राप्ती साहित्य परिषद् जिल्ला शाखाको दाङले ७७ औँ छन्द सङ्गम कार्यक्रम घोराहीमा सम्पन्न गरिएको छ।
राप्ती साहित्य परिषद् दाङ शाखाका अध्यक्ष यम म रेग्मीको अध्यक्षतामा तथा वरिष्ठ साहित्यकार उत्तमकृष्ण मजगैयाको प्रमुख आतिथ्य तथा राप्ती साहित्य परिषद् केन्द्रका सल्लाहकार पुरुषोत्तम खनालको विशिष्ट अतिथ्यतामा कार्यक्रम सम्पन्न भएको थियो । कार्यक्रममा साहित्यकारहरू गणेश विषम उत्तम कृष्ण मजगैयाँ पुरुषोत्तम खनाल खगराज न्यौपाने यम रेग्मी, नारदप्रसाद भण्डारी, महेशकुमार न्यौपाने, नगेन्द्र गुरु, शरद गौतम, रिमा गौतम, वीणा रोका क्षेत्री, कपिलकिशोर धनसिंह गिरी, घिमिरे ,एकराज शर्मा अधिकारी,अनुजा शर्मा “संस्कृति” लगायत छन्द कविहरूले आआफ्नो रचना वाचन गर्नुभएको थियो।
सो कार्यक्रममा राप्ती साहित्य परिषद् केन्द्रका अध्यक्ष कमलमणि देवकोटा, वरिष्ठ उपाध्यक्ष दीपक शर्मा ‘समीर’ अध्ययन मञ्च दाङका अध्यक्ष सूर्य बिसी, प्रगतिशील लेखक दाङका सचिव पुरण शर्मा, त्यसैगरी साहित्यकारहरू रामप्रसाद जैसी, नरेशजङ्ग राणा, देवेन्द्र रिजाल, सुवास न्यौपाने, शंकर मगर, गोपाल भुसाल अभिलाषी, दामोदर पौडेल, दीपबहादुर क्षेत्रीलगायतको गरिमामय उपस्थिति रहेको थियो। राप्ती साहित्य परिषद् दाङ शाखाले विगतका वर्षहरूमा झैँ यस वर्ष पनि यही चैत २१ गते साधारण सभा, काव्योत्सव, स्रष्टा सम्मान तथा पुरस्कृत गर्ने भएको छ। २०८२ सालको पुरस्कार प्रदानको लागि प्रतिभा छनोट समिति गठन गरिएको छ। जसको संयोजकमा राप्ती साहित्य परिषद् केन्द्रका वरिष्ठ उपाध्यक्ष दीपक शर्मा ‘समीर’ सदस्यहरूमा केन्द्रीय सचिव शारदा शर्मा र गीतकार प्रकाश केसीलाई चयन गरिएको छ। राप्ती साहित्य परिषद् दाङ शाखाका उपाध्यक्ष सुरेशकुमार पाण्डेको स्वागत मन्तव्यबाट शुभारम्भ भएको कार्यक्रमको सञ्चालन सचिव घनश्याम केसीले गर्नुभएको थियो।
जेद्दा, साउदी अरब । साउदी अरबको मदिनामा विगत केही दिनदेखि अलपत्र परेका २९ जना नेपाली उम्रा तीर्थयात्रीहरूको नेपाली महावाणिज्य दूतावास जेद्दाले उद्धार गरेको छ। मध्यपूर्वमा उत्पन्न तनाव र उडान रद्द भएपछि स्वदेश फर्किन नपाएर बिचल्लीमा परेका उनीहरूलाई दूतावासको विशेष पहलमा नेपाल फर्काउने व्यवस्था मिलाइएको हो।
गत १७ फेब्रुअरीमा ‘सादाब नेट्रो ट्राभल्स’ मार्फत ३६ जनाको समूह उम्राका लागि मक्का-मदिना आएको थियो। कपिलवस्तुका मोहम्मद ताहिर अलीको नेतृत्वमा आएको यो समूह आफ्नो तीर्थाटन सकेर ३ मार्चमा नेपाल फर्किने तालिका थियो। तर, क्षेत्रीय द्वन्द्वका कारण विमानस्थलहरू बन्द हुँदा उनीहरूको उडान अचानक रद्द भयो। ३६ जनाको समूहमध्ये ७ जना आफ्नै खर्चमा भारतको बाटो हुँदै नेपाल फर्किए पनि बाँकी २९ जनासँग पुनः टिकट काट्ने रकम नहुँदा उनीहरू मदिनामा अलपत्र परेका थिए।
लामो समयसम्म खान र बस्न समेत समस्या भएपछि र विभिन्न सामाजिक संघ-संस्थाहरूबाट सहयोगको अपेक्षा पूरा नभएपछि उनीहरूले जेद्दास्थित नेपाली महावाणिज्य दूतावाससँग सहयोगको अपिल गरेका थिए। नेपाली नागरिकहरू समस्यामा परेको खबर पाउनासाथ महावाणिज्यदूताबासका प्रतिनिधि शौकत अलीको टोली मदिना पुगेर उनीहरूको आवास र भोजनको व्यवस्थापन गरेको थियो।
महावाणिज्य दूतावासको समन्वयमा उनीहरूलाई आज (१० मार्च) मदिनाबाट बसमार्फत रियाद पठाइसकिएको छ। दूतावासका अनुसार, रियादबाट भोलि (११ मार्च) बिहान १० बजेको उडानमार्फत उनीहरूलाई नेपाल पठाइने तयारी पूरा भएको छ।
अप्ठ्यारो परिस्थितिमा दूतावासले अभिभावकीय भूमिका निभाउँदै उद्धार र स्वदेश फिर्तीको प्रबन्ध मिलाएको भन्दै तीर्थयात्रीहरूले खुसी व्यक्त गरेका छन्। उनीहरूले दूतावासका पदाधिकारीहरूलाई धन्यवाद दिँदै दुआ र आशीर्वाद समेत प्रदान गरेका छन्।
जेद्दा, साउदी अरब २८ फेब्रुअरी, २०२६ साउदी अरबको जेद्दास्थित नेपाली महावाणिज्य दूतावासले पवित्र रमदान महिनाको अवसरमा स्थानीय क्षेत्रमा बसोबास गर्ने नेपाली मुस्लिम समुदायका लागि भव्य ‘इफ्तार’ कार्यक्रम आयोजना गरेको छ।
गत २७ फेब्रुअरी २०२६ शुक्रबारका दिन आयोजित उक्त कार्यक्रममा जेद्दा र यसका आसपासका क्षेत्रमा कार्यरत नेपाली मुस्लिम दाजुभाइ तथा दिदीबहिनीहरूको उत्साहजनक उपस्थिति रहेको थियो। दिनभरि व्रत (रोजा) बस्नुभएका नेपाली दाजुभाइहरूलाई महावाणिज्यदूत पारस पण्डित तथा उहाँको टिमले न्यानो स्वागत गर्दै अफ्तारी गराउनुभएको थियो। महावाणिज्य दूतावासले हरेक वर्ष रमदानको अवसरमा नेपाली मुस्लिम समुदायलाई निमन्त्रणा गरी अफ्तारी गराउने परम्परालाई यो वर्ष पनि निरन्तरता दिएको हो। अफ्तारी कार्यक्रम दुई चरणमा विभाजन गरिएको थियो। पहिलो चरणमा व्रत तोड्नका लागि विभिन्न प्रकारका फलफूल, जुस, लेबन र समोसाको व्यवस्था गरिएको थियो भने दोस्रो चरणमा सहभागीहरूका लागि विशेष भोजनको प्रबन्ध गरिएको थियो। उक्त अवसरमा एनआरएनए आरसीसी अल कासिमका पूर्व अध्यक्ष रमजान दिन मियाँ, इस्लामिक दावा सेन्टरका मन्जुर अलि मियाँ र विभिन्न विश्वविद्यालयमा अध्ययनरत विद्यार्थीहरूले दूतावासको निमन्त्रणा र आतिथ्यताप्रति आभार प्रकट गरे। परदेशमा रहेर पनि अभिभावक संस्थाले मीठो भोजनका साथ सम्मानपूर्वक अफ्तारी गराएकोमा उनीहरूले दूतावास परिवारलाई विशेष धन्यवाद दिएका थिए। कार्यक्रमको अन्त्यमा महावाणिज्यदूत पारस पण्डितले निमन्त्रणा स्वीकार गरी उपस्थित हुनुभएका सबैमा धन्यवाद ज्ञापन गर्नुभयो। उहाँले बर्तालुहरूलाई अफ्तारी गराउन पाउँदा अत्यन्तै खुसी लागेको बताउँदै उपस्थित सबैमा रमदानको शुभकामना आदानप्रदान गर्नुभयो। यस कार्यक्रमले प्रवासमा रहेका नेपालीहरूबीच आपसी सद्भाव र भाइचारालाई अझ प्रगाढ बनाएको महसुस गरिएको छ।
मध्यपूर्व क्षेत्रको आकाशमा उत्पन्न भइरहेको परिस्थितिका कारण हिमालयन एयरलाइन्सले मध्यपूर्वका गन्तव्यहरू — दुबई, दमाम र दोहा — का सबै उडानहरू अर्को सूचना नभएसम्मका लागि रद्द गरिएको जनाएको छ।
एयरलाइन्सले यात्रुहरूलाई आफ्नो आधिकारिक सामाजिक सञ्जाल तथा वेबसाइटमार्फत अद्यावधिक जानकारी लिन अनुरोध गरेको छ। साथै, यसबाट यात्रुहरूलाई पर्न गएको असुविधाप्रति कम्पनीले क्षमायाचना गर्दै सहयोग र समझदारीका लागि धन्यवाद व्यक्त गरेको छ।
नेकपा एमालेका महासचिव शंकर पोखरेल आफूलाई अगाडि सारेर चर्चा गर्न रुचाउने नेतामध्ये पर्दैनन्। तर राजनीतिक हैसियत, नीति–निर्माणमा पहुँच र संगठनात्मक प्रभावका हिसाबले खुमबहादुर खड्कापछि दाङबाट उदाएका नेतामध्ये उहाँजस्तो उचाइ अरू कुनै दलमा देखिँदैन। दुर्भाग्य, यस्तो अन्तर्मुखी तर प्रभावशाली नेतृत्वलाई चिन्न र मूल्याङ्कन गर्न हाम्रो समाज सधैं ढिलो गर्दै आएको छ।
रु. १० बाँडेर हजारको गफ चुट्ने संस्कृतिमा रमाएको समाजले दीर्घकालीन सोच, संस्थागत विकास र मौन कर्ममा विश्वास गर्ने नेताको योगदान पहिल्याउन नसक्नु अस्वाभाविक होइन। सायद यही कारणले प्रदेश राजधानी दाङ ल्याउन निर्णायक भूमिका खेलेका शंकर पोखरेललाई दंगाली जनताले २०७९ को निर्वाचनमा पराजित गरिरहँदा उत्सव मनाए। यो प्रवृत्ति त्यति अचम्मको पनि होइन, किनकि सिंहदरबारजस्तो राष्ट्रिय धरोहरमा आगो लगाएर सेल्फी खिच्ने सामाजिक चेतनास्तरले गुणवान नेतृत्व चिन्न नसक्नु स्वाभाविक नै ठहर्छ। तर निर्वाचनमा पराजय भोगेपछि पनि दाङको विकासप्रति शंकर पोखरेलको प्रतिबद्धता कमजोर भएन। घोराही–तुल्सीपुर फोरलेन सडकको वर्षौँदेखि अल्झिएको कामले गति लिएको छ। राप्ती स्वास्थ्य विज्ञान प्रतिष्ठान अन्तर्गत ४०० शय्याको भवन निर्माण भइरहेको छ। इन्जिनियरिङ कलेजको संरचनागत काम अघि बढ्दैछ। साथै, टरिगाउँ विमानस्थल विस्तार र सञ्चालनका विषयमा पनि आगामी दिनमा पहल गर्ने प्रतिबद्धता उहाँले सार्वजनिक गर्दै आउनुभएको छ।
नेकपा एमाले अध्यक्ष केपी ओली पश्चात पार्टीको भावी अध्यक्ष र भविष्यको प्रधानमन्त्रीको रुपमा चर्चा पाएका शंकर पोखरेलले व्यक्त गरेको एउटा भनाइ विशेष अर्थपूर्ण छ— अब आउँदो चुनावमा दंगाली जनताले ज्ञापनपत्र बुझाउन जाने उम्मेदवार होइन, बुझ्ने हैसियत राख्ने उम्मेदवारलाई जिताउनुपर्छ। यो भनाइ केवल राजनीतिक कटाक्ष होइन, बरु नेतृत्वको मापदण्ड पुनःपरिभाषित गर्ने आह्वान हो।
सार्वजनिक सम्पत्ति र ऐतिहासिक धरोहरमाथि आगजनी गर्ने, व्यक्ति विशेषका घर–व्यवसाय ध्वस्त पार्ने, सामाजिक संरचना खलबल्याउने प्रवृत्तिलाई हतोत्साहित गर्न र कानुनी दायरामा ल्याउनुपर्ने आवश्यकता आज झनै टड्कारो बनेको छ। यसका लागि जिम्मेवार राजनीति र संस्थागत दलहरूको भूमिका अपरिहार्य छ—र यही सन्देशका साथ शंकर पोखरेलले नेकपा एमालेसहित आफूलाई समर्थन गर्न आग्रह गरेका छन्। अन्ततः प्रश्न नेतृत्वको हार–जितभन्दा ठूलो छ। प्रश्न हो—हामी कस्तो नेतृत्व चाहन्छौँ? चर्को भाषण गर्ने, भीड तताउने नेतृत्व कि मौन तर परिणाम दिने नेतृत्व? दाङको विकासक्रमलाई हेर्दा, यो प्रश्नप्रति पुनर्विचार गर्ने समय आएको छ।
१) पूज्य मेरो गुरु ब्रान्डका पिता हजुर हजुरबाट सृष्टि सुरु । २) उघारी आँखा मेरा जहाँतहीँ देखूँ तिमीलाई तोडेर सम्पूर्ण घेरा । ३) दिनपछि कालो रातमा भगवान् शिव छन् हरहमेसा मेरो साथमा । ४) म भक्त शिवकाे उनकै पछि लाग्छु कल्याण हुन्छ जीवकाे । ५) गुरुका पनि गुरु हजुरै त हुनुहुन्छ हजुरबाटै काम सुरु । ६) माया र स्नेह गर्नुहुन्छ आफ्नाे भक्तकाे सम्झी आफ्नै देह । ७) बनेर म अन्धभक्त लागिरहेछु रातदिन सदा भएर कट्टर सशक्त । ८) लगाई बाघको छाला बस्नु हुन्छ ध्यानमा पहिरिई रुद्राक्ष माला । ९) समातेर डमरु हातमा गर्नुहुन्छ उहाँ ध्यान केशरी जटाका साथमा । १०) सारा पृथ्वी चलाउने सृष्टिदाता भगवान् उनै पापीलाई सिधैँ जलाउने । ✍️ ईश्वर साउद(भिक्षु ) रामाराेशन गाउपालिका ६ सुदुरपश्चिम अछाम
राप्ती साहित्य परिषद् जिल्ला शाखा दाङको आयोजनामा ‘निमादेवी खनाल स्मृति बाल प्रतिभा पुरस्कार’ का लागि शनिबार घोराहीमा बाल कविता प्रतियोगिता सम्पन्न भएको छ। घोराहीस्थित गोर्खा इन्टरनेसनल पब्लिक सेकेण्डरी स्कुलमा आयोजित उक्त प्रतियोगितामा १० वटा विद्यालयका १४ वर्ष भन्दा मुनिका २८ जना विद्यार्थीहरू सहभागी थिए।
प्रतियोगितामा सिद्धार्थ एकेडेमीकी अंशु पौडेल प्रथम, ज्योति पुञ्ज बोर्डिङ स्कुलकी प्रेशा खनाल द्वितीय, गोर्खा इन्टरनेसनल पब्लिक सेकेन्डरी स्कुलकी प्रिन्सा पोखरेल तृतीय र जनज्योति विद्यामन्दिरकी रुबी अधिकारी सान्त्वना भएकी छिन्। राप्ती साहित्य परिषद् दाङका अध्यक्ष यम रेग्मीको अध्यक्षता तथा राप्ती साहित्य परिषद् केन्द्रका सल्लाहकार तथा पुरस्कार संस्थापक संस्थापक पुरुषोत्तम खनालको प्रमुख आतिथ्य तथा गोर्खा इन्टरनेसनलका प्रिन्सिपल मानसिङ घर्ती विशिष्ट आतिथ्यता कार्यक्रम सम्पन्न भएको थियो । कार्यक्रममा वरिष्ठ साहित्यकार यज्ञबहादुर डाँगी, देवेन्द्र रिजाल र विना रोका निर्णायक रूपमा रहनुभएको थियो । कार्यक्रम संयोजक सुरेश कुमार पाण्डेको स्वागत मन्तव्यबाट सुरु भएको कार्यक्रमको सञ्चालन सचिव घनश्याम केसी र अध्ययन मञ्च दाङका अध्यक्ष सूर्य बिसीले गर्नुभएको थियो।
१) साँचो पिरती गाँसूँ सधैँभरि म तिमीसँगै खुसीले सधैँ हाँसूँ । २) म मुटुभरी सजाउँछु तिमीलाई यो जुनीमा अब मायाले रिझाउँछु । ३) गुलाफको रातो थुङ्गा तिमी माझी हौ बन्छु तिम्रै डुङ्गा । ४) अमर रहोस् माया पवित्र यो सम्बन्धले नभोगोस् कहिल्यै छाया । ५) मुटुको एउटा कुना सजाएर तिमीलाई राख्छु सधैँभरि दुई गुना । ६) बाचा कसम खाऔँ भुलेर सारा दुनियाँलाई मायाकै संसारमा धाऔँ । ७) न्यानो त्यो अङ्गालो सजाइदिऊँ खुसीहरू सबै फुटाएर मनको भङ्गालो । ८) नटुटोस् यो साथ जिन्दगीको हरेक मोडमा कति सुन्दर माथ । ९) प्रणयको मिठो मास बदलियोस् यो जीवन बनेर तिम्रो बास । १०) चोखो यो प्रीति बसौँला सँगै हाँसेर बदलेर संसारको रीति । ११) अटुट एउटा नाता तिमीलाई नै ओढाउँछु पिरतीको यो छाता । १२) पवित्र रहोस् मन तिमी हौ मेरो जिन्दगीको अमूल्य धन । १३) जपेर पिरतीको माला सजाउँला यो संसार हेरौँला त्यसको चाला । १४) भरेर ओठमा हाँसो बाँचेका छौँ खुसीले नपारी कहिल्यै पासो । ✍️ नन्दलाल आचार्य बेलका-२, सिद्धार्थटोल, उदयपुर
लघुकथाकार चुडामणि नेपाल ‘अकिञ्चन’को लघुकथासङ्ग्रह ‘धुवाँको रङ्ग’को परिचर्चा कार्यक्रम शनिवार सम्पन्न भएको छ । नमस्ते आधुनिक लघुकथा मञ्चको आयोजनामा भर्चुअल प्रविधिबाट जुम हलमा भएको उक्त कार्यक्रम अपरान्ह ६ बजेदेखि ९ बजेसम्म चलेको थियोे ।
‘धुवाँको रङ्ग’ लघुकथासङ्ग्रह, लघुकथाकार चुडामणि नेपाल ‘अकिञ्चन’को पहिलो लघुकथा कृति हो । जसमा कुल ७९ वटा लघुकथाहरू सङ्ग्रहित रहेका छन् ।
कार्यक्रमका प्रमुख अतिथि वरिष्ठ साहित्यकार एवम् समालोचक प्रा.डा. विदुर चालिसेले लघुकथासङ्ग्रहमा आयामगत आवृति एउटै भएको उल्लेख गर्दै लघुकथाकार अकिञ्चनको शिर्ष लघुकथा धुवाँको रङ्ग दार्शनिक चिन्तनबाट अभिप्रेरित रहेको बताउनुभयो । साथै उहाँले सेतो रङले सकारात्मक उर्जा र कालो रङले नकारात्मक उर्जा दर्शाउने भन्दै ती प्रतिकात्मक रूपमा आएको भन्नुभयो ।
लघुकथामा शब्द सङ्ख्याको सन्दर्भमा बोल्नुहुँदै उहाँले भन्नुभयो- “जब लघुकथाकार लेखनमा पारङ्गत अवस्थामा पुग्छ नि शब्द कति भयो भनेर उसलाई शब्द गनिरहनुपर्दैन । उसले मानक सङ्ख्याभन्दा बढी लेख्नै सक्दैन ।”
साथै उहाँले लघुकथामा प्राविधिक मोडुलाइजेसन खाँचो रहेको, जसको लागि वृहत् गोष्ठी आयोजना गर्नुपर्ने बताउनुभयो । धुवाँको रङ्ग लघुकथासङ्ग्रहमा ‘प्रोजेक्ट वर्क’ लघुकथा शिर्षक आफैँमा अङ्ग्रेजी शब्दको भएको र त्यसभित्र २४ भन्दा बढी ठाउँमा अङ्ग्रेजी शब्द प्रयोग भएको उल्लेख गर्दै अङ्ग्रेजी शब्द मोह त्याग्न उहाँले सर्जकलाई सुझाउनुभयो ।
कार्यक्रममा ‘धुवाँको रङ्ग’ लघुकथासङ्ग्रहलाई दुई पक्ष- विषयवस्तु वा संरचनागत पक्ष र शिल्प शैली वा सौन्दर्य पक्षमा आधारित रहेर परिचर्चा गरिएको थियोे । लघुकथा कृतिमा समाविष्ट लघुकथाहरूको ‘विषयवस्तु वा संरचनागत पक्ष’मा केन्द्रित रही सोको परिचर्चा वरिष्ठ लघुकथाकार/समालोचक डा.हरिप्रसाद भण्डारीले र शिल्प शैली वा सौन्दर्य पक्षको परिचर्चा वरिष्ठ लघुकथाकार/समालोचक प्रा.डा. कपिल लामिछानेले गर्नुभएको थियोे । ‘धुवाँको रङ’ भित्रका लघुकथाहरूको संरचनागत पक्षको कोणबाट परिचर्चा गर्नुहुँदै डा. हरिप्रसाद भण्डारीले लघुकथा कृतिमा विषयगत विविधता रहेको उल्लेख गर्नुभयो ।
साथै लघुकथा लेख्नका लागि जुन विषय छान्ने गरिन्छ त्यसलाई लघुकथाको विषयवस्तु वा कथावस्तु मानिन्छ । सुनको प्रसङ्ग उठाउँदै उहाँले संरचनागत पक्ष र शिल्प शैली बीच रहेको भिन्नता स्पष्ट पार्नुभयो । खानीबाट सुन निकाल्नु लघुकथाको संरचनागत पक्ष हो भने बुद्धि विवेक सीप प्रयोग गरेर सुनलाई गहनामा परिवर्तन गर्नुलाई शिल्प पक्ष मान्न सकिन्छ, उहाँले भन्नुभयो ।
लघुकथा कृतिको शिर्ष लघुकथा धुवाँको रङ्गका बारेमा परिचर्चा गर्दै कथामा निर्दोष युवाको चिताको धुवाँको रङ सफा सेतो निस्किएको तर धनी स्वार्थी व्यक्तिको चिताको धुवाँको रङ कालो भएको दर्शाइनुले मान्छे जिउँदो हुँदा जस्तो चरित्र छ मरेपछि उसै अनुरूपको प्रभाव छोड्छ भन्ने सन्देश दिएको बताउनुभयो ।
साथै उहाँले सङ्ग्रहमा समाजमा रहेका सामाजिक, राजनैतिक, सास्कृतिक विकृति, विसङ्गतिहरूको उजागर गर्नुका साथै जेष्ठनागरिकको पीडा, वैदेशिक रोजगारले पारेको प्रभाव, महिनावारी बार्ने प्रचलन, महिलाले भोगेका पीडा, प्रेमको प्रसङ्ग, धार्मिक अन्धविश्वास, यौन चाहना, साहित्यमा भएको विकृति, प्राकृतिक प्रकोपले निम्त्याएको अवस्था लगायत विविध विषयलाई कथावस्तु बनाइएको बताउनुभयो।
साथै कृतिमा धेरै भूमिका, शुभकामना नराख्दा उत्तम हुने, पुस्तकको शिर्षक एउटा लघुकथाको शिर्षकबाट नलिई समग्र लघुकथाहरूको प्रतिनिधित्व हुने गरी उपयुक्त शिर्षक राख्दा सबै लघुकथालाई न्याय हुने, विषयवस्तुको पुनरावृत्ति राम्रो नमानिने भन्दै लघुकथामा परिमार्जन आवश्यकता भएको जनाउनुभयो । साथै केही लघुकथा लघुकथाभन्दा पनि बालकथा हुनपुगेको बताउनुभयो । साथै अन्तमा लघुकथाकार अकिञ्चनको प्रयास अत्यन्त सुन्दर, प्रशंसनीय रहेकोे बताउनुभयो ।
त्यस्तै धुवाँको रङ्गको शिल्प शैली अर्थात् सौन्दर्य पक्षको परिचर्चा गर्दै परिचर्चाकार प्रा.डा. कपिल लामिछानेले सङ्ग्रहभित्र सबै लघुकथाहरू उस्तै उस्तै आकारको भएको, एउटै पृष्ठमा अटाएको अर्थात् सन्तुलन कायम गर्नुभएकोमा सर्जकको प्रशंसा गर्नुभयो । लघुकथाहरूको शिर्षकबारे बोल्दै उहाँले कृतिमा ३६ लघुकथाहरू दुई शब्दको र बाँकी सबै लघुकथाहरू एक शब्दको शिर्षक हुनु कृतिको सुन्दर पक्ष रहेको बताउनुभयो ।
धेरै लघुकथामा संवाद शैलीको प्रयोग भएको तर कतिपय लघुकथामा वर्णनात्मक शैली, नाटकीय शैली र संस्मरणात्मक शैलीको पनि प्रयोग भएको बताउनुभयो । कृति अन्तर्गत सुधार गर्नुपर्ने पक्ष बारे बोल्नुहुँदै उहाँले शिर्ष लघुकथामा रङ हुनुपर्नेमा रङ्ग भएको, कतिपय स्थानमा हलन्त हुनुपर्नेमा अजन्त र अजन्त हुनुपर्नेमा हलन्त भएको उल्लेख गर्दै सर्जकले वर्णविन्यासमा सचेत रहन सुझाउनुभयो ।
साथै उहाँले केही लघुकथाहरूमा अन्त्य बिस्तार भएको, धेरै संवादलाई एउटै अनुच्छेदमा राखेको, दुईवटा वा बढी संवादलाई एउटै उद्धरण चिन्हभित्र राखेको, लघुकथामा द्वन्द आवश्यक हुन्छ, भएको तर हुर्कन नपाएको तर्फ औल्याउँदै सङ्ग्रहमा परिमार्जनको आवश्यकता रहेको बताउनुभयो । साथै उहाँले लघुकथा भनेर छापिएका सबै आख्यान लघुकथा हुँदैनन् । तसर्थ सङ्ख्यात्मकलाई भन्दा गुणात्मक पक्षलाई जोड दिनु आजको आवश्यकता भएको बताउनुभयो ।
कृतिकारको तर्फबाट बोल्नुहुँदै लघुकथाकार चुडामणि नेपाल ‘अकिञ्चन’ले समीक्षकहरूबाट आएको सुझावलाई शिरोपर गर्दै आगामी दिनमा सुधार गरेर अगाडि बढ्ने बताउनुभयो । साथै उहाँले सुन्दर समीक्षाका लागि समीक्षकहरूप्रति, अवसर र व्यवस्थापनका लागि नमस्ते आधुनिक लघुकथा मञ्चका अध्यक्ष लगायत सम्पूर्ण पदाधिकारीहरूप्रति आभार एवम् धन्यवाद व्यक्त गर्नुभयो ।
कार्यक्रमका सभाध्यक्ष एवम् नमस्ते आधुनिक लघुकथा मञ्चका अध्यक्ष घनश्याम डल्लाकोटी ‘कृष्णजी शर्मा’ले केही सर्जकहरूमा आफ्नो सृजना ठिक भएको र जस्ताको तस्तै छापियोस्’ भन्ने चाहना हुन्छ जुन उचित नभएको बताउनुभयो । साथै अर्काले लेखेको लघुकथा चोरेर त्यसमा थोरै विषयवस्तु, शिल्प शैली परिवर्तन गरेर आफ्नो लघुकथा बनाउनु अनैतिक व्यवहार भएको, जुन क्षम्य नहुने बताउनुभयो ।
‘लघुकथा वन्दना’को प्रशारणसँगै सुरु भएको कार्यक्रममा वरिष्ठ साहित्यकार हरि कट्टेल र दिनेश राज सुवेदीले शुभकामना मन्तव्य दिनुभएको थियोे भने वरिष्ठ लघुकथाकार/साहित्यकार ध्रुव मधिकर्मी, डा.टिकाराम पोख्रेल, वसन्त अनुभव, नर पल्लव, रमेन्द्र कोइराला, इन्दिरा चापागाईं, सीता रेग्मी, नारायणनाथ योगी, लक्ष्मी रेग्मी खनाल, तुलसी पण्डित, दुर्गा ढकाल, हरि कट्टेल, दिनेश राज सुवेदी, चिरञ्जीवी काफ्ले, तिर्थ राज भाट लगायत संस्थाका पदाधिकारी, लघुकथाकार, साहित्यकार, समीक्षक, पाठक, पत्रकारहरूको बाक्लो उपस्थिति रहेकोे थियोे ।
नमस्ते आधुनिक लघुकथा मञ्चका अध्यक्ष घनश्याम डल्लाकोटी ‘कृष्णजी शर्मा’को अध्यक्षतामा सञ्चालित उक्त कार्यक्रमको सहजीकरण लघुकथाकार आयुष बडालले गर्नुभएको थियोे ।
लघुकथाकार सुरेशकुमार पाण्डेको तेस्रो लघुकथा कृति ‘आवाज’को शनिवार विमोचन भएको छ । राप्ती साहित्य परिषद दाङ शाखाको आयोजनामा नेपाल पत्रकार महासंघ दाङ शाखाको सभाहलमा आयोजित कार्यक्रममा वरिष्ठ साहित्यकार/पत्रकार एवम् पूर्व सभासद्, शताब्दी पुरुष नारायण प्रसाद शर्माले उक्त कृतिको विमोचन गर्नुभएको थियोे । विमोचित कृतिका कृतिकार सुरेशकुमार पाण्डे आयोजक संस्थाको उपाध्यक्ष समेत हुनुहुन्छ । उहाँको यो पाँचौ एकल साहित्यिक कृति हो । यसअघि उहाँका ‘अन्धकार चिर्ने दीयो’ र ‘देशभक्ति आवाज’ नामक दुई गजलसङ्ग्रह, ‘अनुभव’ (हिन्दी) र ‘जेईको सम्झना’ (नेपाली) नामक दुई लघुकथासङ्ग्रह प्रकाशित भइसकेका छन् ।
कार्यक्रममा विमोचित कृतिको समीक्षा झिल्का साहित्य समाजका अध्यक्ष/झिल्का प्रवर्तक एवम् लघुकथाकार वसन्त अनुभवले गर्नुभएको थियोे ।
कार्यक्रम परिषदका अध्यक्ष यम रेग्मीको अध्यक्षता तथा वरिष्ठ साहित्यकार/पत्रकार नारायण प्रसाद शर्माको प्रमुख आतिथ्यमा सम्पन्न भएको थियोे ।
कार्यक्रमको विशिष्ट अतिथिमा राप्ती साहित्य परिषदका पूर्व अध्यक्ष तथा सल्लाहकार पुरुषोत्तम खनाल, भाषा आयोगका पूर्व सदस्य एवम् वरिष्ठ साहित्यकार/समालोचक डा.अमर गिरी र वरिष्ठ साहित्यकार उत्तमकृष्ण मजगैँयालगायत अतिथिहरूमा परिषदका सल्लाहकार पद्मप्रसाद शर्मा, लेखक संघ दाङका अध्यक्ष खगराज न्यौपाने, नेपालकै सर्वाधिक दोस्रो धेरै उपन्यास लेख्नेको सूचीमा उभिन सफल उपन्यासकार एवम् नेपाल पत्रकार महासंघका सचिव सविन प्रियासन, नेपाली लेखक संघका अध्यक्ष डा. हिमलाल पन्थी, राप्ती साहित्य परिषदका केन्द्रिय अध्यक्ष कमलमणि देवकोटा, राप्ती साहित्य परिषदका पूर्व अध्यक्ष डा.टिकाराम उदासी, सर्वोदय पुस्तकालय एवम् वाचनालयका अध्यक्ष सुशील गौतम, युवा संघका पूर्व अध्यक्ष एवम् समाजसेवी काशीनाथ पोख्रेल, विश्व नेपाली साहित्य प्रतिष्ठान दाङ शाखा अध्यक्ष डा.कृष्णराज डि.सी., राप्ती साहित्य परिषद दाङका पूर्व अध्यक्ष दीपक समीर लगायत ५ दर्जन बढी लेखक, साहित्यकार, पत्रकारहरूको उपस्थिति रहेकोे थियोे ।
कार्यक्रममा बोल्दै प्रमुख अतिथि नारायण प्रसाद शर्माले सुरेशकुमार पाण्डेका लघुकथाकृति आफूले पढेको, उहाँ राम्रो लेख्नुहुन्छ । दाङले एक उत्कृष्ट साधक पाएको उल्लेख गर्दै लघुकथा पाण्डेको सक्रियता, क्रियाशिलताको प्रशंसा गर्नुभयो ।
कार्यक्रममा पुस्तक लेखनका अनुभवका बारेमा कृतिकार सुरेशकुमार पाण्डेले प्रकाश पार्नुभएको थियो भने पुरुषोत्तम खनाल, उत्तमकृष्ण मजगैँया, डा.अमर गिरी, खगराज न्यौपाने, सविन प्रियासन, काशीनाथ पोख्रेल लगायतले शुभकामना मन्तव्य दिनुभएको थियो । कार्यक्रममा कृतिकार पाण्डेकी बुहारी मनिषा रेग्मी पाण्डेले उपस्थित सम्पूर्ण व्यक्तित्वहरूमा धन्यवाद प्रकट गर्नुभएको थियोे ।
परिषद्की सहसचिव विना रोकायको स्वागत मन्तव्यबाट सुरु भएको कार्यक्रमको सहजीकरण राप्ती साहित्य परिषदका जिल्ला सचिव घनश्याम केसीले गर्नुभएको थियो ।
