साउदी अरब ! नेपाली साझा मंच साउदी अरबको पहलमा पर्वतको कुश्मा नगरपालिका वडा नंं १कि दुबै मिर्गौला फेल राजकुमारी सार्की र कुश्मा-२ कि छाला क्यान्सर पीडित दिपा पाद्य्यलाई आर्थिक सहयोग गरेको छ।
ज्याला मजदुरीकाे भरमा आफ्नो दैनिकी चलाउदै आईरहेका, विगत ३ महिना अगाडि देखि दुवै मिर्गौलामा समस्या देखिएका पर्वतका सार्कीको उपचारको लागि ८/१० लाख खर्च लाग्ने भएपछि आर्थिक समस्या परेपछि संस्थाले सहयोग गरेको छ ।
त्यसैगरी सोही पर्वत जिल्लाकै अर्का छालाको क्यान्सर पीडित पाध्यको उपचारमा पनि आर्थिक समस्या भएको र उहाँको श्रीमान मानसिक रोगी भएको जानकारी प्राप्त भएपछि दुबै पीडितको बारे बुझी मन्चको खोवर संयोजक भरत पौडेलको नेतृत्वमा अभियान संचालन गरि पीडितलाई आर्थिक सहयोग गरिएको संस्थाले जनाएको छ ।
संस्थाले मृगौला पीडित सार्कीलाई ने रु १२ हजार र क्यान्सर पीडित पाद्य्यलाई ने रु २० हजार आर्थिक सहयोग गरेका छ । पीडित दुबैलाई रेमिट गरि रकम हस्तान्तरण भैसकेको पनि संस्थाले जानकारी गराएको छ ।
पीडित दुबै जना सार्की र पाध्य दम्पतीको सिघ्र स्वास्थ्य लाभको कामना सहित आर्थिक सहयोग गरि मानवीयता व्यक्त गर्नु हुने खोवर संयोजक पौडेल तथा एफपिआईमा कार्यरत दाजुभाइ लगायत सम्पूर्ण सहयोगी मनहरुमा नेपाल साझा मन्च साउदीले हार्दिक आभार व्यक्त गरेको छ ।
गैर आवाशिय नेपाली संघ (एनआरएनए)का संसारभर रहेका ८२ राष्ट्रिय समन्वय समिति (एनसीसी) मध्ये आफ्नै भवन खरीद गरेर एनआरएनए अमेरिका पहिलो बनेको छ ।
अमेरिकाले अमेरिकाको भर्जिनिया राज्यमा आफ्नै घर खरीद गरेको छ । अक्टोबर ४ तारिख बिहान अध्यक्ष वुद्धि सुवेदी नेतृत्वको कार्य समितिका केही पदाधिकारीहरु उपस्थित भएर घर खरीद कार्य टुंगोमा पुर्याएका थिए ।
भर्जिनियाको फेयर फ्याक्स काउण्टिमा अवस्थित यो घर कन्डोमनिय हो । जसमा एउटा हल सहित ५ वटा कोठा रहेका छन । कोठाहरुलाई व्यवसायिक प्रयोजनमा लगाउने एनआरएनएको योजना रहेको अध्यक्ष सुवेदीले बताए ।
संस्थालाई व्यबस्थित गर्न आफ्नै ठेगाना चाहिने भएकोले घर खरीद गरिएको कोषाध्यक्ष राजिव श्रेष्ठले बताए । बरिष्ठ उपाध्यक्ष तथा भवन खरीद गर्न बनेको आर्थिक समितिका संयोजक कृष्णजीवि पन्तले चन्दादाता सबैलाई धन्यवाद दिएका छन । पन्तले यो भवन खरीद गर्न एक महिनाको अवधिमा २ लाख ८० हजार डलर चन्दा संकलन गरेका थिए ।
“एउटा डाईनामिक कर्मचारी राखेर अमेरिकामा रहेका नेपालीका आशा र गुनासा सुन्ने व्यबस्था गर्नेछौं” अध्यक्ष सुवेदीले नेप्लिज डायस्पोरासंग भने । उनले भने “यो घर पुरै पैसा तिरेर खरीद गरिएकोले संस्थालाई अतिरिक्त आर्थिक भार थपिने छैन बरु एनआरएनए अमेरिकालाई थप आर्थिक उपार्जनको अवसर हुनेछ ।”
आगामी दिनमा संघका कामहरु व्यवस्थित हुने बताउदै उपाध्यक्ष डिलु पराजुलीले अब आफूहरु सदस्य संख्यामा वृद्धि गर्न सक्रिय हुने बताए । “भवनका माध्यमबाट भावना जोड्न खोजेका हौं ।” सचिव अनुप खनालले भने ।
आफ्नै घर खरीद गर्ने एनआरएनए अमेरिका पहिलो एनसीसी हो । एनआरएनएका अहिले ८२ वटा देशमा एनसीसी सक्रिय छन ।
साउदी अरब। गैर आवासीय नेपाली संघ पुर्बी क्षेत्रीय समन्वय समिति द्वारा आउदै गरेको बिजयादशमी, शुभ दिपावली तथा छठ पर्वको अवसरमा शुभकामना आदानप्रदान कार्यक्रम भब्य रूपमा सम्पन्न गरेको छ।
साउदी अरबको पुर्बि क्षेत्र दमाम स्थित सियादमा आयोजित शुभकामना कार्यक्रममा प्रमुख अतिथिको रूपमा नेपाली राजदूतावासका पुर्बि क्षेत्रीय जनसम्पर्क अधिकारी नारायण पासवानको उपस्थिति रहेको थियो भने साउदी अरबमा सक्रिय बिभिन्न संघसंस्थाका अध्यक्ष तथा प्रतिनिधि लगायत नेपाली दाजुभाइ तथा दिदिबहिनीहरुको उल्लेखनीय उपस्थिति रहेको थियोे ।
उक्त कार्यक्रममा शुभकामना मन्तव्य व्यक्त गर्दै बिभिन्न संघ संस्थाका प्रतिनिधिहरुले हामी नेपाली सन्सारको कुनै पनि भुगोलमा रहेतापनि आफ्नो कला संस्कृतिको जगेर्ना गर्नुपर्ने र यसै माध्यमबाट आफुलाई नेपाली समाजको परोपकार सङ्ग जोड्नु पर्नेमा जोड दिएका थियो।
कार्यक्रममा गैर आवासीय नेपाली संघ आईसीसी महिला उपाध्यक्ष यासमिन बेगम सैयद , आईसीसी सदस्य तेज थापा , एनसीसी साउदीका अध्यक्ष डमर यादब ,उपाध्यक्ष रबिना अर्याल , नेपाली साझा मन्चका अध्यक्ष अकल प्रधान , प्रवासी नेपाली मन्चका महासचिव याम लामा तामाङ ,पानस साउदीका महासचिव मनोज धिमाल ,हेल्प मधेसी साउदीका कार्यबाहक अध्यक्ष श्याम कुमार महतो ,किरात राई यायोय्खा शाखा साउदी अरबका अध्यक्ष चित्र कुमार चाम्लिङ्ग राई, तामाङ घेदुङ पुर्बी क्षेत्रका अध्यक्ष बिजय लामा , पत्रकार अन्जान गुभाजु , आरसीसी दमाम कोषाध्यक्ष प्रजिता महर्जन लगायत विभिन्न संघसंस्थाका प्रतिनिधिले शुभकामना मन्तव्य दिएका थिए ।
गैर आवासीय नेपाली संघ क्षेत्रीय समन्वय समिति दमामका अध्यक्ष विष्णु भण्डारीले शुभकामना आदानप्रदान विषेश कार्यक्रममा गरिमामय उपस्थिति जनाइ कार्यक्रमको शोभा बढाउनुहुने सम्पूर्ण नेपाली दाजुभाइ तथा दिदीबहिनीहरूमा हार्दिक आभार ब्यक्त गरेका थिए।
कार्यक्रममा स्थानीय कलाकारहरूको नृत्य,गायन तथा साहित्यिक प्रस्तुति पनि प्रस्तुत गरिएको थियो।
उक्त कार्यक्रम गैर आवासीय नेपाली संघ क्षेत्रिय समन्वय समिति दमामका सचिब पुर्ण सुनार संचालन गरेका थिए भने कार्यक्रमको सभापतित्व अध्यक्ष विष्णु भण्डारीले गरेका थिए।
कार्यक्रममा हेल्थ केयर अस्पताल दम्मामले त्यहाँ उपस्थित नेपाली दाजुभाईहरुलाई चेक जाँच गरि स्वास्थ्य सेवा उपलब्ध गराएको थियो ।
नयाँ दिल्ली (भारत) । भारत र साउदी अरबले रुपया–रियालमा व्यापार गर्ने सम्भावनाबारे छलफल गरेका छन् । यसबाहेक पनि साउदीमा यूपीआई र रुपये कार्डको प्रयोग शुरु गर्नेबारे छलफल भइरहेको वाणिज्य मन्त्रालयले सोमवार बताएको छ । सेप्टेम्बर १८ देखि १९ को बीचमा वाणिज्य तथा उद्योग मन्त्री पियुष गोयलको साउदी भ्रमणको समयमा यसबारे छलफल भएको हो । भ्रमणका क्रममा उनी भारत–साउदी अरब रणनीतिक साझेदारी परिषद्को मन्त्रीस्तरीय बैठकमा पनि सहभागी भएका थिए । साउदी भ्रमणका क्रममा गोयलले राजकुमार अब्दुलाजिज बिन सलमान अल साउदसँग अन्य विविध विषयमा पनि छलफल भएको थियो । मन्त्रीस्तरीय बैठकले कृषि तथा खाद्य सुरक्षा, ऊर्जा, प्रविधि तथा आईटी र उद्योग तथा पूर्वाधारका ४१ क्षेत्रमा सहकार्यका लागि समर्थन गरेको छ । समय तोकेर प्राथमिकताका परियोजनाहरु कार्यान्वयन गर्ने र दुबैको संलग्नता रहेका परियोजनाहरुमा सहकार्यलाई निरन्तरता दिनेबारे पनि भारत र साउदी दुबैले समर्थन जनाएका छन् । दुई देशका एक्जिम बैंकहरुबीच संस्थागत टाई–अप, तेस्रो देशमा संयुक्त परियोजना सञ्चालन, पूर्वाधार विकासमा सहकार्य लगायन अन्य कयौं विषयमा पनि छलफल भएको बताइएको छ । भारतले व्यापार घाटा कम गर्न, विदेशी विनिमय सञ्चिति घट्न नदिन, रुपयामाथिको दबाब कम गर्न, पश्चिमी देशहरुको प्रतिबन्ध उल्लंघनको अवस्थामा आउन नदिन पछिल्लो समय विदेश व्यापारमा रुपयाको प्रयोगलाई बढावा दिने नीति लिएको छ । केही समयअघि रुससँग पनि भारत सरकारले रुपयामा व्यापार गर्ने संयन्त्रण स्थापना गर्ने सहमति भएको थियो । इरानमाथि पश्चिमी देशहरुले लगाएको प्रतिबन्ध उल्लंघन हुने अवस्था टार्न केही वर्ष अघि भारत र इरानले रुपयामा कारोबार गरेका थिए । रुसले युक्रेनमाथि आक्रमण गरेयता भारतले पनि रुपयामा कारोबारलाई अगाडि बढाउने अर्को अवसर पाएको छ । रुपया–रुबलमा द्विपक्षीय व्यापारलाई सहज बनाउन रुसको पिटर्सबर्ग सोसल कमर्सियल बैंक (पीएससीबी) ले भर्खरै भारतीय बैंक यस बैंकमा रुपयामा आधारित खाता खोलेको छ । यो खातालाई पछि विशेष रुपया खातामा रुपान्तरण गर्न सकिने बताइएको छ । एजेन्सी
भैरहवा : गौतमबुद्ध अन्तर्राष्ट्रिय विमानस्थलबाट जजिरा एअरवेजले शुक्रबारदेखि दैनिक उडान सुरु गरेको छ। शुक्रबार बिहान ६ः४५ बजे १ सय ६८ यात्रुलाई लिएर जजिराले विमानस्थलबाट नियमित उडान सुरु गरेको हो।
विमानस्थलबाट अन्तर्राष्ट्रिय उडान भर्ने यो एक मात्र एअरवेज कम्पनी हो। ‘शुक्रबारदेखि गौतमबुद्ध अन्तर्राष्ट्रिय विमानस्थलबाट नियमित उडान सुरु गरेका छौँ’, जजिरा एअरवेज नेपालको अपरेसन प्रमुख संगीता रौनियारले भनिन्, ‘राम्रो प्रतिक्रिया आए भविष्यमा विमान थप गरेर पनि सेवा दिने छौँ।’
जजिराले कुवेतका लागि उडान भर्ने गरे पनि यात्रुहरूले ट्रान्जिट गरेर अन्य मुलुकमा पनि विमानस्थलबाट जाने गरेका छन्। विमानस्थलबाट सिधा कुवेत र ट्रान्जिट गरेर दोहा, दुबई र साउदी अरेबियामा बढी यात्रुहरू जाने गरेको अपरेसन प्रमुख रौनियारले बताइन्।
हालसम्म एयरलाइन्सले कुबेत–भैरहवाबीच हप्तामा सोमबार, बुधबार र शनिबार गरी तीनवटा उडान भर्दै आएको थियो। गौतमबुद्ध अन्तर्राष्ट्रिय विमानस्थलका निर्देशक तथा प्रवक्ता सुभाष झाले शुक्रबारदेखि जजिरा एअरवेजले कुबेत–भैरहवाबीच नियमित रूपमा दैनिक एउटा उडान सञ्चालन गरेको बताए।
कुबेतबाट–भैरहवा विमानस्थलमा कुल ६ हजार ५ सय ८७ जना हवाईयात्रु आएका छन्। भैरहवाबाट कुबेतका लागि कुल ७ हजार २ सय ४० जना गएका छन्। जजिरा एयरलाइन्सको ‘एयर बस ३२० नीओ’ विमानले हवाई उडान भर्दै आएको छ। यो विमानस्थललाई चलायमान बनाउन नेपाल नागरिक उड्डयन प्राधिकरणले अन्तर्राष्ट्रिय हवाई उडान सञ्चालन गर्दा विभिन्न छुट र सहुलियत दिएका कारण जजिरा एअरवेजबाट काठमाडौं–कुबेतभन्दा भैरहवाबाट भाडा दर धेरै सस्तो छ।
लुम्बिनी, कर्णाली, सुदूरपश्चिम प्रदेश र पूर्वमा वीरगन्जसम्मका यात्रुले कुबेतको हवाई यात्रा भैरहवाबाट गर्ने गरेका छन्। हंगेरीको वायुसेवा कम्पनी विज एयरले पनि अक्टोबर ३० देखि दुबईको अवुधाबी–भैरहवा हवाई उडान सञ्चालन गर्ने तयारी गरेको छ।
दशैंका लागि विदेशबाट नेपाल फर्किंदै हुनुहुन्छ ? फर्किंदा टन्नै सामान ल्याउने योजना छ भने विचार पुर्याउनुहोला । पछिल्लो समयमा त्रिभुवन अन्तर्राष्ट्रिय विमानस्थलले भन्सारमा सामान जाँच कडा बनाएको छ ।
तुलनात्मक रुपमा विदेशबाट तोकिएभन्दा बढी परिमाणमा सुन, रक्सी र मोबाइल ल्याउने क्रमलाई निरुत्साहित गर्न भन्सार जाँचमा कडाइ गरिएको छ ।
त्रिभुवन विमानस्थल भन्सार कार्यालयका प्रमुख अरुण पोखरेलले अनुसार सरकारको झिटीगुन्टा आदेशअनुसार मात्रै सामान ल्याउन उनले आग्रह गरेका छन् । झिटीगुन्टा आदेशमा तोकिएको भन्दा बढी सामान ल्याए जफत हुने उनको भनाइ छ ।
झिटीगुन्टा आदेशले दिएको सुविधामा पनि अरुको समान बोकेर ल्याएको पाए तोकिएको दरमा भन्सार तिराउने गरेका छौं,’ उनी भन्छन्, ‘सुन, रक्सी र स्मार्टफोन (आईफोन) ल्याउनेहरुले बढी नियम मिचेको पाउँछौं ।’
सरकारले विदेशबाट फर्किनेहरुले ल्याउने विभिन्न वस्तुमा भन्सार लाग्ने व्यवस्था गरेको छ । कतिपय सामान ल्याउनै पाइँदैन भने केही सामान भन्सार नतिरी पनि ल्याउन पाइन्छ । त्यसैले एयरपोर्टमा आएर झन्झट ब्यहोर्नुभन्दा पहिले जानकारी लिन अनुरोध गर्छन् भन्सार प्रमुख पोखरेल ।
परिमाण मिचेर रक्सी र अरु सामान ल्याउने क्रम बढ्दै गएपछि जफत गर्ने क्रम पनि बढेको छ । विदेशबाट फर्किने धेरैले टिभी, मोबाइल, गहना लगायतका सामग्री ल्याउँछन् । तोकिएको भन्दा बढी ल्याए सामान सिधै जफत हुने वा महँगो भन्सार तिर्नुपर्ने पनि हुनसक्छ । कतिपय सामान त परिमाणभन्दा बढी ल्याएमा जफत समेत हुनसक्छ ।
के-केमा भन्सार लाग्दैन ?
विदेशबाट महँगा र ब्राण्डेड रक्सी ल्याउने प्रचलन छ । तर, धेरै परिमाणमा रक्सी बोक्नुभयो भने समस्या हुनेछ । विदेशबाट बढीमा १ लिटर मात्रै रक्सी ल्याउन पाइन्छ ।
यस्तै ल्यापटप/कम्प्युटर वा ट्यावलेट, घडी, क्यामेरा, भिडियो क्यामेरा, सेलुलर–मोबाइल फोन र पेन ड्राइभ १/१ थान ल्याउँदा पूर्ण भन्सार छुट हुन्छ । बच्चा राख्ने पेराम्बलेटर र ट्राइसाइकल १/१ वटा ल्याउँदा पनि कुनै भन्सार तिर्नुपर्दैन ।
वैदेशिक रोजगारीमा गएर कम्तीमा एक वर्ष बिताएका नेपालीले ३२ इन्चसम्मको टिभी ल्याउन पाउँछन् । तर, अरु प्रयोजनले विदेशमा गएका र १ वर्ष नबिताएकालाई यो सुविधा छैन ।
विदेशमा काम गरेर फर्किएकाहरुलाई १ थानसम्म नयाँ मोबाइल ल्याउन दिइन्छ । विभिन्न पेशा गर्ने व्यक्ति स्वदेश फर्किंदा ल्याएका आफ्नो पेशासँग सम्बन्धित सामानमा पनि भन्सार लाग्दैन ।
डाक्टरले ब्लड प्रेसर नाप्ने यन्त्र, स्टेथेस्कोप, खेलाडीले खेलकुद सामग्री, संगीत क्षेत्रमा लागेकाहरुले गितार, हार्मोनियम लगायतका बाजा १/१ थान ल्याउन भन्सार तिर्नुपर्दैन ।
निश्चित परिमाणमा लुगाफाटा, बिछ्यौना, घर गृहस्थी लगायतका पुराना व्यक्तिगत प्रयोजनका सामग्री ल्याउन भन्सार लाग्दैन । तर, ठूलो परिमाणमा ल्याउन पाइँदैन ।
औषधि उपचारका लागि विदेश गएका नागरिकले आफ्नै प्रयोजनका लागि ल्याउने औषधि र शारीरिक रुपमा अशक्तहरुको सहाराको लागि ल्याइने सामग्रीमा पनि भन्सार छुट छ । सात किलोग्रामसम्म खाद्यवस्तुमा पनि भन्सार शुल्क लाग्दैन ।
यात्रुको अवस्था, परिवार संख्या, विदशेमा व्यतित गरेको अवधि लगायतलाई ध्यानमा राखेर भन्सार अधिकारीले औचित्य हेरेर तोकिएभन्दा बढी परिमाणका वस्तु रहेछन् भने छोडिदिन सक्ने व्यवस्था छ ।
६ महिनाभन्दा बढी र एक वर्षसम्म विदेश बसेर फर्किएकाहरुले १५ हजारसम्म र एक वर्षभन्दा बढी बसेर फर्किएमा २५ हजार रुपैयाँसम्मको मूल्यको विभिन्न वस्तुहरु तोकिएको परिमाणमा ल्याएमा भन्सार प्रज्ञापनपत्र नभरी छुट्टै अभिलेख राखेर जाँचपास गर्ने व्यवस्था छ । यो सुविधा अन्तरगत म्यूजिक तथा भिडियो प्लेयर, रेफ्रिजेरेटर, वासिङ मेसिन, पंखा र रेडियो र १/१ थान ल्याउन सकिन्छ ।
शरीरमा लगाउने लुगाफाटा, जुत्ता, कस्मेटिक लगायत १५ थान, घरायसी प्रयोजनका लागि ल्याइने मिक्स्चर, जुसर, सिलाइ मेसिन, ग्यासटेबुल, इस्त्री, राइस कुकर २–२ थान, पेशागत क्षमता अभिवृद्धिका लागि आवश्यक पर्ने सामान २–२ थान र दश किलोग्रामसम्मको खाद्यान्न ल्याउँदा पनि यही नियम लागू हुनेछ ।
यो सीमा नाघेर आएका सामान भने आर्थिक एन अनुसारको भन्सार महसुल तिरेर मात्रै छुटाउन सकिने छ ।
३२ इन्चभन्दा ठूलो टिभी ल्याएमा इन्चअनुसार भन्सार महसुल तिर्नुपर्छ । तर, एउटाभन्दा बढी टिभी भन्सार तिरेरै पनि ल्याउन पाइँदैन ।
विदेशमा बसेका व्यक्तिले नेपालमा बसेका आफन्तलाई ल्याएका ३५० डलर मूल्यसम्म्का जुनसुकै वस्तु पनि प्रमाण हेरेर छोडिने नियम पनि छ ।
चुरोट २ सय खिल्लीसम्म र सिगार ५० खिल्लीसम्म लाग्ने महसुल तिरेर ल्याउन पाइन्छ । तर, सोभन्दा बढी परिमाणमा ल्याएमा दोब्बर भन्सार महसुल लिएर मात्रै भन्सार जाँचपास हुने व्यवस्था छ ।
सुनको व्यवस्था
विदेशमा काम गरेर फर्किने नेपाली कामदारले १०० ग्रामसम्म काँचो सुन ल्याउन पाउँछन् । त्यसका लागि कर तिर्नुपर्छ ।
५० ग्रामसम्म सुन ल्याउँदा दश ग्रामको ९ हजार ५०० रुपैयाँका हिसावले कर तिर्नुपर्ने हुन्छ । यसअनुसार ५० ग्रामको ४७ हजार ५ सय रुपैयाँ भन्सार लाग्छ ।
५० ग्रामभन्दा बढी सुन ल्याएमा भने बढी ल्याइएको सुनमा प्रति १० ग्राम १० हजार ५०० रुपैयाँ कर लाग्नेछ । यसअनुसार थप ५० ग्रामका लागि ५२ हजार ५०० रुपैयाँ भन्सार तिर्नुपर्छ । सय ग्रामभन्दा बढी सुन ल्याएमा जफत हुन्छ ।
५० ग्रामभन्दा बढी सुनका गहना ल्याएमा प्रति १० ग्राम १० हजार ५०० रुपैयाँ र थप सय ग्रामसम्म ल्याएमा प्रति १० ग्राम १२ हजार ५०० रुपैयाँका दरले भन्सार लाग्ने व्यवस्था छ । सोभन्दा ठूलो परिमाणमा सुनको गहना लगाएर आउँदा पनि जफत गरिन्छ ।
‘अहिले काँचो सुनलाई बेरुवा औंठी वा बाला बनाएर गहना भन्दै ल्याउनेहरु पनि छन्,’ विमानस्थल भन्सार प्रमुख पोखरेल भन्छन्,‘तस्करी गर्ने नियतले ल्याइने सुन बरामद गरेर तोकिएको परिमाणसम्म भए भन्सार तिराएर छाड्छौं, तोकिएभन्दा बढी भए जफत समेत गर्छौं ।’
काठमाडौँ- साउदी अरबमा ठूलो परिमाणमा प्रतिबन्धित लागूऔषध एम्फेटामाइनसहित आठ जना पक्राउ परेका छन् । पक्राउ पर्नेमा ६ जना सिरियाली नागरिएक एवम् दुई जना पाकिस्तानी रहेको साउदी अरबको सरकार सञ्चालित साउदी प्रेस एजेन्सीले जनाएको छ ।
साउदी अरबको लागूऔषध नियन्त्रण महानिर्देशनालयका अनुसार रियादस्थित एक गोदाममा छापा मार्दा ४ करोड ६९ लाख १६ हजार ४ सय ८० चक्की एम्फेटामाइन बरामद भएको हो । यसलाई साउदी अरबमा लागूऔषध विरुद्धको कारवाहीमा सबैभन्दा ठूलो सफलताको रुपमा हेरिएको छ ।
पिठोको थुप्रोमा लुकाएर तस्करहरुले उक्त परिमाणको लागूऔषध रियादस्थित सुख्खा बन्दरगाह कटाउन सफल भएको जनाइएको छ ।
खाडी मुलुकहरुमा एम्फेटामाइनको ठूलो स्तरमा कारोबार हुने गरेको बताइन्छ । खासगरी धनाढ्य वर्गका युवाहरुले यसको प्रयोग गर्ने गरेको पाइएको छ ।
जुम्ला — वैदेशिक रोजगारीको सिलसिलामा साउदी पुगेका जुम्ला गुठीचौर गाउँपालिकाका ९ युवकहरूको उद्धार गरिएको छ । गुठीचौर गाउँपालिका १ का ९ जनाको उद्धार गरिएको हो ।
एक महिनादेखि उद्धारका लागि हारगुहार गरिरहेका उनीहरूको उद्धार गरिएको गुठीचौर १ का अध्यक्ष अर्जुनकुमार महताराले जानकारी दिए । साउदीमा अलपत्र पर्नेमा जुम्ला गुठीचौर गाउँपालिका १ का निराजन थापा, डिलबहादुर रोकाया, शान्तबहादुर रोकाया, खडग रोकाया, लक्ष्मीबहादुर रोकाया, प्रताप लामा, एकराज ऐडी, आनन्द रोकाया र जनक बुढा रहेका छन् ।
‘उनीहरूलाई नेपालबाट ब्लु ग्यालेक्सी नामक कम्पनीले राम्रो तलब दिने स्वार्थमा साउदीस्थित क्यु सीएम कम्पनीमा पठाएको थियो । तलब राम्रो दिन्छौं । कुनै गडबडी हुँदैन भनेर साउदी पठायो,’ अलपत्र परेको जुम्ली युवाको भनाइ उदृध गर्दै वडाध्यक्ष महताराले भने,‘न राम्रो काम पायौं । नेपालबाट जुन काम र तलब दिने भनिएको थियो । त्यो भएन । अर्कै काममा लगाएर तलब पाइएन । हामी अलपत्र पर्यौं ।’
नेपालदेखि उनीहरूलाई बैंक र अस्पताल क्लिनरको रुपमा पठाइएको थियो । तर साउदीमा आर्मी ब्यारेकमा लगाइदियो । एक हजार साउदी रुपैयाँ पारिश्रमिक दिने भनिएकोमा ८ सय मात्रै दिने भनियो । त्यो पनि महिना पुगेपछि नदिएपछि अलपत्र परेको उनीहरूले बताएका छन् । उनीहरूले आठ महिना काम गरेकोमा ६ महिनाको मात्र पारिश्रमिक पाएको बताएका छन ।
उनीहरू सबै जना ११ सेप्टेम्बरमा अर्थात आइतबार नेपाल आइपुग्दैछन् । नेपाल आइसकेपछि ‘ब्लु ग्यालेक्सी’मेनपावर कम्पनी विरुद्ध वडाअध्यक्ष महताराको नेतृत्वमा उजुरी दिने तयारी भइरहेको छ ।
एक महिना अलपत्र परेका जुम्ली युवाहरू नेपाल आउने भएपछि निकै उत्साही भएका छन् । उनीहरूले जुम्लामै माटोमा केही इलम गरेर बस्ने बताए । गुठीचौर १ का वडाध्यक्ष महतरा लगायतका अगुवाहरूको पहलमा उनीहरूको उद्धार गरिएको बताइएको छ ।
वडाध्यक्ष महताराले झुटो धन्दा गरी युवाहरूलाई साउदीमा अलपत्र पार्ने मेनपावर कम्पनी र कम्पनीका ‘दलाल’हरूलाई कारबाहीका लागि पहल गर्ने बताए । यस क्रममा वैदेशिक रोजगार विभागले तीन दिनभित्र लिखित जवाफसहित उपस्थित हुन मेनपावर कम्पनीलाई निर्देशन दिइसकेको छ ! कान्तिपुर बाट सभार गरिएको।
सन् १९२६ अप्रिल २१ मा लन्डनको माइफेरमा जन्मिएकी एलिजाबेथ बेलायतमा सबैभन्दा लामो समय शासन गर्ने राष्ट्राध्यक्ष हुन् । उनी विश्वमै पनि लामो समयसम्म सत्तामा रहने शासकको सूचीमा फ्रान्सका लुइस १४ औं पछि दोस्रो स्थानमा पर्छिन् । बेलायतसँगै उनी अन्य १४ वटा कमनवेल्थ देशको राष्ट्रप्रमुख हुन् ।
महारानी एलिजाबेथले आफ्नो जीवनमा थुप्रै उतारचढावको सामना गरेकी थिइन् । उनले थुप्रै रेकर्ड पनि कायम गरेकी थिइन् । एलिजाबेथको शासनकालमै बेलायतमा १५ जना प्रधानमन्त्री र अमेरिकामा १४ जना राष्ट्रपति परिवर्तन भएका छन् ।
एलिजाबेथलाई ‘स्थायित्व र निरन्तरता’ को प्रतिनिधित्व गर्ने शालीन राष्ट्राध्यक्षका रुपमा लिइन्छ । पारिवारिक जीवनमा उनी कैयौं अप्रिय घटनाको साक्षी बनिन् तर विचलित भइनन् । एलिजाबेथ राजकुमारी रहँदा राजपरिवारमा दोस्रो मर्यादा क्रममा थिइन् । उनी बेलायतको महारानी बन्ने सम्भावना निकै कम थियो । तर सन् १९३६ डिसेम्बरमा राजा एडवर्ड तेस्रोले अमेरिकी महिलासँग विवाह गर्नका लागि सिंहासन त्याग्ने निर्णय लिएपछि १० वर्षकी उनलाई दरबारको उत्तराधिकारी बन्ने बाटो खुलेको थियो ।
उनका बुबा राजकुमार अल्बर्टलाई राजा जर्ज चौथोको उपाधि मिलेपछि जेठी छोरी एलिजाबेथ उत्तराधिकारी बनेकी थिइन् । पिताको निधनपछि सन् १९५२ फेब्रुअरी ६ मा २५ वर्षको उमेरमा उनले राजगद्दी आरोहण गरेकी थिइन् । दोस्रो विश्वयुद्धपछि बेलायत आर्थिक तथा राजनीतिक रूपमा तंग्रिने प्रयास गरिरहेका बेला एलिजाबेथले गद्दी आरोहण गरेकी थिइन् । करिब १२० देशको भ्रमण गरेकी एलिजाबेथले संसारकै सबैभन्दा धेरै यात्रा गर्ने राष्ट्राध्यक्षको कीर्तिमान राखेकी थिइन् । १६ लाख किलोमिटरभन्दा बढी यात्रा गरेकी उनी हजारौं समारोहमा सहभागी भएकी थिइन् । उनी संसारमै सबैभन्दा धेरै फोटो खिचाउने व्यक्तिमध्येमा पर्छिन् ।
महारानीले स्वास्थ्यका कारण आफ्ना कतिपय राजकीय जिम्मेवारी यसअघि नै जेठो छोरा तथा उत्तराधिकारी युवराज चार्ल्सलाई हस्तान्तरण गरेकी छन् । उनले युवराज चार्ल्स राजा बनेपछि पत्नी क्यामिला रानी बन्ने यसअघि नै प्रस्ट पारेकी थिइन् ।
सन् १९९६ मा चार्ल्स र डायनाबीच विवाहको १५ वर्षमै सम्बन्धविच्छेद भएपछि शाही परिवारप्रति आलोचना बढ्यो । त्यसको अर्को वर्ष फ्रान्सको राजधानी पेरिसमा भएको कार दुर्घटनामा डायनाको निधन भएपछि मानिसहरू राजसंस्थाप्रति नकारात्मक बन्दै गए । डायनासँग चार्ल्सको बिग्रेको वैवाहिक सम्बन्ध सुधार्न र डायनाको दुर्घटनापछि गुम्दै गएको राजसंस्थाप्रति जनताको सम्मान कायम राख्नका लागि एलिजाबेथले थुप्रै चुनौती सामना गरिन् ।
राजकुमारहरु विलियम र ह्यारीकी आमा डायनाको सन् १९९७ अगस्टमा फ्रान्सको राजधानी पेरिसमा भएको कार दुर्घटनामा मृत्यु भएको थियो । पछि सन् २००५ मा चार्ल्सले क्यामिला पार्कर बाउल्ससँग विवाह गरेका हुन् ।
तीन वर्षअघि राजकुमार ह्यारी र मेगनले दरबार छाड्ने निधो गर्दा महारानीले दुःख व्यक्त गरेकी थिइन् । पछि सन् २०२१ को जुनमा पति गुमाएपछि भने उनलाई ‘एक्लोपन’ ले अत्याएको थियो । त्यसको ६ महिनापछि यौन दुर्व्यवहारको आरोपमा छोरा एन्ड्रयुको शाही पदवी खोसिएको थियो ।
महारानी एलिजाबेथले गद्दी आरोहण गरेको ७० वर्षको अवसरमा गत जुनमा भव्य समारोह आयोजना गरिएको थियो । चार दिन सार्वजनिक बिदा दिएर गरिएको ‘प्लेटिनम जुब्ली’ समारोहमा दसौं लाख बेलायतीले भाग लिएका थिए । त्यस अवसरमा महारानीले राजकुमार चार्ल्स, ड्युक अफ केन्टलगायत शाही परिवारका सदस्यमाझ राजदरबारको बाल्कोनीबाट सैनिक र हजारौं सर्वसाधारणलाई हात हल्लाएर हौसला प्रदान गरेकी थिइन् ।
उनले नेपालप्रति पनि सद्भाव राख्ने गर्थिन् । खासगरी गोर्खा सैनिकप्रति बेलायती राजपरिवारको गहिरो विश्वास रहेकाले पनि नेपालसँग एलिजाबेथको विशेष सम्बन्ध थियो ।
८ सेप्टेम्बर २०२२, बिहीबार ! साउदी अरब वैदेशिक रोजगारीको सिलसिलामा केही बर्ष पहिले साउदी आएर काम गर्दै गर्दा गत जुलाईमा ड्युटी जाने क्रममा सवारी दुर्घटना परी एक हात गुमाएका दाङका हेम राज खत्रीलाइ “नेपाली साझा मंच” साउदीद्वारा आर्थिक सहयोग गरेको छ ।
डुट्यिको समयमा सवारी दुर्घटना परि घाइते भएका र उहाँको उपचार पछि उनको कम्पनीले कुनै रकम बिना नेपाल पठाउन लागेको अबस्थामामा उहाँ नेपाली राजदूताबास रियादको सम्पर्कमा पुगेर आफ्नो शरीरको एक महत्त्वपूर्ण अंग गुमाउनु परेको र उल्टै आफुले पाउनु पर्ने बिमा रकम नदिकन कम्पनीले नेपाल् पठाउन लागेको कुरा अबगत गरि सहयोगको लागि अनुरोध गरेका थिए । उहाँको अनुरोध पछि दूतावासले पुनः बिमाको लागि प्रोसेस गर्न उनको कम्पनीलाई लगाएपनी उनी कार्यरत कम्पनी सप्लाई रहेको हुँदा बिमा रकम पाउने कुनै ग्यारेन्टी नभएको हुदा खत्रीको आगामी जीवनमा केही भएपनि सरल सहज होस भनी नेपाली साझा मन्चले केही सकेको आर्थिक सहयोग गरेको संस्थाका उप संयोजक अन्जान गुभाजुले जानकारी गराउनु भयो । उहाँको सहयोगका लागि संस्था मंचका अध्यक्ष अकल प्रधान , जेद्वा संयोजक टिकाराम पान्डे ,अलखुम्र संयोजक तेज ब सिन्धुली ,केन्द्रिय सदस्य पुन्य प्र घिमिरे लगायत दम्मामका अन्य साथीहरुको पहलमा ने रु ६९ हजार १ सय ९९ रुपैया ४८ पैसा संकलन गरि खत्रीको खातामा रेमिटबाट जम्मा गरिएको गुभाजु ले जानकारी गराए । साथै उहाँको बिमाको रकमका लागि पहल भैरहेको पनि गुभाजुले जानकारी गराए ।
पीडित खत्रीलाई आर्थिक सहयोग गरि मानवीयता व्यक्त गर्नु हुने जेद्वा टिम ,अलखुम्र टिम र दम्माम टिम ,राजु केसी, काजी गुरुङ ,राज नेपाली ,चन्द्र बहादुर ,दिनेश रम्तेल, एफपिआईमा कार्यरत दाजुभाइ लगायत सम्पूर्ण मनकारीमनहरुमा नेपाल साझा मन्च साउदीले आभार व्यक्त गर्दै पीडित बिरामी घाइते खत्रीको सिघ्र स्वास्थ्य लाभको कामना पनि गरेको छ ।
