काठमाडौं । भारतमा जीपले हुन्डाई भेन्यू, मारुती सुजुकी ब्रेजाजस्तै सब-फोर मिटर एसयूभी बजारमा ल्याउने भएको छ । कम्पनीले आफ्नो बजार हिस्सा बढाउन र भारतीय बजारमा छोटा एसयूभीको मागमा भइरहेको बढोत्तरीलाई आफ्नो पक्षमा पार्न सब-फोर मिटर एसयूभी ल्याउन लागेको हो ।
जीपले भारतीय बजारमा सुरुवाति दिनमा जसरी कम्पासको बिक्री गर्न सकेको थियो अबभने क्रमिकरुपमा बिक्रीमा गिरावट आइरहेको छ । सुरुवाति महिनामा ३ हजार यूनिट हाराहारीमा बिक्री हुने गरेको जीप कम्पासको बिक्री घटेर अहिले मासिक ६/७ सयमा आईपुगेको छ ।
अमेरिकी चर्चित कम्पनी जीपले भारतीय बजारमा आफ्नो व्यवसाय बिस्तार गर्न कम्पास बाहेक अर्को मोडल नभएर हो भन्ने धेरैको बुझाई रहेको थियो । त्यसैले कम्पनीले अब भारतीय बजारमा जीप कम्पासको फेसलिफ्ट, कम्पास ७ सिटर र सब फोर मिटर नयाँ एसयूभी समेत ल्याउने भएको हो ।
कम्पनीको कम्प्याक्ट एसयूभीमा टु ह्वील र फोर ह्वील ड्राइभ अप्सन रहने छ भने मूल्यका हिसावले यी एसयूभीको मूल्य हुन्डाई क्रेटा, किया सेल्टोस, निशान किक्स र महिन्द्रा स्कर्पियोको जस्तै रहने छ ।
अहिले विभिन्न एजेन्सीले गरेको अनुमान अनुसार भारतमा यसको सुरुवाति भेरियन्टको मूल्य १० लाखदेखि टप भेरियन्टको मूल्य १५ लाख भारुसम्म रहने छ ।
अटोमेटिक र म्यानुयल दुबै गियरबक्समा आउने यो मोडलमा टर्बो चार्ज्ड पेट्रोल र डिजेल इन्जिन दिइने अनुमान गरिएको छ । कम्पनीले यो मोडललाई सन् २०२० को तेस्रो क्वाटरसम्ममा बजारमा उतार्ने तयारी गरिरहेको छ ।
बिगत १८ महिनादेखि नेपाली बजारमा बिक्री वितरण भइरहेको जीप कम्पासले निकै राम्रो बजार पाउन सफल भएको एमएडब्ल्यू लाइफले जनाएको छ ।
