Category: मुख्य खबर

कपिलवस्तु –
मायादेवी गाउँपालिका अध्यक्ष वलिउद्दिन खान आफ्नो ईमानदार र सोझो स्वभावका कारण स्थानीय तहमा उदाहरणीय नेतृत्वकर्ताका रूपमा परिचित छन् । गाउँपालिकाको समग्र विकास, सुशासन र जनसहभागितामा उनले देखाएको सक्रियता र प्रतिबद्धताले स्थानीयवासीहरूमा विश्वास जागेको हो ।

अध्यक्ष खानको नेतृत्वमा गाउँपालिकाले पछिल्ला वर्षहरूमा पूर्वाधार, शिक्षा, स्वास्थ्य, कृषि र सामाजिक क्षेत्रमा उल्लेखनीय उपलब्धि हासिल गरेको छ । विकासका योजनाहरूमा पारदर्शिता, जवाफदेहिता र जनसहभागितालाई प्राथमिकतामा दिइँदै आएको हुन् । स्वास्थ्य सेवा सुदृढीकरणका लागि गाउँपालिकाले वडा नं ७ हरनामपुरमा १५ शैयाको आधुनिक अस्पताल निर्माणको काम अन्तिम चरणमा पुगेको छ । छिट्टै सञ्चालनमा आउने उक्त अस्पतालले स्थानीय बासिन्दालाई गुणस्तरीय स्वास्थ्य सेवा पहुँचमा ल्याउनेछ । साथै, प्रत्येक वडामा एक-एकवटा नयाँ एम्बुलेन्स उपलब्ध गराइएको छ, जसले आपतकालीन अवस्थामा जनजीवन सुरक्षित गर्न सहजतामा ल्याएको छ । अध्यक्ष खानको सक्रियतामा गाउँपालिकाले सडक विस्तार, खानेपानी आयोजना, विद्यालय सुधार तथा सार्वजनिक भवन निर्माणमा प्राथमिकता दिएको छ ।

जापान सरकारको सहयोग र युनाइटेड मिसन टु नेपालको पहलमा अहिले गाउँपालिकामा आधुनिक दमकल पनि आइसकेको छ । यसले आकस्मिक आगलागी नियन्त्रणमा सहजता ल्याउने र जनधनको सुरक्षा सुनिश्चित गर्ने अपेक्षा गरिएको छ । अध्यक्ष खानका अनुसार गाउँपालिकाको विकास भनेको जनताको सशक्तीकरण हो । योजना निर्माणदेखि कार्यान्वयनसम्म नागरिकको सुझावलाई प्राथमिकता दिइएको छ। स्रोतसाधन व्यवस्थापन, कर संकलनको पारदर्शिता र बजेटको उचित उपयोगमा गाउँपालिकाले उदाहरण प्रस्तुत गरेको छ ।

यसले ‘जनताको कर, जनताको विकास’ भन्ने सिद्धान्तलाई व्यवहारमा उतारेको छ । स्थानीय बासिन्दाहरूका अनुसार अध्यक्ष खान ईमानदार, मिलनसार र जिम्मेवार नेताका रूपमा परिचित छन् । उनका सहकर्मीहरू भन्छन्— “उनको सरल स्वभावले गाउँपालिकाभित्र सामाजिक सद्भाव, सहअस्तित्व र सहकार्य कायम राख्न मद्दत गरेको छ।”वलिउद्दिन खानको नेतृत्वले मायादेवी गाउँपालिकालाई स्थानीय विकास, सुशासन र जनसहभागिताको उदाहरणीय मोडेलका रूपमा उभ्याउँदै लैजाने विश्वास जनाइएको छ । जनताको साथ र विश्वास नै उनको सबैभन्दा ठूलो शक्ति बनेको छ ।

संस्थागत राजनीतिलाई जनताको ‘घण्टी’ मार्फत कडा चुनौती; सभापतिमा जगत प्रसाद तिवारी ४२३ मतसहित निर्वाचित

चन्द्रगढी, २०८२ कार्तिक १२ गते – झापाको चन्द्रगढी खानेपानी संस्थानको निर्वाचनमा राष्ट्रिय स्वतन्त्र पार्टी (रास्वपा) को प्यानलले दुई दशकभन्दा लामो समयदेखि स्थापित रहेको CPN-UML र नेपाली कांग्रेसको गठबन्धनको राजनीतिक विरासतलाई पूर्ण रूपमा भत्काएको छ। यो निर्वाचनले स्थानीय तहमा समेत ‘घण्टी’ प्रतिको जनआकर्षण र परिवर्तनको चाहना कति बलियो छ भन्ने स्पष्ट सन्देश दिएको छ। रास्वपा ले सभापतिसहित दुई तिहाइ बहुमत पदमा ऐतिहासिक विजय प्राप्त गरेको हो।

मतदानको विस्तृत विवरण र रास्वपाको वर्चस्व

संस्थानको निर्वाचन परिणामअनुसार, राष्ट्रिय स्वतन्त्र पार्टीका श्री जगत प्रसाद तिवारी ४२३ मत प्राप्त गरी सभापति पदमा निर्वाचित हुनुभएको छ। गठबन्धनका उम्मेदवारमाथि प्राप्त यो भारी मतान्तरले रास्वपा को विजयको आधारलाई मजबुत बनाएको छ।

मुख्य पदाधिकारीमा रास्वपा को पूर्ण वर्चस्व रहेको छ। उपसभापतिमा श्री घनश्याम अधिकारी ले ३३६ मत प्राप्त गर्नुभएको छ भने, सह-सचिव पदमा श्रीमती बिमला पौडेल दाहाल ले ४१३ मत प्राप्त गरी जित दर्ता गराउनुभयो। यस्तै, कोषाध्यक्षमा श्रीमती कल्पना पौडेल २७१ मतसहित विजयी हुनुभएको छ।

राष्ट्रिय स्वतन्त्र पार्टीका अन्य सदस्य उम्मेदवारहरूले पनि गठबन्धनका उम्मेदवारलाई पराजित गर्दै सफलता प्राप्त गरेका छन्। यसरी संस्थानको सञ्चालक समितिमा रास्वपा ले दुई तिहाइ बहुमत कायम गर्दै आफ्नो वर्चस्व स्थापित गरेको छ।

निर्वाचन विवरण र ‘परिवर्तनको चाहना’

यस निर्वाचनमा कुल मतदाता ८९५ रहेकोमा जम्मा ७८९ मत खसेको थियो, जसले मतदाताको उत्साहजनक सहभागितालाई देखाउँछ।

यो सम्पूर्ण जानकारी सार्वजनिक गर्दै भद्रपुर पालिका नगर सभापति श्री प्रेम न्यौपाने ले विजयलाई सामान्य रूपमा लिन नहुने बताउनुभयो। उहाँले भन्नुभयो, “यो जित सामान्य जित होइन, देश अब घण्टीमय हुँदैछ भन्ने स्पष्ट संकेत हो। अब जनताले पुरानो राजनीतिक नेतृत्वबाट परिवर्तन चाहेका छन्। जनताको विश्वास छ कि घण्टीका उम्मेदवारले मात्र व्याप्त भ्रष्टाचार र अनियमितता रोक्न सक्छन्, त्यसैले हामीले यो ऐतिहासिक सफलता प्राप्त गर्यौँ।”

गठबन्धनको सान्त्वना: सचिवमा मात्र सीमित

लामो समयदेखि संस्थानको नेतृत्वमा रहेको CPN-UML र नेपाली कांग्रेसको गठबन्धन यसपटक एक पदमा खुम्चिएको छ। गठबन्धनले केवल सचिव पदमा मात्रै झिनो मतान्तरले विजय हासिल गर्न सफल भयो। गठबन्धनको लागि यो परिणाम संस्थागत रूपमा गम्भीर समीक्षाको विषय बनेको छ।

नयाँ नेतृत्वका चुनौती र अपेक्षा

यो निर्वाचन परिणामले उपभोक्ता तथा मतदाताहरू लामो समयदेखि संस्थागत हुँदै आएको पुरानो राजनीतिक नेतृत्वको सट्टा नयाँ विकल्प खोजेको स्पष्ट संकेत दिएको छ। विशेषगरी, खानेपानी जस्तो अत्यावश्यक सेवा दिने संस्थामा पारदर्शिता र प्रभावकारी सेवा प्रवाहको आवश्यकतालाई मतदाताले प्राथमिकता दिएको देखिन्छ।

विजयी नेतृत्वले अब २ दशकदेखिको परम्परालाई तोडेर संस्थानको सेवा प्रवाह, वित्तीय पारदर्शिता, र उपभोक्ताको गुनासो सम्बोधनमा तत्काल सुधार ल्याउने चुनौती र अवसर दुवै प्राप्त गरेको छ। चन्द्रगढीका बासिन्दाले अब नव-निर्वाचित पदाधिकारीहरूबाट स्वच्छ खानेपानीको निरन्तर उपलब्धता र संस्थानको कुशल व्यवस्थापनको उच्च अपेक्षा राखेका छन्।

— राजनीतिक संकट र संस्थागत मर्यादाको प्रश्न

✍️तुल्सीराम आचार्य

काठमाडौं ।

हालै देशभर चर्चित “२३ र २४ गतेका घटना” लाई लिएर सामाजिक सञ्जालमा तीव्र बहस चलिरहेको छ। कतिपयले “२३ गते गलत” त कोहीले “२४ गते गलत” भन्दै आफ्नो पक्ष पुष्टि गर्न खोजिरहेका छन्। तर यी दुवै घटनाबाट देशले पाएको क्षति — १९ जनाको ज्यान र सार्वजनिक सम्पत्तिको विनाश — कुनै पनि अर्थमा औचित्यपूर्ण ठहरिन सक्दैन।

२३ गतेका घटनामा निर्दोष युवाहरूले ज्यान गुमाउनु नैतिक र राजनीतिक दुवै दृष्टिले गम्भीर विषय हो। त्यसका लागि तत्कालीन राज्यसत्ता प्रत्यक्ष वा अप्रत्यक्ष रूपमा उत्तरदायी ठहरिन सक्छ, यद्यपि यो निष्कर्ष अनुसन्धान र समयसापेक्ष प्रतिवेदनले दिनेछ। तर यसका साथै, ती युवाहरूलाई उक्साउने, तोडफोडमा संलग्न गराउने, संसद भवनमा प्रवेश गराई आगजनी र विध्वंसकारी गतिविधिमा संलग्न गराउनेहरू नै सबैभन्दा ठूला दोषी हुन्।

२४ गतेका घटनाहरूमा देखिएको अराजकता, लुटपाट र हिंसक गतिविधि कुनै पनि दृष्टिले क्षम्य हुन सक्दैन। ती कार्यमा संलग्नहरूलाई देशद्रोही, अराजकतावादी र गुण्डागर्दी प्रवृत्तिका व्यक्ति मान्न कुनै द्विविधा रहँदैन।

तर सबैभन्दा चिन्ताजनक पक्ष भनेको देशको उच्च सुरक्षा संयन्त्रका प्रमुख स्वयंले प्रधानमन्त्रीलाई नै “हामी तपाईंलाई सुरक्षा दिन सक्दैनौं, तत्काल राजीनामा दिनुहोस्” भन्ने आशय प्रकट गर्नु हो। विधि र पद्धतिमार्फत स्थापित प्रधानमन्त्रीविरुद्ध यस्तो अभिव्यक्ति आउनु लोकतान्त्रिक प्रणालीकै आधारभूत मूल्यमा प्रश्न उठाउने घटना हो।

यदि तत्कालीन प्रधानमन्त्री केपी शर्मा ओली हाम्रा मनपर्ने पात्र होइनन् भनेर मानौं, र त्यस घटनाले हाम्रो भावनालाई सन्तुष्ट गर्‍यो भने पनि—भोलि हाम्रै मनपर्ने प्रधानमन्त्रीविरुद्ध त्यस्तै आदेश जारी भए भने के हामी त्यसलाई पनि स्वीकार गर्न तयार हुनेछौं?

यो प्रश्न केवल आजका पात्रहरूसँग सम्बन्धित छैन; यो देशको लोकतान्त्रिक संरचना, राज्यसंस्थाको मर्यादा र भविष्यको राजनीतिक दिशासँग जोडिएको गम्भीर चेतावनी हो।

वालिङ (स्याङ्जा)। आज पुतलीबजार नगरपालिका–१४ आमडाँडामा मोटरसाइकल दुर्घटना हुँदा सोही वडाको लामागे लम्सालडाँडाका ४५ वर्षीय माधव लम्साल भएको जिल्ला प्रहरी कार्यालयका सूचना अधिकारी कमल नेपालीले जानकारी दिए।

पुतलीखेत–सतौँ जोड्ने भित्री पक्की सडकखण्डमा लु५९प ३७९७ नम्बरको मोटरसाइकल दुर्घटना भएको हो। सातौँबाट पुतलीखेततर्फ आउने क्रममा ओरालो सडकबाट मोटरसाइकल अनियन्त्रित भई झण्डै एक सय मिटर तल खसेको प्रहरीले जनाएको छ।

दुर्घटना परी गम्भीर घाइते भएका लम्साललाई उपचारका लागि जिल्ला अस्पताल स्याङ्जा पु्र्याउनासाथ चिकित्सकले मृत घोषणा गरेका थिए। मृतक लम्साल हाल राष्ट्रिय कृषि परियोजना एकाइ कार्यालय पोखराको कार्यालय प्रमुख थिए।