Category: Uncategorized

कपिलवस्तु ,माघ २९

काठमाडौंबाट सुर्खेत जाँदै गरेको ना.७.ख ६०४८ नम्बरको बस कपिलवस्तुको शुद्धोधन गाउँपालिका–६ टिटिहिरिया स्थित तौलिहवा–भैरहवा सडकखण्डमा आज बिहान करिब ४:३० बजे आगलागी हुँदा पूर्ण रूपमा जलेर नष्ट भएको छ ।
गुडिरहेको अवस्थामा अचानक आगो लागेको बस सडक छेउमा रोकिएको थियो । स्थानीयवासी र प्रहरीले आगो निभाउन प्रयास गरे पनि बस केही बेरमै पूर्ण रूपमा जलेर नष्ट भएको ईलाका प्रहरी कार्यालय पकडीले जनाएको छ ।
घटनामा कुनै मानवीय क्षति नभएको जनाइएको छ । बसमा सवार सबै ४१ जना यात्रु सकुशल रहेका छन् । आगलागीको कारण भने हालसम्म खुल्न सकेको छैन ।
प्रहरीले घटनाबारे थप अनुसन्धान भइरहेको जनाएको छ ।

कपिलवस्तु ,माघ २५

आगामी प्रतिनिधि सभा निर्वाचनको तयारीमा राष्ट्र निर्माण दल नेपालले कपिलवस्तु जिल्ला, क्षेत्र नम्बर–१, विशेषगरी बाणगंगा नगरपालिकामा आफ्नो अभियान तीव्र बनाएको छ । दलका प्रत्यक्ष उम्मेदवार निसार अहमद र समानुपातिक उम्मेदवारहरूले घरदैलो कार्यक्रम सञ्चालन गर्दै मतदातासँग प्रत्यक्ष संवाद गरेका छन् ।
उम्मेदवार निसार अहमदले मतदातालाई आफ्नो योजना र प्रतिबद्धता प्रस्तुत गर्दै स्थानीय विकास, शिक्षा, स्वास्थ्य र रोजगारीका क्षेत्रमा ठोस कदम चाल्ने आश्वासन दिएका छन् । “जनतासँग प्रत्यक्ष भेटघाट गरेर समस्या बुझ्ने र समाधानतर्फ अघि बढ्ने हाम्रो अभियानको मुख्य लक्ष्य हो,” अहमदले बताएका छन् ।
राष्ट्र निर्माण दलले बाणगंगा नगरपालिका क्षेत्रमा संगठन विस्तार गर्दै युवा र महिला सहभागितालाई प्राथमिकता दिएको छ । दलका नेता र कार्यकर्ताहरूले उम्मेदवारको सक्रियताप्रति उत्साह देखाउँदै अभियानलाई थप बल दिने प्रतिबद्धता जनाएका छन् ।
अभियानका सहभागीहरूले मतदातासँग प्रत्यक्ष संवाद र घरदैलो कार्यक्रमले जनसामान्यमा दलको दृष्टिकोण र उपस्थिति स्पष्ट भएको बताएका छन्। यस अभियानसँगै राष्ट्र निर्माण दल नेपाल क्षेत्र नम्बर–१ मा आफ्नो जरो मज़बुत गर्दै अघि बढिरहेको छ ।

कपिलवस्तु ,माघ २५

प्रतिनिधि सभा निर्वाचन नजिकिँदै जाँदा कपिलवस्तु निर्वाचन क्षेत्र नम्बर–१ मा नेपाली कांग्रेसले आफ्नो चुनावी अभियानलाई तीव्र बनाएको छ । गाउँ–टोल केन्द्रित कार्यक्रम, घरदैलो अभियान र ठाउँ–ठाउँमा सम्पर्क कार्यालय उद्घाटन गर्दै कांग्रेस मैदानमा सक्रिय देखिएको छ । कांग्रेसको यो सक्रियताले क्षेत्रको चुनावी माहोल थप तातेको छ ।
कांग्रेसका उम्मेदवार अतहर कमालले क्षेत्र नम्बर–१ मा कांग्रेसको संगठनात्मक अवस्था मजबुत रहेको जनतासँग प्रत्यक्ष सम्पर्क नै आफ्नो मुख्य शक्ति भएको बताएका छन् । “यो क्षेत्रमा कांग्रेस सबैभन्दा माथि छ,” कमालले भने, “हामी प्रचारका लागि मात्र होइन, मतदाताका गुनासा सुन्न र समाधानको बाटो खोज्न मैदानमा उत्रिएका हौं ।”
चुनावी अभियानका क्रममा कांग्रेस टोलीले किसान, मजदुर, युवा, महिला तथा व्यवसायीहरूसँग प्रत्यक्ष संवाद गरिरहेको छ । स्थानीय मतदाताले कृषि मल–बिउको समस्या, सिँचाइ, बेरोजगारी, शिक्षा र स्वास्थ्य सेवाको पहुँच, सडक र खानेपानी जस्ता आधारभूत विषय उठाइरहेका छन् । उम्मेदवार कमालले यी विषयलाई संसदमा प्रभावकारी रूपमा उठाउने प्रतिबद्धता जनाएका छन् ।
स्थानीय मतदाताहरू कांग्रेसको अभियानप्रति सकारात्मक देखिएका छन् । उनीहरूका अनुसार उम्मेदवार र पार्टी नेतृत्व प्रत्यक्ष गाउँमै आएर समस्या सुन्नु र संवाद गर्नु सकारात्मक संकेत हो । “नेता चुनावमा मात्र होइन, समस्या बुझ्न पनि आउनुपर्छ,” एक स्थानीय मतदाताले भने, “कमालको टोली गाउँमै आएर हाम्रो कुरा सुन्दैछ, यो राम्रो संकेत हो ।”
यसैबीच, कांग्रेस नेता गगन थापाको नेतृत्व र पार्टीभित्र देखिएको नयाँ ऊर्जा पछि कांग्रेसप्रति जनआकर्षण बढ्दै गएको कांग्रेस नेताहरूको भनाइ छ । विशेषगरी युवा मतदाता कांग्रेसप्रतिको विश्वास पुनःस्थापित हुँदै गएको संकेत कपिलवस्तु–१ मा देखिएको छ । कांग्रेसले मतदाता केन्द्रित अभियानलाई निरन्तरता दिदै कपिलवस्तु–१ मा चुनावी प्रतिस्पर्धामा बलियो उपस्थिती छ । जनताको मुद्दा उठाउने, सुशासन र विकासको एजेन्डालाई प्राथमिकतामा राखेको कांग्रेसको अभियानले अन्तिम मतपरिणाममा महत्वपूर्ण प्रभाव पारेको छ ।
कांग्रेसको आक्रामक अभियान, संगठन र मतदातासँगको प्रत्यक्ष संवादले कपिलवस्तु–१ को चुनावलाई निर्णायक मोडतर्फ लैजाँदै गरेको छ ।

कपिलवस्तु ,माघ २४

नेपाली कांग्रेसका नेता तथा पूर्व संविधान सभा सदस्य अत्तर कमालले देशमा व्याप्त भ्रष्टाचार अन्त्य र सुशासन स्थापनाका लागि गगन थापाको नेतृत्वमा सरकार बन्न आवश्यक रहेको बताएका छन् ।
कपिलवस्तुको पकडीमा आयोजित कार्यक्रममा बोल्दै नेता कमालले आगामी निर्वाचनमा आफूलाई विजयी गराएर गगन थापालाई प्रधानमन्त्री बनाउने अभियानमा साथ दिन मतदातासँग आग्रह गरे ।
उनले आफू २०७०सालमा संविधान सभा सदस्य हुँदा र २०७४ मा प्रतिनिधि सभा सदस्य हुँदा कपिलवस्तु यस क्षेत्रमा गरेका विकास निर्माणका कार्यहरू स्मरण गर्दै त्यसबेला आधारभूत पूर्वाधार विकासमा महत्वपूर्ण काम भएको दाबी गरे । कमालका अनुसार त्यस समय हिँड्नसमेत कठिन रहेका क्षेत्रमा पिच र ग्राभेल सडकको सुरुआत गरिएको थियो । साथै कृषिका लागि सिँचाइ सुविधा विस्तार, विद्यालयहरूको भौतिक पूर्वाधार सुधार तथा ग्रामीण भेगमा विद्युत् विस्तारका कामलाई प्राथमिकता दिइएको थियो ।
कार्यक्रममा उनले वर्तमान राजनीतिक अवस्थाबारे टिप्पणी गर्दै युवापुस्ताको आवाजलाई प्रतिनिधित्व गर्ने ‘जेन्जी’ (Gen-Z) आन्दोलनले उठाएका मुद्दाहरू—विशेष गरी भ्रष्टाचारविरुद्धको संघर्ष र संविधान संशोधन—आजको आवश्यकता भएको बताए ।
“गगन थापालाई पार्टी सभापति र देशको आगामी प्रधानमन्त्री बनाउन सकेमा मात्र भ्रष्टाचार, नातावाद र कुशासनजस्ता समस्याहरूको जरैदेखि समाधान सम्भव हुन्छ,” उनले भने ।
नेता कमालले आफू अहिलेसम्म कुनै पनि संस्थागत भ्रष्टाचार वा विवादमा नपरेको दाबी गर्दै स्वच्छ छविका साथ जनताको सेवामा निरन्तर लाग्ने प्रतिबद्धता व्यक्त गरे ।

कपिलवस्तु ,माघ २४

प्रतिनिधि सभा निर्वाचन नजिकिँदै गर्दा कपिलवस्तु निर्वाचन क्षेत्र नम्बर १ मा चुनावी गतिविधि तीव्र बन्दै गएको छ । यस क्षेत्रमा जनमत पार्टीका राष्ट्रिय उपाध्यक्ष समेत रहेका नरेन्द्र चौधरी उम्मेदवारका रूपमा मैदानमा उत्रिएसँगै चुनावी माहोल थप तातेको देखिएको छ ।
‘निकास र विकास’लाई मुख्य एजेन्डा बनाएर घरदैलो अभियानमा सक्रिय चौधरीप्रति जनसमर्थन क्रमशः बढ्दै गएको स्थानीयहरू बताउँछन् । लामो समयदेखि उपेक्षा, विभेद र अविकासको चक्रमा परेको कपिलवस्तु–१ का मतदाताले यसपटक वैकल्पिक, दूरदर्शी र परिणाममुखी नेतृत्वको अपेक्षा गरेका छन् ।
यही अपेक्षालाई सम्बोधन गर्दै नरेन्द्र चौधरीले शिक्षा, स्वास्थ्य, रोजगारी, कृषिको आधुनिकीकरण र सुशासनलाई आफ्नो प्रमुख चुनावी प्राथमिकताका रूपमा अघि सारेका छन् । जनमत पार्टीका राष्ट्रिय उपाध्यक्षको हैसियतमा संगठनात्मक अनुभव र नीति निर्माणको भूमिकामा सक्रिय रहँदै आएका चौधरी अहिले स्पष्ट विकास दृष्टिकोणसहित जनतामाझ प्रस्तुत भइरहेका छन् ।
घरदैलो अभियानका क्रममा उनले वृद्ध, महिला, युवा, किसान, मजदुर तथा बुद्धिजीवीसँग प्रत्यक्ष संवाद गर्दै स्थानीय समस्या टिपोट गर्ने र समाधानका स्पष्ट प्रतिबद्धता व्यक्त गर्ने गरेका छन् ।
“पहिले नेताहरू चुनावको समयमा मात्र देखिन्थे, तर नरेन्द्र चौधरीले हाम्रो घरमै आएर कुरा सुन्नुभयो,” एक स्थानीय मतदाताले प्रतिक्रिया दिए ।
विशेषगरी युवापुस्तामाझ चौधरीप्रतिको आकर्षण बढ्दो देखिएको छ । स्वदेशमै रोजगारी सिर्जना, सीपमूलक शिक्षा, उद्यमशीलता प्रवर्द्धन र कृषिमा आधुनिक प्रविधिको प्रयोगसम्बन्धी योजनाले युवालाई उत्साहित बनाएको स्थानीयहरू बताउँछन् । महिलाहरू पनि शिक्षा, स्वास्थ्य र आत्मनिर्भरता सम्बन्धी एजेन्डाबाट प्रभावित देखिएका छन् ।
राजनीतिक विश्लेषकहरूका अनुसार कपिलवस्तु–१ मा परम्परागत दलहरूप्रति बढ्दो निराशा र असन्तुष्टिको फाइदा जनमत पार्टीले उठाइरहेको छ ।
जनमत पार्टीको चुनाव चिन्ह ‘लाउडस्पिकर’ लिएर नरेन्द्र चौधरी चुनावी मैदानमा सक्रिय छन् ।

कपिलवस्तु ,माघ २३

प्रतिनिधि सभा निर्वाचन क्षेत्र नं. १ कपिलवस्तुबाट नेपाली कम्युनिष्ट पार्टीका उम्मेदवार कृष्णबहादुर कुंवरले निर्वाचनमा विजय हासिल गरेपछि आफूले पाउने सम्पूर्ण तलब भत्ता तथा सेवा सुविधालाई जनताको सेवामा समर्पण गर्ने ऐतिहासिक प्रतिबद्धता सार्वजनिक गर्नुभएको छ ।
कपिलवस्तुमा आयोजित भेटघाट तथा अन्तरक्रिया कार्यक्रममा उम्मेदवार कुंवरले सांसद पदलाई व्यक्तिगत लाभको साधन नभई जनताको सेवाको जिम्मेवारीका रूपमा लिने स्पष्ट धारणा राख्नुभयो । उहाँले प्राप्त हुने सम्पूर्ण सुविधा रकम क्षेत्रका ज्येष्ठ नागरिकको सम्मान, असहाय तथा दिनदुखीको सहयोग, सबै समुदायका धार्मिक स्थलहरूको संरक्षण, मर्मत तथा निर्माणमा खर्च गरिने घोषणा गर्नुभयो ।
त्यसैगरी आर्थिक अवस्था कमजोर रहेका विद्यालयहरूको शैक्षिक गुणस्तर सुधार गर्न विशेष संयन्त्र स्थापना गरी प्राप्त सम्पूर्ण रकम सोही माध्यमबाट शिक्षा क्षेत्रमा लगानी गरिने उहाँको प्रतिबद्धता छ । यस कदमलाई स्थानीयवासीहरूले शिक्षा र भविष्यप्रति गरिएको दूरदर्शी निर्णयका रूपमा लिएका छन् ।
कार्यक्रममा बोल्दै उम्मेदवार कुंवरले “विज्ञान कहिल्यै पुरानो हुँदैन, समयअनुसार यसको निरन्तर परिमार्जन आवश्यक हुन्छ” भन्दै सोच, नीति र कार्यशैलीमा परिवर्तनको खाँचो औँल्याउनुभयो । उहाँले बुबा–आमाको सेवा गर्नु सन्तानको कर्तव्य भएको उल्लेख गर्दै समाजमा वृद्ध–वृद्धाप्रति सम्मानको संस्कृति विकास गर्नुपर्नेमा जोड दिनुभयो ।
समृद्ध, न्यायपूर्ण र समावेशी कपिलवस्तु निर्माणका लागि सामूहिक प्रयास अपरिहार्य रहेको बताउँदै उम्मेदवार कुंवरले जनताको विश्वास र साथ पाए परिवर्तन सम्भव हुने विश्वास व्यक्त गर्नुभयो । उहाँको जनमुखी सोच, स्पष्ट प्रतिबद्धता र निस्वार्थ सेवाको संकल्पले कपिलवस्तु–१ मा नयाँ आशा र उत्साह थपिएको स्थानीयवासीहरूको भनाइ छ ।

कपिलवस्तु ,माघ २३

जनता समाजवादी पार्टी नेपालले कपिलवस्तु निर्वाचन क्षेत्र नं. १ मा आगामी २१ गते हुने प्रतिनिधि सभा निर्वाचनका लागि बब्बु सिन्ह यादवलाई उम्मेदवार बनाएको छ । पार्टीको यस निर्णयलाई यस क्षेत्रमा रणनीतिक र समयसापेक्ष कदमका रूपमा हेरिएको छ ।
यस क्षेत्रमा यादवको मत निर्णायक मानिँदै आएको छ । विगतका निर्वाचन तथा सामाजिक गतिविधिले समेत यादवको जनआधार मजबुत रहेको संकेत गर्छ । जनता समाजवादी पार्टीले कपिलवस्तुका धेरै स्थानीय तहमा निरन्तर प्रतिनिधित्व गर्दै आएको र संगठनात्मक रूपमा जरा गाडेको पार्टी भएकाले यादवको उम्मेदवारीलाई थप बल पुगेको राजनीतिक विश्लेषकहरूको भनाइ छ ।
पछिल्लो समय भएका विभिन्न जनआन्दोलनहरूमा जनता समाजवादी पार्टीले जनताको हकहित, सामाजिक न्याय र अधिकारका पक्षमा अग्रपंक्तिमा रहेर आवाज उठाउँदै आएको छ । विशेषगरी जेएनजी आन्दोलनले उठाएका युवा रोजगारी, संघीयताको प्रभावकारी कार्यान्वयन र अधिकारको विकेन्द्रिकरणका मुद्दालाई पार्टीले प्राथमिकतामा राख्दै आएको छ ।
यही राजनीतिक पृष्ठभूमिमा पार्टीले युवालाई अघि सार्दै बब्बु सिन्ह यादवलाई उम्मेदवार बनाएको हो । यादवलाई स्थानीय समस्याको राम्रो बुझाइ भएको, जनतासँग प्रत्यक्ष सम्पर्कमा रहने र आवाजलाई संसदसम्म पुर्‍याउन सक्ने सक्षम नेतृत्वका रूपमा हेरिएको छ ।
हाल उम्मेदवार यादव मतदाताको घरदैलोमा पुगेर आफ्ना एजेन्डा प्रस्तुत गर्दै आएका छन् । उनले विकास, रोजगारी सिर्जना, शिक्षा, स्वास्थ्य र किसानको समस्यालाई प्रमुख प्राथमिकतामा राखेर काम गर्ने प्रतिबद्धता व्यक्त गर्दै जनसमर्थन विस्तारमा सक्रिय छन् ।
स्थानीयस्तरमा बढ्दो जनसमर्थन र पार्टीको संगठनात्मक शक्तिका कारण कपिलवस्तु–१ मा बब्बु सिन्ह यादव बलिया उम्मेदवारका रूपमा उभिएका छन् ।