Category: ताजा अपडेट

१
समर्पण
आफूलाई अर्पण
मेरो आफ्नै दर्पण !

२
साथ
स्वार्थीको हात
मीठा मुलायम बात !

३
स्थिति
भएको समय
नाजुक देशको स्थिति !

४
घाती
मीठा बात
व्वाँसोको जस्तो छाती !

५
तोड्नु
छुटाउने कार्य
बलीमा बोकाको शिर !

६
नाजुक
कमजोर स्थिति
समयले निम्त्याएको परिस्थिति !

७
ज्ञान
मनमा भान
आफैँले स्थिति जान !

८
प्रवचन
ज्ञानका कुरा
व्यवहारमा धारिलो छुरा !

९
धुर्त
स्यालका बात
नदिनु त्यसलाई साथ !

१०
स्थिर
अटल अचल
मनलाई पार्नु धिर !

११
श्रीखण्ड
वास्नादार काठ
खुर्पामा बिँड राख !

१२
परिचय
चिनजानका कार्य
आफ्नो व्यवहार नियाल !

१३
घात
उल्टो प्रतिघात
बेइमानीको हुन्न साथ !

१४
लोभी
चाहिने स्वभाव
इज्जत पानीको फोका !

१५
सिफारिस
अर्कालाई अह्रायो
आफ्नो परिचय हरायो !

१६
मौन
नबोली बस्यो
परिस्थिति खरानी धस्यो !

• सविता केसी, काठमाडौँ

पञ्चाङ्ग साहित्य समाज नेपाल अभ्यास पाठशालाको अभ्यास शृङ्खला दर्तापछिको :- भाग १९ [उन्नाइसौँ] ————————————-
” पाँच तत्त्व पाँचै विकार, पञ्चाङ्ग नै ठिक आधार “

======================
सम पञ्चाङ्गसंरचना
,,,,,,,,,,,,,,,,,,,,,,,,,,,,

अक्षर सङ्ख्या:- प्रत्येक हरफमा अक्षर बराबरी हुनु पर्नेछ ।

अनुप्रास :-भोट, नोट, रोट, चोट, खोट, पोट, बोट, लोट, ओट, आदि ।

स्थायी :-आफूखुसी
,,,,,,,,,,,,,,,,,,,,,,,,,,,,,,,,,,,,,,

पञ्चाङ्ग तथा सम पञ्चाङ्ग संरचना —————————————-

पञ्चाङ्ग भनेको पाँच पदिय कविता विधा हो । कसरी लेख्न सकिन्छ ?
—————- ———————–

पूर्ण अनुप्रास र स्थायी अनिवार्य हुनु पर्छ ।
उठान गर्दा विषयवस्तुसँग सम्बन्धित हुनुपर्छ । ———————————
समपञ्चाङ्ग

आज खुलेर बोल्छु घण्टीमा भोट दिनुपर्छ [०१]
भ्रष्टलाई   पाखा   लगाएर  चोट  दिनुपर्छ [०२]
——————————–
तेस्रो लाइनले माथिको १,२ लाई विस्तार गर्नुपर्छ ।

चुनावले निर्णय दिन सके देश बन्ने हाे [०३]
——————————————

१,२,३का लाइनलाई जोड दिँदै परिणाम दिनुपर्छ । ————————————
जाडो आउँदै छ बुढालाई कोट दिनुपर्छ [०४]
वृद्ध नेता सबैलाई खेल्न  पोट दिनुपर्छ [०५]

माथिको १,२,३,४,५ लाइनको मर्मलाई पूर्णता दिन बाँकी १२३४५ ले खुल्नुपर्छ । —————————————- उठान गर्दा विषयवस्तुसँग सम्बन्धित हुनुपर्छ । १ र २ मा जस्तै हुनुपर्छ ।
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

आफू शुद्ध बनी अरूलाई खोट दिनुपर्छ [०६]
बिस्तारै चोट दिँदै फिरीमा ओट दिनुपर्छ [०७]

आठौँ लाइनले माथिको ६ र ७ लाई विस्तार गर्नुपर्छ।
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

मौन सत्रमा प्रचार भन्दा पैसा बाँड्दै गयौ [०८]

६,७ र ८ का लाइनलाई जोड दिँदै परिणाम दिनुपर्छ ।
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

प्रतिघातीलाई मिलेर नै छोट दिनुपर्छ [०९]
जितेर गोरखनाथलाई  रोट दिनु पर्छ [१०] ————————————– उदाहरण सम पञ्चाङ्ग ०१

आज खुलेर बोल्छु घण्टीमा भोट दिनु पर्छ [०१]
भ्रष्टलाई  पाखा   लगाई  चोट     दिनु पर्छ [०२]
चुनावले  निर्णय  दिन  सके  देश   बन्ने हाे [०३]
जाडो  आउँदै छ  बुढालाई  कोट दिनु पर्छ [०४]
वृद्ध  नेता  सबैलाई  खेल्न  पोट  दिनुपर्छ [०५]

आफू  शुद्ध  बनी  अरूलाई खोट दिनुपर्छ [०६]
बिस्तारै  चोट  दिँदै  फिरीमा ओट दिनुपर्छ [०७]
मौन  सत्रमा प्रचार भन्दा पैसा बाँड्दै गयौ [०८]
प्रतिघातीलाई  मिलेर  नै  छोट  दिनु   पर्छ [०९]
जितेर    गोरखनाथलाई   रोट   दिनु  पर्छ [१०] 

सोमनाथ लुइटेल “रवि पाल्पाली” पाल्पा हाल बर्दिया ।
~~~~~~~~~~~~~~~~~~~~~~~~~~~~~~~

पञ्चाङ्ग तथा सम पञ्चाङ्गहरू
~~~~~~~~~~~~~~~~~~

सम पञ्चाङ्ग   [०१]

आज खुलेर बोल्छु घण्टीमा भोट दिनु पर्छ ।
भ्रष्टलाई  पाखा   लगाई  चोट     दिनु पर्छ ।
चुनावले  निर्णय  दिन  सके  देश   बन्ने हाे ,
जाडो  आउँदै छ  बुढालाई  कोट दिनु पर्छ ।
वृद्ध  नेता  सबैलाई  खेल्न  पोट  दिनुपर्छ ।

आफू  शुद्ध  बनी  अरूलाई खोट दिनुपर्छ ।
बिस्तारै  चोट  दिँदै  फिरीमा ओट दिनुपर्छ ।
मौन  सत्रमा प्रचार भन्दा पैसा बाँड्दै गयौ ,
प्रतिघातीलाई  मिलेर  नै  छोट  दिनु   पर्छ ।
जितेर    गोरखनाथलाई   रोट   दिनु  पर्छ ।

✍️सोमनाथ लुइटेल “रवि पाल्पाली” पाल्पा हाल बर्दिया ।
~~~~~~~~~~~~~~~~~~~~~~~~~~

सम पञ्चाङ्ग   [०२]

असल नेतालाई छानीछानी भोट दिने हो ।
अक्षम नेतालाई यसपालि चोट दिने हो ।
वयोवृद्ध भएका मान्छे हो धर्म–कर्म गर ,
माघै काट्न नसक्नेहरूलाई कोट दिने हो ।
देश हाँक्ने युवालाई फूलको बोट दिने हो ।
नेता होइन जनतालाई पो खोट दिने हो ।
कलो खाई भोट दिनेको गला घोटदिने हो ।
अब नबुझ्ने जनताले कहिले होला बुझ्ने ,
भोलि यही देश बेच्नेले आज नोट दिने हो ।
चोर नेतालाई झन् किन मिठो रोट दिने हो ?

✍️श्रीकृष्ण शर्मा,  पोखरा ।
~~~~~~~~~~~~~~~~~~~~

सम पञ्चाङ्ग   [०३]

प्रेममा लागेको खोट सम्झेको छु ।
मायाले दिएको चोट सम्झेको छु ।
सिरसिर हावा मनमा शीतल,
वर र पीपल बोट सम्झेको छु ।
चौतारीको न्यानो कोट सम्झेको छु ।

गुलाफको सौम्य बोट सम्झेको छु ।
मायाले दिएको कोट सम्झेको छु ।
पिरतीमा घात गरेको तिमीले,
मुटुको वेदना चोट सम्झेको छु ।
के होला भनेर खोट सम्झेको छु ।

पञ्चाङ्ग

बाबा आमाको केश राम्रो लाग्छ ।
सुन्दर परिवेश राम्रो लाग्छ ।
उकाली, ओराली, लेक र बेसी
मलाई मेरो देश राम्रो लाग्छ ।
शान्त सुन्दर शेष राम्रो लाग्छ ।

✍️आर्त अकुलीन, कैलाली ।
~~~~~~~~~~~~~~~~

सम पञ्चाङ्ग   [०४]

जाडोको समय आएको लगाउन कोट चाहिन्छ।
देशको भविष्य उज्ज्वल बनाउन भोट चाहिन्छ।
चुनाव आउँदा मात्र गाउँ गाउँ जाने होइन,
सधैँ आउने बनाउन एउटा बोट चाहिन्छ।
सबैको विश्वासिलो बन्नको लागि ओट चाहिन्छ।

भविष्य निर्माण गर्न सबैले भोट दिनु पर्छ।
हाम्रोलाई होइन राम्रोलाई नोट दिनु पर्छ।
विश्वास गर्ने कुनै नै आधार नभएको हुँदा,
आफ्नोलाई आफ्नैबाट सधैँ नै खोट दिनु पर्छ।
पाँच वर्षमा दिएको भोटले चोट दिनुपर्छ ।

✍️सुशीला पौडेल, नेपाल ।
~~~~~~~~~~~~~~~~~~

समपञ्चाङ्ग   [०५]

दाताले देश विकासका लागि सदुपयोग खालको भोट देओस्।
मतदानले जिती उसले विकास भर्न समावेशी नोट देओस्।
युवापिँढी पो छान्नुपर्छ अब ढल्केवर पर्दा पछाडि राखेर ,
नाङ्गा आङ चिसोमा कठ्याङ्ग्रिएको हेर्दा  बास सहित कोट देओस्।
भोटले भोकको लागि जमिन सहितका नै बीउका बोट देओस् ।

हाँसीहाँसी सजिलै समस्याका समाधान गरि  विना खोट देओस् ।
बेरोजी राखे जनता सबैलाई कि दिन काट्ने खेल पोट देओस् ।
कि जनशक्तिको  भरपूर  उपयोग  गरि गाउँ-गाउँ  विकास,
आँउदोमा त नठानेर फेरि जनताले मिलिजुली चोट देओस्।
एक्लैले हुँदैन  ती धनी, गरिब, मजदुर सबका ओट देओस् ।

✍️जमुना आचार्य, सिन्धुपाल्चोक ।
~~~~~~~~~~~~~~~~~

समपञ्चाङ्ग   [०६]

जनताले आफ्नो अमुल्य भोट दिए,
पछि फल मिल्छ भनेर बोट दिए,
बदलामा जनतालाई धोका भयो,
त्यही भोटले हजार चोट दिए।
त्यतिले मात्रै नपुगेर खोट दिए।

जनताले नै उसलाई कोट दिए।
माथी माथी जानलाई अठोट दिए।
जनतालाई भने अल्मल्याइ रहे,
भुलाउनको लागि सधैं पोट दिए।
अम्मली पो बनाउन चुरोट दिए।

✍️पशपती राई, खोटाङ ।
~~~~~~~~~~~~~~~~~~~

सम पञ्चाङ्ग [०७]

लाएको त्यो प्रेमलाई खोट दियौ।
सोझासाझा महिलामा चोट दियौ।
तिमी त साह्रै वैमनस्य रहेछौ,
नजान्ने मा गएर त्यो लोट दियौ।
कसैको स्वार्थमा गयौ ओट दियौ।

स्वार्थी भएर  गयौ र भोट दियौ।
आसा राखिएकोमा चैँ चोट दियौ।
तिम्रो यो स्वार्थवाद कहिले सम्म,
अरुलाई नै गएर ओट दियौ।
सारै नै नराम्रो गरि खोट दियौ।

✍️बेदु न्यौपाने, काठमाडौ ।
~~~~~~~~~~~~~~~~~~

पञ्चाङ्ग   [०८]

सत्ता पोट  भए  जित अवश्य ।
धन्दा खोट भए जित अवश्य ।
भोटमा गुण्डागर्दी चल्छ सधैँ ,
खोट  चोट भए जित अवश्य ।
नोटै  नोट  भए जित अवश्य ।

गुणनिधि घिमिरे, अमेरिका ।
~~~~~~~~~~~~~~~~~~

पञ्चाङ्ग [०९]

नेताहरूले चुनावमा जित्छन् नोट लगाएर।
माखो मार्ने कोही छैनन् के गर्ने खोट लगाएर।
दलाली मात्रै पालन पोषण हुन्छन् यो देशमा,
गरीब माथी हुन्छ दुख साह्रै चोट लगाएर।
पैसा फल्छ रे यहाँ  रूपैयाँको बोट लगाएर।

शिव कुमार रेग्मी, पोखराथोक,पाल्पा ।
~~~~~~~~~~~~~~~~~~~~~~~~

पञ्चाङ्ग   [१०]
१•
नोटसँग  भोट   साट्नु, महापाप हुन्छ हेर।
आज हाँसे पनि भोलि,अभिश्राप हुन्छ हेर।
जानी जानी बन्चरोको,चोट किन सहने हो,
नत्र   भ्रष्टचारीको  नै, फलिफाप हुन्छ हेर।
सानो गल्ती गरे देखि,पश्चाताप हुन्छ हेर।
२•
जनताको मनभित्र बस्नेलाई भोट दियौं।
सॅधैभरि छलछाम  गर्नेलाई  चोट दियौं।
जनताले गर्नु गरे अब पालो नेताजीको,
मतदाता न्यायमूर्ति बनी कालो कोट दियौॅ।
सॅधैभरि जोगाउनू नोट फल्ने बोट दियौॅ।
३•
यो पालीको चुनावमा अठोट गरियो।
हाम्रा छोडी राम्रालाई छनोट गरियो।
जनताको चाहनालाई टाढा राखेर,
अन्यत्रीका कुरा मात्र सपोर्ट गरियो।
जो चाहिन्छ त्यसैलाई बचोट गरियो।
घनश्याम पौडेल,पोखरा

✍️घनश्याम पौडेल, पोखरा ।
~~~~~~~~~~~~~~~~~~~~~~~~~

पञ्चाङ्ग   [११]

मान्छे चिनेर जिताउँ आफ्ना  नहेरौँ अब।
सहि सोचेर अगाडी जाउँ पाटी नफेरौँ अब।
जोड् घटाउ जति गर उहीँ  भेटियो नतिजा ,
नोट थुपारे  पनि  अरूको कुरा नटेरौँ अब।
देश बनाउँ आफैँ नराम्रा कुरा नखेरौँ अब।

✍️शन्जना शर्मा, दाङ लमही ।
~~~~~~~~~~~~~~

पञ्चाङ्ग   [१२]

थोरै राहत मिलेको थियो पुल बनेको देखेर।
छिन भर आशा हरायो बाढीले खनेको देखेर।
अब फेरि भेलमै हेलिनु पर्ने भयो जनताले,
सुबिधा छैन पछुतो लाग्छ कर गनेको देखेर।
बन्छ फेरि भ‍ोट देउ रे नेताले भनेको देखेर।

✍️दुर्गा रिजाल आचार्य, मोरङ ।
~~~~~~~~~~~~~~~~~~~~

पञ्चाङ्ग   [१३]

यहाँ मान्छेकाे भाग्य बदल्ने नाेट रहेछ ।
कस्ताे नेता छान्ने हाे त्याे सबै भाेट रहेछ ।
जनता साेझासाझा पत्याउँछन् रे चाँडै नै,
तर नेताहरूकाे मनमा खाेट रहेछ ।
जनताले सधैँ खानु पर्ने चाेट रहेछ ।

          ✍️ नवराज भट्ट
     महेन्द्रनगर, कञ्चनपुर ।
~~~~~~~~~~~~~~~~~~~

पञ्चाङ्ग  [१४]

असल नेता छान्नलाई चुक्नु त भएन कोही
भोट दिन नगइकन रुक्नु त भएन कोही
विकासको नारा कहिल्यै पुरा गर्दैनन् थाहा छ
प्रलोभनमा परेर नि झुक्नु त भएन कोही
अन्याय गर्नेलाई कान फुक्नु त भईन कोही

✍️अम्विका अधिकारी, झापा विर्तामोड ।
~~~~~~~~~~~~~~~~~~~~~~~~~

पञ्चाङ्ग   [१५]

हाम्रालाई होइन  राम्रालाई  भोट दिनुपर्छ ।
हामी  मिलेर भ्रस्टाचारलाई चोट दिनुपर्छ ।
राखेर युवा पर्दा पछाडि   विजय हुँदैन नै ,
जाडोको समय छ वृद्धलाई कोट दिनुपर्छ ।
पालो बनाएर   नसक्नेलाई छोट‌ दिनुपर्छ ।

✍️ अच्युत घिमिरे-भुटान बाट 🇧🇹
~~~~~~~~~~~~~~~~~~

पञ्चाङ्ग  [१६]

भोट दिएर चोट  पाएका  जनता हामी।
भात दिएर ढिडो खाएका जनता हामी।
खै कसलाई के  दिने  दोधारे भयो मन,
कोट दिएर भोटो लाएका जनता हामी।
नोट दिएर  रोट  चाहेका  जनता हामी।

✍️मन्दिरा सेढाई, मलेखु,धादिङ ।
~~~~~~~~~~~~~~~~~~~~~~~

पञ्चाङ्ग   [१७]

पांच घन्टाको पैदल हिंडेर खसाल्यौं भोट हामी।
चिसोले लागेन निन्द्रा र फर्कियौँ बिना रोट हामी।
थिए  सिथिल जोश  अहिले  मतदातामा  थिएन,
उम्मेदवारमा नै जित्ने  सधैँभरी देख्छौँ होट हामी।
गर्ने कसैले केही होइन चिन्ता देख्छौँ नोट हामी।

✍️सुरेशकुमार पान्डे, दाङ घोराही १८ ।
~~~~~~~~~~~~~~~~~~~

पञ्चाङ्ग[१८]

जनताले जतिपल्ट भोट दिए।
यी नेताले त्यतिपल्ट चोट दिए।
देश लुटे जनता लुटे नाङ्गो पारे,
झोले चम्चे भ्रष्टलाई नोट दिए।
बुझे पछि जनताले खोट दिए !

✍️बिबस पारदर्शी, भद्रपुर  झापा ।
~~~~~~~~~~~~~~~~~~~~~~

पञ्चाङ्ग [१९]

जनताको  मर्म  बुझ्दैन  नोट  खानेले।
बिनाकारण नोट खान्छ भोट खानेले।
सत्तामा पुग्न  जनताकै  बलि चढ्दैछ,
केही  गर्दैनन्  ईश्वरको  रोट   खानेले।
कसरी  चरित्र बुझ्ने हो   खोट खानेले।

✍️जनुका गौतम , काठमाडौं ।
~~~~~~~~~~~~~~~~~~~~~~~

पञ्चाङ्ग   [२०]

राम्रो नेता छानी सबैले भाेट दिनुपर्छ ।
अक्षम घुस्याहालाइ खाेट दिनुपर्छ ।
जनताका पिरमार्का नबुझेपछी यहाँ ,
सबै  जनता मिली धेरै चाेट दिनुपर्छ ।
अन्याय गर्ने पापीलाइ छाेट दिनुपर्छ ।

✍️उर्मिला के.शी., धनकुटा ।
~~~~~~~~~~~~~~~~~~~~~~

पञ्चाङ्ग   [२१]

मनपरेको  मान्छेले  खोट लाउँदैन,
मीठो  बोलीवचनले  चोट लाउँदैन।
शंका गर्ने बानीले गर्न सक्दछ हानी ,
हृदयमा  फुल्छ  फूल बोट लाउँदैन,
मजाले गुड्छ जीवन अोट लाउँदैन।

✍️होम प्रसाद नेउपाने, धरान सुनसरी ।
~~~~~~~~~~~~~~~~~~

पञ्चाङ्ग   [२२]
[०१]
असल व्यक्तिलाई छानेर भोट दिनुपर्छ ।
भ्रष्टाचारी नेता त सारेर खोट दिनुपर्छ ।
जनताको पिडा नबुझ्ने नेता के काम यहाँ ,
अब सबै जनता मिलेर  चोट दिनुपर्छ ।
यी अत्याचारीलाई हामीले छोट दिनुपर्छ ।
[०२[
सुन्दर बगैँचामा बोट हुनुपर्छ ।
आराम गर्न यहाँ  नोट हुनुपर्छ ।
जीवन गुजार्न  कहाँ सजिलो छ र,
गर्छु भन्न  मनमा  अठोट हुनुपर्छ ।
योग्य व्यक्ति छान्न त भोट हुनुपर्छ ।

✍️दुर्गा भट्टराई,  बिराटनगर ।
~~~~~~~~~~~~~~~~~~

पञ्चाङ्ग   [२३]

हराभरा    हुनलाई   बोट चाहिन्छ ।
कारोबार    चलाउन नोट चाहिन्छ ।
यो कुरा   बुझी मनैमा राख्नु हजुर,
जिवन  जिउन  त अठोट चाहिन्छ ।
चर्चित  हुन असली खोट चाहिन्छ ।

✍️अनुग्रह राना मगर ‘पुष्प’
पाँचखपन नपा – ६ संखुवासभा ।
~~~~~~~~~~~~~~~~~~~~~~

पञ्चाङ्ग   [२४]

चुनावको मासु खाए भोट पनि लाए ।
कतिले त  थोरै-थोरै पैसा  पनि पाए ।
फटाहा हो भन्ने कुरो जानीजानी पनि ,
भेडाले नै भोट हाले पछि ती नै आए ।
भोट हाल्नेले नै कठै! ठुलो खाए।

✍️दस्ता कौशिक, पाँचथर।
~~~~~~~~~~~~~~~~~~~

पञ्चाङ्ग   [२५]

जाडोमा तातो कोट चाहिएको छ।
बुवाको लागि पोट चाहिएको छ।
चिसोको बेला तातो चीज चाहिने,
वृद्धलाई त खोट चाहिएको छ।
युवाहरुमा बोट चाहिएको छ।

✍️ह्यारिसन ह्यारिश, काठमाडौं ।

पञ्चाङ्ग   [२६]
१
दिल भित्र लागेको खाेट याद आउँछ।
आफन्तले दिएकाे चाेट याद आउँछ।
यस्तै नै  रहेछ  जिन्दगी  भनि समालेँ,
उही  राताे  फूलकाे बाेट  याद आउँछ।
जाडाे जाडाे माैसम काेट याद आउँछ।
२
हाम्रोलाई हाेइन है राम्रोलाई भाेट दिनु पर्छ।
भनेका पनि हुन् जेल उनलाई चाेट दिनु पर्छ।
असल देशप्रेमी भए पछि राम्रो नै गर्नु हाेस,
अन्य अनि अत्याचार गर्नेलाइ खाेट दिनु पर्छ।
गरिब दुखीलाइ जाडो याममा काेट दिनु पर्छ।

✍️सहयात्री शाेभा अर्याल
       रुपन्देही १४ बुटवल
~~~~~~~~~~~~~~~~~~~~~~~~~~~

सम पञ्चाङ  [२७]

भुलौला म कसरी मुटुमा लागेको चाेट उस्तै छ ।
रुखमा चढाई फेद ढाल्न लागेको बोट उस्तै छ ।
फुर्क्याएर  विश्वास  दिलाएर धुरी  माथी  पुगेँ ,
तल खसाल्न लगाएको यो आरोप खोट उस्तै छ ।
धोका दिने खालको त्यो अपराधी अठोट उस्तै छ ।

चुनाव आयो जनताको आत्मा घाती भोट उस्तै छ ।
भेडा बाख्रा जस्तै जनता ठानी  दिने नोट उस्तै छ ।
परिणाम आउँछ अब छिटो भन्दा छिटो छ हेर्नु,
धेरै  दाहुन हालेी  पकाए  नहुने राेट उस्तै  छ ।
जति अड्कलेर ठिक बनाएको ओट उस्तै छ ।

✍️तारा घिमिरे सङ्खुवा सभा ।
~~~~~~~~~~~~~~~~~~

पञ्चाङ्ग   [२८]

चुनाव गराउन टाडा धाइयो पनि।
घर छोडेर सारै दुुःख पाइयो पनि।
निर्वाचन शान्तिपूर्ण सम्पन्न गर्नमा,
मेसमा पकाएको खाना खाइयो पनि।
समानुपातिकमा भोट लाइयो पनि।

✍️भगवती दवाडी ,झापा ।

पञ्चाङ्ग   [२९]

शुभ कामको पनि पहिलो  तात होस्
आफ्नो आफ्नो सदैव सबैको जात होस्
सबतिर  छन्  रे   नयाँ   सरकारको,
गठनको  प्रस्ताव प्रस्ताव  बात  होस् ।
विकासमा  नयाँ लहरको खात होस् ।

✍️सीता शर्मा, पन्थी बिरंगज ।

चित्र अनुसार पञ्चाङ्गहरू [चित्रपट]
~~~~~~~~~~~~~~~~~

चित्रपट पञ्चाङ्ग   [०१]

भुकम्पले गर्दा नै पुल केही धसेको छ।
विम्बहरू सबै जमिन भित्र पसेको छ।
लान्छना लगाउने कार्य  हामीमा धेरै छन्,
रक्सीले चुर भएर नदीमा खसेको छ।
देवीको प्रार्थना गरी पानीमा बसेको छ।

✍️शिव कुमार रेग्मी,पोखराथोक,पाल्पा ।
~~~~~~~~~~~~~~~~~~~~

चित्रपट पञ्चाङ्ग   [०२]

नेपालमा पुल  कति  कच्चा बनाउछौ।
चुनाव जित्नेलाई  नै सच्चा बनाउछौ।
बिग्रन्छ बाटो भत्किन्छ पुल बनाएको।
भ्रष्टाचारी   गर्नेले त  घच्चा बनाउछौ।
जनतालाई   तिमीले बच्चा बनाउछौ ।

✍️सोमनाथ लुइटेल “रवि पाल्पाली” पाल्पा
हाल बर्दिया ।
~~~~~~~~~~~~~~~~~~~~~

चित्रपट पञ्चाङ्ग   [०३]

हराभरा आहा अति  राम्रो देखियो।
ति नदी जति सबै नै  हाम्रो   देखियो।
नलाउनु  कसैको   नजर  हामीमा,
जल माथि हुँदा पुल काम्रो देखियो ।
बलियो नि निकै होला चाम्रो देखियो।

✍️शन्जना  शर्मा,  दाङ लमही ।
~~~~~~~~~~~~~~~~~~~

चित्रपट पञ्चाङ्ग   [०४]

नदीमाथि पुल भासिएको कसरी हेरौँ ।
नेपालको धन नासिएको कसरी हेरौँ ।
रातदिन रोएकी छिन् मेरै नेपाल आमा,
मेरो यो सिमाना तासिएको कसरी हेरौँ ।
पुर्खाको सम्पत्ति मासिएको कसरी हेरौँ ।

✍️आर्त अकुलीन, कैलाली ।
~~~~~~~~~~~~~~~~~~~~~

चित्रपट पञ्चाङ्ग   [०५]

गरिबी र भोकमरीले असहाय बच्चा थियो।
आमाबाबु  मरि गए  उमेर नै  कच्चा थियो।
उपाय  नै  नदेखेर   फाल  हान्यो  पुलबाट,
ढाँट्न चोर्न नजानेको संस्कारी र सच्चा थियो।
बाँचिरहोस् भने पनि सामाजिक घच्चा थियो।

✍️ गुणनिधि घिमिरे, अमेरिका ।
~~~~~~~~~~~~~~~~~~~~~~~

चित्रपट पञ्चाङ्ग   [०६]

बजेट झ्वाम पारेर पुल दिएको छ ।
हेर्नुस् कसरी नदीको पानी पिएको छ ।
कुन बेला भत्कने हो त्रासको घर भो,
पौडी खेल्दा बालक त्रासले जिएको छ ।
कठै ! विकासको मेरुदण्ड खिएको छ ।
 
✍️श्रीकृष्ण शर्मा, पोखरा ।
~~~~~~~~~~~~~~~~~~~~~

चित्रपट पञ्चाङ्ग   [०७]

पौँडदै आफैँ खोला तर्दैछन् नि देखेर पुल कच्चा त्यो।
ठूलै  खर्च  गरि  बनाए   पनि भएन किन सच्चा त्यो।
हेर ! बिनासित्ति  खेर  गयो  बजेट त्यसमा अपत्तो,
बनाउने  कि  बनाउन  लगाउनेको काम बच्चा त्यो।
कतिको ज्यान लिएर कतिलाई गराउला घच्चा त्यो।

✍️जमुना आचार्य, सिन्धुपाल्चोक ।
~~~~~~~~~~~~~~~~~~~~~~~~~

चित्रपट पञ्चाङ्ग   [०८]

सत्ताको मनोमानीले गर्दा बालबालिका सुरक्षित छैनन्।
विकासमा आँच आईपर्दा बालबालिका सुरक्षित छैनन्।
जस्ले जिते पनि चुनावमा देशको लागि गर्ने केही हैन ,
बाटोघाटो पुल निर्माण सार्दा बालबालिका सुरक्षित छैनन् ।
बगायो बाढीपैह्रोले चर्दा बालबालिका सुरक्षित छैनन् ।

✍️अम्विका अधिकारी, छापा विर्तामोड ।
~~~~~~~~~~~~~~~~~~

चित्रपट पञ्चाङ्ग   [०९]

पुल भासियाे हेर त।
धन नासियाे हेर त।
प्रतिशतकाे खेलमा,
मनै  तासियाे हेर त।
नेता गाँसियाे हे र त।

✍️म प्र घि, काठमाडौं ।
~~~~~~~~~~~~~~~~~~

चित्रपट पञ्चाङ्ग   [१०]
[०१]
बनाएका पुल भासिएका छन् यहाँ ।
बनाउँदै धन नासिएका छन् यहाँ ।
के भनौँ  यो कमिसनको हाेडबाजीमा ,
देखेर यो मन ताछिएका छन् यहाँ ।
मिली खान नेता गाँसिएका छन् यहाँ ।
[०२]
ऎतिहासिक खम्बा  भाँचिएका छन् यहाँ ।
यसरी  सबै  धन नासिएका छन् यहाँ ।
देश भन्दा कमिसनमा  ब्यस्त छन् नेता ,
जनताका मन नै ताछिएका छन्  यहाँ ।
बेमेलमा  नि नेता गासिएका छन् यहाँ ।

✍️दुर्गा भट्टराई, मोरङ ।
~~~~~~~~~~~~~~~~~~~

पञ्चाङ्ग चित्रपट   [११]

कच्चा बाटो माथी पुल तल नदी पुल भासिए छ।
पढ्न भनी हिँड्दा हिँड्दै बालापन त्यसै नासिए छ।
गाउँ बस्ती सहर बाटो पुल देशमा  राम्रो छैन,
हाम्रा नेताको विदेशीसँग  साँठगाँठ गाँसिए छ।
यसरी नै हाम्रो देशमा विकासोन्मुख नासिए छ।

✍️बेदु न्यौपाने, काठमाडौ ।
~~~~~~~~~~~~~~~~~~~~~~~~~

चित्रपट पञ्चाङ्ग  [१२]

अलिकति मात्रै भाँसिएको पुल थियो।
मोटरसाइकलको मान्छे नै झुल थियो।
गाडी लडेर चालक पानीमा तलै खस्दा,
त्यस खोलामा हिमनदीको  मूल थियो।
दुर्घटना भएको ठाउँमा धेरै हुल थियो ।

✍️भगवती दवाडी, झापा ।
~~~~~~~~~~~~~~~~~~~

चित्रपट पञ्चाङ्ग   [१३]

नदीको बचमा भाँसिएको पुल छ ।
निर्माणको लागि नासिएको भुन छ ।
कसले कसलाई भन्ने सबै त्यसै,
नाता आपसमा गाँसिएको मुल छ ।
यहाँ पार्टीहरु मिसिएको हुल छ ।।

✍️धनमाया चौधरी,  कैलाली ।
~~~~~~~~~~~~~~~~

चित्रपट पञ्चाङ्ग   [१४]

नदी वारि पारी जोडिने पुल बन्न सकौँ ।
बगैंँचामा मग्मगाउने  फूल बन्न सकौँ ।
पञ्चाङ्गमा रमाउने बानी परिसक्यो है,
पञ्चाङ्गको  बर्सिरहने मुल बन्न सकौँ।
यस्लाई सिँगारी रहने तुल बन्न सकौँ।

✍️तारा घिमिरे, सङ्खुवासभा ।
~~~~~~~~~~~~~~~~~~~

चित्रपट पञ्चाङ्ग   [१५]

ठेक्दारको गल्तीले पुल भासियो हेर।
बेकारमा देशको धन नासियो हेर।
जनतालाई सुविधा दिन खोज्दाखेरि,
ठेक्दारसँग भ्रष्ट नेता टाँसियो हेर।
बेकारमा कच्चापदार्थ मासियो हेर।

✍️पूर्णबहादुर श्रेष्ठ “हृदयङकृत”
        पनौती-३,काभ्रे ।
~~~~~~~~~~~~~~~~~

चित्रपट पञ्चाङ्ग   [१६]

प्यारो मेरो देशको लागि लड्दैछु म।
सङ्घर्षको मैदानमा त बड्दैछु म।
जे परेपर्छ हत्यारालाई छाड्दिन,
साथ नदिएर नै एक्लै षड्दैछु म।
समान्तिको दलदलमा गड्दैछु म।

✍️कमला पाण्डे पराजुली झापा ।
~~~~~~~~~~~~~~~~~

चित्रपट पञ्चाङ्ग    [१७]

नदीको  बिचमा  पुल बनाउनेलाई मान्नु पर्छ ।
अति नै  उत्तम  विचार दिमागलाई ठान्नु पर्छ।
बनेको पुलबाट कति आनन्द छ हेर्नलाई त्यो,
कुरा मात्र  होइन यस्तो बनाउनु त जान्नु पर्छ ।
सबै  मिलि  हातेमालो गरेर लठ्ठारो तान्नु पर्छ ।

✍️अनुग्रह राना मगर ‘पुष्प’
पाँचखपन नपा – ६ संखुवासभा हाल मलेसिया  ।
~~~~~~~~~~~~~~~~~~~~~~~~

चित्रपट पञ्चाङ्ग   [१८]

तल पानी माथि पुल तर्ने नै हो।
वारिबाट पारितिर  सर्ने नै  हो।
पानी जहाज चल्ने समुन्द्र हैन,
तर्दातर्दै  भत्किएमा मर्ने  नै हो।
पुलै  नभए  विपत्ति  पर्ने  नै हो।

✍️होम प्रसाद नेउपाने, धरान,सुनसरी ।
~~~~~~~~~~~~~~~~~~~

चित्रपट पञ्चाङ्ग   [१९]

पुलको पनि त आयु हुन्छ होला भाँचियो।
पुरानो थियो कि पुल बिच खोला भाँचियो।
बनाउन  गारो छ  ज्यान  हथलिमा  राख्दै,
दिए ठेक्का लिनेछन् नोटकै झोला भाँचियो।
खाने  खाए  मर्ने  मरे  रुने रोला भाँचियो।

✍️सुरेशकुमार पान्डे, दाङ घोराही १८ ।
~~~~~~~~~~~~~~~~~~~~~~~~~~

चित्रपट पञ्चाङ्ग   [२०]

नेताहरुको बुद्धि विवेक सबै नासिएर गयो।
जनता हिँड्ने पुलहरु सबै नै भासिएर गयो।
कमिसनको लोभमा ठेकेदार  छानेर लगाई,
ती  काम गर्ने  ठेकेदार र नेता टाँसिएर गयो।
भ्रष्टाचारमा  बनेको  पुलहरु  मासिएर गयो।

✍️मल्ल लक्ष्मी श्रेष्ट, मेची किनार
बिर्तामोड झापा ।
~~~~~~~~~~~~~~~~~

चित्रपट पञ्चाङ्ग   [२१]

बाँडेपछि खाम, काम यस्तै हो।
भेटी अनि दाम, काम यस्तै हो।
हुने  यी  विकास  र निर्माणमा,
हुन्छ छलछाम, काम यस्तै हो।
छैन  बदनाम,  काम  यस्तै हो ।

✍️वसन्त अनुभव , घोराही, दाङ ।
~~~~~~~~~~~~~~~~~

चित्रपट पञ्चाङ्ग   [२२]

जताततै अस्तव्यस्त देख्छु देश भित्र मैले
पुल नाजुक बालक डुब्दै देख्छु चित्र मैले।
यातायात   पक्कै पनि छँदैछ जोखिमपूर्ण
पुल भासिनु पक्कै गहिरो देख्छु छित्र मैले
देख्दैन  है कतै  मर्मत  संहार  मित्र मैले।

✍️तेजप्रसाद खनाल, लमही दाङ ।
~~~~~~~~~~~~~~~~~~~~

चित्रपट पञ्चाङ्ग   [२३]

अब त  पुल  पनि  ठगिएछ  यहाँ।
खाताबाट  रकम   लगिएछ  यहाँ।
विकासको पाइलैपिच्छे यस्तै हुन्छ
भ्रस्टाचारले  मात्र   तगिएछ  यहाँ।
जनताको  सपना   बगिएछ  यहाँ।

✍️अच्युत घिमिरे, भुटान बाट 🇧🇹
~~~~~~~~~~~~~~~~~~

चित्रपट पञ्चाङ्ग   [२४]

चुनाव जिताएर जनताले फुल लाइदिए।
परिणाम उसले चाहिँ भने शुल लाइदिए।
असल नेता त देशले कहिल्यै चुन्न सकेन,
चुनाव अघि चैँ आश्वासनको मुल लाइदिए।
जितेपछि दुइदिनै नटिक्ने पुल लाइदिए।

✍️पशपती राई, खोटाङ ।
~~~~~~~~~~~~~~~~~~~~~~~~~~

चित्रपट पञ्चाङ्ग   [२५]

ठाउँ ठाउँमा नै पुल कच्चा बनाए बरै ।
जनताको मन जित्न सच्चा बनाए बरै ।
भत्किन्छन् पुलहरु अनि भासिन्छन् बाटो ,
भ्रष्टाचारीहरुले नै घच्चा बनाए बरै।
साेझा यी जनतालाई बच्चा बनाए बरै।

✍️सहयात्री शोभा अर्याल, बुटवल ।
~~~~~~~~~~~~~~~~~~~~~~~

चित्रपट पञ्चाङ्ग   [२६]

पुल बन्दा खुसी लागेको छ ।
दुःख पीडा सब भागेको छ ।
अहिले पुल भाँचिएकोले,
मनमा दुःख नै जागेको छ।
पीडा माथि पीडा मागेको छ।

✍️ह्यारिस ह्यारिसन, काठमाडौं ।
~~~~~~~~~~~~~~~~~~~~~~

चित्रपट पञ्चाङ्ग   [२७]

पहिलेका धेरै कुरा मासिएको छ।
मान्छेहरु हिँड्ने पुल भासिएको छ।
चुनावमा विकासको हुन्छ कुरा त,
बच्चा डरले छेउमा टाँसिएको छ।
जीवन नै दोसाँधमा गाँसिएको छ।

✍️सुशीला पौडेल, काठमाडौं ।
~~~~~~~~~~~~~~~~~~~~~~~

चित्रपट पञ्चाङ्ग    [२८]

हेर्दाहेर्दै त्याे छँदाखाँदाकाे पुल पनि भासिन लाग्याे ।
सार्वजनिक ति धराेहरहरु पनि नासिन लाग्याे ।
भ्रष्टाचारीलाई उति  नै कमिसन नपुगेर हाेला ,
जनतालाई शास्ति छ है भाेकले  पेट टाँसिन लाग्याे ।
विदेशीकाे इशारामा चल्दा देश पनि मासिन लाग्याे ।

✍️उर्मिला के.शी., धनकुटा।
~~~~~~~~~~~~~~~~~~~

चित्रपट पञ्चाङ्ग   [२९]

भाँचिएको पुल कसरी हेर्नु  यहाँ ।
वर्षै पिच्छे पुल कसरी फेर्नु यहाँ ।
भाँचिएको नदीमा जिन्दगी बचेको ,
पानीमा बाँचेको जिन्दगी घेर्नु यहाँ ।
उद्वार गरेर मायाले  बेर्नु यहाँ ।

✍️सुमित्रा पोखरेल, काठमाडौं ।
~~~~~~~~~~~~~~~~~~

पञ्चाङ्ग   [३०]

सिङ्गै ज्वालामुखी छातीभित्र,हुलेर बाँचेको मान्छे हुँ म।
मुस्किलले  तिम्रा  यादहरु, भुलेर  बाँचेको मान्छे हुँ म।
अब पठाएर के गर्छ्यौ, व्यर्थमा  घाइते भएर आउलान्,
त्यो ज्वालामुखीको लाभा सँगै,घुलेर बाँचेको मान्छे हुँ म।
राप सँगैको  खरानी माथि, डुलेर  बाँचेको  मान्छे हुँ म।
                          
चिरञ्जीवी ढकाल, नेपालगन्ज -२०
राँझा एयरपोर्ट बाँके ।
~~~~~~~~~~~~~~~~~

१.
चुनावको मुखमा गर्छन् एकापसमा सक्तो सराप
जिते पछि कॅाध मिलाउॅछन्, जब कुर्सी हुन्छ धराप ।
२.
मख्ख नपराैँ नेताहरूका चिल्ला चाप्ला कुराले
चुनाव पछाडि जनतालाई काट्ने छन् छुराले ।
३.
चुनाव अगाडि भोट माग्न हात जोड्छन्
जितेर गए पछि हाम्रै टाउको फोड्छन् ।
४.
युवा अघि बढ्नु पर्‍यो, यी बुढा नेताहरू हराउन
पठाउॅ अब यिनीहरूलाई भेडा बाख्रा चराउन ।
५.
कर्तव्य भुले नेताहरूले, विचार गरी भोट हालाैँ
थोत्रा गाडीका इन्जन जस्ता पुराना नेता अब फालाैँ ।
✍️ राजेशराज गड्तौला
रतुवामाई- १०, मोरंग
हाल- प्रवास

“#समाज_सेवामा_निस्वार्थ_सहभागिता #साहित्य_उत्थान_र_विकासमा_हाम्रो_प्रतिबद्धता “

#चित्रमा_मुक्तक_अभ्यास_शृङ्खला ५५ सम्पन्न 🇳🇵🏵️ 🌺

संरक्षक /सहजकर्ता =निर्मला सुवेदी
सञ्चालक/संयोजक =प्रेम थापा “मन”

तस्बिरसँग मिल्दो मुक्तक अभ्यास गर्नु हुने सबै स्रष्टा ज्यूहरू प्रति हार्दिक आभार ।

#उदाहरण_मुक्तक 🇳🇵

प्रफुल्लित बनेको छ मन प्रकृतिको भित्र भित्र
दु:ख सारा हरण गराउन देख्दा मोहक यही चित्र
कञ्चन मन सजाउन सन्ततिको,सपार्न मतिको
वर्णन योग्य काफी विश्वको मुटु यही दृश्य पवित्र ।

✍️२०७९ ,कात्तिक ,२२ ,मङ्गलबार🇳🇵

✍️मुक्तक🇳🇵

झर्झराउँदा झरना हरियाली फाँट यो सुन्दर।
बचाउ पर्यावरण देशको अरु सान के छ र ।
सफा हावा सफा पानी जान हो प्रकृति यो सबैको,
सबथोक यहिँ मिल्छ जिन्दगी यसैको छ भर।

👉️रतन बिष्ट
आलिताल डडेल्धुरा ।

✍️मुक्तक🇳🇵

सुन्दर प्राकृतिक छटा देखिन्छ हेर कस्ताे
हेरेर यस्ताे दृश्य आँखा टेकिन्छ हेर कस्ताे
झरना र हरियाे वनले सजाएकाे छ भूमि 
त्यहाँ पुगे याे अंगालोमा बेरिन्छ हेर कस्ताे।

                         👉️ नवराज भट्ट
                   महेन्द्रनगर, कञ्चनपुर
✍️मुक्तक🇳🇵

कति अदभूत दृश्य, मोहित नहुने को होला
मन,मुटु अनि अन्तस्करण, नछुने को होला 
प्रकृति नै हाम्रो साथी, सृष्टिकर्ता पालनकर्ता,
प्रकृतिसँगै नहाँस्ने,नखेल्ने र नरुँने को होला ?

👉️वसन्त अनुभव 
घोराही, दाङ

✍️मुक्तक🇳🇵

चुनावी सरगर्मी ह्वात्तै नै बढेकाे 
काेही हात्ती चढे काेही धुरीमै रहेकाे
अरुले कमाए भनेर हुन्छ र ?
मतदाताकाे मन छ अहिले जलेकाे ।

  👉️  मधुसूदन प्रसाद घिमिरे

✍️मुक्तक🇳🇵

प्रकृतिको कला बनोट लेखेर चित्त मान्दैन
जसरी  हेरूँ  हेरिरहुँ  चिम्लेर चित्त  मान्दैन
हरियाली  बस्ती भित्र स्वर्गपुरी घर छ मेरो ,
यहीँ बस्छु  यहीँ मर्छु म मरेर चित्त  मान्दैन ।

👉️होम प्रसाद नेउपाने
धरान,सुनसरी ।

✍️मुक्तक🇳🇵

आहा!कति सुन्दर र रमणीय ठाउँ रहेछ
डाँडा पाखा पहराले छोपिएको गाउँ रहेछ
प्रकृति प्रेमिको लागि कविता लेख्न सुहाउने
हरियाली बसन्तको मनोहक नाउँ रहेछ ।

👉️अम्विका अधिकारी
झापा विर्तामोड

✍️मुक्तक🇳🇵

मन नै खुसिले गदगद प्रकृति देख्दा 
स्वर्गको बयान पनि कमि शब्दमा हेर्दा 
हरेक दुःख भुलाईदिन्छ यो सुन्दर सन्सार
खुशी र शान्ति एकै ठाउँमा भेट्दा ।

👉️सागर शर्मा (ढुक्क हो)
जैमिनि १० पाही

✍️मुक्तक🇳🇵

प्रकृति तिमीलाई मन पराउने भएछु 
खै कसरी दिलभित्र सजाउने भएछु ‌
तिम्रै रूपाकृति देखेर मन भरिएपछि,
चराझैँ मन मष्तिस्क नचाउने भएछु ।

👉️- आर्त अकुलीन, कैलाली

✍️मुक्तक🇳🇵

माथी झरना पारी पर्वत तल मेराे गाउँ
साँच्ची यस्तै हुन्छ हजुर स्वर्ग भन्ने ठाँउ
माछापुछ्रे अन्नपूर्ण धौलागिरी सबै देखिने
नेपालमै पर्छ त्यो देउराली हो त्यसको नाउँ ।

👉️सिर्जन रामु गुरुङ्ग 
जैमिनि न पा १० राङ्खानी देउराली बागलुङ

✍️मुक्तक🇳🇵

प्राकृतिक सुन्दरताले वरपर सुन्दरता छरेको छ
साथमा सुन्दर बस्तिले लिई आनन्द अटेको छ
रमाउन चाहनेहरुका लागि प्रकृति नै एक हो
कलकल बग्दै हेर यहाँ स्वच्छ सरिता बहेको छ।

     👉️     तेजप्रसाद खनाल
               लमही दाङ।
✍️मुक्तक🇳🇵

सौन्दर्य प्रकृतिमा हराउँदा यो मन ,
अचम्मित  आफै,सर्माउँदा यो मन ,
थाकेको शरीर लामो सुस्केरा सँगै ,
अमृत रूपी झरना तिर्खाउँदा यो मन ।

👉️महाश्रम शर्मा 
जैमिनि 4

✍️मुक्तक🇳🇵

स्वर्गीय आनन्द रारा, फोक्सुण्डो,फेवा तालमा पाउँछौं
अनि,यी प्रत्येक हात्ती,गैंडा,कस्तुरीको चालमा पाउँछौं 
यसैले, ए ! बिदेशी  पर्यटकहरु एकपटक घुम्न आउनु 
यस्तो मनोरम दृश्य एउटा मात्र देश नेपालमा पाउँछौं।

👉️प्रदिप नेपाली
बिहादी ५ उराम,पर्बत।

✍️मुक्तक🇳🇵

आहा!मन लोभिने ठाउँ कति सुन्दर छ 
आजसम्म देखे भन्दा अति सुन्दर छ 
प्रकृति त हो मानवको बाँच्ने आधार
यसैमा गरेको हाम्रो प्रगति सुन्दर छ ।

👉️विक्रम तिरूवा सलिन 
जुम्ला

✍️मुक्तक🇳🇵

प्रकृतिको सुन्दरताले नछुने को होला?
यो मौलिकतामा खुशी नहुने को होला?
सुख मात्र होइन सन्तोष हो हजुर खुशी
प्राकृतिक विपत्तिमा यहाँ नरुने को होला?

👉️निर्मला सुवेदी,बागलुङ।

✍️मुक्तक🇳🇵

तन मन वचन  लोभ्यायो  प्रकृतिको भावले
अन्तःकरण चेष्टा खुलायो हरियाली दावले
रूपात्मक, अनगन्ती आशय,  दैवी जगतमा
प्राकृतिक  सुन्दरतालाई   जित्दैन  तनावले।

✍️ अच्युत घिमिरे-भुटान बाट 🇧🇹

✍️मुक्तक🇳🇵

चारैदिशा हरियाली कति राम्रो गाउँ छ
सबैजना एक पटक पुग्नै पर्ने ठाउँ छ 
नेताहरूले  गर्दा आज कुरुप बनाइसके
त्यही ठाउँसँग जोडिएको मेरो सुन्दर नाउँ छ ।

👉️बिक्रम शर्मा चापागाईं 
जैमिनिघाट बाग्लुङ

✍️मुक्तक🇳🇵

कुनै बेला धूप कुनै बेला छाउँ जिन्दगी यस्तै छ,
किस्मतको खेल लगाउ दाउँ जिन्दगीको यस्तै छ,
प्रकृतिको सुन्दरता र स्वरूप जस्तै यहाँको,
कहिले काँही रमाउने ठाउँ जिन्दगीको यस्तै छ ।

👉️Singer bishal
Kohalpur, banke

✍️मुक्तक🇳🇵

हेर्न मात्रै पाए पनि भोक प्यास मेटिन्छ नि
साराङ्गीको धुन पनि छहराले रेटिन्छ नि
स्वर्गकै अप्सरा पनि यतै भुल्थिन् होली
धर्तीमा यस्तो ठाउँ अन्त कहाँ भेटिन्छ नि!

👉️-पशपती राई खोटाङ

✍️मुक्तक🇳🇵

कति सुन्दर  प्राकृतिकले भरिपुर्ण  मनमोहक ठाउँ 
सूक्ष्म रुपले अवलोकन  गर्दा  बिर्सने  आफ्नै नाउँ 
झर्नाको संगीत संँगै  ~ छङ्गछङ्ग  बग्ने उस्तै  खोला 
प्राकृतिले सजिएको सुन्दर लाग्छ देख्दा अझै गाउँ।

👉️अनुपमा भुजेल (आभा)
खोटाङ्ग नेर्पा-६

✍️मुक्तक🇳🇵

देशलाई प्रकृतिले दिएको अतिनै सुन्दर उपहार छ
प्रकृति प्रेमी साहित्यकारको धेरैनै मिठो उदगार छ
उत्तरतर्फ कञ्चन हिमाल दक्षिण सुनौला फाँटहरू
पाहुनालाई लोभ्याउने स्वच्छ प्राकृतिक उपकार छ ।

👉️” जिज्ञासु ” पन्त

✍️मुक्तक🇳🇵

खोज्दा नेपाली कै नाम भेटियोस् अनि पो त मज्जा हुन्छ
उठ्ना बितिकै झरना देखियोस् अनि पो त मज्जा हुन्छ 
सबैले गुनगुनाउन परोस अाहा कति राम्रो नेपाल भनेर 
विदेशीको गलत नजर छेकियोस् अनि पो त मज्जा हुन्छ ।

👉️ हेमराज महरा क्षेत्री
रोल्पा नगरपालिका 5 रोल्पा