–वसन्त अनुभव –
परि नामक उपन्यासबाट नेपाली साहित्य जगतमा पहिचान र चर्चा बटुल्दै आउनु भएकी सीमा पुरी आजभन्दा करिब ४४ वर्ष पहिले दाङ जिल्लाको स्युजामा बुवा तेज बहादुर पाण्डे र आमा भिमादेवी पाण्डेको कोखबाट जन्मिनु भएको हो । जन्मले तेश्रो सन्तान भए पनि उहाँ पहिलो जिवित सन्तान भएको बताउनु हुन्छ ।
कलिलै उमेरमा विवाह बन्धनमा बाँधिनु भएकी पुरी हाल एक छोरा र एक छोरीको आमा हुनुहुन्छ । २०५२ सालमा दाङ छोडेर काठमाडौ छिर्नु भएकी सीमा पुरीले २०५६ सालमा सहकारीबाट आफ्नो पेशागत जीवनको सुरुवात गर्नु भएको हो । सुरुमा कर्मचारीको रुपमा सहकारी भित्र छिर्नु भएकी पुरी सज्जन महिला बचत तथा ऋण सहकारी संस्था लिमिटेड, का.म.न.पा.६ महाकालको अध्यक्षको जिम्मेवारी बिगत १० वर्ष देखि सम्हाल्दै आउनु भएको छ । उहाँको कुशल नेतृत्वका कारण उहाँको सहकारीले एउटा उचाई कायम गरेको छ ।
काठमाडौ महानगरपालिका वडा नं. ६, शान्तिनगर स्थित आफ्नै निवासमा बस्दै आउनु भएकी पुरीको सानैदेखि कथा, कविता पढ्ने, लेख्ने रुचि रहेको थियो । शब्दसँग लुकामारी खेल्न असाध्यै रुचाउने पुरीका थुप्रै कविता, कथा, गजल आदि विभिन्न पत्रपत्रीकाका छापिदै आइराखेका छन । साहित्य लेखनका साथसाथै टि.भि.सिरिएलमा अभिनय समेत गरिसक्नु भएको छ । प्रकाशित उपन्यास परी उहाँको पहिलो प्रकाशित कृति हो ।
परी एक सामाजिक कथावस्तु बोकेको उपन्यास भएको जसमा समाज र परिवारबाट स्वीकार नगरिएकी कुमारी आमाले आफ्नो र बच्चाका लागि समाज, परिवार सँग गर्नु परेको संघर्ष र अन्त्यमा सन्तान मार्फत न्याय पाएको दृष्टान्त उल्लेख भएको बताउनु हुन्छ ।
परी उपन्यासको जन्म बारेमा सोधिएको प्रश्नको उत्तरमा उहाँले परीको जन्म अत्यन्त रोचक रुपमा भएको राती के लेखौ के लेखौ भएको, उदास भएको बेला राती सुतिरहेको अवस्थामा परी शब्द दिमागमा आयो उठेर लेखे त्यसपछि कथा लेखी फेसबुकमा पोस्ट गरे । साथिहरु, आफन्तहरुको राम्रो कमेन्ट पाए । लेख्ने र पोस्ट गर्ने कार्य करिब ४ महिना निरन्तर रह्यो अन्तत परीको जन्म भएको उल्लेख गर्नु भयो ।
परीले पुस्तकार लिएको करिब ३ महिना पुग्दासम्म पहिलोपटक प्रकाशित अधिकांस प्रति बिक्री भैसकेको र पाठकबाट अत्यन्त राम्रो प्रतिक्रिया प्राप्त भैराखेको बताउनु भयो । एक प्रश्नको उत्तरमा आफ्नो उपन्यासको पहिलो पाठक आफ्नै आमा रहेको बताउनु हुन्छ । हाल पुरी अर्को उपन्यास अपरिचित को लेखनकार्यमा ब्यस्त रहनु भएको छ ।
