कपिलवस्तु,फागुन ५
आगामी फागुन २१ गते हुने प्रतिनिधि सभाको निर्वाचनलाई स्वतन्त्र, निष्पक्ष र भयरहित रूपमा सम्पन्न गर्न नेपाल र भारतका सीमावर्ती जिल्लाका सुरक्षा अधिकारीबीच भर्चुअल समन्वयात्मक बैठक सम्पन्न भएको छ ।
जिल्ला प्रहरी कार्यालय कपिलवस्तुले आयोजना गरेको पत्रकार भेटघाट कार्यक्रममा प्रहरी उपरीक्षक सन्तोष आचार्यले नेपालतर्फका कपिलवस्तु, पश्चिम नवलपरासी, रुपन्देही र दाङ तथा भारततर्फका चम्पारण, महाराजगञ्ज, सिद्धार्थनगर र बलरामपुर जिल्लाका सुरक्षा अधिकारीबीच छलफल भएको जानकारी दिनुभयो ।
बैठकमा निर्वाचनको ७२ घण्टा अघि सबै सिमाना नाका बन्द गर्ने निर्णय गरिएको छ । साथै साना हतियार, नक्कली नोट तथा आपराधिक गतिविधिमाथि विशेष निगरानी राखिने जनाइएको छ । खुला सिमानाको दुरुपयोग रोक्न संयुक्त गस्ती, नियमित सूचना आदान–प्रदान तथा शंकास्पद गतिविधिमाथि कडाइ गरिने सुरक्षा निकायले जनाएको छ ।
निर्वाचन अवधिभर संवेदनशील क्षेत्रको पहिचान गरी थप सुरक्षा परिचालन गरिने र मतदान स्थल वरपर कडा निगरानी राखिने प्रहरीले जानकारी दिएको छ । निर्वाचनलाई शान्तिपूर्ण र मर्यादित बनाउन दुवै देशका सुरक्षा निकायबीच निरन्तर समन्वय रहने बताइएको छ ।