साप्ताहिक झिल्का लेखन अभ्यासको २७ औँ शृङ्खला आइतवार अपरान्ह सम्पन्न भएको छ । झिल्का साहित्य समाज नेपालको आयोजनामा यो अभ्यास शृङ्खला निरन्तर हरेक हप्ता सञ्चालन हुँदै आएको छ ।
साप्ताहिक झिल्का कविता लेखन अभ्यासका विगतका शृङ्खलामाझैँ यसपटक पनि सहभागीहरूको निकै उत्साहप्रद सहभागीता रहेकोे थियो । जसमा नेपाल, भारत, भुटान लगायत विश्वका विभिन्न देशमा रहेर नेपाली भाषा, साहित्यलाई निरन्तर माया गर्नुहुने ६२ जना झिल्काकारहरूको सहभागीता रहेकोे थियोे ।
झिल्का कविताको उन्नयन, विकास र प्रवर्द्धन गर्नका लागि समाजले विभिन्न क्रियाकलापहरू सञ्चालन गर्दै आएको छ । त्यसमध्ये साप्ताहिक झिल्का लेखन अभ्यास शृङ्खला पनि एक भएको र साप्ताहिक रूपमा निरन्तर सञ्चालन गरिने यसका परिकल्पनाकार एवम् झिल्का कविताका प्रवर्तक वसन्त अनुभवले बताउनुभयो ।
शृङ्खलाबारे प्रष्ट पार्दै शृङ्खला संयोजक/प्रशिक्षक म्यामराज राईले हरेक हप्ताको शुक्रवार राति १२ बजे अभ्यासको सूचना झिल्का कविता फेसबुक समूहमा राखिने र उक्त सूचनाको कमेन्टमा इच्छुक झिल्काकारज्यूहरूले स्वत:स्फूर्त आफ्ना उत्कृष्ट झिल्काहरू राखेर सहभागीता जनाउन सकिने बताउनुभयो ।
झिल्का कविता, नेपाली माटोमा उम्रिएको एक नवीनतम एवम् लघुतम प्रयोगवादी काव्य विधा हो । जसमा विम्ब, प्रतीक र अलङ्कारको प्रयोग गर्दै चोटिलो पाराले तीन हरफमा लेख्ने गरिन्छ । जसको पहिलो हरफले विषयवस्तुको उठान, दोस्रो हरफले विषयवस्तुको बिस्तार र तेस्रो अर्थात् अन्तिम हरफले भावलाई उत्कर्षमा पुर्याई समापन गर्ने गर्दछ । यसका प्रत्येक हरफमा तीन/तीन शब्दहरू हुने गर्दछन् । जम्माजम्मी नौ वटा शब्दमा एउटा झिल्का कविता पूरा हुने भएकोले यसलाई नौ शब्दको कविता पनि भन्ने गरिन्छ ।
झिल्का कविताका तीन हरफ मध्ये पहिलो र तेस्रो हरफमा अन्त्यानुप्रास हुनुपर्ने विधान छ भने दोस्रो हरफ स्वतन्त्र हुने गर्दछ । अर्थात् दोस्रो हरफको अन्त्यमा पहिलो र तेस्रो हरफको अन्त्यानुप्राससॅंग मिल्ने समध्वनिक अक्षर नभएमा उत्तम मानिन्छ ।
साप्ताहिक झिल्का लेखन अभ्यास शृङ्खला- २७ मा सहभागी झिल्काकारहरूका सुन्दर झिल्काहरू-
…
१,
राई माइलाको गाउॅं
कुर्सीमा लडाइॅं भइरहे
उजाड बन्छ ठाउॅं ।
२,
ऊ मुस्कुराउनलाई मुस्कुराउॅंछ
दुनियाँ छ बेमतलब
दु:ख पसिनामा बगाउॅंछ ।
३,
पाएमा अलकत्रा खान्छु
सोचेँ, सित्तैको बेसाहा !
मेहनतले दैनिकी धान्छु ।
- म्यामराज राई
…
१,
गर्नुगर्यो ऎनाले यार
भ्रष्टाचारी खोज्दै थिएँ
देखायो आफ्नै अनुहार !
२,
मिलेर खाउँ पालैपालो
सकेसम्म छिराऔँ सत्तामा
भाइ, भतिजा सालो !
३,
गुन्डागर्दी एउटै नीति
पार्टी झन्डा अलगअलग
भ्रष्टाचारको बस्यो थिति । - वसन्त अनुभव, घोराही उपमहानगरपालिका १४ दाङ
…
१,
स्वार्थ बाँडेर पालो
राष्ट्रिय सम्पत्ति सके
खान गर्छन् हातेमालो !
२,
बाढी पहिरोले सताएको
राहत दिनु छैन
मुखले मात्रै बताएको ।
३,
राज्यसत्ता दलाल भयो
आर्थिक उन्नति छैन
ऋण बढेर गयो । - रबि पौडेल ,दक्षिण भारत पाण्डेचरि
…
१,
गरौँ आफैँले हिम्मत
नजान्दाको परिणामले यहाँ
नहोस् कसैको हबिगत।
२,
आँट गर्दको परिणाम
एकदिन सफल भई
अनि बन्छ काम।
३,
भइन्छ गर्दागर्दै सफल
एक पटक बिग्रिॅंदैमा
नगरौँ है अदलबदल। - अर्जुन प्रसाद चौलागाई, रामेछाप-सुनापति-१
हाल:-अमेरिका, बोस्टन
…
१,
पीडित जनता मरिरहे
छैन सरकारको ध्यान
सत्ताको पिर परिरहे । - वेल थोकर
…
१,
खोज्दा देशको पहरेदार
भाग बाली संसदमा
भेटिए विदेशीको यादगार ।
२,
कता खोज्ने बास
मानिस जता गयो
उतै खोसियो गाँस।
३,
जति भागे पनि
अगाडि ठिङ्ग उभिन्छ
समस्या दर्शक बनी। - सुरेशकुमार पाण्डे दाङ घोराही १८
…
१,
राम्रो हुँदा तानातान
बिग्रियो परिस्थिति अब
ढुङ्गा मुढा हानाहान ।
२,
हुँदाहुँदै बिगार्यौ मति
अब भन कसरी
सुधार्छौ यो गति ? - अनुग्रह राना मगर ‘पुष्प’, पाँचखपन न.पा. – ६ संखुवासभा
…
१,
हाम्रा सबै गाउँ
सत्तामा होडबाजी चलिरहे।
उजाड हुनेछन् ठाउँ!
२,
कामको कर्म गर
सानोतिनो भन्दैन कामल।
कर्ममा भर पर।
३,
संसार जाली भएछ
लुटपाट कमिसन खानेलाई!
देशमा ताली गएछ। - बेदु न्यौपाने
…
१,
मेरो प्यारो आदर्श
भुल्न कहाँ सकिन्छ
सम्झिॅंदा मनमा हर्ष ।
२,
सकेसम्म हिम्मत गर
हातमा सीप भएपछि
पर्दैन कसैको भर ।
३,
साउन महिनाको संस्कार
बुझ्नु केही छैन
देखासिखी बन्यो आधार । - लक्ष्मण देउवा डोटी, हाल भारत चेन्नई
…
१,
देश लुट्नेको होडबाजी
कतै छैन सुशासन
उस्तै सबै पाजी।
२,
उठ युवा अब
राष्ट्र बर्वाद भो
राष्ट्र बन्छ तब। - तेजप्रसाद खनाल, लमही दाङ
…
१,
प्रतिभा योग्यता छोडेर
भाइ भतिजा भन्नेलाई
सम्मान हात जोडेर ?
२,
प्रतिभाको गला कस्नेहरू
ह्वास्स काखी गनाउँला
काखीको न्यानोपनमा बस्नेहरू।
३,
घर फर्की आए
उजुरी सुन्ने हाकिम
हिलोमा लतपत पाए । - दिवाकर चाम्लिङ्ग राई, खर्साङ्ग ,दार्जीलिङ
…
१,
गर्नुछ असल कर्म
इमानदार राष्ट्रसेवक बने
हुनेछ ठुलो धर्म ।
२,
देशमा बिग्रियो थिति
सत्ता आलापालो गर्ने
नेताले बनायो नीति ।
३,
पालोपालो सत्ता चलाऔॅं
जनताले जेसुकै भनून्
कुकर्मको फायल जलाऔॅं । - राज कुमार राजभण्डारी खोटाङ्गे
मध्यपुर ठिमी ५ संगम कोलोनी राधे राधे भक्तपुर ।
…
१,
लुट्नसम्म त लुटे
शक्तिको आडमा भएर,
निर्दोष बनी छुटे ।
२,
रजाइँ तिनकै भयो
जसले बदमासी गर्दै,
सत्तामा आज गयो।
३,
थालेका छन लुट्न
अनुहार मात्रै फरक,
सिपालु गफ चुट्न। - शंकर कार्की, मकवानपुर ।
…
१,
घोडाको हिँड्ने चाल
अनौठो लाग्ने सबैलाई
पहाडमा उसको काल।
२,
बाध्नु मायाको डोरी
कस्तो रमाइलो हुन्छ
काली देखिने गोरी। - नवराज भट्ट, कञ्चनपुर
…
१,
तिमीहरू कुर्सी तानातान,
साच्चै भेडा बनायौ
जनतालाई छैन सम्मान ।
२,
भगवान आमा मेरै ,
खायो कि खाएन,
पिर लिन्छिन् धेरै । - भुपेन्द्र राना मगर, धादिङ
…
१,
फुलेपछि फूल झर्नैपर्छ
यी लेन्डुप दोर्जेहरुलाई
देश निकाला गर्नैपर्छ ।
२,
गैरी खेत झरेर
आउन सकिन प्रिय
म बन्धनमा परेर ।
३,
भाँडा राम्रो तामाको
कहिले बिर्सन नसकिने
माया मिठो आमाको । - दीप गोले तामाङ, रौतहट
…
१,
भ्रष्टाचार सबै नेताहरू
कुनै अछुत रहेन
चार दिवालभित्र केटाहरू ।
२,
देश लुट्नेको होडबाजी
चमत्कार देखाउनुपर्छ हेर
प्रथम हुनेभो काजी। - एवाइ प्रभात
सहिदभुमि धनकुटा
…
१
जनतालाई सधैँ पीरमा
फेरबदलको यो राजनीति
कहिले हुन्छ स्थिरमा।
२
जेष्ठ नागरिकले चलाउँदै
देशको हविगत अब
उठ्न नसक्ने थलाउँदै। - सङ्गीता खरेल, चन्द्रागिरी ८ काठमाडौँ
…
१,
नदिने बज्यैले बार्छन्
साँझ पर्यो भनेर
चिम्टालाई चिम्टेले टार्छन् ।
२,
हेरेर मन बुझाउनेहरू
घुटुक्क थुक निलेर
कतिपय हुन्छन् झुक्याउनेहरू।
३,
सावनमा वर्त बर्सेनि
राल चुहाउँदै खानेकुरामा
सिद्धि होला अनि। - दिल ठकुरी दार्जिलिङ
…
१,
हरियो चुरा लाउँला
व्रत बसेर सोमबारको
मन्दिर हामी जाउँला ।
२,
जोगाउन गाह्रो सत्ता
बढी पहिरोमा परेर
जनता छन् बेपत्ता ।
३,
राम्रो नाम कमाऔँ
गुरुहरूको सम्मान गर्दै
गुरु पुर्णिमा मनाऔँ । - अनिता भण्डारी ताप्लेजुङ
…
१,
सङ्कल्पमा प्रभु चयन
कुकर्म गर्दा आफ्नै
साक्षी हुने नयन ।
२,
सुकर्म मानवता धर्म
परिश्रमको फल सुखदायी
कल्याण हिन्दुत्व मर्म ।
३,
दुष्टलाई प्रभुले दमन
मरेर जाने चोलामा
बेकारमा ईर्ष्या जलन । - कार्की डिबी माकुम, सुनवल-४, नवलपरासी
…
१,
भयो सधैं हार
लाग्छ मनमा छटपटी
युद्द गरेछु बेकार।
२,
छैन मनमा शान्त
जान मन लाग्छ
खोजी ठाँउ एकान्त।
३,
बन्नु असल साथी
कोही छैन हजुर
ईश्वरभन्दा त माथि। - काजल न्यौपाने, भोजपुर
…
१,
सत्ताधारीको साझा अभ्यास
राजनैतिक खेल खेल्दाखेल्दै
देशको स्थिति सत्यानास ।
२,
अनुशासनको पद्धति नबसाएसम्म
राज्य चलाउनेहरूको बेथिति
हेर्दाहेर्दै लागिरहेछ अचम्म ।
३,
प्रजातन्त्रवादका खोक्रा नारा
स्वतन्त्र हुँदा निरङ्कुसताबाट
ठगिँदारहेछन् जनता सारा । - गुणनिधि घिमिरे, अमेरिका
…
१,
त्रिशुलीमा पल्टेर गाडी
नेपाली यात्रु बेपत्ता
छामियो नेताको नाडी ।
२,
जनताको स्थिति बेहाल
चालेनन् राम्रो चाल
बुन्छन् षडयन्त्रको जाल ।
३,
दुःखीले गरेर काम
पर्याप्त पाएनन् माम
कमाउँछन अरूले दाम । - डिल्लीराज (राजेन्द्र) भुसाल, सन्धिखर्क-१, कुर, अर्घाखाँची
…
१,
मध्यरातमा रुम मिलाए
मुलुक उथलपुथल भएर
कयौँ मानिसहरू बिलाए । - नागेन्द्रप्रसाद यादव , दाङ
…
१,
नगरे बादलले घात
हेर्नेछु आज आनन्दले
मैले जुनेली रात ।
२,
जून हेर्दै टोलाउँछु
सानी तिम्रो सम्झनामा
एकोहोरो मैले बोलाउँछु।
३,
सगैँ जून हेरेको
याद आयो आज
तिमीले अङ्गालोमा बेरेको । - अमृत कोइराला, पोखरा -१८, चंखपुर
…
१,
जिन्दगीमा घाम पानी
प्यारीको छैन यहाँ ,
हेर्नुहोस् नराम्रो बानी ।
२,
आँगनमा सजाए फूलबारी
तिमी मलाई भेट्न ,
आऊ घरी घरी ।
३,
गर्नु होला कर्म
राष्ट्रसेवक नै भएपछि ,
सुरक्षा ठूलो धर्म । - श्रीकृष्ण धामी – बझाङ
…
१,
त्रासित हरिणी सुन्दरी
समाउन सकिन्थ्यो किन
भाला सोझ्याउँछन् कठैबरी !
२,
आत्माको ज्योति चम्केको
मानवका नष्ट हृदयहरू
भाला खुकुरीमा लम्केको।
३,
बुझेनन् सज्जनले समस्त
प्रभातकी किरणमै धब्बा
तर्कवितर्कमा छन् व्यस्त । - घनश्याम पन्त, हरिवन सर्लाही
…
१,
कुकुर बिराला देखेर
आजै होसियार बनौँ
जीवन गाथा लेखेर !
२,
तिमीले लेखेको कलम
खुसीले मन सन्तुष्टि
मलाई भयो मलम !
३,
चौतर्फी गरेर छल
तिम्रो भ्रष्ट मतिले
गाउँघर बनायौ कल ! - आर्त अकुलीन
…
१
परिवर्तनशील हुँदोरहेछ समय,
कस्तो जमना यो
भाग्यो लाज, भय ।
२
सदन पनि कस्तो
डाक बडाबड गर्ने
लिलाम बजार जस्तो ।
३,
गर्नै पर्यो कुरा
माया अनि पिरतिका
बोक्छ कुराको चुरा । - दीपा समभाव, खोटाङ्ग
…
१,
सारो राम्रो भयो
ताला चाबी सबै
चोरको हातमा गयो !
२,
मुखमा ताला लाऊँ
निर्भय भै अब
सबै मिली खाऊँ ! - विवश पारदर्शी, झापा
…
१,
परिश्रम गर्न नसके
फलको आशा नगर्नु
अरूको हेपाइमा नफसे ।
२,
फूलको बासना हुन्छ
पुतलीले रस चुसेर
असल व्यक्ति रुन्छ ।
३,
राजनिती फोहोरी खेल
मैदानमा लड्न सक्दैन
कुर्सीमा सधैंभरि झेल । - अम्बिका अधिकारी, झापा बिर्तामोड
…
१,
बोकेर खोक्रो नारा
सदन भित्र देखाउँछन्
झुटो आश्वासन सारा।
२,
महॅंगीले जनता मर्दैछन्
सरकार सत्तामोहमा परेर
अन्याय धेरै गर्दैछन् ।
३,
नेता सदनमा हल्लिएका
सोझा निमुखा जनता
कर तिर्नमा डल्लिएका। - कला ढकाल झापा
…
१,
पेशा गर्छ चोर
उसैको हुन्छ दिन
कुरा गर्छ सोर !
२,
कोठाभित्रको त्यो राजनिती
बुझ्नै सकेनन् कसैले
कालो धन्दाको रणनीति !
३,
टुक्केको कुरा टुक्कैमा
कुरा गर्छ मुखैले
विकास गर्छ मुक्कैमा ! - धनमाया चौधरी, कैलाली
…
१,
सधैं पीडा हत्तेरी
असार गयो आयो
साउने झरी फेरि!
२,
दाउरा , घाँस, पँधेरो
गर्न गाह्रो बर्खामा
मन हुन्छ अँधेरो! - साबित्री प्याकुरेल, धादिङ
…
१,
यता लापत्तालाई खोज
उता गर्छन् नेताहरू
कुर्सीमा बसेर मोज ।
२,
नराम्रो देशको हाल
एक आपसमा नेताज्यूलाई
कुर्सीमा भयो मालामाल ।
३,
राजनीतिक भो लुट
राजा आऊ देशमा
भ्रष्टाचारीलाई छानेर भुट । - केसर बोहरा ( सङ्घर्ष ), सुदूरपश्चिम अछाम (हाल भारत)
…
१,
मान्छेलाई जितेर भोकले
युगौँ दास बनायो
हैरानी थप्यो शोकले ।
२,
मोबाइल शत्रु बन्यो
आफैंलाई बिर्सेर पो
मान्छेले धरातल खन्यो । - नन्दलाल आचार्य, सिद्धार्थटोल, उदयपुर
हाल- एनेलकुटी, सिरहा ।
…
१,
बाटो अवरुद्ध पहिरोले
जतिसुकै ढ्याङ्ग्रो ठटाउनु
सुन्दै सुन्दैनन् बहिरोले ।
२,
नगर्नु जाती जानाजानी
बर्सातमा खन्याएको बजेट
बेकार बालुवामा पानी ।
३,
हुञ्जेल हेर्यो तमासा
समयले नेटो काटेपछि
हेर्दाहेर्दै पल्ट्यो पासा । - कृष्णकुमार वैद्य, बनेपा ९, काभ्रे
…
१ ,
पोको खोलेर जोड्नु
धोको पुर्याई सधैँ
मित्रता कहिल्यै नतोड्नु ।
२ ,
जीवन हाम्रो छोटो
सदा हाँस्नु खेल्नु
लगाएर न्यानो भोटो । - हरिगोपाल न्हुच्छेँप्रधान, काभ्रे, बनेपा १४ साँगा बजार
…
१,
चिन्ताले मन खायो
श्रावणको भेलपछि अब
भदौरे गर्मी आयो ।
२,
अखण्ड राष्ट्र रही
नेपाली भएको गर्व
हिमाल माथ सही ।
३,
युवाका पाउ अडिए
देशमा सुशासन आउने
विगतका याद भरिए । - भगवती दवाडी ,झापा
…
१,
भयो मेरो हार
दुःखी बने मन
कसरी तर्ने जङ्घार ?
२,
मिठो बोली राम्रो
हेरिरहेको तिमीलाई पनि
कसरी बन्यो चाम्रो ?
३,
संसारमा आएको माया
भुलिदिने तिमी मलाई
बनिरहन्छु तिम्रो छाँया। - नीमा छिरिङ भोटिया, जलढका कालेबुङ
…
१.
झुटको खेती गरेर
के पाउॅंछौ आखिरमा
जान्छौ एकदिन मरेर।
२.
बिग्रेपछि सत्ता समीकरण
जनतालाई गलाको पासो
नेताहरूलाई पोषण भरण। - पुरुषोत्तम फुयाल, खोटाङ
…
१,
अँध्यारोमा प्रकाश छर्ने
गुरु टुकी हुन्
अज्ञानीलाई ज्ञान भर्ने।
२,
धैर्यशाली हुन्छन् गुरु
सहनशीलताका खानी पनि
दिन्छन् ज्ञान खुरुखुरु।
३,
आज्ञा गुरुको मानौँ
माने गुरुको आज्ञा
विद्वान बनिन्छ जानौँ। - सतीश पण्डित, भानु -६, चुँदी तनहूँ
(हाल चनपा – ६ मातातीर्थ)
…
१,
रगत पसिना बगाउँछु
मेहनत गरेर म
आफ्नै पौरखले रमाउँछु।
२,
हातमा मेहदी चुरा
शिवको अर्चना गरेँ
सपना भयो पूरा । - प्रविना प्रयासी ओखलढुंगा
…
१,
मुखले बरबराए भाइ
विपरीत नगर्न भन्दा
रहे मनमौजीमा दाइ ।
२,
हिसाब त मिलाएको
कताबाट चित्त बुझेन
चुहिने गोजी सिलाएको ।
३,
कचकचमा व्यस्त छोरा
भनेको मनमा नराखे
बोक्नुपर्ला भविष्यमा बोरा । - लक्ष्मी रिजाल, कञ्चनरूप-१२, रूपनगर, सप्तरी ।
…
१,
समयले छल गर्यो
गन्तव्यमा पुग्न नपाउँदै
जिन्दगीको आशा मर्यो ।
२,
सत्य यही हो
सहाराबिनाको जिन्दगी हजुर
बाँचेर के भो ?
३,
बचाउको नारा करायो
छोपेर होला कलियुगले
गुरुप्रतिको श्रद्धा हरायो । - त्रिलोचन भण्डारी, मेचीनगर,झापा
…
१,
मान्नु चाड पर्व
मितव्ययी बनी सबैले
सँस्कृतिको गर्नु गर्व।
२,
लगाएर हरियो चुरा
उपवास बसी गरेको
हुन्छ मनोकामना पूरा।
३,
सुरु भयो साउन
नरनारी मिलेर जाऊँ
शिवलिङ्गमा जल चढाउन l - अरुण कुमार भुजेल, गोरुबथान,कालेबुङ,भारत
…
१.
श्रावणका हरिया चुरा
मेहेन्दीले रङ्गिएका हत्केला
नहानियोस् संस्कारमा छुरा।
२.
श्रावण मासका सोमबार
उपसना उनै भोलेको
महिमा जसको अपरम्पार।
३.
शिव मन्दिरमा जल
एकाग्र चित्त भक्त
खोजिन्छ मिठो फल। - तोया नाथ चापागाईं, दमक, झापा, नेपाल
…
१,
सावनको महिना हरियो
परदेश लागेको उनी
यसरी मझधारमा परियो ।
२,
हरियो साडी चुराको
ल्याईदिउला भन्थ्यौ तिमीले
भरोसा लागेन कुराको ।
३,
सन्चै होला कहन्छु
कुशलताको कामना गर्दछु
पीर जतिसुकै सहन्छु । - मोती योन्जन सुब्बा, दार्जिलिङ निमकी डाँडा।
…
१,
गर्दाखेरि कर्तव्य वहन
गरिन्छ यो देशमा
देशभक्तको पुत्ला दहन l
२,
सरकार हुँदा थपना
अरथी उठ्यो न्यायको
ब्रह्मलीन भए सपना l
३,
सतीले सरापेको देशमा
विधिसम्मत गर्न खोजे
फसाइन्छ जघन्य केसमा l - बाबुराम गौतम, गुल्मी
…
१,
हरियालीले पाखा छायो ।
किसान खोज्दै खोरियामा
मजाले फलफूल खायो ।
२,
हिलाम्मे सडक छाडेर ।
ठेकेदार पस्यो नगरमा
रातो झण्डा गाडेर ।
३,
आषाढमा वजेट रित्तियो
बाटोघाटो कमसल बनाइ।
योजनाको काम सिद्धियो । - हिरालाल न्यौपाने ,बानपा ८ काेटमाैला, सल्यान
…
१,
नहिॅंड्नु कुबाटो रोजेर
समय नै ढल्किएपछि
पाइन्न इज्जत खोजेर! - मन्दिरा सेढाई, मलेखु, धादिङ
…
१,
दर्कियो पानी सानू
असारे झरी यो
चुहिएला कि छानु। - शोभा आचार्य गौतम, काठमाडौँ
…
१,
नझुकेर फलेको हाँगो
कहाँ भेटिन्छ भन
जिन्दगी औषधी हो ।
२,
बटुलेर जिन्दगीलाई संसारमा
हिॅंड्ने आदत बसाउॅंदैछु
सबैको सामु सवारमा।
३,
सम्झेर आफ्नै यार
शिर निहुराएर बारम्बार
झुक्याएर आफ्नै अनुहार । - ईश्वर साउद (भिक्षु), रामारोशन गाउँपालिका ६ सुदुरपश्चिम अछाम
…
१,
फूल फुल्यो बारीमा
नारी चट्टै सुहाँउछिन्
लगाउँदा रातो सारीमा ।
२,
देशै भष्ट्राचारको थलो
राजनीति मात्र खेल्ने
नेता गर्दैन भलो।
३,
निर्दोष फसाउने जाल
नेताहरूले नै बुनेपछि
हुन्छ देशको बेहाल । - मन्जु बोहरा, सुदुरपश्चिम बझाङ
…
१,
सत्तामा गए पुराना
लछार पाटो लाउॅंदैनन्
गरिबको उस्तै छाना ।
२,
बाढी, पहिरो गएर
दु:ख पाए जनताले
जोखिम पूर्ण भएर । - बुद्धिमान दनुवार ( सुरुङ्गेली कान्छो ), कनकाई ४ झापा
…
१
देशमा हुनुपर्छ शान्ति
रिस ईर्ष्या क्रोधले
हट्छ मनको कान्ति ।
२
चिताले मरेकोलाई जलाउँछ
भन्छन् चिन्ताले जिउँदोलाई
रोगव्याधले मान्छेलाई ढलाउँछ ।
३
हुनुहुन्न मान्छे चाम्रो
असल कुरा सिक्नलाई
देखासिकी गरे राम्रो । - जयनारायण नेपाल, इलाम (हाल सूर्यविनायक २
बालकोट ,भक्तपुर)
…
१,
भरिॅंदा मनमा अहङ्कार
नोक्सान हुन्छ आफ्नै,
भोग्नुपर्छ जहिल्यै हार ।
२,
रिसले आफैँलाई खान्छ
जान्दछ सम्मान जसले
उसैको पहिचान लान्छ ।
३,
रिस ठूलो रोग
जाग्छ हरपल मनमा
बदला लिने भोग । - सीमा कार्की समर्पण, मेलचोक पर्सा
…
१,
गणतन्त्र भनी खोक्छौ
आफ्नाको गल्तीमा पनि
फेरि आफैँ बोक्छौ । - प्रेम थापा “मन”बागलुङ
…
१,
कविता फलेन कविहरू,
फलाउने उपाय खोज्दा,
बिगारे कविका छविहरू ।
२,
रहरमा शहर पस्ने,
फसेर कुलतमा भरे,
उपाय सुधारशालामा बस्ने।
३,
विनाअभ्यास केही नखोज
गन्तव्य छिचोल्न गाह्रो
सहज पदमार्ग रोज । - मनोहरी पौडेल, गैँडाकोट १
…
१,
मेरो गाउँ नागबेली
रहस्यमय जीवन बित्यो
पुरानो शैलीमा नखेली।
२,
दिनमा कोदाली खनेर
आमाले खाजा दिनुहुन्थ्यो
छोरी भोकाई भनेर ।
३,
आनन्द उही आउँछ
मेरो प्यारो जन्मभूमि
सधैँ माया लाउँछ । - ललिता गिरी, सिन्धुली (हाल काठमाडौँ, नेपाल)
…
१,
गुरु पूर्णिमामा आयो
गुरुलाई आदरको ओइरो,
जीवन सार्थक लाग्यो।
२,
दिवसको जस्तै दिन
हरेक दिन भइदिए,
वृद्धहरू रुन्थे किन ? - सुस्मिता अधिकारी, काठमाडौँ
::::::::जय झिल्का साहित्य ! ::::::::::
