उमेश कुशवाहा वीरगञ्ज, पर्सा— मधेस प्रदेशका मुख्यमन्त्री सरोजकुमार यादवको नियुक्ति असंवैधानिक भएको भन्दै जनमत पार्टीले वीरगञ्जमा आज विरोध प्रदर्शन गरेको छ।
पार्टीका नेता तथा कार्यकर्ताहरूले मुख्यमन्त्री यादवलाई बर्खास्त गर्न र तत्कालीन प्रदेश प्रमुख साबित्री सुवेदी भण्डारीविरुद्ध कानुनी कारबाही गर्न माग गरेका छन्। प्रदर्शनका क्रममा सहभागीहरूले ‘संविधानको मर्म विपरीत गरिएको नियुक्ति खारेज गर’ भन्ने नारासहित जुलुस निकालेका थिए।
जनमत पार्टीका नेताहरूका अनुसार यादवलाई संविधानको धारा विपरीत नियुक्त गरिएकोले यो कदमले लोकतान्त्रिक मूल्य र संविधानको उल्लङ्घन गरेको छ। उनीहरूले यस्तो निर्णयले प्रदेशमा राजनीतिक अस्थिरता बढाउने चेतावनी समेत दिएका छन्।
वीरगञ्जको घण्टाघर क्षेत्र वरिपरि गरिएको प्रदर्शनमा पार्टीका केन्द्रीय र स्थानीय नेताहरूको उपस्थिति रहेको थियो। शान्तिपूर्ण तर तीव्र नाराबाजीसहितको प्रदर्शन केही घण्टा सञ्चालन भएको बताइएको छ।
रियाद । अन्तर्राष्ट्रिय पत्रकार महासंघ अमेरिका–साउदी शाखाद्वारा साउदी अरेबियास्थित नेपाली दूतावास रियादमा परिचयात्मक तथा अन्तरक्रिया कार्यक्रम सम्पन्न गरेको छ।
गत ७ नोभेम्बर शुक्रबाका दिन संचालित कार्यक्रममा महासंघका पदाधिकारीहरूको परिचय, संस्थाको उद्देश्य, दूतावाससँगको सहकार्य, र साउदीमा रहेका नेपाली श्रमिकका समस्या समाधानका विषयमा विस्तृत छलफल गरिएको थियो।
कार्यक्रममा दूतावासका नियोग उप–प्रमुख तथा कार्यवाहक राजदूत सृजना अधिकारी, श्रम काउन्सेलर कविराज उप्रेति, र द्वितीय सचिव दिनेश सिवाकोटीको तथा पत्रकार महासंघका पदाधिकारीहरुको उपस्थिति रहेको थियो।
महासंघका अध्यक्ष बिष्णु घिमिरेले संस्थाको उद्देश्य र गतिविधिबारे जानकारी दिँदै श्रमिकको हक–हितका विषयमा मिडियाको सक्रिय भूमिका आवश्यक रहेको उल्लेख गर्नुभयो ।
दूतावास रियादकी कार्यवाहक राजदूत अधिकारीले साउदीमा रहेका मिडियालाई एकताबद्ध बनाएर संस्था स्थापना गरेकोमा धन्यवाद व्यक्त गर्दै, दूतावास सदैव नेपाली श्रमिकको पक्षमा काम गर्ने प्रतिबद्धता जनाउनुभयो। उहाँले छिट्टै दुई देशबीच श्रम सम्झौता हुने र त्यसले श्रमिकलाई राहत मिल्ने जानकारी पनि दिनुभयो।
श्रम काउन्सेलर उप्रेतिले कम्पनीबाट भाग्नुपर्ने अवस्था, सम्झौता विपरीत काम, आत्महत्या, भिसा प्रमाणीकरण, सेल्टर समस्या लगायतका विषयमा प्रकाश पार्दै, संघ–संस्थाको सहकार्यले यी समस्या समाधानमा टेवा पुर्याउने विश्वास व्यक्त गर्नुभयो।
द्वितीय सचिव सिवाकोटीले दूतावासले श्रमिकका हितमा जारी गरेको ‘हाते पुस्तिका’ साउदीभरका नेपालीसम्म पुर्याउन संघका प्रतिनिधिहरूलाई आग्रह गर्नुभयो।
शिक्षक तथा समाजसेवी स्व. हर्कध्वज राईद्वारा सङ्कलित ‘बान्तावा शब्दावली’ पुस्तक किराँत राई बान्तावा खिम, सहिदभूमि गाउँ कार्यसमितिको आयोजनामा बुधबार पिप्लेमा परिवार, शिक्षक र स्थानीय अगुवाहरूसॅंगै लोकार्पण गरिएको छ । सहिदभूमि गाउॅंपालिकाका अध्यक्ष मनोज राईको प्रमुख आतिथ्यमा सम्पन्न कार्यक्रममा विशिष्ट अतिथि बंगला राई, चन्द्रध्वज राई, प्रा.डा. टंक न्यौपाने, निराजन राई (सहप्राध्यापक तथा भाषाविद, इच्छापूर्ण राई (सहप्राध्यापक तथा भाषाविद) रहेका थिए । त्यस्तै, आमन्त्रित विशेष अतिथिमा आनन्द सन्तोषी राई (निवर्तमान अध्यक्ष, केन्द्रीय जनजाति महासंघ), अस्मिता राई (केन्द्रीय सचिव, किराँत राई यायोख्खा), उद्धव राई(अध्यक्ष, किराँत राई यायोख्खा, धनकुटा) समाजिक अभियन्ताहरू तिलक राई, पृथसिंह दाहाल लगायत थिए ।
कार्यक्रमलाई अझ स्मरणीय बनाएको पक्ष के थियो भने लोकार्पित पुस्तकमा आत्मीयता, मेहनत र सङ्कलनको रोचक कहानी बोकेर बसेकी कृतिकारकी भतिजी सुजाता राई विशेष रूपमा उपस्थित थिइन् । काकाले आफ्नो जीवन समाज, शिक्षा र संस्कृतिमा अर्पण गरेको साँचो हो । मरणोपरान्त भए पनि उहाँको सम्मानार्थ यस पुस्तकलाई आकार दिइएको हो, उनले प्रष्ट्याइन् । कृतिकारको योगदान बारे सार्वजनिक रूपमा सुनिँदा सुजाता राई मात्र होइन, उपस्थित सम्पूर्ण परिवार र सहभागीहरू भित्रभित्रै भावुक बनेका दृश्यहरू खुलेर देखिन्थे । स्व. राई केवल शिक्षक मात्र थिएनन्, जीवन सुधालय माध्यमिक विद्यालय, खोकुका नि:शुल्क जग्गादाता, संस्कृतिक अभियन्ता एवम् समाजका आदर्श व्यक्ति पनि थिए ।
उनको जीवनसाथी श्रीमती बंगला राई, छोरा अशेष राई, भाइ चन्द्रध्वज राई, भाउजू बैकान्छी राई, भतिजो इच्छराम राई, मोहन राई, अशिम राई, प्रेमबहादुर राई, भतिजी धनकुमारी राई लगायत छिमेकी, आफन्त, साथीभाइ र सांस्कृतिक अभियन्ता, स्थानीय जनप्रतिनिधिहरूको विशेष उपस्थिति रहेको उक्त लोकार्पण कार्यक्रमले शब्द मात्र होइन, अस्तित्वको पहिचान जोगाउने संकल्प समेत बोकेको थियो । विमोचनमा स्थानीय विद्यार्थीहरूको सुन्दर नृत्यले कार्यक्रमको शोभा बढाएको थियो । पञ्चकृष्ण माविका प्रधानाध्यापक होमबहादुर राईको सभापतित्वमा स्वागत मन्तव्य सहिदभूमि बान्तावा खिमका कोषाध्यक्ष सुलुकमन राईले गरेका थिए भने कार्यक्रम सञ्चालन अर्जुन राईको थियो ।
जेन जी को नेतृत्व गर्दै आएका सुदन गुरुङले गृह मन्त्री ओमप्रकाश अर्यालले सरकार गठनको 2 महिना हुँदा समेत जेन जी र जनताले चाहेझै काम गर्न नसकेको हत्यारालाई र” “भ्रष्टाचारीलाई कारबाही गर्न नसकेको भन्दै पद छाड्न भनेका छन् । गुरुङले आफ्नो फेसबुक पेजमार्फत हाम्रो अलोकप्रिय गृहमन्त्रीको लागि सन्देश भन्दै पद छाड्नकालागि अनुरोध गरेका छन् ।
सुदन गुरुङ गुरुङको स्टाटस जस्ताको त्यस्तै …
हाम्रो अलोकप्रिय गृहमन्त्रीको लागि सन्देश
तपाईंले जनताको भरोसा पूरा गर्न सक्नुभयो छैन।
देशभरबाट “हत्यारालाई कारबाही गर” “भ्रष्टाचारीलाई कारबाही” गर भन्ने आवाज उठ्दा “जेन्जीलाई कारबाही” गर सुन्ने गृह मन्त्रीको पदमा टाँसिएर बस्नु राष्ट्रप्रति अपमान हो।
सहिदको रगत सम्झनुहोस्। नेपाल र नेपालीको आशा र आँसु सम्झनुहोस्।
काम गर्न नसके पद छोड्ने गर्नुभएको वाचा सम्झनुहोस्।
ओमप्रकाश अर्याल ज्यू, अब त्यो समय आएको छ किनभने अब दुई महिना हुन लागिसक्यो न त कुनै भ्रष्टाचारलाई कारबाही भो न त कुनै हतियारालाई।
अहिलेसम्म के हुन्छ कि भनेर देशको हितको लागि लड्दा मैले भ्रामक समाचार द्वारा यत्रो अपमान देखि चरित्र हत्या समेत सहेर बसे । कुनै स्पष्टीकरण पनि दिन उचित ठानिन्न किनभने मैले सोचेको थिएँ कामले देखाउँछ र कामले बोल्छ अनि नेपाली जनताले बुझ्नेछन् एकदिन,र अझै पनि देश बन्छ भने, करोडौँ अट्याकहरू सहन तयार छु तर अब तपाईंबाट आशा मरिसकेको छ।
हामी लड्यौं योग्य, इमानदार, र परिणाम देखाउने नेतृत्वका लागि।
हामी भ्रष्टाचार अन्त्य र राष्ट्रको भविष्य सुरक्षित गर्न उठ्यौं।
अब भीत्र मनमै सोच्नु होला—“चुनाब गराएर निक्लिन्छु, THE YOUTHS OF NEPAL ARE NOT STUPID, WE ARE WAITING.
त्यसैले चेतना होस् ।
चुनाबको नाटक नचलोस्।
८४ को चुनाव ८२ मा सार्नलाई गरिएको आन्दोलन होइन यो ।
नेपाली जनता र जिन्जीका मागहरू सम्बोधन हुँदैन भने यसपालिको चुनाव हुन दिइने छैन।
अझै पनि गृहमन्त्रीको पदमा टाँसेर जुका जस्तो बस्नुहुन्छ भने दुई दिनपछिको प्रेस कन्फ्रेन्सले तपाईंको भविष्य निर्धारण गर्नेछ। प्रधानमन्त्रीको प्रिय पात्रो भनेर कुर्ची बच्छ भनेर सोच्नुहुन्छ भने यो तपाईंको भ्रम हो।
कपिलवस्तु – गरिबी, अनाथत्व र अपांगताको कारण धेरै बालबालिकाको पढाइ बीचमै टुट्ने देशमा, लुम्बिनी एकीकृत विकास संस्था (लिडो) ले ४८० विद्यार्थीलाई आशाको नयाँ ढोका खोलेको छ ।
संस्थाले कतार च्यारिटीको सहयोगमा ८० लाख रुपैयाँभन्दा बढीको छात्रवृत्ति वितरण गर्दै कपिलवस्तुका विभिन्न विद्यालयमा अध्ययनरत अनाथ र अपांग विद्यार्थीलाई शैक्षिक सहयोग उपलब्ध गराएको हो ।
लिडोकी कार्यकारी निर्देशक सुनिता बेल्बासेका अनुसार, हालसम्म ३०५ विद्यार्थीलाई छात्रवृत्ति हस्तान्तरण भइसकेको छ । “तीनदेखि १८ वर्ष उमेर समूहका विद्यार्थीलाई ५ हजार ६६१ देखि १६ हजार ९८४ रुपैयाँसम्म त्रैमासिक रूपमा छात्रवृत्ति दिइन्छ,” उनले बताइन् ।
कार्यक्रमका प्रमुख अतिथि जिल्ला समन्वय समितिका प्रमुख बाबुराम आचार्यले विद्यार्थीको पहुँच र शैक्षिक निरन्तरता बढाउन यो कार्यक्रम प्रभावकारी हुने विश्वास व्यक्त गरे । “गरिबीका कारण पढाइ छाड्ने समस्या अझै छ, यस्तो सहयोगले त्यो चक्र तोड्न सहयोग पुर्याउँछ,” उनले भने ।
कार्यक्रममा शिक्षा विकास तथा समन्वय इकाइ कपिलवस्तुका अधिकृत अर्जुन कुँवर लगायत अधिकारीहरूको सहभागिता थियो ।
लिडोका कार्यक्रम संयोजक रामनरेश चौधरीका अनुसार, संस्थाले विगतदेखि नै अनाथ र अपांग विद्यार्थीहरूलाई नियमित रूपमा छात्रवृत्ति प्रदान गर्दै आएको छ ।
छात्रवृत्ति प्राप्त विद्यार्थीहरूले भने आफूहरूलाई अध्ययनमा सहजता र प्रेरणा दुबै बढेको प्रतिक्रिया दिएका छन् ।
काठमाडौं : अमेरिकाको ठूलो शहर न्यूयोर्कको मेयरमा जोहरान ममदानी विजयी भएका छन्। उनी मुस्लिम समुदायबाट पहिलो मेयर बनेका हुन्।
सीबीएसका अनुसार ३४ वर्षीय ममदानी न्यूयोर्कको सबैभन्दा कान्छा र पहिलो मुस्लिम तथा दक्षिण एसियाली मेयर बनेका हुन्। उनका समर्थकहरू खुसीयाली मनाइरहेका छन्। उनीहरू एकअर्कालाई बधाइ दिइरहेका छन्।
ममदानीको जन्म सन् १९९१ मा युगान्डाको राजधानी कम्पालामा भएको थियो। ममदानीका बुबाले उनलाई क्रान्तिकारी र घानाका प्रथम प्रधानमन्त्री क्वामे एनक्रुमाहको नामबाट क्वामे नाम दिएका थिए।
ममदानी प्रसिद्ध भारतीय-अमेरिकी फिल्म निर्देशक मीरा नायर र कोलम्बिया विश्वविद्यालयका प्रख्यात प्राध्यापक महमूद ममदानीका छोरा हुन्। उनले आफ्नो सुरुवाती दिनहरू कम्पालामा बिताए र त्यसपछि पाँच वर्षको उमेरमा दक्षिण अफ्रिका सरे।
ममदानीका बुबा, भारतीय मूलका महमूद ममदानी, केप टाउन विश्वविद्यालयमा प्राध्यापक थिए। उनले आफ्नो प्रारम्भिक शिक्षा दक्षिण अफ्रिकाको सबैभन्दा पुरानो विद्यालय सेन्ट जर्ज व्याकरण स्कूलमा प्राप्त गरे, जुन १८४८ मा केप टाउनमा स्थापित भएको थियो।
सात वर्षको उमेरमा, उनी न्यूयोर्क शहर सरे र ब्रोंक्स हाई स्कूल अफ साइन्समा पढे। २०१४ मा उनले बोडेन कलेजबाट अफ्रिकी अध्ययनमा स्नातक गरेकी थिइन्। केही वर्षपछि २०१८ मा, ममदानी अमेरिकी नागरिक बने।
कपिलवस्तुस्थित एनआईसी एशिया बैंक तौलिहवा शाखामा असोज ३१ गते प्रहरीले छापा मारे पनि अहिलेसम्म बैंकको केन्द्रिय कार्यालयले कुनै कारबाही नगरेको भन्दै स्थानीयमा असन्तुष्टि बढेको छ ।
स्थानीय स्रोतका अनुसार, राति करिब १० बजे बैंकको सटर खुला र बत्ती जलिरहेको देखेपछि स्थानीयले प्रहरीलाई जानकारी दिएका थिए । सूचना पाएलगत्तै जिल्ला प्रहरी कार्यालय कपिलवस्तुबाट खटिएको टोली घटनास्थल पुगेको थियो ।
छापापर्दा बैंकभित्र बियरका बोतल र कालब्रेक तास खेलिरहेको भेटिएको थियो । एक प्रहरी अधिकारीले भने, “बैंकका कर्मचारी भित्रै कालब्रेक तास खेल्दै बियर सेवन गरिरहेका थिए। स्थानीयहरूले बैंक जस्तो पवित्र संस्थामा यस्तो व्यवहार स्वीकार्य नभएको बताएका छन् ।
घटनाको भिडियो सामाजिक सञ्जालमा भाइरल भएपछि बैंकका कर्मचारीहरूले भिडियो मेटाउन दबाब दिएको पनि स्थानीय स्रोतले बताए । बैंक स्रोतका अनुसार, कर्मचारीले भित्र तास खेल्दै र बियर सेवन गरेको घटना सिसिटिभीमा कैद भएको भए पनि प्रदेश कार्यालयको समर्थनमा अहिलेसम्म कुनै कारबाही गरिएको छैन ।
स्थानीयले प्रदेश र केन्द्रिय कार्यालय दुबैलाई जानकारी दिए पनि अहिलेसम्म कुनै कारबाही नभएकोमा गुनासो गरेका छन् । उनीहरूले भनेका छन्, बैंकमा कुनै घटना भएमा त्यसको जिम्मेवार कर्मचारी र सम्बन्धित निकाय नै हुनेछन् । केन्द्रले तुरुन्त छानबिन गरी कारबाही गर्नु आवश्यक छ ।
आज मिती १९ कार्तिक २०८२, बुधवारका दिन नेकपा माओवादी केन्द्रले नेकपा (एकीकृत समाजवादी ) सहित ९ पार्टीहरूको पार्टी एकीकरण गर्ने निर्णय र प्रस्तावित एकीकृत पार्टीको साझा घोषणापत्र लाई अनुमोदन गरेको छ ।
राष्ट्रिय महाधिवेशन आयोजक समितिको बैठक संयोजक प्रचण्डको पुष्पकमल दाहालको अध्यक्षतामा बसेको उक्त नेकपा (माओवादी केन्द्र ) को अन्तिम बैठक ले घोषणापत्रलाई अनुमोदन गरेको कुरा माओवादी केन्द्रका बरिष्ट नेता नारायणकाजी श्रेष्ठले जनाएका छन् ।
श्रेष्ठले आजको बैठक नेकपा (माओवादी केन्द्र ) को अन्तिम बैठकको रुपमा पार्टी एकीकरण गर्ने निर्णय गर्दै सफलता पूर्वक सम्पन्न भएको र नयाँ एकीकृत पार्टीको नाम नेपाली कम्युनिष्ट पार्टी (Communist Party of Nepal ) र चुनाव चिन्ह पाँच कुने तारा रहने बताएका छन् ।
उहाँले अरु कुरा थप्दै पार्टी एकता गरी एकीकृत पार्टी निर्माण गर्दा एकतामा सामेल सबै क्रान्तिकारीहरूले प्रारम्भ देखि नै निम्न पक्षहरूमा गम्भीर ध्यान दिनु जरुरी रहेको पनि बताएका छन् ।
” एक, यो एकता नेपालका सबै कम्युनिष्ट तथा बामपन्थी शक्तिहरूको एकीकरण र पुनर्गठनको प्रस्थान विन्दु बन्नु पर्दछ ।त्यसो भएमात्र यो देश ,जनता र कम्युनिष्ट आन्दोलनको माग अनुरुपको कोषे ढुंगा बन्न सक्नेछ । दुई ,नेपाली राजनीति र नेपाली कम्युनिष्ट आन्दोलनको आजको मुख्य समस्या विचारधारात्मक सांस्कृतिक (ideo-cultural ) समस्या हो । त्यसैले समग्र कम्युनिष्ट आन्दोलनको वैचारिक सांस्कृतिक संकट लाई समाधान गर्न व्यापक वैचारिक सांकृतिक रुपान्तरणको अभियान लाई एकीकृत पार्टीले शुरुदेखि नै आफ्नो अभिन्न काम बनाएर जानुपर्छ ।क्रान्तिकारी उद्देश्य ,आदर्श ,विचार ,सिद्धान्त ,विधि पद्धति ,स्वच्छता , प्रदतिशिल संकृति , श्रमजीवी एवं उत्पीडित वर्ग एवं जनमुखी चरित्र लाई एकीकृत पार्टीको चारित्रिक विशेषता बनाउनु पर्दछ । अन्यथा पार्टी एकता जोडघटाउ को थुप्रो मात्र बन्ने र परिणाममुखी एवं सार्थक नबन्ने खतरा उत्पन्न हुनेछ ।कि मार्थ त्यसो हुन दिनु हुँदैन ।”
र ,तीन, जेन जी (Gen Z ) बिद्रोहात्मक आन्दोलनको चेतना , मुद्दा र संगठन एवं अन्य जिम्मेवारीहरूमा जेन जी सहितका युवाहरुको उल्लेखनीय सहभागिता तथा प्रतिनिधित्व लाई एकीकृत पार्टीले गम्भीरतापूर्वक ग्रहण गर्दै तदनुरूप अघि बढ्न प्रतिबद्ध हुनु पर्ने कुरा उल्लेख गरेका छन् ।
कपिलवस्तु — सडक दुर्घटनामा निधन भएकी आफ्नी १३ वर्षीया छोरीको शव खोज्दै एक दम्पती सात दिनदेखि जिल्ला प्रहरी कार्यालय, कपिलवस्तु धाइरहेका छन् ।
भारतको सिद्धार्थनगर बर्डपुर घर भई कपिलवस्तुको मायादेवी–१ पकडीमा मजदूरी गर्दै आएका हरिचन्द्र मल्लाह र उनकी श्रीमतीले प्रहरीमा बारम्बार गएर जाहेरी दिन खोजे पनि सुनुवाइ नभएको गुनासो गरेका छन् ।
मल्लाह दम्पतीका अनुसार, कात्तिक २ गते लु.१ क ५७८० नम्बरको ट्रकले ठक्कर दिँदा उनीहरूको १३ वर्षीया छोरी खुशी मल्लाहको मृत्यु भएको थियो । तर प्रहरीले शव उनको नाममा दर्ता नगरी घरबेटी पर्शुराम तेलीका छोरा पिन्टु तेलीलाई “श्रीमान्” भन्दै जिम्मा लगाएको पीडित पक्षको आरोप छ ।
‘मेरी छोरीको विवाह नै भएको थिएन। प्रहरीले नक्कली अभिभावक खडा गरेर हाम्रो दुःख बढायो,’ बाबु हरिचन्द्र मल्लाहले आँसु झार्दै भने ।
घटनाको पृष्ठभूमि
पीडित मल्लाह दम्पती कात्तिक १ गते भारतस्थित आफ्नै घरमा धान स्याहार्न गएका थिए । उनले छोरी खुशीलाई स्थानीय पर्शुराम तेलीको जिम्मा लगाएका थिए । त्यसको भोलिपल्ट साँझ ट्रकको ठक्करबाट बालिकाको मृत्यु भयो ।
तर जब मल्लाह दम्पती कात्तिक ८ गते फर्किए, उनीहरूले छोरीको मृत्यु र शव पहिले नै अरूलाई बुझाइएको थाहा पाए ।
गैरजिम्मेवार प्रहरी र विवादास्पद शव बुझाइ
प्रहरी स्रोतका अनुसार, नाता प्रमाणित गर्ने कुनै पनि कागजात नहुँदा पनि जिल्ला प्रहरी कार्यालय, कपिलवस्तुका एसपी सन्तोष आचार्यको निर्देशनमा शव पिन्टु तेलीलाई बुझाइएको थियो । एक प्रहरी अधिकृतले नाम नखुलाउने सर्तमा भने, “माथिबाट दबाब आएपछि शव बुझाइयो ।”
पीडित परिवारले जाहेरी नदर्ता भएपछि हुलाकमार्फत पनि जाहेरी पठाए, तर प्रहरीले त्यो समेत बेवास्ता गरेको उनीहरूको भनाइ छ ।
‘मेरी छोरीको लाश कहाँ छ—जलाइदिए कि गाडे ? कि फालिदिए ? कम्तीमा अन्तिम पटक हेर्न पाए हुन्थ्यो,’ भन्दै आमाले बिलौना गरेकी छन् ।
प्रहरीको भनाइ
मामिला हेर्दै आएका प्रहरी नायब निरीक्षक सुशिल केसीले “शव श्रीमान् दाबी गर्ने पिन्टुलाई बुझाइएको” बताए । तर उनले नाता प्रमाणित गर्ने कागजात नभएको स्वीकारे । सभार:- जनआस्था
कपिलवस्तु _ हरित जलवायु कोषको सहयोगमा वैकल्पिक ऊर्जा प्रवर्द्धन केन्द्र र मायादेवी गाउँपालिका कपिलवस्तुको सहकार्यमा “स्वच्छ खाना पकाउने समाधान (सीसीएस) परियोजना” सञ्चालनमा आएको छ । परियोजनाले गाउँपालिकामा स्वच्छ, दिगो र वातावरणमैत्री ऊर्जा प्रविधि विस्तार गर्ने लक्ष्य लिएको छ ।
परियोजनाअन्तर्गत गाउँपालिकाका आठ वडामा विद्युतीय चुलो, सुधारिएको तह ३ चुलो र चार घनमिटर क्षमताको घरेलु बायोग्यास प्लान्ट वितरण गरिनेछ । विद्युतीय चुलो प्रति थान ९५२ रुपैयाँ, सुधारिएको चुलो ३१० रुपैयाँ र घरेलु बायोग्यास प्लान्ट १०,७९१ रुपैयाँमा उपलब्ध हुनेछ ।
अध्यक्ष वलिउद्दिन खानले भने, गाउँपालिकाको दिगो विकास र स्वच्छ ऊर्जा प्रवर्द्धनतर्फ यो परियोजना महत्वपूर्ण कदम हो । यसले आम नागरिकमा स्वच्छ ऊर्जा प्रयोग गर्ने संस्कार विकास गर्नेछ र वातावरणीय प्रदूषण घटाउन सहयोग पुर्याउनेछ ।
त्यस्तै प्रमुख प्रशासकीय अधिकृत नरेन्द्र यादवले भने, “यो परियोजनाले गाउँस्तरमा दिगो ऊर्जा प्रविधिको पहुँच बढाउनेछ । विशेषगरी ग्रामीण महिलामाथिको कामको बोझ घटाउने र स्वच्छ जीवनशैली निर्माणमा सहयोग पुग्ने अपेक्षा छ ।
गाउँपालिकाले सबै वडामा आवेदन फाराम उपलब्ध गराएको छ । इच्छुक नागरिकले नागरिकताको प्रतिलिपिसहित फाराम भरी आफूलाई उपयुक्त लाग्ने प्रविधि चयन गर्न सक्नेछन् ।
गाउँपालिकाले विश्वास व्यक्त गरेको छ कि परियोजनाले स्वच्छ ऊर्जा प्रयोग, वातावरणीय संरक्षण र हरित गाउँपालिका निर्माणमा महत्वपूर्ण योगदान पुर्याउनेछ ।
हाम्रो अलोकप्रिय गृहमन्त्रीको लागि सन्देश 
