काठमाडौ, १२ चैत । साप्ताहिक ‘टुक्का माथि टुक्का’ व्यङ्ग्यात्मक टुक्का लेखनको २६ औँ शृङ्खला शनिबार सम्पन्न भएको छ ।
अभ्यासमा ४८ जना टुक्काकारहरूको सहभागिता रहेको कार्यक्रम संयोजक तथा प्रशिक्षक वसन्त अनुभवले बताउनुभयो । टुक्का साहित्य समाजको आयोजनामा उक्त शृङ्खला विगत लामो समय देखि नियमित रूपमा सञ्चालन हुँदै आएको छ।
टुक्का कविताको उन्नयन, विकास र प्रवर्द्धन गर्ने हेतुले समाजले विविध किसिमका कार्यक्रम गर्दै आएको छ । टुक्का लेखनमा पृथकता एवं फरकपन भित्राउने सिलसिला उक्त शृङ्खला सञ्चालन गरिदै आएको समाजका अध्यक्ष एवं कार्यक्रमका परिकल्पनाकार ताराप्रसाद चापागाईंले बताउनुभयो ।
टुक्का लेखनका लागि एक व्यङ्ग्यात्मक टुक्का राखिने र त्यसैमा आधारित रहेर गहन भावको एक एक टुक्का सहभागीले राख्नुपर्ने संयोजक अनुभवले जनाउनुभयो ।
‘टुक्का माथि टुक्का’ व्यङ्ग्यात्मक टुक्का लेखनको २६ औँ शृङ्खलाको लागि समाजका वरिष्ठ टुक्काकार वसन्त अनुभवले समसामयिक विषयमा लेख्नुभएको व्यङ्ग्यात्मक टुक्कालाई राखिएको संयोजक अनुभवले बताउनुभयो ।
अभ्यासका लागि राखिएको टुक्का
सफलता कसरी मिल्छ हेर लड्दै नलडेर,
धर्तीमा जति छन् शत्रु सारा ठहरै नपरेर ।
✍️ वसन्त अनुभव
सहभागी टुक्काकारहरूले अभ्यासका क्रममा सृजना गर्नुभएको टुक्काहरू
[१]
शत्रु नभई सफल कहाँ सदैव पछि परून्,
हिम्मत छ भने पल पलमा मेरै डाहा गरून्।
✍️ ताराप्रसाद चापागाई
धुनिबेसी ।
[२]
मेरो सफलतामा आरिसले जल्नेहरू जल्दै गरून् ,
मलाई रिस र डाहा गर्नेहरू , सबै उत्तानो परून् ।
✍️ बुद्धिमान चौधरी
कनकाई नगरपालिका ४ झापा
[३]
समय र भाग्य दुईवटै परिवर्तनशील हो, अहङ्कार गर्नु हुँदैन,
मिहेनत गरिरहने व्यक्तिलाई, सफलता प्राप्त गर्न कसैले छुदैन।
✍️कबिताहरी
सुन्दर हरैंचा नगरपालिका १ मोरङ
[४]
म सक्दिनँ कि भन्दै डगमगाउनु राम्रो हैन,
हर चिज पूर्ण भएको दुनियाँमा कोही छैन।
✍️ म्यामराज राई
हतुवागढी-६,भोजपुर
[५]
आफ्नै बाहुबलले बढ्नु छ अगाडि,
रिस गर्नेलाई लगाउँदै पछाडि ।
✍️ दुर्गा भट्टराई
मोरङ
[६]
बोल्ने बोल्दै गर्छन् कदम चाल्न नछोड,
हार भयो भन्दैमा बाटो अन्तै नमोड ।
✍️ अनुग्रह राना मगर ‘पुष्प’
संखुवासभा हाल मलेसिया
[७]
देशले रगत मागेको छ नहुने भो संघर्ष नगरी,
नागरिकले सुःख पाएनन् देशभित्र राक्षस नमरी।
✍️ सुरेशकुमार पान्डे।
दाङ घोराही१८
[८]
लड्नु संघर्ष गर्नु आफ्नै जिन्दगीसँग भाई,
भिड्ने अहित हुने कार्य नगर्नु कसैलाई ।
✍️ गुणनिधि घिमिरे
पाँचथर मोरङ हाल अमेरिका
[९]
मित्र चिन्नु साम, दाम, हुदैनन् अरु शत्रु,
प्यारो हुन्छ स्वार्थ हाम्रो मिलेर सबै पत्रु।
✍️ होम प्रसाद नेउपाने
धरान,सुनसरी ।
[१०]
धरतीकै सारा शत्रु आरिसले जले, जल्दै लौ पछि पर,
सफलताको दियो बालिरहन्छु, निभाउनेले फुक्दै गर।
✍️ अच्युत घिमिरे
दोभान भुटान 🇧🇹
[११]
हुँदैन हित गर्दैमा युद्ध किन पाे लडाइँ,
मारेर मान्छे भनिने जित याे कस्ताे बढाइँ ।
✍️ त्रिलाेचन भण्डारी
मेचीनगर,झापा
[१२]
हात्तीहरू हिड्दै गर्छन्, कुकुर भुक्दै गर्छन्,
वीरहरू लड्दै गर्छन् नामर्द मान्छे डर्छन् ।
✍️ रामजी लामिछाने
पोखरा २७
[१३]
चुहिन्छ पसिना परिश्रमको मीठो हुन्छ फल,
मिल्दछ खुसी आनन्द थुप्रै चुहाई स्वेद जल ।
✍️ कमला देवकोटा
पाल्पा, हाल काठमाडौ
[१४]
बैगुनीलाई गुनले नै मार्नु भन्छन्,
गुन गर्यो बदलामा भुसुना गन्छन् ।
✍️राजेशराज गड्तौला
रतुवामाई- १०, मोरङ हाल- प्रवास
[१५]
अगाडि बढ्न लक्ष्य मजबुत गर,
सफलता मिल्छ अवश्य भर पर ।
✍️ दुर्गा तिवारी
काठमाडौ ,महाराजगन्ज
[१६]
मारेर मान्छे बलियो भइदैन मित्र,
मानवता भन्ने कुरा साच्नू आफूभित्र ।
✍️केशवप्रसाद ढकाल ‘प्रीतबीज’
सिरान्चाेक-७, उपल्लो गाेहाेरे, गाेरखा।
[१७]
सफल हुनु नहुनु मेहनत इमान्दारीमा भर पर्छ,
आह्रिसेहरूको फाँईफुट्टी हेर्दै जानु आफ सेआफ झर्छ ।
✍️ दीपक ठटाल जलन
खरसाङ।
[१८]
सफलताको शिखर पुग्नु अघि आत्मविश्वासमा भर परौँ,
सानो ठूलो जस्तो काम भए पनि घमण्ड नगरी सुरु गरौँ ।
✍️ अम्विका अधिकारी
झापा विर्तामोड
[१९]
संघर्ष जति गरेपनि यहाँ, सफल को चाहिँ हुन्छ?
चाकडी गरे जीत हुन्छ नेताको, जसको बोली सुन्छ !
✍️ गोपालकृष्ण डंगोल
इटहरी, सुनसरी ।
[२०]
अधिकार लिनलाई आफैँ अगाडि बढ्नुपर्छ,
जसलाई पारि पुग्नुछ उसैले पो खोला तर्छ ।
✍️जमुना आचार्य
सिन्धुपाल्चोक
[२१]
लड्नु मित्र जीत र हार पक्कै होला,
आफ्नै मार्गको लागि बग्नै पर्छ खोला ।
✍️ प्रेम थापा “मन”
बागलुङ
[२२]
शत्रु अनि मित्र भन्नु मनको कारण मात्र,
निरन्तर परिश्रमले सफल हुन्छ पात्र ।
✍️ अरुण कु.भुजेल
गोरूबथान,कालेबुङ्ग,भारत।
[२३]
हिड्दा लड्न सक्छ बिचमै बाटो मोड्नु हुन्न,
सिधा हिड्नुपर्छ बाह्रहाते टाँगले छुन्न ।
✍️ बिके माकजु
भक्तपुर ।
[२४]
जल्नदेऊ दन्किएर सुख्खा घाँसहरू,
आँट लेऊ निरन्तर जिल्लिनेछन् बरु ।
✍️ रामकृष्ण दुवाडी
पाेखरा ।
[२५]
सफलता हात पर्दछ आफ्नै पौरखले,
विडम्बना सित्तैमा खोज्दछ यो समाजले ।
✍️ शंकर कार्की
थाहा,३ मकवानपुर।
[२६]
कर्तव्यले शान्ति मिल्छ शत्रु जल्दै गरून्,
कदम रोक्नु हुन्न चाहे ठहरै परून् ।
✍️ इश्वरी अधिकारी
लमजुङ
[२७]
लडाउनु चाहनेहरू धेरै हुन्छ, खुट्टा तान्नेहरू धेरै हुन्छ,
जसले यसको पर्वाह गर्दैन उसैले सफलतालाई छुन्छ।
✍️ बी.कुलुङ
दार्जिलिङ भारत
[२८]
धर्तीमै उज्यालो दीप बाल्नेछु रिस डाहा गर्ने गर्दै गर,
आफ्नो कर्म गर्न छोड्दिन शत्रुहरु जल्दै परपर सर ।
✍️ बेदु न्यौपाने 💕
काठमाडौ
[२९]
आरिस गर्छौ मलाई देखि गर कति गर्ने,
मेरा खुट्टा तान्दातान्दै तिमी नै हौँ पछि पर्ने ।
✍️ दुर्गा आचार्य
मोरङ
[३०]
द्वन्द्व लडाइँ झगडा गर्नु छैन मलाइ,
अझैँ आलै छ हेर हिजोको तीब्र दुखाइ ।
✍️भगवती दवाडी
झापा
[३१]
सुनेनौ भने कहिले नि अरुको कुरा,
आँट गरे गर्न सकिन्छ सपना पुरा।
✍️ लालीमाया थापा मगर
[३२]
लड्दा लड्दा थाकिनै सकियो हामी जनताहरू,
गद्धार जति सबैलाई कालले लानु नि बरु ।
✍️ लक्ष्मी श्रेष्ट
बिर्तामोड झापा
[३३]
धर्ती छाडी आकाशमा उडाइ ल्याऊनु,
आपसमा साझेदारी मौसम छाऊनु ।
✍️ जि कुमार गौतम
भद्रपुर-१ (पृथिविनगर) झापा
[३४]
भाग्यमानी सफल छन् कर्म गरेर,
अभागी बन्छ अल्छी जिउँदै मरेर ।
✍️लक्ष्मण समीर
बर्दिया हाल: काठमाडौं ।
[३५]
कति खुट्टा तान्छौ तान तिमी आफ्नो काम गर्छु,
आरिसले जल्छौ भने सृजनाले यहाँ भर्छु ।
✍️ तारा घिमिरे
सङ्खुवा सभा
[३६]
राम्री लाई मरिमेटी गर्छ हेरिहेरि,
शङ्का व्यर्थै गर्छ अन्तै आँखा जोर्छ फेरि।
✍️ पौडेल विमुन्स 💕
पोखरा कास्की 💕
[३७]
छैन मेरो कहीँ यता सफल चित्र,
चौतर्फी घेरा गरि पार आफ्नो मित्र ।
✍️ संझना कुसुम
[३८]
काग कराइरन्छ पिना सुक्दै जान्छ,
आरिसेले अन्त्यमा आलु मात्रै खान्छ ।
✍️ गंगा खड्का
बूढानीलकण्ठ काठमाडौँ
[३९]
सज्जनसँग लागेर भन तिमीलाई के पाउँछ,
नेतासँग हात मिलाउ बरु पैसो पनि आउँछ।
✍️ गणेश तामाङ वाइबा
ताल्ती,धादिङ नेपाल
[४०]
झाँक्रीले रातोभाले नखाए भूत पनि भाग्दैन्,
नेता निकट नभइ सफलता हात लाग्दैन् ।
✍️ रिजाल विनोद
मोरङ
[४१]
सफलता पाउनलाई संघर्ष गर्नु पर्छ,
रिस डाहा गर्ने मान्छे आफै जलेर नै मर्छ ।
✍️ बिबस पारदर्शी
भद्रपुर – २ झापा ,
[४२]
भाइ भाइ बिच हुन्छ जहिले हानाहान,
स्वार्थका निमित्त सधै नै कुर्सी तानातान ।
✍️ अम्बिका कोइराला
धादिङ
[४३]
झगडा कसरी साम्य हुन्छ लौन बँचाऊ,
विश्व युद्व चल्न सक्छ रुसलाई हँसाऊ ।
✍️ भगवती दवाडी
[४४]
लड्छ भन्छन् घोडा चढ्ने हुन्छ रे प्रयास गरे,
लक्ष्य भेट्न सकिदैन् बिचमै अलमल्ल परे।
✍️ मनोहरी पौडेल
गैडाकोट १नवलपुर
[४५]
पाैरखीकाे हातमा सुनकाे थैला ,
ईर्ष्या गर्नेकाे मन त सदा मैला ।
✍️ प्रद्युम्न चालिसे
भक्तपुर कटुञ्जे
[४६]
सफलता पाईने हो एक दुई हार मिलेपछि,
भाग्य अवश्य नै बन्छ ईखले मनमा खिलेपछि ।
✍️ पुष्पशायरा
बिराटनगर ।
[४७]
कुरा काट्नेकाे कुरा सुनेर लक्ष्य मेरो माेडिदैन,
खुट्टा तान्ने धेरै छन् तर संघर्ष गर्न छाेडिदैन ।
सुमिना तिमल्सिना
[४८]
डाडु र पन्यौ आफ्नै हातमा, केको लिन्छौँ पिर,
आफूमात्र मोज गर हान्दै अरुलाई तिर ।
वसन्त अनुभव
घोराही, दाङ
✡️✡️✡️✡️ जय टुक्का ! जय साहित्य !! ✡️✡️✡️✡️
