साउदी अरब (जेद्दा): रोजगारीको सिलसिलामा साउदी अरबको जेद्दामा रहेका नेपाली श्रमिकहरुको संस्था ‘नेपाली श्रमिक समाज साउदी अरब, जेद्दा’ ले हालै नेपालको रसुवामा आएको विनाशकारी बाढीपहिरोबाट प्रभावित नागरिकको सहयोगार्थ प्रधानमन्त्री दैवी प्रकोप उद्धार तथा राहत कोषमा ९५ हजार ३ सय ४६ रुपैयाँ (रु. ९५,३४६) जम्मा गरेको छ।
बाढीपहिरोका कारण देशले ठूलो जनधनको क्षति व्यहोर्नु परेपछि नेपाल सरकारले उद्धार र राहतका लागि गरेको अपिललाई मनन गर्दै यस संस्थाले सुरुवाती दिनदेखि नै सक्रियता देखाएको थियो। प्रवासमा रहेर पनि आफ्नो देश र दाजुभाइमा परेको अकल्पनीय विपत्तिमा मूकदर्शक नबनी, यहाँ कार्यरत नेपाली श्रमिकहरुले आफ्नो क्षमताअनुसार स्वस्फूर्त रूपमा आर्थिक सहयोग संकलन गरेका थिए।
भर्खरै केहि महिना अगाडि स्थापना भई उदीयमान चरणमा रहेको यस संस्थाले छोटो समयमै देशप्रतिको उत्तरदायित्व बोध गर्दै यस्तो मानवीय कार्य गरेको हो। संस्थाका अध्यक्ष मन्जुर अलि मियाँले देश दुख्दा प्रवासमा रहेका नेपालीहरुको मन पनि दुख्ने बताउँदै विपत्तिको यो घडीमा सानै भए पनि सहयोग गर्न पाएकोमा सन्तोष व्यक्त गरे।
अध्यक्ष मियाँले भने, “हामी भर्खरै स्थापना भएर अघि बढ्दै गरेको संस्था हौं। तर देशमा यस्तो अकल्पनीय विपत्ति पर्दा हामी चुप लागेर बस्न सकेनौं। सबै साथीहरुले आफूले सकेको सहयोग गर्नुभएको छ। आगामी दिनहरुमा पनि देश र जनतालाई पर्ने हरेक अप्ठ्यारोमा हाम्रो संस्थाले यस्तै सामाजिक तथा मानवीय सेवामा निरन्तर हातेमालो गरिरहनेछ।”
साउदी अरब (जेद्दा) — नेपालको रसुवा र नुवाकोट क्षेत्रमा आएको विनाशकारी बाढीपहिरोबाट प्रभावित नागरिकहरूको राहतार्थ साउदी अरबको जेद्दामा स्थापित ‘नेपाली युवा क्लब, जेद्दा’ ले ठूलो आर्थिक सहयोग प्रदान गरेको छ। क्लबले बाढीपीडितहरूको सहयोगका लागि संकलन गरेको कुल ५,००,०००/- (पाँच लाख) रुपैयाँ जेद्दास्थित नेपाली महावाणिज्यदूतावासका महावाणिज्यदूत श्री पारस पण्डितलाई औपचारिक रूपमा हस्तान्तरण गरेको छ।
मातृभूमिमा प्राकृतिक विपत्ति पर्दा प्रवासबाट मलम लगाउने उद्देश्यले क्लबले ‘बाढी पीडित सहयोगार्थ’ विशेष अभियान सञ्चालन गरेको थियो। सोही अभियान अन्तर्गत साउदी अरबका विभिन्न क्षेत्रमा कार्यरत नेपाली श्रमिकहरूबाट उक्त ५ लाख रुपैयाँ संकलन गरिएको हो। महावाणिज्यदूत पण्डितलाई उक्त राहत रकम हस्तान्तरण गर्दै क्लबले प्रभावित क्षेत्रका नागरिकहरूको छिटोभन्दा छिटो उद्धार, राहत र पुनर्थापनामा महत्त्वपूर्ण सहयोग पुग्ने विश्वास व्यक्त गरेको छ।
यस परोपकारी तथा मानवीय अभियानमा साउदीमा कार्यरत नेपालीहरूले आफ्नो पसिनाको कमाइबाट स्वस्फूर्त रूपमा सहयोग गरेका थिए। अभियानलाई सफल बनाउन विभिन्न कम्पनीमा कार्यरत नेपाली साथीहरूबाट महत्त्वपूर्ण आर्थिक योगदान प्राप्त भएको थियो। सहयोगदाता कम्पनी तथा व्यक्तिहरूको विवरण यसप्रकार रहेको छ:
सनैया-२ (UAC कम्पनि): सिद्ध ओली, अमरराज गिरी र चित्र बहादुर डाँगी।
वेस्टर्न जाना कन्ट्राक्टिङ: बल बहादुर मगर।
बिन्जागर कम्पनि: रमेश शाह र मदन सिलवाल।
सनैया-१: युवराज थापा मगर।
बिजादिन कम्पनि: मिथुन थापा, ईश्वर श्रेष्ठ र पदम रावत।
नेपाली युवा क्लब, जेद्दाका अध्यक्ष राम थापाले महावाणिज्यदूतलाई रकम हस्तान्तरण गरेपश्चात यस अभियानमा जोडिएर मातृभूमिको दुःखमा साथ दिने सबै सहयोगी मनहरूप्रति विशेष कृतज्ञता प्रकट गर्नुभएको छ। उहाँले भन्नुभयो, “यो पवित्र अभियानमा जोडिनु हुने सम्पूर्ण सहयोगदाता, अभियन्ता लगायत क्लबका साथीहरूमा हार्दिक आभार व्यक्त गर्दछु।” अध्यक्ष थापाले प्रवासको व्यस्त दैनिकी र कडा परिश्रमका बाबजुद पनि देशलाई विपत्ति पर्दा निःस्वार्थ रूपमा सहयोग गर्ने सबै सहयोगीहरूको उच्च मूल्यांकन गर्दै आगामी दिनहरूमा पनि यस्तै साथ र सद्भाव निरन्तर प्राप्त हुने विश्वास व्यक्त गर्नुभयो।
सन् 2010 मा स्थापना भएको नेपाली युवा क्लबले प्रवासमा रहेका नेपालीहरूको हकहित र नेपालमा पर्ने विपत्तिहरूमा निरन्तर सहयोग गर्दै आइरहेको छ। हस्तान्तरण गरिएको यस रकमले रसुवा र नुवाकोटका बाढीपीडितको घाउमा मलम लगाउन र उनीहरूको दैनिक जीवनयापन सहज बनाउन ठूलो भूमिका खेल्ने अपेक्षा गरिएको छ।
साउदी अरबको जेद्दामा स्थापित नेपालीहरूको संस्था तमु धीं जेद्दाले नेपालको रसुवा र नुवाकोट क्षेत्रमा आएको विनाशकारी बाढीबाट प्रभावित पीडितहरूको राहतका लागि आर्थिक सहयोग प्रदान गरेको छ। संस्थाले बाढीपीडितको सहयोगार्थ संकलन गरेको ३ लाख १३ हजार ३३३ रुपैयाँ महावाणिज्यदूतावास जेद्दालाई हस्तान्तरण गरेको हो।
नेपाल सरकार र महावाणिज्यदूतावास, जेद्दा (साउदी अरब) ले बाढीपीडितको सहयोगका लागि गरेको अपिललाई आत्मसात् गर्दै तमु धींले उक्त राहत संकलन अभियान सञ्चालन गरेको थियो। संकलित नेपाली रुपैयाँ ३,१३,३३३/- (अक्षरेपी: तीन लाख तेह्र हजार तीन सय तेत्तीस रुपैयाँ) जेद्दास्थित नेपाली महावाणिज्यदूत श्री पारस पण्डितलाई हस्तान्तरण गरिएको छ। प्रवासमा रहेर पनि आफ्नो मातृभूमिमा परेको प्राकृतिक विपत्तिमा मलम लगाउने र नागरिकको उद्धार तथा राहतमा हातेमालो गर्ने उद्देश्यले यो सहयोग गरिएको हो।
यस मानवीय परोपकारी अभियानमा तमु धीं जेद्दा परिवारका साथै साउदी अरबका विभिन्न क्षेत्रमा कार्यरत श्रमिकहरूले स्वस्फूर्त रूपमा सहयोग गरेका थिए। विशेषगरी अलमराई कम्पनीका मदिना, यान्बु र उम्लुज शाखामा कार्यरत नेपाली तथा गैर-नेपाली सहयोगी दाताहरूको महत्वपूर्ण योगदानबाट उक्त रकम संकलन गरिएको तमु धीं जेद्दाका अध्यक्ष बेद तमुले बताएका छन् ।
रकम हस्तान्तरण गर्दै तमु धीं जेद्दाका अध्यक्ष बेद तमुले यस अभियानमा जोडिएर सहयोग गर्नुहुने सम्पूर्ण सहयोगी मनहरूलाई हार्दिक आभार तथा धन्यवाद व्यक्त गर्नुभएको छ। उहाँले अभियानलाई सफल बनाउन विशेष भूमिका खेल्ने तथा समन्वय गर्ने अनिल बराल, राम नारायण रावत, शान्त पोखरेल, रणजीत तथा गंगा छेत्रीप्रति विशेष धन्यवाद ज्ञापन गर्नुभयो। साथै, अध्यक्ष तमुले आगामी दिनहरूमा पनि मातृभूमिमा पर्ने हरेक संकट र प्रवासका सामाजिक कार्यमा सम्पूर्ण नेपालीहरूबाट यस्तै साथ, सहयोग र सद्भाव निरन्तर प्राप्त हुने विश्वास व्यक्त गर्नुभएको छ।
साउदी अरबमा रहेका पर्वत जिल्लावासीहरूलाई एउटै साझा सामाजिक चौतारीमा जोड्ने उद्देश्यका साथ ‘पर्वत समाज साउदी अरब’ गठन गरिएको छ। प्रवासमा रहेका पर्वतवासीहरूबीचको व्यापक छलफल र आपसी सहमतिपछि गत शुक्रबार, २५ सेप्टेम्बर २०२६ का दिन बासुदेव सापकोटाको संयोजकत्वमा संस्थाको तदर्थ समिति सर्वसम्मत रूपमा गठन गरिएको हो। यसबाट साउदी अरबमा रहेका सम्पूर्ण पर्वतवासीहरूलाई एकै ठाउँमा जोड्ने र सहकार्य गर्ने महत्वपूर्ण प्रारम्भिक आधार तयार भएको निष्कर्ष निकालिएको छ।
नवगठित तदर्थ समितिको महासचिवमा ओम प्रकाश काफ्ले, सचिवमा बसन्त रिजाल, कोषाध्यक्षमा नारायण प्रसाद भुसाल र सह–कोषाध्यक्षमा विष्णु प्रसाद श्रेष्ठ चयन हुनुभएको छ। यसैगरी, समितिका सदस्यहरूमा प्रेम खनाल, टंक प्रसाद काफ्ले, सुरज तिवारी, अमृत सेवा, गोकुल जीसी, शिव भुसाल, धनन्जय पौडेल, विश्व बेग र विवेक कार्की सर्वसम्मत रूपमा चयन हुनुभएको छ। संस्थाको कामलाई थप प्रभावकारी बनाउन आगामी दिनमा आवश्यकता अनुसार एक जना उपसंयोजक र थप चार जनासम्म सदस्यहरूलाई समितिमा मनोनित गरिने योजना रहेको छ।
प्रवासमा रहेका पर्वतवासीहरूलाई एकताबद्ध गर्दै सामाजिक सेवा, सहकार्य र आपसी सद्भावलाई प्राथमिकतामा राखेर संस्था अगाडि बढाउने मुख्य उद्देश्य समाजले लिएको छ। यसका साथै, साउदी अरबमा रहेका पर्वतवासीहरूलाई समस्या पर्दा आपसी सहयोग आदानप्रदान गर्ने र विभिन्न सामाजिक, मानवीय, कल्याणकारी तथा रचनात्मक गतिविधिहरू सञ्चालन गरिनेछ। पर्वत जिल्लाको मौलिक कला, संस्कृति, पर्यटन तथा सामाजिक पहिचानलाई प्रवासमा प्रवर्द्धन गर्दै आगामी पुस्तालाई समेत आफ्नो जन्मभूमि पर्वतसँग निरन्तर जोडिराख्ने वातावरण निर्माण गर्ने उच्च लक्ष्य संस्थाले राखेको छ।
नवगठित तदर्थ समितिले तत्काल संस्थाको प्रारम्भिक संगठनात्मक तथा प्रशासनिक कार्यहरू अगाडि बढाउने जिम्मा पाएको छ। समाजको संगठनात्मक संरचनालाई स्थायी तथा थप व्यवस्थित बनाउन आगामी चरणमा बृहत महाधिवेशन आयोजना गरिनेछ। उक्त महाधिवेशनका लागि आवश्यक पर्ने सदस्यता विस्तार, साउदीमा रहेका पर्वतवासीहरूको पहिचान तथा सम्पर्क, विधान निर्माण, संगठनात्मक संरचना र प्रतिनिधित्व लगायतका सम्पूर्ण तयारीका कार्यहरूलाई समितिले क्रमशः अगाडि बढाउने जनाएको छ।
बेरोजगार र अनुभवी नेपालीलाई रोजगारीसँग जोड्ने लक्ष्य
समर्पण रम्जानदिन मियाँ
रियाद, साउदी अरेबिया — प्रवासमा रहेका नेपालीहरूलाई रोजगारीका अवसरहरूसँग जोड्ने र आपसमा सहयोगको वातावरण निर्माण गर्ने उद्देश्यका साथ स्थापित ‘हेल्पलाइन नेपाल साउदी अरेबिया’ ले आफ्नो प्रथम उद्घाटन समारोह तथा बृहत् सांस्कृतिक कार्यक्रम आयोजना गर्ने भएको छ। आगामी ९ अक्टोबर २०२६ (शुक्रबार) का दिन रियादस्थित एक्जिट १८ मा रहेको वालिद रेस्ट हलमा भव्य कार्यक्रमका साथै हिन्दुहरूको महान् पर्व बडा दशैंको शुभकामना आदानप्रदान समेत गरिने भएको छ।
रोजगारी सिर्जना र अनुभवको सम्मान मुख्य प्राथमिकता
संस्थाका अनुसार साउदी अरेबियामा रोजगारविहीन बनेका नेपाली दाजुभाइ तथा दिदीबहिनीहरूलाई प्राथमिकताका साथ उपयुक्त रोजगारी दिलाउन पहल गर्नु संस्थाको पहिलो उद्देश्य रहनेछ। यसका साथै, लामो समयदेखि वैदेशिक रोजगारीका क्रममा अनुभव र दक्षता हासिल गरिसकेका श्रमिकहरूलाई उनीहरूको क्षमता र योग्यता अनुसार अझ राम्रो अवसरसँग जोड्ने सोच संस्थाले अघि सारेको छ।
अनुभवी नेपालीहरूले राम्रो अवसर पाउँदा उनीहरूको आर्थिक अवस्था सुधार हुनुका साथै आफ्नो ज्ञान, सीप र क्षमतालाई अझ परिस्कृत गर्ने मौका मिल्नेछ। “एक नेपालीले अर्को नेपालीलाई अवसर र सहयोग गर्ने” संस्कारको विकास गर्दै नयाँ पुस्तालाई अवसर दिने र अनुभवी पुस्ताको सीपको सम्मान गर्ने वातावरण बनाउनु हेल्पलाइन नेपालको मुख्य ध्येय रहेको छ।
सामाजिक र मानवीय सेवामा पनि समर्पित हुने
हेल्पलाइन नेपाल केवल रोजगारी र सीप समायोजनमा मात्र सीमित नरही समाजका विभिन्न क्षेत्रमा आवश्यक पर्ने सामाजिक तथा मानवीय कार्यहरूमा पनि सक्रिय रहने जनाइएको छ। संस्थाका अनुसार हाल विधि-विधान तथा कार्यविधिहरूलाई अन्तिम रूप दिने काम भइरहेको छ। कार्यविधि हेल्पलाइन नेपाल’को प्रथम उद्घाटन कार्यक्रममा संस्थाले गर्ने अन्य सामाजिक कार्यहरू र आगामी गतिविधिहरू स्पष्ट रूपमा सार्वजनिक गरिनेछ।
कार्यक्रमको पूर्ण विवरण:
कार्यक्रम: प्रथम उद्घाटन समारोह, बृहत् सांस्कृतिक कार्यक्रम २०२६ तथा बडा दशैंको शुभकामना आदानप्रदान
मिति: २०२६/१०/०९ (अक्टोबर ९, २०२६) शुक्रबार
समय: दिनको ठिक १२:०० बजेदेखि साँझ ६:०० बजेसम्म
स्थान: एक्जिट १८, वालिद रेस्ट हल (अबी तालिब मस्जिद पछाडि)
सम्पर्क व्यक्तिहरू:
राज तोङमालुङ राई – 0570218160
राज चेम्जोङ लिम्बु – 0545060749
अभिषेक सुन्दास – 0548575198
बिनोद खत्री – 0572727802
आयोजक संस्थाले साउदी अरेबियामा कार्यरत सम्पूर्ण नेपाली दिदीबहिनी, आमा-बुवा तथा दाजुभाइहरूलाई उपस्थित भई कार्यक्रम भव्य रूपमा सफल पारिदिनुहुन हार्दिक निमन्त्रणा गरेको छ।
जेद्दा, साउदी अरब — नेपालको संविधान तथा राष्ट्रिय दिवस २०८३ साउदी अरबको जेद्दास्थित नेपाली महावाणिज्य दूतावासको प्राङ्गणमा शनिबार भव्यतापूर्वक सम्पन्न भएको छ। २०८३ असोज ३ गते अर्थात् १९ सेप्टेम्बर २०२६ का दिन नेपाली महावाणिज्य दूतावास जेद्दाको आयोजनामा कार्यक्रम सम्पन्न भएको हो।
कार्यक्रममा नेपाली महावाणिज्य दूतावासको निमन्त्रणामा साउदी अरबमा क्रियाशील विभिन्न नेपाली संघसंस्थाका पदाधिकारी, समाजसेवी, होटल व्यवसायी तथा पत्रकारहरूको उल्लेखनीय सहभागिता रहेको थियो।
कार्यक्रमको सञ्चालन वाणिज्य दूत सुवास यादवले गर्नुभएको थियो भने कार्यवाहक महावाणिज्य दूत यज्ञराज पौडेलको अध्यक्षतामा कार्यक्रम सम्पन्न भएको थियो।
कार्यक्रममा एनआरएनए साउदी अरबका उपाध्यक्षद्वय राजकुमार गिरी र अर्जुन थापा, एनआरएनए आरसीसी जेद्दाका कार्यवाहक अध्यक्ष चिरञ्जीवी बस्नेत, नेपाली युवा क्लबका अध्यक्ष राम थापा, महासचिव नरकुमार मगर तथा अन्य पदाधिकारीहरु, इस्लामिक दावा सेन्टर जेद्दाका प्रमुख मन्जुर अली मियाँ, अन्तर्राष्ट्रिय पत्रकार महासंघका सदस्य रमजान दिन मियाँ, होटल व्यवसायी संघका आरजे पन्त, होटल मेलम्चीका प्रमुख, ग्लोबल आइएमई बैंकका प्रतिनिधि दीपक राज गौतम, सुदूरपश्चिमेली समाजका महासचिव केशव सिंहलगायत विभिन्न संघसंस्थाका प्रतिनिधि तथा समाजसेवीहरूको उपस्थिति रहेको थियो।
कार्यक्रम नेपालको राष्ट्रिय गानको धुनसँगै सुरु भएको थियो। कार्यक्रममा नेपाली महावाणिज्य दूतावासका श्रम सहचारी जीवन घिमिरेले स्वागत मन्तव्य राख्नुभएको थियो।
कार्यक्रममा सहभागी विभिन्न संघसंस्थाका प्रतिनिधि तथा समाजसेवीहरूले संविधान दिवस तथा राष्ट्रिय दिवसको अवसरमा शुभकामना व्यक्त गर्दै कार्यक्रम आयोजना गरी आफूहरूलाई सहभागी हुने अवसर प्रदान गरेकोमा नेपाली महावाणिज्य दूतावास जेद्दाप्रति आभार व्यक्त गरेका थिए।
मन्तव्यका क्रममा वक्ताहरूले लामो संघर्ष र बलिदानपछि जारी भएको नेपालको संविधान २०७२ देश सञ्चालनको महत्वपूर्ण आधार भएको बताएका थिए। संविधानले मुलुकको शासन व्यवस्था, नागरिक अधिकार तथा राज्य सञ्चालनका विभिन्न पक्षलाई समेटेको उल्लेख गर्दै समयअनुकूल आवश्यक संशोधन र सुधार गर्दै संविधानलाई अझ प्रभावकारी बनाउनुपर्ने धारणा पनि व्यक्त गरिएको थियो।
कार्यक्रममा केही वक्ताहरूले भने नेपालको संविधान २०७२ का कतिपय पक्षप्रति असन्तुष्टि व्यक्त गर्दै विगतको संविधान, विशेषगरी २०४७ सालको संविधानप्रति आफ्नो धारणा राखेका थिए। संविधानको विषयमा फरक–फरक धारणा प्रस्तुत भए पनि वक्ताहरूले देशको संविधान, राष्ट्रिय एकता र राष्ट्रिय दिवसको महत्वबारे आ–आफ्ना विचार राखेका थिए।
कार्यक्रमको समापन गर्दै सभाध्यक्ष तथा कार्यवाहक महावाणिज्य दूत यज्ञराज पौडेलले उपस्थित सम्पूर्ण अतिथि, संघसंस्थाका प्रतिनिधि, समाजसेवी तथा पत्रकारहरूलाई धन्यवाद ज्ञापन गर्दै संविधान तथा राष्ट्रिय दिवसको शुभकामना व्यक्त गर्नुभयो।
उहाँले पछिल्लो समय नेपालमा आएको प्राकृतिक विपत्तिका कारण यस वर्ष संविधान तथा राष्ट्रिय दिवसलाई विगतमा जस्तो बृहत् रूपमा आयोजना गर्न नसकिएको बताउनुभयो। यद्यपि, संविधान तथा राष्ट्रिय दिवस कुनै जात, धर्म, भाषा वा संस्कृतिभन्दा माथि रहेको साझा राष्ट्रिय पर्व भएकाले सबै नेपालीले खुला रूपमा मनाउनुपर्नेमा उहाँले जोड दिनुभयो।
कार्यवाहक महावाणिज्य दूत पौडेलले संविधान देश सञ्चालन गर्ने मूल कानुनी दस्तावेज भएकाले संविधानले निर्दिष्ट गरेको विधि, प्रक्रिया र कानुनी व्यवस्थाभित्र रहेर राज्य सञ्चालन हुनुपर्ने बताउनुभयो। संविधान निर्माण तथा लोकतान्त्रिक व्यवस्थाका लागि योगदान र बलिदान गर्ने सम्पूर्ण ज्ञात–अज्ञात सहिदहरूको योगदानको स्मरण गर्दै राष्ट्रिय दिवस मनाउनुपर्ने उहाँको भनाइ थियो।
उहाँले संघीय लोकतान्त्रिक गणतन्त्र नेपालको महत्वपूर्ण राजनीतिक उपलब्धि भएको उल्लेख गर्दै संविधान तथा राष्ट्रिय दिवसलाई सबै नेपालीले साझा राष्ट्रिय दिवसका रूपमा मनाउन पाउनु गौरवको विषय भएको बताउनुभयो।
कार्यक्रममा उपस्तिथित विभिन्न संघसंस्थाका प्रतिनिधि, समाजसेवी, व्यवसायी तथा पत्रकारहरूको सहभागितासहित कार्यक्रम सम्पन्न भएको थियो ।
२००९ मा साइट इन्जिनियरका रूपमा साउदी पुगेका भण्डारीको १७ वर्षे व्यावसायिक यात्रामा महत्वपूर्ण सफलता साउदी अरेबिया । वैदेशिक रोजगारीका क्रममा सन् २००९ मा साउदी अरेबिया पुगेका नेपाली युवा भूपाल भण्डारीले निरन्तरको मिहिनेत, व्यावसायिक दक्षता र नेतृत्व क्षमताका बलमा आफ्नो करियरमा महत्वपूर्ण सफलता हासिल गरेका छन्। झापाको बिर्तामोड स्थायी घर भएका भण्डारी साउदीस्थित Tasawy General Contracting Co. मा साइट इन्जिनियरका रूपमा आफ्नो व्यावसायिक यात्रा सुरु गरेका थिए। करिब १७ वर्षको निरन्तर व्यावसायिक यात्रापछि उनी अहिले कम्पनीको प्रमुख कार्यकारी अधिकृत (CEO) पछिको दोस्रो सर्वोच्च व्यवस्थापकीय पद ‘Operations Director’ को जिम्मेवारीमा पुगेका छन्। मरुभूमिमा परियोजना निर्माणदेखि व्यवस्थापनको नेतृत्वसम्म भण्डारीले साउदी अरेबियाको मरुभूमि क्षेत्रमा नयाँ शहर निर्माण तथा पूर्वाधार विकाससँग सम्बन्धित विभिन्न ठूला परियोजनामा काम गर्दै आफ्नो प्राविधिक तथा व्यवस्थापकीय क्षमता प्रस्तुत गरेका छन्। साइटमा प्राविधिक जिम्मेवारीबाट सुरु भएको उनको यात्रा क्रमशः अनुभव, कार्यक्षमता र नेतृत्व भूमिकासँगै अगाडि बढ्दै अहिले कम्पनीको उच्च व्यवस्थापकीय तहसम्म पुगेको हो। उनको करियर यात्राले वैदेशिक रोजगारीलाई केवल श्रम गर्ने गन्तव्यका रूपमा मात्र बुझ्ने दृष्टिकोणलाई समेत चुनौती दिएको छ। उचित शिक्षा, प्राविधिक दक्षता, अनुभव, अनुशासन र निरन्तर मिहिनेत भए नेपालीहरूले अन्तर्राष्ट्रिय श्रम बजारमा उच्च जिम्मेवारी सम्हाल्न सक्छन् भन्ने सन्देश उनको सफलताले दिएको छ। ‘खाडीमा नेपाली तल्लो तहकै काम गर्छन्’ भन्ने सोचलाई चुनौती खाडी मुलुकमा कार्यरत नेपालीहरूबारे अझै पनि उनीहरू मुख्यतः तल्लो वा मध्यम तहका श्रममा मात्र सीमित छन् भन्ने धारणा सुनिन्छ। तर भण्डारीको सफलता त्यस्तो एकांगी सोचलाई सच्याउने एउटा उदाहरण हो। साउदी अरेबिया लगायत खाडी मुलुकमा नेपालीहरू इन्जिनियर, व्यवस्थापक, सुपरभाइजर, व्यवसायी, प्राविधिक विशेषज्ञ तथा विभिन्न नेतृत्वदायी भूमिकामा कार्यरत छन्। आफ्नै व्यवसाय सञ्चालन गर्दै सफल भएका नेपाली व्यवसायीहरूको संख्या पनि क्रमशः बढिरहेको छ। भण्डारीजस्ता दक्ष नेपालीहरूको व्यावसायिक उन्नतिले ‘नेपाली भनेको केवल श्रमिक हो’ भन्ने सीमित सोचभन्दा माथि उठेर नेपाली जनशक्तिको वास्तविक क्षमता र सम्भावनालाई हेर्नुपर्ने आवश्यकता औँल्याएको छ। सामाजिक क्षेत्रमा पनि सक्रिय व्यावसायिक क्षेत्रमा सफलता हासिल गरेका भण्डारी सामाजिक क्षेत्रमा समेत सक्रिय छन्। उनी राष्ट्रिय स्वतन्त्र पार्टी (रास्वपा) को प्रवास समितिअन्तर्गत प्रवासी नेपाली सम्पर्क विभाग, साउदी अरेबियाका अध्यक्ष समेत हुन्। व्यावसायिक जिम्मेवारीसँगै प्रवासी नेपाली समुदायका सामाजिक गतिविधिमा सक्रिय रहँदै आएका उनले आफ्नो कार्यक्षेत्र र सामाजिक भूमिकाबीच सन्तुलन कायम गर्दै आएका छन्। आफ्नो पदोन्नतिबारे प्रतिक्रिया दिँदै भण्डारीले नेपालबाट साउदी अरेबिया आउँदा व्यावसायिक करियरमा यस्तो उचाइ हासिल गर्ने कल्पना नगरेको बताए। “निरन्तरको मिहिनेत, दृढ संकल्प र जिम्मेवारीप्रतिको निष्ठाले नै मलाई आज अपरेसन डाइरेक्टरको तहमा पुर्याएको हो। यसलाई मैले व्यक्तिगत उपलब्धिका रूपमा भन्दा पनि एउटा ठूलो अवसर, विश्वास र थप उत्तरदायित्वका रूपमा लिएको छु।” नयाँ जिम्मेवारीसँगै अझ बढी समर्पण, परिणाममुखी काम र जवाफदेहिताका साथ अघि बढ्ने प्रतिबद्धता व्यक्त गर्दै उनले आफ्नो व्यावसायिक यात्रामा साथ दिने परिवार, गुरुजन, साथीभाइ तथा सहकर्मीहरूप्रति कृतज्ञता व्यक्त गरेका छन्। भण्डारीको बुझाइमा नेपाली युवाहरूलाई प्राविधिक तथा व्यावसायिक शिक्षामा पहुँच बढाउन सकिए अन्तर्राष्ट्रिय श्रम बजारमा नेपालीहरूले अझ उच्च तहका जिम्मेवारी प्राप्त गर्न सक्छन्। वैदेशिक रोजगारीमा जाने युवाहरूले केवल रोजगारी खोज्नेभन्दा पनि सीप, ज्ञान, भाषा, प्रविधि र नेतृत्व क्षमता विकासमा जोड दिनुपर्ने उनको धारणा छ। उनको आफ्नै यात्रा पनि यसको एउटा उदाहरण बनेको छ—सन् २००९ मा साइट इन्जिनियरका रूपमा सुरु भएको करियर आज कम्पनीको उच्च व्यवस्थापकीय जिम्मेवारीसम्म पुगेको छ। वैदेशिक भूमिमा अवसरसँगै चुनौती पनि हुन्छन्। तर आफ्नो क्षेत्रमा निरन्तर सिक्ने, जिम्मेवारीपूर्वक काम गर्ने, दक्षता बढाउने र नेतृत्व क्षमता विकास गर्ने हो भने नेपालीहरूले अन्तर्राष्ट्रिय संस्थाहरूमा पनि उच्च जिम्मेवारी प्राप्त गर्न सक्छन् भन्ने सन्देश उनको यात्राले दिएको छ। साउदीको मरुभूमिमा साइट इन्जिनियरबाट सुरु भएको यात्रा कम्पनीको उच्च व्यवस्थापकीय तहसम्म पुग्नु भूपाल भण्डारीको व्यक्तिगत सफलता मात्र होइन, अन्तर्राष्ट्रिय श्रम बजारमा नेपाली दक्ष जनशक्तिको सम्भावनाको एउटा उदाहरण पनि हो। उनको यो सफलता आगामी पुस्ताका नेपाली युवालाई एउटा स्पष्ट सन्देश दिन्छ—‘अवसर जहाँ भए पनि, क्षमता र मिहिनेतलाई सीमाले रोक्न सक्दैन।’
समर्पण रम्जान दिन मियाँ, अन्तर्राष्ट्रिय पत्रकार महासंघ अमेरिका – साउदी शाखा सदस्य
जेद्दा, साउदी अरब — गैर-आवासीय नेपाली संघ (NRNA), राष्ट्रिय समन्वय परिषद साउदी अरबको १९ औँ वार्षिकोत्सव साउदी अरबको जेद्दास्थित ‘द भिलेज रेस्टुरेन्ट’ (अजीजिया) मा गत 24 जुलाई 2026 का दिन भव्यताका साथ सम्पन्न भएको छ । कार्यक्रमका संचालक संस्थाका उपाध्यक्ष राज कुमार गिरीद्वारा अपरान्ह २ बजेबाट सुरु गरेका उक्त समारोह संस्थागत गतिविधि, महावाणिज्य दूतावाससँगको श्रमिक अन्तरक्रिया र विविध साँस्कृतिक प्रस्तुति गरी मुख्य तीन चरणमा सञ्चालन गरिएको थियो।
उक्त समारोहको सभापतित्व गैर-आवासीय नेपाली संघ साउदी अरबका अध्यक्ष उमेश भट्टराईले गर्नुभएको थियो भने नेपाली महावाणिज्य दूतावास जेद्दाका महावाणिज्यदूत पारस पण्डित प्रमुख अतिथिका रूपमा आशन ग्रहण गर्नुभएको थियो । त्यसैगरी विशिष्ट अतिथिका रूपमा दूतावासका उप-महावाणिज्यदूत यज्ञ पोखरेल, वाणिज्यदूत सुभास यादव, श्रम सहचारी जीवन घिमिरे र उप-वाणिज्यदूत श्रीमती पुजन पाण्डेले आशन ग्रहण गर्नु भएको थियो। समारोहमा अन्तर्राष्ट्रिय प्रवास मञ्च अमेरिका-साउदी शाखाका अध्यक्ष एवं अन्नपूर्ण पोष्ट प्रतिनिधि विष्णु घिमिरे, नेपाली युवा समाजका अध्यक्ष राम थापा, हातेमालो युवा क्लबका अध्यक्ष अमर प्रसाद चपाँई, तामाङ युवा समाजका अध्यक्ष तथा मेलम्चि रेस्टुरेन्टका संचालक राम सिंह तामाङ, नेपाल मगर संघका अध्यक्ष कुल बहादुर मगर, किरात राई यायोक्खाका अध्यक्ष शैलाब राई, नेपाली साझा मंचका महासचिव तेज बहादुर बि.क., इस्लामिक दावा सेन्टरका नेपाली विभाग प्रमुख मन्जुर अलि मियाँ, एनआरएनए आरसिसी अलकासिमका पूर्व अध्यक्ष तथा संचारकर्मी रमजान दिन मियाँ, सिटी एक्सप्रेसका क्षेत्रीय प्रबन्धक रामजी काईराला, Frendi का क्षेत्रीय प्रबन्धक निरज सिंह, काठमाडौँ रेस्टुरेन्टका संचालकहरू रबिन राना मगर र कुल मगर, नेपाली कल्चरल डान्स ग्रुपका संस्थापक धीरज आले मगर, समाजसेवीहरू दिपेन्द्र यादव र रामचन्द्र पौडेल तथा अन्तरप्रगतिशिल मञ्चका सचिव सिताराम लगायत स्थानीय विभिन्न संघ-संस्थाका प्रतिनिधिहरू एवं व्यवसायीहरू समाजसेवीहरूले आशन ग्रहण गर्नु भएको थियो। लक्ष्मी थापा मगर र शर्मिला गिरीले उपस्थित अतिथिहरूलाई खादा तथा ब्याच वितरण गरेर भव्य स्वागत गर्नुभएको थियो
सभापति, प्रमुख अतिथि तथा अतिथिगणहरूद्वारा संयुक्त रूपमा दीप प्रज्वलन गरी औपचारिक उद्घाटन गरिएको कार्यक्रममा उपस्थित सम्पूर्ण महानुभावहरूले सम्मानपूर्वक उठेर राष्ट्रिय गान गाएका थिए। कार्यक्रमको थप रौनक बढाउन LCC, RCC र NCC द्वारा संयुक्त रूपमा तयार पारिएको झाँकीले हलको सांगीतिक परिक्रमा गरेको थियो भने ।
औपचारिक समारोहको पहिलो चरणमा स्वागत मन्तव्य एनआरएनए साउदीका उपाध्यक्ष हेम सुवेदीले प्रस्तुत गर्नुभएको थियो। त्यसपश्चात् अर्का उपाध्यक्ष अर्जुन थापाले संस्थाको एक बर्षे कार्य प्रगति प्रतिवेदन र कोषाध्यक्ष योगेन्द्र श्रेष्ठले आर्थिक प्रतिवेदन, अडिट रिपोर्ट, बैंक स्टेटमेन्ट तथा आय-व्ययको विस्तृत विवरण सबैमाझ बुझ्नेगरि प्रस्तुत गर्नुभएको थियो। सोही अवसरमा समाजमा योगदान पुर्याउने व्यक्तित्वहरूलाई सभापति उमेश भट्टराई र प्रमुख अतिथि पारस पण्डितद्वारा सम्मान-पत्र प्रदान गरिएको थियो।
बधाई तथा शुभकामना व्यक्त गर्ने मन्तव्यको क्रममा एनआरएनए आरसिसी अलकासिमका पूर्व अध्यक्ष तथा संचारकर्मी रमजान दिन मियाँले सन् २०१४ देखि २०२२ सम्म आफु संस्थामा रहेर संस्थालाई दिएको योगदान तथा श्रमिक हकहितमा गरेका आफ्ना अनुभव र सहकार्यको स्मरण गर्दै संस्था 19औं बर्षमा पुगेमा बधाई तथा शुभकामना दिए । त्यसपछि बोल्दै इस्लामिक दावा सेन्टरका मन्जुर अलि मियाँले शुभकामना दिंदै सम्सि जेलमा समस्यामा परेका नेपाली श्रमिकहरूको तत्काल उद्धारका लागि महावाणिज्य दूतावासको ध्यान आकर्षण गराउनुभयो। क्रमलाई निरन्तरता दिँदै नेपाली साझा मंचका तेज बहादुर बि.क., किरात राई यायोक्खाका शैलाब राई, नेपाल मगर संघका कुल बहादुर मगर, तामाङ युवा समाजका राम सिंह तामाङ, हातेमालो युवा क्लबका अमर प्रसाद चपाई र नेपाली युवा क्लबका राम थापाले संस्थाले श्रमिकको हक-हितमा पुर्याएको योगदानको प्रशंसा गर्दै सफलताको शुभकामना व्यक्त गरेका थिए । त्यसैगरी ग्लोबल आईएमई बैंकका प्रतिनिधि दीपक राज गौतमले विदेशबाटै नेपाल फर्किएको 35 दिनभित्र राष्ट्रिय परिचयपत्र बनाउऩे गरी बैंकिङ कारोबार तथा खाता खोल्दा राष्ट्रिय परिचयपत्र (NID) को अनिवार्यता नरहेको जानकारी गराए ।
उक्त भब्य समारोहमा अन्तर्राष्ट्रिय पत्रकार महासंघ अमेरिका – साउदी शाखाका अध्यक्ष विष्णु घिमिरेले बधाई तथा शुभकामना दिदैं श्रमिकका हक हितमा संस्थाले धेरै काम गरेको र अझै राम्रो काम गर्न अनुरोध गरेका थिए, अन्तरप्रगतिशिल मञ्चका सचिव सिताराम, सिटी एक्सप्रेसका क्षेत्रीय प्रबन्धक रामजी काईरालाले वैधानिक र कानुनी माध्यमबाट मात्र रेमिट्यान्स/पैसा पठाउन उपस्थित सम्पूर्णलाई अनुरोध गरेका थिए । र Frendi का क्षेत्रीय प्रबन्धक निरज सिंहले पनि आफ्नो मन्तव्य राख्दै अनावस्यक धेरै सिम ननिकाल्न र आफ्नो नाममा भएको सिम चेक गरी अनावस्यकलाई बन्द गर्न आग्रह गरेका थिए । कुटनैतिक नियोगका तर्फबाट बोल्दै उप-महावाणिज्यदूत यज्ञ पोखरेलले दूतावास र एनआरएनएको सहकार्यले श्रमिकलाई ठूलो राहत मिलेको बताउँदै दूतावासका सूचनाहरू आधिकारिक पेजबाट सेयर र फलो गर्न आग्रह गर्दै श्रमिक हकहितका लागि दूतावासको पूर्ण सहयोग रहने प्रतिबद्धता व्यक्त गर्नुभयो भने श्रम सहचारी जीवन घिमिरेले साउदी अरबको स्थानीय कानुनको पूर्ण पालना गर्न श्रमिकहरूलाई अनुरोध गर्नुभयो।
प्रमुख अतिथिको आसनबाट बोल्दै महावाणिज्यदूत पारस पण्डितले एनआरएनए साउदी उमेरले १९ वर्षको भए पनि यसको कार्यसम्पादन ४०-४५ वर्षको परिपक्व संस्था जत्तिकै उत्कृष्ट रहेको भन्दै प्रशंसा गर्नुभयो साथै नियोगका गतिविधि र श्रमिकका समस्या समाधानमा एनआरएनएले गरेको योगदानको उच्च कदर गर्दै धन्यवाद ज्ञापन गर्नुभयो। पहिलो चरणको अन्त्यमा सभापतिको आसनबाट बोल्दै एनसीसी तथा आईसीसी स्तरबाट प्राप्त शुभकामना सन्देश व्यक्त गर्दै संस्थाले अहिलेसम्म श्रमिकहरूका लागि ६ देखि ७ करोड रुपैयाँ बराबरको प्रत्यक्ष सहयोग गरिसकेको जानकारी दिनुभयो। साउदी अरबमा काम गर्दा यहाँकै नियम-कानुनभित्र रहेर काम गर्नुपर्नेमा जोड दिँदै उहाँले कार्यक्रम सफल पार्न साथ सहयोग गर्ने सम्पूर्ण आरसीसी, एनसीसी, मिडिया, कलाकार, महावाणिज्य दूतावास तथा सम्पूर्ण उपस्थित नेपाली समुदायलाई दिँदै पहिलो औपचारिक सत्रको समापन गर्नुभएको थियो।
कार्यक्रमको दोस्रो चरण विशेष गरी साउदीमा कार्यरत नेपाली श्रमिक दाजुभाइ दिदीबहिनीहरूका समस्या र गुनासाहरूमा केन्द्रित थियो। उपस्थित श्रमिकहरूले साउदीमा भोग्नुपरेका कानुनी, श्रम सम्बन्धी तथा व्यावहारिक समस्याहरू प्रत्यक्ष रूपमा महावाणिज्य दूतावासका पदाधिकारीहरूसामु राखेका थिए। उठाइएका जिज्ञासा र प्रश्नहरूको महावाणिज्यदूत पारस पण्डित लगायत दूतावासका उप-महावाणिज्यदूत यज्ञ पोखरेल, वाणिज्यदूत सुभास यादव, श्रम सहचारी जीवन घिमिरे ले प्रष्ट उत्तर दिँदै समस्या समाधानको प्रतिबद्धता व्यक्त गर्नुभएको थियो।
अन्तिम तथा तेस्रो चरणमा स्थानिय लोकप्रिय नेपाली कलाकारहरू सरस्वती लामा, श्याम भण्डारी, तेज बहादुर सिलवाल, अमर चपाई र अशोक सुवेदी लगायतले बेजोड सांगीतिक तथा नृत्य प्रस्तुति दिएका थिए। कलाकारहरूको मनोरञ्जनात्मक प्रस्तुतिमा दर्शकहरूले नाचेर गाएर भरपूर आनन्द लिएका थिए। कार्यक्रमको अन्त्यमा उपस्थित सम्पूर्ण अतिथि, आयोजक तथा दर्शकहरूका लागि स्वादिष्ट खानपान (रात्रिकालीन भोज) को व्यवस्था गरी कार्यक्रम सफलतापूर्वक सम्पन्न भएको थियो।
रियाद, साउदी अरब। प्रविधिको प्रयोगमार्फत देश र प्रवासमा रहेका नागरिकबीचको दूरी घटाउने उद्देश्यका साथ साउदी अरबमा एक नवप्रवर्तनात्मक डिजिटल यात्राको सुरुवात भएको छ। नेपाली राजदूतावास रियाद र प्रवास नेपाली सम्पर्क विभागबीचको ऐतिहासिक सहकार्यमा “नमस्ते दूतावास” (WhatsApp Group) र “प्रवास Help Desk” डिजिटल प्लेटफर्म सञ्चालनको तयारी तीव्र पारिएको छ।
समस्या जहाँ भए पनि, समाधान दूतावाससँगै” भन्ने मूल मर्मलाई आत्मसात गर्दै प्रवासी नेपालीको सुख-दुःखमा साथ दिन र सेवा प्रवाहलाई सरल, पारदर्शी एवं प्रभावकारी बनाउन यो नयाँ यात्राको सुरुवात गरिएको यो सहकार्य केवल संस्थागत सम्बन्धमा मात्र सीमित नभई विशेषगरी श्रमिक वर्गको सेवा, सहयोग, समन्वय र विश्वासलाई अझ सुदृढ बनाउने साझा अभियानको एउटा महत्वपूर्ण कोशेढुङ्गा बन्ने विश्वास लिइएको छ।
प्रवास नेपाली सम्पर्क विभाग, साउदी अरबको अवधारणा अनुरूप आयोजित उक्त कार्यक्रममा प्रवासी नेपालीका गुनासाहरूलाई कसरी व्यवस्थित रूपमा संकलन गर्ने र सम्बन्धित निकायसँगको समन्वयमा समाधान प्रक्रियालाई कसरी द्रुत बनाउने भन्नेबारे विस्तृत छलफल भएको थियो।
सहज पहुँच: प्रवासी नेपालीहरूले आफ्ना समस्या, आवश्यकता र सेवासम्बन्धी विषयहरूलाई सिधै डिजिटल माध्यमबाट सम्बन्धित निकायसम्म पुर्याउन सक्नेछन्।
द्रुत सञ्चार र मार्गदर्शन: सूचना आदान-प्रदान गर्न तथा अप्ठ्यारोमा परेका नेपालीहरूलाई तत्काल आवश्यक सहयोग र मार्गदर्शन प्रदान गर्न यो प्रणाली प्रभावकारी सेतु बन्नेछ।
पारदर्शी गुनासो व्यवस्थापन: प्राप्त गुनासाहरूको उचित व्यवस्थापन र अनुगमनका लागि राजदूतावास र सम्पर्क विभागको प्राविधिक टोलीले यसलाई थप परिमार्जन गरी छिट्टै सार्वजनिक गर्ने तयारी गरिरहेको छ।
डिजिटल प्रणालीलाई अन्तिम रूप दिन आयोजित विशेष अन्तरक्रिया कार्यक्रममा साउदी अरबका लागि नेपाली राजदूतावासका कार्यवाहक राजदूत सिर्जना अधिकारी, लेबर कन्सुल कविराज उप्रेती लगायत दूतावासका प्रतिनिधिहरूको उपस्थिति रहेको थियो। यसैगरी कार्यक्रममा प्रवास नेपाली सम्पर्क विभाग साउदी अरबका केन्द्रीय समिति तथा रियाद र जुबेल दुवै क्षेत्रीय समितिका पदाधिकारी एवं सदस्यहरूको समेत सक्रिय सहभागिता थियो।
आयोजकका तर्फबाट प्रवास नेपाली सम्पर्क विभाग, साउदी अरबका सभापति भुपाल भण्डारीले कार्यक्रमको सफल व्यवस्थापन तथा प्राविधिक समन्वयमा पुर्याएको योगदानका लागि नेपाली राजदूतावास रियादप्रति विशेष आभार व्यक्त गरेका थिए। यो ऐतिहासिक सहकार्यले आगामी दिनमा विश्वभर छरिएर रहेका नेपाली श्रमिकहरूको हित, सम्मान र सुरक्षामा थप सकारात्मक परिणाम ल्याउने अपेक्षा गरिएको छ।
जेद्दा, साउदी अरब गैरआवासीय नेपाली संघ (एनआरएनए) राष्ट्रिय समन्वय परिषद्, साउदी अरबले आफ्नो स्थापनाको १९औं वार्षिकोत्सव भव्य रूपमा मनाउने भएको छ। आगामी जुलाई २४ तारिखका दिन जेद्दाको अजिजियास्थित ‘द भिलेज रेष्टुरेन्ट’मा एक विशेष कार्यक्रमको आयोजना गर्दै संघले उक्त वार्षिकोत्सव मनाउन लागेको हो।
“नेपालीका लागि नेपाली” भन्ने मूल मर्म र भावनालाई आत्मसाथ गर्दै स्थापना भएको यस संस्थाले साउदी अरबमा कार्यरत नेपालीहरूको हकहित, उद्धार र सामाजिक कार्यमा लामो समयदेखि महत्त्वपूर्ण भूमिका निर्वाह गर्दै आएको छ। यसै सन्दर्भमा आयोजना हुन लागेको १९औं वार्षिकोत्सवले साउदीमा रहेका नेपाली समुदायबीच आपसी भाइचारा, सहकार्य र एकतालाई थप सुदृढ गर्ने विश्वास आयोजकले लिएको छ।
संघले यस ऐतिहासिक अवसरमा कार्यक्रमको शोभा बढाइदिन साउदी अरबमा कार्यरत सम्पूर्ण नेपाली दाजुभाइ तथा दिदीबहिनीहरूलाई हार्दिक निमन्त्रणा गरेको छ।
आयोजकका अनुसार उक्त कार्यक्रममा संघका सबै समिति र संरचनाहरूमा आबद्ध वर्तमान तथा भूतपूर्व पदाधिकारीहरू, पञ्जीकृत सदस्यहरू, विभिन्न सामाजिक तथा राजनीतिक भातृ संगठनका अध्यक्ष एवम् पदाधिकारीहरू, जातीय तथा भौगोलिक संगठनका प्रतिनिधिहरू लगायत सम्पूर्ण शुभचिन्तकहरूको बाक्लो उपस्थिति रहनेछ।
कार्यक्रमको विस्तृत विवरण:
मिति: २०२६ जुलाई २४ तारिख
समय: बिहान ठीक ११:०० बजे
स्थान: द भिलेज रेष्टुरेन्ट, अजिजिया, जेद्दा, साउदी अरब
साउदी अरबमा क्रियाशील सम्पूर्ण नेपाली संघसंस्था र आम नेपाली श्रमिकहरूलाई समयमै उपस्थित भई कार्यक्रमलाई सफल बनाउन एनआरएनए राष्ट्रिय समन्वय परिषद्, साउदी अरबले विशेष अपिल गरेको छ।
