कार्तिक २८ दाङ राप्ती साहित्य परिषद् जिल्ला शाखा दाङले आफ्नो नियमित कृति समीक्षा कार्यक्रम अन्तर्गत १९७ औँ श्रृङ्खलामा साहित्यकार खगेश्वर भण्डारीको नविनतम् कथासङ्ग्रह “प्लाष्टिककको फूल”को घोराहीमा समीक्षा गरेको छ।
परिषद्का अध्यक्ष यम रेग्मीको अध्यक्षता तथा नेपाल संस्कृत विश्वविद्यालय, सांस्कृतिक विभागका प्रमुख निर्देशक डा.टीकाराम उदासीको प्रमुख आतिथ्यता तथा राप्ती साहित्य परिषद् केन्द्रका सल्लाहकार पुरुषोत्तम खनालको विशिष्ट अतिथ्यतामा कार्यक्रम सम्पन्न गरिएको थियो।
‘प्लाष्टिकको फूल’ कथासङ्ग्रहको समीक्षा समालोचक तथा साहित्यकार प्रमोद धितालले गरेका थिए । भण्डारीको कथा सङ्ग्रह हरेक दृष्टिकोणले पठनयोग्य रहेको समीक्षक धितालले बताए । प्लाष्टिकको फूल कथासङ्ग्रहमा १२ वटा कथा रहेका छन् । जसलाई अक्षरधाम नेपालले प्रकाशनमा ल्याएको हो ।
कार्यक्रममा कथाकार भण्डारीले कथा लेख्दाका एवम् कथा प्रकाशन गर्दाका अनुभवहरू सुनाएका थिए ।
सर्वोदय पुस्तकालय तथा वाचनालयका अध्यक्ष सुशील गौतम, राप्ती साहित्य परिषद् केन्द्रका सल्लाहकार पुरुषोत्तम खनालले शुभकामना मन्तव्य तथा स्रष्टा भण्डारीलाई बधाई दिएका थिए।
कार्यक्रम ३ दर्जन बढी साहित्यकारहरूको उपस्थिति रहेको थियोे । परिषद्का उपाध्यक्ष सुरेशकुमार पाण्डेको स्वागत मन्तव्यबाट शुभारम्भ भएको कार्यक्रमको सञ्चालन सचिव घनश्याम केसीले गरेका थिए।
रियाद । अन्तर्राष्ट्रिय पत्रकार महासंघ अमेरिका–साउदी शाखाद्वारा साउदी अरेबियास्थित नेपाली दूतावास रियादमा परिचयात्मक तथा अन्तरक्रिया कार्यक्रम सम्पन्न गरेको छ।
गत ७ नोभेम्बर शुक्रबाका दिन संचालित कार्यक्रममा महासंघका पदाधिकारीहरूको परिचय, संस्थाको उद्देश्य, दूतावाससँगको सहकार्य, र साउदीमा रहेका नेपाली श्रमिकका समस्या समाधानका विषयमा विस्तृत छलफल गरिएको थियो।
कार्यक्रममा दूतावासका नियोग उप–प्रमुख तथा कार्यवाहक राजदूत सृजना अधिकारी, श्रम काउन्सेलर कविराज उप्रेति, र द्वितीय सचिव दिनेश सिवाकोटीको तथा पत्रकार महासंघका पदाधिकारीहरुको उपस्थिति रहेको थियो।
महासंघका अध्यक्ष बिष्णु घिमिरेले संस्थाको उद्देश्य र गतिविधिबारे जानकारी दिँदै श्रमिकको हक–हितका विषयमा मिडियाको सक्रिय भूमिका आवश्यक रहेको उल्लेख गर्नुभयो ।
दूतावास रियादकी कार्यवाहक राजदूत अधिकारीले साउदीमा रहेका मिडियालाई एकताबद्ध बनाएर संस्था स्थापना गरेकोमा धन्यवाद व्यक्त गर्दै, दूतावास सदैव नेपाली श्रमिकको पक्षमा काम गर्ने प्रतिबद्धता जनाउनुभयो। उहाँले छिट्टै दुई देशबीच श्रम सम्झौता हुने र त्यसले श्रमिकलाई राहत मिल्ने जानकारी पनि दिनुभयो।
श्रम काउन्सेलर उप्रेतिले कम्पनीबाट भाग्नुपर्ने अवस्था, सम्झौता विपरीत काम, आत्महत्या, भिसा प्रमाणीकरण, सेल्टर समस्या लगायतका विषयमा प्रकाश पार्दै, संघ–संस्थाको सहकार्यले यी समस्या समाधानमा टेवा पुर्याउने विश्वास व्यक्त गर्नुभयो।
द्वितीय सचिव सिवाकोटीले दूतावासले श्रमिकका हितमा जारी गरेको ‘हाते पुस्तिका’ साउदीभरका नेपालीसम्म पुर्याउन संघका प्रतिनिधिहरूलाई आग्रह गर्नुभयो।
शिक्षक तथा समाजसेवी स्व. हर्कध्वज राईद्वारा सङ्कलित ‘बान्तावा शब्दावली’ पुस्तक किराँत राई बान्तावा खिम, सहिदभूमि गाउँ कार्यसमितिको आयोजनामा बुधबार पिप्लेमा परिवार, शिक्षक र स्थानीय अगुवाहरूसॅंगै लोकार्पण गरिएको छ । सहिदभूमि गाउॅंपालिकाका अध्यक्ष मनोज राईको प्रमुख आतिथ्यमा सम्पन्न कार्यक्रममा विशिष्ट अतिथि बंगला राई, चन्द्रध्वज राई, प्रा.डा. टंक न्यौपाने, निराजन राई (सहप्राध्यापक तथा भाषाविद, इच्छापूर्ण राई (सहप्राध्यापक तथा भाषाविद) रहेका थिए । त्यस्तै, आमन्त्रित विशेष अतिथिमा आनन्द सन्तोषी राई (निवर्तमान अध्यक्ष, केन्द्रीय जनजाति महासंघ), अस्मिता राई (केन्द्रीय सचिव, किराँत राई यायोख्खा), उद्धव राई(अध्यक्ष, किराँत राई यायोख्खा, धनकुटा) समाजिक अभियन्ताहरू तिलक राई, पृथसिंह दाहाल लगायत थिए ।
कार्यक्रमलाई अझ स्मरणीय बनाएको पक्ष के थियो भने लोकार्पित पुस्तकमा आत्मीयता, मेहनत र सङ्कलनको रोचक कहानी बोकेर बसेकी कृतिकारकी भतिजी सुजाता राई विशेष रूपमा उपस्थित थिइन् । काकाले आफ्नो जीवन समाज, शिक्षा र संस्कृतिमा अर्पण गरेको साँचो हो । मरणोपरान्त भए पनि उहाँको सम्मानार्थ यस पुस्तकलाई आकार दिइएको हो, उनले प्रष्ट्याइन् । कृतिकारको योगदान बारे सार्वजनिक रूपमा सुनिँदा सुजाता राई मात्र होइन, उपस्थित सम्पूर्ण परिवार र सहभागीहरू भित्रभित्रै भावुक बनेका दृश्यहरू खुलेर देखिन्थे । स्व. राई केवल शिक्षक मात्र थिएनन्, जीवन सुधालय माध्यमिक विद्यालय, खोकुका नि:शुल्क जग्गादाता, संस्कृतिक अभियन्ता एवम् समाजका आदर्श व्यक्ति पनि थिए ।
उनको जीवनसाथी श्रीमती बंगला राई, छोरा अशेष राई, भाइ चन्द्रध्वज राई, भाउजू बैकान्छी राई, भतिजो इच्छराम राई, मोहन राई, अशिम राई, प्रेमबहादुर राई, भतिजी धनकुमारी राई लगायत छिमेकी, आफन्त, साथीभाइ र सांस्कृतिक अभियन्ता, स्थानीय जनप्रतिनिधिहरूको विशेष उपस्थिति रहेको उक्त लोकार्पण कार्यक्रमले शब्द मात्र होइन, अस्तित्वको पहिचान जोगाउने संकल्प समेत बोकेको थियो । विमोचनमा स्थानीय विद्यार्थीहरूको सुन्दर नृत्यले कार्यक्रमको शोभा बढाएको थियो । पञ्चकृष्ण माविका प्रधानाध्यापक होमबहादुर राईको सभापतित्वमा स्वागत मन्तव्य सहिदभूमि बान्तावा खिमका कोषाध्यक्ष सुलुकमन राईले गरेका थिए भने कार्यक्रम सञ्चालन अर्जुन राईको थियो ।
आज मिती १९ कार्तिक २०८२, बुधवारका दिन नेकपा माओवादी केन्द्रले नेकपा (एकीकृत समाजवादी ) सहित ९ पार्टीहरूको पार्टी एकीकरण गर्ने निर्णय र प्रस्तावित एकीकृत पार्टीको साझा घोषणापत्र लाई अनुमोदन गरेको छ ।
राष्ट्रिय महाधिवेशन आयोजक समितिको बैठक संयोजक प्रचण्डको पुष्पकमल दाहालको अध्यक्षतामा बसेको उक्त नेकपा (माओवादी केन्द्र ) को अन्तिम बैठक ले घोषणापत्रलाई अनुमोदन गरेको कुरा माओवादी केन्द्रका बरिष्ट नेता नारायणकाजी श्रेष्ठले जनाएका छन् ।
श्रेष्ठले आजको बैठक नेकपा (माओवादी केन्द्र ) को अन्तिम बैठकको रुपमा पार्टी एकीकरण गर्ने निर्णय गर्दै सफलता पूर्वक सम्पन्न भएको र नयाँ एकीकृत पार्टीको नाम नेपाली कम्युनिष्ट पार्टी (Communist Party of Nepal ) र चुनाव चिन्ह पाँच कुने तारा रहने बताएका छन् ।
उहाँले अरु कुरा थप्दै पार्टी एकता गरी एकीकृत पार्टी निर्माण गर्दा एकतामा सामेल सबै क्रान्तिकारीहरूले प्रारम्भ देखि नै निम्न पक्षहरूमा गम्भीर ध्यान दिनु जरुरी रहेको पनि बताएका छन् ।
” एक, यो एकता नेपालका सबै कम्युनिष्ट तथा बामपन्थी शक्तिहरूको एकीकरण र पुनर्गठनको प्रस्थान विन्दु बन्नु पर्दछ ।त्यसो भएमात्र यो देश ,जनता र कम्युनिष्ट आन्दोलनको माग अनुरुपको कोषे ढुंगा बन्न सक्नेछ । दुई ,नेपाली राजनीति र नेपाली कम्युनिष्ट आन्दोलनको आजको मुख्य समस्या विचारधारात्मक सांस्कृतिक (ideo-cultural ) समस्या हो । त्यसैले समग्र कम्युनिष्ट आन्दोलनको वैचारिक सांस्कृतिक संकट लाई समाधान गर्न व्यापक वैचारिक सांकृतिक रुपान्तरणको अभियान लाई एकीकृत पार्टीले शुरुदेखि नै आफ्नो अभिन्न काम बनाएर जानुपर्छ ।क्रान्तिकारी उद्देश्य ,आदर्श ,विचार ,सिद्धान्त ,विधि पद्धति ,स्वच्छता , प्रदतिशिल संकृति , श्रमजीवी एवं उत्पीडित वर्ग एवं जनमुखी चरित्र लाई एकीकृत पार्टीको चारित्रिक विशेषता बनाउनु पर्दछ । अन्यथा पार्टी एकता जोडघटाउ को थुप्रो मात्र बन्ने र परिणाममुखी एवं सार्थक नबन्ने खतरा उत्पन्न हुनेछ ।कि मार्थ त्यसो हुन दिनु हुँदैन ।”
र ,तीन, जेन जी (Gen Z ) बिद्रोहात्मक आन्दोलनको चेतना , मुद्दा र संगठन एवं अन्य जिम्मेवारीहरूमा जेन जी सहितका युवाहरुको उल्लेखनीय सहभागिता तथा प्रतिनिधित्व लाई एकीकृत पार्टीले गम्भीरतापूर्वक ग्रहण गर्दै तदनुरूप अघि बढ्न प्रतिबद्ध हुनु पर्ने कुरा उल्लेख गरेका छन् ।
कार्तिक १०, चितवन । पूर्वी चितवनको राप्ती नगरपालिका-८, खुरखुरेमा यही कार्तिक १० गते राष्ट्रिय विशिष्ट अभिनन्दन, सम्मान तथा पुरस्कार समर्पण समारोह-२०८२ भएको छ। वरिष्ठ साहित्यकार प्रा.डा. चूडामणि बन्धुकाे प्रमुख आतिथ्यमा प्रा.डा. दयाराम श्रेष्ठ, प्रा.डा. कपिल लामिछाने र भागीरथी श्रेष्ठ, वरिष्ठ गायिका तथा सङ्गीतकार लोचन भट्टराईलाई रथारोहण गराई भव्य सार्वजनिक अभिनन्दन गरियो । राप्ती नगरपालिकाका विभिन्न मार्ग हुँदै विभिन्न सांस्कृतिक समूहबाट बाजागाजा, नाचगान सहित नगर परिक्रमा गरी जनसमुदायबाट अभिनन्दन तथा सम्मान गरिएको हाे ।
नमस्ते आधुनिक लघुकथा मञ्चका अध्यक्ष कृष्णजी शर्माकाे अध्यक्षता तथा आयुष बडाल र इन्दिरा पाैडेल प्रतीक्षाद्वारा सञ्चालित कार्यक्रममा मञ्चद्वारा पूर्व घोषित ‘आख्यान अनुसन्धान तथा समालोचना शीर्ष पुरुष-२०८२’ बाट वरिष्ठ साहित्यकार एवम् आख्यानकार प्रा.डा. दयाराम श्रेष्ठलाई अभिनन्दन गरिएको थियोे । त्यस्तै ‘लघुकथाश्री समालोचक सम्मान- २०८२’ बाट वरिष्ठ साहित्यकार एवम् समालोचक प्रा.डा. कपिल लामिछानेलाई’ विशिष्ट संगीतश्री सम्मान- २०८२’ बाट वरिष्ठ गायक एवम् संगीतकार लोचन भट्टराईलाई र ‘विजय स्मृति अग्रज लघुकथा सम्मान-२०८२’ बाट वरिष्ठ साहित्यकार भागीरथी श्रेष्ठलाई सम्मान अर्पण गरिएको थियोे ।
साथै ‘लघुकथालय पुरस्कार- २०८२’ बाट ‘दुर्बिन’ लघुकथासङ्ग्रह कृतिका कृतिकार एवम् वरिष्ठ साहित्यकार लक्ष्मण अर्याल (चितवन)लाई, ‘वर्ष लघुकथा स्रष्टा सम्मान- २०८२’ बाट लघुकथाकार खगेन्द्र बस्याल (रुपन्देही)लाई, ‘हेमलता स्मृति लघुकथा सम्मान- २०८२ बाट लघुकथाकारद्वय हिमा रोका ‘प्रतिज्ञा’ (सुर्खेत) र हेमराज अधिकारी (सिक्किम)लाई पुरस्कार एवम् सम्मान अर्पण गरिएको थियोे ।
साथै उक्त अवसरमा ‘लघुकथा विशिष्ट प्रतियोगिता- २०८१’ विजयी लघुकथाकारहरूलाई पुरस्कार, सम्मान एवम् प्रमाणपत्र समर्पण गरिएको थियो । पुरस्कृत हुनुहुनेमा लोकनाथ पुडासैनी (प्रथम), मित्र ‘उराठी’ गौतम (द्वितीय), तारानाथ पराजुली (तृतीय), लक्ष्मी रेग्मी खनाल (सान्त्वना) र कुमार काफ्ले (सान्त्वना) हुनुहुन्छ । साथै सोही अवसरमा प्रदेशगत प्रतियोगितामा विजयी हुनुहुने लघुकथाकारहरूलाई पनि पुरस्कार तथा सम्मान अर्पण गरिएको थियोे ।
मञ्चीय कार्यक्रम स्थानीय नन्दिनी स्टार पार्टी प्यालेसको सभाहलमा गरिएको हाे । साेही कार्यक्रमका बिचमा लघुकथा र यसको सौन्दर्य विषयमा प्रा.डा. कपिल लामिछानेले कार्यपत्र प्रस्तुत गर्नुभयो भने कार्यपत्रउपर प्रा.डा. विदुर चालिसे र डा. शङ्करप्रसाद गैरेले टिप्पणी प्रस्तुत गर्नुभयो । गाेष्ठीमा लघुकथाकाे स्वरूप र साैन्दर्यमा जाेड दिइयो । कार्यक्रमकाे तेस्रो चरणमा आयाेजित साङ्गीतिक साँझमा वरिष्ठ गायिका तथा सङ्गीतकार लोचन भट्टराईले दर्जनभन्दा बढी गीत प्रस्तुत गर्नुभयो ।
उमेश कुशवाहा, वीरगञ्ज । तिहार तथा दीपावलीको अवसरमा नेपाल विद्युत प्राधिकरण पोखरिया वितरण केन्द्रका सम्पूर्ण प्राविधिक तथा कर्मचारीहरू निरन्तर स्ट्यान्ड बाइ (STAND BY) अवस्थामा रहेका छन्।
ग्राहकका घरमा बत्ति निभ्ने वा अन्य कुनै प्राविधिक समस्या उत्पन्न नहोस् भन्ने उद्देश्यका साथ, केन्द्रका कर्मचारीहरूले निरन्तर अनुगमन र सेवा तयारीमा रहेका छन्। पोखरिया वितरण केन्द्रका अनुसार, तिहारको समयमा पनि विद्युत आपूर्तिलाई अबाधित राख्न सबै प्राविधिक टोली सर्तक अवस्थामा छन्।
केन्द्रका कर्मचारीहरूले सामाजिक सञ्जाल फेसबुक पेजमार्फत पनि स्टाटस लेख्दै जनाएका छन् —
“पोखरिया वितरण केन्द्र परिवारका सम्पूर्ण प्राविधिक कर्मचारीहरू STAND BY छौं, कतै हाम्रा आदरणीय ग्राहकहरूको घरमा बत्ति निभ्ने त होइन भनेर। हजुरहरूले निर्धक चाहिने बत्तिहरू बाल्नुस, सेवामा नेपाल विद्युत प्राधिकरण पोखरिया वितरण केन्द्र सधैं साथमा छ।”
पोखरिया वितरण केन्द्र परिवारले सम्पूर्ण ग्राहकहरूलाई तिहार तथा दीपावलीको हार्दिक मंगलमय शुभकामना व्यक्त गर्दै सुरक्षित र उज्यालो पर्व मनाउन अनुरोध गरेको छ।
वसन्त अनुभव नमस्ते आधुनिक लघुकथा मञ्चले वरिष्ठ गायिका एवम् संगीतकार लोचन भट्टराईलाई ‘विशिष्ट संगीतश्री सम्मान- २०८२’ प्रदान गर्ने भएको छ । मञ्चको मिति २०८२ साल साउन २४ गते बसेको कार्यसमितिको बैठकले उक्त निर्णय गरेको थियोे ।
नेपाली लोक, आधुनिक, चलचित्र लगायत विभिन्न भाषाभाषीका गीत गायनका साथै नेपाली पद्य साहित्यमा संगीत र स्वरका माध्यमले दिनुभएको विशिष्ट योगदानको कदरस्वरूप उक्त सम्मान प्रदान गर्न लागिएको मञ्चले जनाएको छ ।
आगामी कार्तिक १० गते मञ्चले चितवनमा गर्ने ‘राष्ट्रिय विशिष्ट अभिनन्दन, सम्मान तथा पुरस्कार समर्पण समारोहमा नगद रु. ११,१११/- (रुपैयाँ एघार हजार एकसय एघार) पुरस्कार रकमसहित ताम्रपत्रद्वारा सम्मान गरिने मञ्चले जनाएको छ ।
वसन्त अनुभव नमस्ते आधुनिक लघुकथा मञ्चले वरिष्ठ साहित्यकार भागीरथी श्रेष्ठलाई ‘विजय स्मृति अग्रज लघुकथा सम्मान- २०८२’ प्रदान गर्ने भएको छ । मञ्चको मिति २०८२ साल साउन २४ गते बसेको कार्यसमितिको बैठकले उक्त निर्णय गरेको थियोे । कीर्तिशेष वरिष्ठ साहित्यकार विजय चालिसेज्यूको स्मृतिमा मञ्चले यसै वर्ष यस पुरस्कार तथा सम्मानको स्थापना गरेको थियोे ।
आगामी कार्तिक १० गते मञ्चले चितवनमा गर्ने ‘राष्ट्रिय विशिष्ट अभिनन्दन, सम्मान तथा पुरस्कार समर्पण समारोहमा नगद रु. ११,१११/- (रुपैयाँ एघार हजार एकसय एघार) पुरस्कार रकमसहित ताम्रपत्रद्वारा सम्मान गरिने मञ्चले जनाएको छ ।
मञ्चले दिएको जानकारी अनुसार यस वर्षको पुरस्कार रकम कीर्तिशेष विजय चालिसेज्यूका सुपुत्र आलोक चालिसे एवम् परिवारको चाहना अनुरूप उहाँहरूले नै व्यवस्थापन गर्ने बुझिएको छ ।
नेपालीहरुको महान पर्व दशैं तथा शुभ दिपावलीको पावन अवसर पारेर यहि आउँदो अक्टोबर २४ तारिक शुक्रबारका दिन साउदी अरबियाको होटल यास्मिनमा सिर्जना साँस्कृतिक समुह द्वारा शुभदीपावालीको शुभकामना आदानप्रदान ,देउसी भैलो तथा स्थानिय कलाकार द्वारा विविध साँस्कृतिक प्रस्तुति कार्यक्रम” भव्य रूपमा आयोजना गरेको छ ।
सिर्जना साँस्कृतिक समुह साउदीले नेपालीहरुलाई आफ्नो चार्डबार्ड र संस्कृतलाई उजागर गर्ने उद्देश्यका आयोजित उक्त कार्यक्रममा साउदी अरेबियामा कार्यरत सम्पूर्ण नेपाली दाजुभाइ तथा दिदीबहिनीहरूलाई सक्रिय सहभागिता जनाउन हार्दिक निमन्त्रणा गरेको छ ।
यसै पावन अवसरलाई मध्यनजर गर्दै “२०११ साल देखि निरन्तर हाम्रो कला – साँस्कृति ,सिर्जना बचाउने अभियान” हाम्रो कर्मभुमीमा भन्ने मुल नाराका साथ अगाडि बढ्दै आएको साँस्कृति समुहको चौंथो अधिवेशन समेत हुन लागेको उक्त समुहले जनाएको छ भने बिबिध कला ,साँस्कृति , सिर्जनामा आबद्ध हुन चाहने नेपाली दाजुभाई दिदिबहिनी तथा साथीहरूले यथासिघ्र सम्पर्क गरि समुहमा आबद्द हुन पनि अनुरोध गरेको छ ।
हाम्रो कला ,साँस्कृति तथा सिर्जना संरक्षणमा योगदान दिन र साझा पहिचानलाई मजबुत बनाउन, सम्पूर्ण नेपालीहरुको उपस्थिति महत्वपूर्ण रहेको जानकारी गराउँदै कार्यक्रममा उपस्थित हुन सम्पर्कका लागि आफ्नो समुहको सम्पर्क नम्बरहरु पनि सार्बजनिक गरेको छ ।
कार्यक्रम विवरण च –
स्थान: होटल यास्मिन, रियाद, बथा साउदी अरेबिया मिति: २४ तारिख समय: दिउँसो १२ बजे देखि साझँ ७ बजे सम्म
गैरआवासीय नेपाली संघ, क्षेत्रीय समन्वय समिति, जेद्दा, साउदी अरब (NRNA, RCC, JEDDAH, KSA) को आयोजनामा २४ अक्टोबर २०२५ तदनुसार २०८२ साल कार्तिक ७ गते शुक्रबार का दिन नेपालीहरूको महान् पर्व दशैं तथा शुभ दिपावलीको शुभकामना आदानप्रदान तथा देउसी-भैलो कार्यक्रम – २०२५’ आयोजना हुने भएको छ ।
नेपालीहरूको महान पर्व दशैं तथा शुभ दीपावली को अवसर पारेर विदेशमा रहनुभएका दाजुभाई तथा दिदीबहिनीहरूलाई शुभकामना आदानप्रदान गर्ने उद्देश्यले आयोजना गर्न लागेको उक्त कार्यक्रममा संघले साउदी अरबमा रहनुभएका नेपाली दाजुभाई तथा दिदीबहिनीहरुलाई उल्लेखित स्थान र समयमा उपस्थित भईदिनुहुन हार्दिक निमन्त्रणा गरेको छ। अक्टोबर २४ तारिख शुक्रबार हुने उक्त कार्यक्रम साउदी अरबको जिद्दास्थित लक्की दरबार रेस्टुरेन्ट सरफियामा दिनको १ बजेदेखि सुरु हुने जनाइएको छ।
विगतका वर्षहरूमा पनि यस्तै कार्यक्रमहरू गर्दै नेपाली दाजुभाईहरूलाई आफ्नै चाडबाडको अनुभव महसुस गराएको संघले जनाउँदै गैरआवासीय नेपाली संघ, क्षेत्रीय समन्वय समिति, जेद्दा, साउदी अरबले यो वर्षपनि उक्त कार्यक्रम आयोजना गरेको जनाइएको छ। कार्यक्रममा उपस्थित हुनुभएका दाजुभाई तथा दिदीबहिनीहरूलाई भरपुर देउसी भैलो संस्कृतिक कार्यक्रमले मनोरञ्जन दिनुको साथै नेपाली परिकारहरू सेल रोटी तथा खानाको पनि व्यवस्था रहेको आयोजक संघले जनाएको छ।
