काठमाडौ, । साप्ताहिक ‘टुक्का माथि टुक्का’ व्यङ्ग्यात्मक टुक्का लेखन अभ्यासको १९ औँ शृङ्खला शनिबार सम्पन्न भएको छ ।
अभ्यासमा ५४ जना टुक्काकारहरूको सहभागिता रहेको कार्यक्रम संयोजक तथा प्रशिक्षक वसन्त अनुभवले बताउनुभयो । टुक्का साहित्य समाजको आयोजनामा उक्त अभ्यास शृङ्खला विगत लामो समय देखि नियमित रूपमा सञ्चालन हुँदै आएको छ।
टुक्का कविताको उन्नयन, विकास र प्रवर्द्धन गर्ने हेतुले समाजले विविध किसिमका कार्यक्रम गर्दै आएको छ । टुक्का लेखन अभ्यासमा पृथकता एवं फरकपन भित्राउने सिलसिला उक्त शृङ्खला सञ्चालन गरिदै आएको समाजका अध्यक्ष एवं कार्यक्रमका परिकल्पनाकार ताराप्रसाद चापागाईंले बताउनुभयो ।
अभ्यासका लागि एक व्यङ्ग्यात्मक टुक्का राखिने र त्यसैमा आधारित रहेर गहन भावको एक एक टुक्का सहभागीले राख्नुपर्ने संयोजक अनुभवले जनाउनुभयो ।
‘टुक्का माथि टुक्का’ व्यङ्ग्यात्मक टुक्का लेखन अभ्यासको १९ औँ शृङ्खलाको लागि समाजका वरिष्ठ टुक्काकार वसन्त अनुभवले समसामयिक विषयमा लेख्नुभएको व्यङ्ग्यात्मक टुक्कालाई राखिएको संयोजक अनुभवले बताउनुभयो ।
अभ्यासका लागि राखिएको टुक्का
जता धन उतै बग्छ समृद्धिको कुलो,
संसारमा धन नै हो बुद्धिभन्दा ठुलो।
✍️ वसन्त अनुभव
सहभागी टुक्काकारहरूले अभ्यासका क्रममा सृजना गर्नुभएको टुक्काहरू
[१]
बलेकै आगो ताप्छन् रे अरूहरू मत निभेकोलाई बाल्ने गर्छु,
सबै जना धन धन भनुन् म गरिबलाई साथ दिएर मर्छु ।
गुणनिधि घिमिरे
पाँचथर मोरङ हाल अमेरिका
[२]
धन भनेपछि महादेवको तेस्रो नेत्र भन्छन्,
आफैँले बनाएको धनलाई किन धेरै गन्छन् ?
गंगा खड्का
बूढानीलकण्ठ काठमाडौँ
[३]
धनको तुजुक गर्नेले बुद्धिलाई हियाउँछन्,
धन कमाउन बुद्धिकै चोर दुलो चियाउँछन्।
दीपक ठटाल जलन
खरसाङ, दार्जीलिङ।
[४]
मुर्खहरूकै पछि लाग्दा विद्वान पनि बन्छ काँचो,
वास्तवमा धन भन्दा नि बुद्धि विवेक नै हो साँचो!
पूर्णबहादुर श्रेष्ठ “हृदयङकृत”
पनौती न.पा-३,काभ्रे
[५]
काे हाे माथि खाेज्दै जाँदा धेरै बिते घडि पला,
समृद्धिकाे धन मेराे जीवन जिउने कला।
ताराप्रसाद चापागाईं
धुनिबेसी ।
[६]
समृद्धिको धनको जति बगाए नि कुलो,
मरेपछि जादैन बाचुञ्जेल को हो ठुलो।
बेदु न्यौपाने
काठमाडौ
[७]
सबैभन्दा जरुरी धन, आफूसँग छैन,
धन बाहेक सबै भ्रम, अरू केही हैन!
भूषण जंग
नेपाल
[८]
देश विकासले भरिसक्यो सबै खातापाता,
उप्काइदिने कसले होला?कुबुद्धिको गाता।
म्यामराज राई
भोजपुर
[९]
कहाँ बग्यो नेपालमा समृद्धिको कुलो?
बुद्धि भन्दा कहिले नि धन हुन्न ठूलो।
माधवी भट्ट
सुर्नया ३ (बैतडी ) हाल कंचनपुर
[१०]
घाम हेरे घामै राम्रो जून हेर्दा जून,
धन अनि मन दाॅज्दा ठूलो हुन्छ कुन?
घनश्याम पौडेल
सृजना चोक, पोखरा
[११]
केही चाहिंदैन धन भए सोच्नु हुन्न अरे,
सम्पन्न हुनेका सन्तानहरू बिग्रिन्छन् भरे ।
बिके माकजु
भक्तपुर ।
[१२]
जता विद्वान उतै हुन्छ समृद्धिको कुलो,
धन हैन विद्वान हुन्छ सबैभन्दा ठूलो ।
सरस्वती वली
बर्दिया
[१३]
कहीँ कतै देख्या छैन समृद्धिकाे कुलाे बगेको,
जता हेर्छु उतै देख्छु जनता मात्रै पाे ठगेको ।
त्रिलाेचन भण्डारी
मेचीनगर, झापा
[१४]
तिम्रो धन मेरो बुद्धि दाजौँ न त दाजै,
कुन ठुलो कुन सानो थाहा हुन्छ आजै।
मन्दिरा सेढाई
मलेखु,धादिङ
[१५]
बुद्धि विवेक गुमाएर एकदम बहकिँदै,
धनकै पछि दुनियाँ सारा आउँछ नजिकिँदै!
बिबस पारदर्शी
धद्रपुर न० पा० २, झापा ।
[१६]
धनको कुरा नगर साथी, मर्दा कहाँ लान्छौ,
मूर्ख छौ र बुद्धि भन्दा तिमी धन ठूलो ठान्छौ ?
राजेशराज गड्तौला
रतुवामाई- १०, मोरङ, हाल- प्रवास
[१७]
तल पर्छ ज्ञान विवेक यस्को माथि मन,
जाने भए मर्दासँगै, देउता हुन्थ्यो धन।
होम प्रसाद
सुनसरी ।
[१८]
धन भए सबै आफ्ना नत्र ती पराया,
नभएमा टेडो हुन्छ आफ्नै पनि छाँया!
कमला देवकोटा
पाल्पा
[१९]
पुग्दैन हौ धन सम्पती सार्है लोभी मन,
कसले लग्यो मर्दा सँगै कुम्ल्याएको धन?
✍ नवशिला
बेलबारी-२,लालभित्ती,मोरङ ।
[२०]
धन भन्दै पछिलाग्दा बिग्रेको छ घर,
बेलैदेखि सोच्यो भने मिल्छ सधैँ भर।
दुर्गा आचार्य
मोरङ
[२१]
मुर्ख हो भनी ठान्नु , बुद्धिभन्दा ठुलो धन गाउनु,
मस्तिष्कले काम नगरे धन कहाँबाट आउनु ?
अनुग्रह राना मगर ‘पुष्प’
संखुवासभा हाल मलेसिया
[२२]
पुँजीवादले सबैभन्दा शक्तिशाली गरायो धन,
त्यसैले मान्छेहरूको कतै रहेन दयालु मन।
सुरेशकुमार पान्डे।
दाङ घोराही१८
[२३]
फूलले पुतलीको जीवन नर्क बनायो,
नालीभन्दा ज्यादा देशको शासक गनायो ।
रिजाल विनोद
मोरङ
[२४]
धनले नै गर्छु भन्दै हरेक कुराको ढाकछोप,
मान्छेको मनबाट हुँदै गयो मानवताको लोप ।
बी.कुलुङ
भारत (दार्जिलिङ)
[२५]
मान्छेलाई यो धन सम्पत्तिले बिगार्यो ,
जिन्दगीको खेलदेखि त्यसैले त हार्यो ।
बिक्रम तिरुवा सलिन
तिला ३ जुम्ला
[२६]
समृद्धिकाे कुलाे हाेला जनता टार्ने खेल,
कतिदिन चल्छ हाेला जनता मार्ने झेल ।
निरज कोइराला
[२७]
सबैको मन बिग्रियो धनले,
त्यही नि छोड्न मान्दैन मनले ।
ललिता अभागी
सुनकोशी५ सिन्धुली
[२८]
ज्याला मजदुरी गरेर आर्जन गरियो धन,
बिकास समृद्धिको तर्फ नैं अडिग रह्यो मन।
हरिनारायण चौधरी
सुन्दर हरैंचा नगरपालिका १ मोरङ
[२९]
पाँच कक्षा फेल म त हुन पुगें नेता,
कालो धन थुपार्दछु नपारेर सेता।
मनोहरी पौडेल
गैडाकोट १ नवलपुर
[३०]
आफ्नाले त छोडी गए धनको ढुकुटी लिएर,
परदेशमा बाँचेको छु नसाले मुटु सिएर ।
अम्बिका अधिकारी
[३१]
प्रदेशमा काम गर्छु सारा ब्यथा रोकेर,
नरोइ बसे माया आउछु धन बोकेर ।
संझना `कुसुम´
कास्की गण्डकी प्रदेश
[३२]
धनतिर मन दिदा बुद्धि विवेक गुम्याे,
थुपारेर जायजेथा धनकै बिटो चुम्याे ।
रामकृष्ण दुवाडी
[३३]
संसारमा पुजनिय बनेको छ धनी,
धन देख्दा तीन नेत्र शिवजीका पनि।
मित्र उराठी गाैतम
अमरपुर गुल्मी
[३४]
मूर्ख मान्छे सधैँभरि धनकै पछि लाग्छ,
यस्तै देखी सुख समृद्धि पर-पर भाग्छ।
अरुण कुमार भुजेल
गोरूबथान,कालेबुङ्ग,भारत।
[३५]
धन , धन भनेर अन्तर्मन गुमनाम हुँदैछ,
यही धनले सदा नै निमुखाको हृदय छुँदैछ ।
प्रेम थापा “मन ” बागलुङ
[३६]
धन भए पनि शान्ति कहिल्यै भएन,
उसकाे कठाेरपन कहिल्यै गएन ।
भावना मञ्जु
माेरङ
[३७]
पैसाकै बन्यो सिरक डसना पैसाकै बन्यो चिहान,
यी गद्दार नेताहरूलाई कहिले नआओस् बिहान।
लक्ष्मी श्रेष्ट
बिर्तामोड झापा
[३८]
धन विना बल्दैन अचेल यहाँ जनताको चुलो,
फालाफाल भो बुद्धि बजारभरि धनै भयो ठुलो।
शम्भु लाल श्रेष्ठ
बेसीशहर, लमजुङ, हाल रानीवन, काठमाडौं।
[३९]
धनसँग सम्बन्ध छ जिन्दगीको सेरोफेरो,
मरेपछि कोही हुन्न बाचुन्जेल तेरो मेरो ।
जि कुमार गौतम
भद्रपुर-१ (पृथ्विनगर) झापा
[४०]
धनको दुरुपयोग मात्र समृद्धिको नाम बग्ने सितको थोपा,
भाषणमा समृद्धि खोक्ने चुसी खान पल्किएका घुसियाँको छोपा ।
राम कुमारी खडका
तुल्सिपुर उ न पा १९ दाङ्ग ।
[४१]
समृद्धिको भाषण बाँडेर हिड्दैछन् , खोइ कता कता ,
बिकासको बजेट जति , सबै नेताको पोल्टामा यता ।
बुद्धिमान चौधरी
कनकाई नगरपालिका ४ झापा
[४२]
पैसा पैसा जताततै पैसाकै छ चल्ती,
काम गर्नु अघि हेर छाम्नुपर्छ खल्ती!
बलराम सुवेदी
वीरगन्ज, पर्सा
[४३]
बुद्धि सुद्धी जहाँ जाओस् धनकै बिटा गन्छन्
धन देख्दा महादेवको त्रिनेत्र पो भन्छन् ।
डम्बर थामी ‘अनुपम’
कालिन्चोक गा.पा. -६, दोलखा
[४४]
ब्याज माधि ब्याजको हिसाब गरेकै हो हेर,
पानी छोडि महमा पौडे कमाई हुन्न खेर ।
अच्युत घिमिरे-भुटान
[४५]
धनभन्दा विद्या ठूलो भन्ने गर्थें नामी,
विद्या लिई काम छैन धन हुने दामी।
भगवती दवाडी
[४६]
कुरो अनि कुलो जता लगायो उतै जान्छ,
गोजीमा पैसा हुने आफू बुद्धिमान ठान्छ ।
धर्मराज पोख्रेल
[४७]
भ्रष्ट नीति लिई, लुकिछिपी कमाएको धन,
नोकरचाकर राख्दा पनि शान्ति छैन मन ।
जमुना आचार्य
सिन्धुपाल्चोक
[४८]
धनले ल्याउँछ मानिसमा सधैँ फाटाे,
नमेटिने दाग लाग्छ जीवनमा खाटाे।
तारा घिमिरे संखुवासभा
[४९]
ठुलाे दरबार बनाउँदैमा धन सम्पत्तिकाे घमण्ड नगर साथी,
तिम्रो महल भन्दा पनि गरिबकाे झुपडी नै ठुलाे हुन्छ धेरै माथि ।
सहयात्री शाेभा अर्याल
रुपन्देही १४ बुटवल
[५०]
धनको मोहमा फस्यो मान्छे बिर्सेर मानवता,
भुल्यो सारा नातागोता रहेन रत्ती नैतिकता ।
सुर्य मणि रेग्मी
चितवन
[५१]
जता धन उतै उर्लिएका छन् सारा जन ,
त्यता हुन्छ कमिसनको खेल टनाटन ।
प्रद्युम्न चालिसे
भक्तपुर कटुञ्जे ।
[५२]
भ्रष्टाचार गरि कमाएको कालो धन,
पैसाको ओछ्यानमा सन्तोष हुन्न झन ।
दुर्गा भट्टराई
मोरङ
[५३]
धनले गर्दा उक्लिएको ओरालिनु पर्छ,
सधैँ बुद्धिले अघि बढे दुःख सबै टर्छ ।
धनुष न्यौपाने
गुठीचौर गाउँपालिका ० ४ बिगारे जुम्ला
[५४]
धन भए सबै काम बन्दो रहेछ अहिले,
बुद्धिमानले धेरै नाम पाउँदथे पहिले ।
रचना शर्मा प्रतीक्षा
ललितपुर ।
जय टुक्का ! जय साहित्य !!
