दाङ, लमही/२९ असोज । दाङको लमहीमा आज दुई कृति एकसाथ विमोचित भएका छन् । विमोचित हुने कृतिहरूमा चारु साहित्य प्रतिष्ठान लुम्बिनी प्रदेश अध्यक्ष एवम् साहित्यकार तेजप्रसाद खनालको एकल चारु सङ्ग्रह ‘जुनेली रात’ र नेपालका नौ जना मूर्धन्य चारुकारहरूको (नवरत्नको) संयुक्त सङ्ग्रह ‘नवरत्न’ रहेकोे छ ।
चारु साहित्य प्रतिष्ठान, लुम्बिनी प्रदेशको आयोजनामा आयोजित एक कार्यक्रममा प्रमुख अतिथि एवम् गजल शिरोमणि डा.घनश्याम न्यौपाने परिश्रमी र विशिष्ट अतिथि एवम् चारु प्रवर्तक डा.देवी पन्थीले संयुक्त रुपमा गर्नुभएको थियो ।
बहर र काफियालाई गजल मुटु र फोक्सोको संज्ञा दिदै गजल शिरोमणि डा.घनश्याम न्यौपाने ‘परिश्रमी’ले उक्त दुई कुरा गजलमा अपरिहार्य रहेको जनाउनुभयो । बहर र काफिया बिना गजल, गजल हुन नसक्ने बताउनुभयो । साथै उहाँले बहरबिना लेखिएका सम्पूर्ण गजल चारु भएको उल्लेख गर्नुभयो ।
चारु नेपालको आफ्नै माटोमा उम्रिएको काव्यको एक प्रविधा भएको उल्लेख गर्दै चारु प्रवर्तक डा.देवी पन्थीले गजलकै शैलीमा लेखिने बिनाबहरका रचना चारु भएको उल्लेख गर्नुभयो । विमोचित कृतिहरूको समीक्षा गर्ने क्रममा उहाँले चारु छोटो समयमा नेपाल लगायत भारतमा समेत लोकप्रिय हुनपुगेको बताउनुभयो । भारतिय सर्जकहरूले चारु हिन्दी भाषामा लेख्ने गरेको बताउनुभयो ।
उक्त कार्यक्रममा शुभकामना मन्तव्य दिनुहुँदै लमही नगरपालिका वडा नं. ५ का अध्यक्ष ओमप्रकाश सुवेदीले साहित्यको उन्नयनका लागि आफूले सक्दो सहयोग गर्ने प्रतिबद्धता जनाउनुभयो ।
उक्त कार्यक्रममा साहित्यकार हरि पोख्रेल, स्वर्णशिखा, धनसिंह गिरी, छविलाल कोपिला , जगतराम यादव, भूमि आयोग दाङ जिल्ला अध्यक्ष लेखराज रेग्मी, प्राध्यापक हरेकृृष्ण ज्ञवाली, लिलाराम खनाल लगाएतका महानुभावहरूले शुभकामना मन्तव्य दिनुभएको थियो । साथै उक्त अवसरमा विभिन्न साहित्यकारहरूले चारु लगायतका रचना वाचन गर्नुभएको थियो ।
कार्यक्रममा प्रथम चारुकार अमृता रसाइली रामदाम, अम्बिका खरेल उप्रेती, वसन्त अनुभव, यज्ञलाल सुवेदी, सीता शर्मा पन्थी, सन्जना शर्मा, निम बहादुर थापा, बिना रोका, सुरेश कुमार पाण्डे लगायतका साहित्यकारको उपस्थिति रहेकोे थियो । कार्यक्रममा स्थानीय साहित्यकारहरूका अलावा पूर्वको विराटनगर, चितवन, नवलपरासी, पाल्पा, बुटवल देखि पश्चिम बाँकेसम्मका साहित्यकारहरूको समेत उपस्थिति रहेकोे थियो ।
कार्यक्रम चारु साहित्य प्रतिष्ठान लुम्बिनी प्रदेश अध्यक्ष तेजप्रसाद खनालको अध्यक्षमा सम्पन्न भएको थियो भने कार्यक्रमको सञ्चालन सचिव नागेन्द्र यादवले गर्नुभएको थियो ।
चारु साहित्य प्रतिष्ठान, लुम्बिनी प्रदेश समिति घोषणा
कृति विमोचनका लागि आयोजित उक्त कार्यक्रममा पूर्व गठित चारु साहित्य प्रतिष्ठान, लुम्बिनी प्रदेश समितिको औपचारिक रुपमा सार्वजनिक पनि गरिएको थियो ।
उक्त घोषित प्रदेश समितिमा तेजप्रसाद खनाल – अध्यक्ष, सन्जना शर्मा – उपाध्यक्ष , नागेन्द्र यादव – सचिव, वसन्त अनुभव – कोषाध्यक्ष र सदस्यहरू – नविना रेग्मी, सिर्जना खनाल, मुना पन्थी र यज्ञलाल सुवेदी रहनु भएको छ ।
