार होलीमा
बहारै बहार छाओस् यो रङ्ग जस्तै सबै सबैको झोलीमा।

✍️ दीपक ठटाल जलन
खरसाङ।

[१६]
१.
मानव समाजलाई खुसी पार्छ मेला पर्व,
होली तिहारले समाजका गहनाहुन् सर्व।
२.
आऊ दुस्मनी छाडेर लगाऊ गुलाल,
बरु आदान प्रदान गरौं हालचाल।

✍️ सुरेशकुमार पान्डे
दाङ घोराही-१८

[१७]
आऊ है साथी मिलेर खेलाैँ हाेलीमा रमाई
दुःख र कष्ट त्यो सबै भुलाै रङ्गमा सजाई।

✍️  प्रेम कला चापागाईं( सिटौला )
मेचीनगर १२ झापा ।

[१८]
१.
नखेल पानीको लोला
बग्नेछ रक्तको खोला।
२.
रमाऊँ होली रमेर
रङ्ग लगाऊ जमेर ।

✍️अम्विका  अधिकारी
झापा विर्तामोड

[१९]
१.
हाेलीकाे पर्व छरिन्छ रङ्ग ,
मायालु सँग परिन्छ दङ्ग ।
२.
खेलिन्छ हाेली पिच्कारी लाेली ,
छेपिन्छ रंङ्ग जाेखिम माेली ।

✍️ रामकृष्ण दुवाडी
पाेखरा ।

[२०]
१.
दुलहा सङ आए पन्चेबाजा,जन्ती लस्कर
भरिभराउ हर्षबढाइँ दुलही का घर ।
२.
तिमी सजिया मण्डपमा, सोह्र शृङ्गार
दन्त टलक्क दुलहा, सत्र चमत्कार ।

✍️ जि कुमार गौतम
भद्रपुर -१, पृथिविनगर झापा

२१]
पूर्णिमाको होली मिलेर खेलौं उमङ्ग लिएर ,
होलीको पर्व मिठाई प्रसाद खाउँला दिएर ।

✍️ बेदु न्यौपाने
काठमाडौ ।

[२२]
१.
आउँहै साथी धुमधामले मनाउँ होली,
मीठो बिचार  नै सकारत्मक रंग घोली।
२.
दुईसाल व्यर्थै गयो आएन जीवनमा कहिलै रङ्ग,
यो वर्ष हेरन तपाईं हामी खुशी दुनियाँ हुन्छ दङ्ग।

✍️ कमला पाण्डे पराजुली

[२३]
१.
लोला नहान प्यारा लौन, दल अनुहारमा रङ्ग
शरिर मेरो बनाऊ रङ्गिन ,केलाई अङ्ग अङ्ग ।
२.
होली जस्तै रङ्गिन जिन्दगी भए वाहा,
मन्त्रमुग्ध हुन्थ्यो मानव जीवन अाहा ।

✍️  बिके माकजु
भक्तपुर ।

[२४]
१.
सप्तरङ्गि रंगहरु मिलाएर घाेली,
खेलाै साथी सङ्गीहरु सबै मिली हाेली।
२.
आयाे याे साल पनि रङ्गको पर्व हाेली,
खेलाै घर परिवार सबै  मनै खाेली।

✍️ सहयात्री शाेभा अर्याल
रुपन्देही  १४ बुटवल ।

[२५]
होलीको पर्व गरेर गर्व खुशीले मनाऊ,
दाजु र भाइ दिदी र बैनी सबैमा जनाऊ।

✍️ सरस्वती श्रेष्ठ

[२६]
१.
खेलाै है हाेली दिलनै खाेली रमेर रमाई ,
फागुकाे पर्व जमेर खेलाै खुशीनै जमाइ ।
२.
जीवन हाम्राे के छर भाइ  जीउन रमाई ,
मनकाे मैलाे पखाली खेलाै रङ्गीन बनाइ ।

✍️ प्रद्युम्न चालिसे

[२७]
१
होलीमा साथी रमाई हामी खेलिन्छ योरङ्ग
दलेर एक अर्कामा रङ्ग भएर उमङ्ग।
२
बालक मात्र  हुँदैन  युवा युवती सगर्व,
शहर गाउँ सम्पूर्ण ठाउँ मान्दछन्  योपर्व ।

✍️भगवती दवाडी
झापा ।

[२८]
उखरमाउलो गर्मी नै सम्झेर नै त होला बेलुन हानिन,
माया नपाएर जिउ चिसिएकेा थ्येा मलाई बेस्सरि ढालिन।

✍️ पवन कुमार बुढाथोकी

[२९]
१.
नगरौँ जातको बोली
मिलेर नै खेलौँ होली ।
२.
रङ्गको  होलीमा मनाऊ है मनले
साथी भाईचारा  बडाउन रङ्गले।

✍️ रुद्रराज श्लोक

[३०]
शुभकामना सँगै झरुन् होली पर्वका रङ्गहरू
एकार्काको सहारामा सुध्रिएर हाम्रा ढङ्गहरू ।

✍️ गुणनिधि घिमिरे
पाँचथर मोरङ हाल अमेरिका

[३१]
आत्मियता र सद्भावको महान पर्व
होलीकाे रङमा रङ्गिएर लाग्छ गर्व।

✍️ साधना पाैडेल
रगनी-१, ओखलढुङ्गा ।

[३२]
१.
वर्ष दिनको होली पर्व आएको राम्रो,
चाड शताव्दी देखिको संस्कार हो हाम्रो।
२,
रङ्गै रङ्गले मनाउने पर्व हो होली,
हामी सबै खेलौँ मिलेर रमाई भोलि ।

✍️ दुर्गा आचार्य
मोरङ

>>> जय टुक्का! जय साहित्य!! <<<