Category: अर्थ

मृतकको नामबाट पनि आवेदन

२० फागुन, काठमाडौं । ‘निफ्राको आईपीओ २७ बराबर १४२०’ लेखेर शेयर बजार विचार हजार लेखेको ग्रुपमा माघ १६ गते एक व्यक्तिले स्टाटस पोष्ट गरे । ‘हामीलाई पनि यति कित्ता आईपीओ पर्यो’ भन्नेेको त्यो स्टाटसमा कमेन्ट गर्नेहरुको ओइरो लागेको थियो ।
२७ जनाको नामबाट आवेदन दिदा नेपाल इन्फ्रा स्ट्रक्चर बैंक (निफ्रा)को १ हजार ४२० कित्ता आईपीओ परेको भन्ने आशयको उक्त स्टाटस केहिबेरमै डिलिट भयो । आईपीओ बाँडफाँट भएपछि सामाजिक सञ्जालमा यस्ता स्टाटस प्रसस्तै देखिने गरेका छन् । सेयर बजारसम्बन्धी फेसबुक ग्रुपहरुमा यस्ता पोष्ट धेरै देखिन्छन् ।

निफ्राले आईपीओ जारी गरेपछि सेयर बजारतर्फ सर्वसाधारणको एक किसिमको लहर छ । २ महिना अघिभन्दा अहिले डिम्याट प्रयोगकर्ता दोब्बर बढेका छन् ।
सेयर कारोबारको लेखाजोखा राख्ने सिडिएस एण्ड क्लियरिङ लिमिटेडका अनुसार डिम्याट प्रयोगकर्ता ३० लाख ४१ लाख ६९८ पुगेका छन् । यतिधेरै डिम्याट प्रयोगकर्ता हुँदा दैनिक चार लाखले पनि कारोबार नगर्नुलाई भने सेयर बजारका जानकारहरु शंङ्कास्पद मान्छन् ।
सेयर विश्लेषक प्रकाश तिवारी एकै व्यक्तिले हजार आईपीओ आवेदन दिने गरेको बताउँछन् । उनका अनुसार, एकै व्यक्तिले धेरैको नागरिकताको फोटोकपी लिएर धेरैवटा बैंक खाता र डिम्याट खाता खोलेर आईपीओ भर्ने गरिएको छ ।
‘११ सयजनाको नाममा भर्ने मान्छे त मैले नै भेटेको छु । ५०, सय, २ सयजनाको नाममा भर्ने त कति छन् कति’, तिवारी भन्छन्, ‘यसरी खोलिएका सबै खातामा एकै व्यक्तिको हस्ताक्षर हुन्छ ।’
नेपाल मर्चेन्ट बैंकर एशोसिएसनका अध्यक्ष मेखबहादुर थापा सम्बन्धीत व्यक्तिको स्वीकृतिमै सक्कली नागरिकता ल्याएर कतिपय खाता खोलिने गरेको बताउँछन् ।
‘कसैले नजिकका आफन्तको त कसैले ज्येष्ठ नागरिकहरुको पनि नागरिकता ल्याएर बैंकमा खाता खोलेका होलान्’, उनी भन्छन्, ‘यसलाई कसैले हतोत्साहित गरेजस्तो मलाई लाग्दैन । धेरै डिम्याट खुल्दा ठूलो फाइला नहुने भएकाले मर्चेन्ट बैंकहरुले यस्तो कामलाई प्रोत्साहन गदैन ।’
अर्काको नामबाट आईपीओ
आईपीओ भर्नका लागि सबभन्दा पहिला बैंक खाता आवश्यक पर्छ । जुनसुकै बैंकमा खाता भएपछि सेयर राख्ने डिम्याट खाता खोलिन्छ ।
डिम्याट खाता खोल्ने फारम लिएर सम्पूर्ण विवरण भरेर बैंकमा बुझाउँन पर्छ । डिम्याट खाता खोल्ने क्रममा बैंक खाता खोल्दाजस्तै नागरिकताको प्रतिलिपि र फोटो चाहिन्छ । अहिले दुवै खाता खोल्दा अर्काको नागरिकता र फोटो प्रयोग भइरहेको शेयर विश्लेषक तिवारी बताउँछन् ।
सेयर बिक्री गरिएको रकम बैंक खातामा आउँछ । अरु व्यक्तिको नामको बैंक खाता भए पनि त्यो खोल्नेले ‘एक्सेस’ राखेर रकम निकाल्छन् । एकाघर परिवारकै सदस्यहरुको भए यसलाई स्वभाविक मान्नु पर्ने तिवारी बताउँछन् ।
‘घरबाटै सेयर भर्न सकिने भएकाले परिवारका सदस्यहरुले एकअर्काको नामबाट आईपीओ भर्नु स्वभाविकै हो’, उनी भन्छन्, ‘तर, गाउँभरका मान्छेको नाममा भर्नु त गैर कानुनी हुन्छ ।’
मृतकको नामबाट पनि आवेदन
हुँदा हुँदा मृतकको नामबाट समेत सेयर कारोबार गरिएको पाइएको छ । केहि दिन अघि सेयर नामसारी गर्न आएका एक व्यक्तिको विवरण हेर्दा मृतकले समेत आईपीओ आवेदन दिएको पाइएको नेपाल धितोपत्र बोर्डका एक अधिकारी बताउँछन् ।
निधन भएका बुवाको नामको सेयर आफ्नोमा नामसारी गरिदिन भन्दै ती व्यक्ति एक मर्चेन्ट बैंक पुगेका थिए । ‘उनको बुबाले मृत्यु भएको एक महिनापछि पनि आईपीओ भरेको पाइयो’, बोर्डका अधिकारी भन्छन्, ‘मृतकले भरेको आईपीओको वैधानिकतामा प्रश्न उठेको छ ।’
संसारमै नभएको व्यक्तिको नाममा परेको आईपीओ के गर्ने भन्ने विषयमा बोर्डले निर्णय लिन सकेको छैन । कानुनी समस्याका कारण निर्णय लिन समय लाग्ने ती अधिकारी बताउँछन् ।
‘अपराधिक काम समेत हुनसक्छ’
गत वर्षको माघ मसान्तसम्म बैंक खाताको संख्या १ करोड ११ लाख १२ हजार १ सय ९४ वटा थियो । बीचमा लामो समय कोरोनाको असर पर्‍यो । तर त्यसयता बैंक खाता बढ्ने क्रम नरोकिएको राष्ट्र बैंकका प्रवक्ता डा. गुणाकर भट्ट बताउँछन् । उनका अनुसार गत माघ मसान्तसम्म २ करोड ४६ लाख ७१ हजार ९ सय ४९ बैंक खाता पुगेका छन् ।
बैंक खाता बढ्नु नराम्रो होइन, तर कुनै एक व्यक्तिले सेयर भर्नकै लागि धेरै व्यक्तिको खाता चलाउँछ भने गैर-कानुनी हुने उनले बताए । यो विषयमा सम्बन्धित बैंक आफैं धेरै चनाखो हुनुपर्ने बताउँदै डा. भट्ट भन्छन्, ‘कुनै व्यक्तिले अरुको नाममा बैंक खाता खोलेको छ भन्ने कुरा सुपरिवेक्षणको क्रममा भेट्टाइयो भने कारबाही हुन्छ ।’
उनका अनुसार, आईपीओ आवेदनका लागिमात्र बैंक खाता खोल्नु पनि गैरकानुनी हो । त्यस्तोमा अपराधिक क्रियाकलापसमेत हुन सक्ने, सोझो नागरिक फस्ने उनी बताउँछन् ।
‘अरुको नामको खातामा भ्रष्टाचार गरेको रकम, गैरकानुनी आर्जन राख्ने हुनसक्छ’ प्रवक्ता डा. भट्टले भने, ‘यस्ता क्रियाकलापमा वित्तीय साक्षरताको कमी भएका नागरिक फस्ने खतरा हुन्छ ।’
पुँजी बजार क्षेत्रको नियामनकारी निकाय नेपाल धितोपत्र बोर्ड यो विषयमा जानकार नै छ । बोर्डका कार्यकारी निर्देशक निरज गिरी यसरी आईपीओ आवेदन दिनेहरु छैनन् भन्न नसकिने बताउँछन् ।
‘बैंक खातामा लिंक भएर आईपीओ आवेदन दिनु पर्ने भएकाले यस्ता डिम्याट खाता होलान्, तर त्यति धेरै छैनन्,’ उनी भन्छन्, ‘एकै व्यक्तिले धेरै जनाको डिम्याट खोलेर आईपीओ आवेदन दिनु चाही सरासर गलत हो ।’
कसरी गर्न सकिन्छ निरुत्साहन ?
अरुको नाममा बैंक र डिम्याट खाता खोलेर गैरकानुनीरुपमा आईपीओ भर्नेको संख्या करिब ५० प्रतिशत रहेको सेयर विश्लेषक प्रकाश तिवारीको दाबी छ । सम्बन्धित व्यक्ति वा निजको एकाघरका बाहेक अरुले भर्न नपाउने हो भने यो समस्या हट्ने उनी बताउँछन् ।
आईपीओ भर्नकै लागि खोलिने बैंक खाताहरु अरु बेला निष्कृय हुन्छन् । ती खाताबाट आईपीओ भर्दाखेरी पैसा रोक्का हुने र आईपीओ नपर्दा पैसा काटिने बाहेक अरु कारोबार हुँदैनन् ।
आईपीओ प्रयोजनका लागिमात्र सञ्चालन हुने खाताहरुको केवाईसी अपडेट गराए समस्या समाधान हुने तिवारी बताउँछन् । ‘सम्बन्धित व्यक्ति नै उपस्थित भएर केवाईसी भर्नुपर्ने नियम लगाए यस्ता खाता आधा घट्छन्,’ उनी भन्छन्, ‘राष्ट्र बैंक र बोर्ड मिलेर यो काम सजिलै गर्नसक्छन् ।

काठमाडौ, नेस ।
एनसेल आजियाटाले वैदेशिक रोजगारीमा जाने योजनामा रहेका नेपाली र उनीहरुका परिवारका सदस्यलाई विशेष योजना ‘सहयात्री सिम’ ल्याएको छ । स्टार्टर प्याकमा बन्डल सेवा, आकर्षक बोनस सुविधा र निःशुल्क रोमिङ सेवा यो सिमको मुख्य विशेषता हुन् ।यो सिम योजना फागुन १४ गतेबाट सञ्चालनमा आएको छ । एनसेलले आफ्नो नयाँ अभियान ‘फास्ट फरवार्ड लाइफ’ अन्तर्गत यो योजना ल्याएको हो । यो अभियानले भविष्यको पुनः कल्पना गर्दै डिजिटल पावरका साथ छिटो अगाडि बढ्न अभिप्रेरित गरेको छ ।

यस सिममा समेटिएका सबै अफर तथा सुविधा विदेश जाने सोच बनाएका व्यक्तिको यात्रालाई सहज बनाउने र विदेशमा रहेका परिवारका सदस्यसँग सहजै सम्पर्कमा रहिरहन मद्दत गर्ने किसिमका छन् । यो सिम ग्राहकले करसहित ९९ रुपियाँमा लिन सक्छन् र सिमसँगै २० रुपियाँ मेन ब्यालेन्स, सात दिनको लागि मान्य हुने २०० एमबी डेटा, २० मिनेट अन नेट टक लाइम र २० वटा अन नेट एसएमएस पाइन्छ । यस सिममा पहिलो रिचार्जमा बोनस, एक वर्षसम्म प्रत्येक रिचार्जमा १० प्रतिशत बोनस, नेपाल कल गर्न वा आफू रहेको देशभित्रै कल गर्न १५ मिनेट रोमिङ् सेवा जस्ता विशेष सुविधाहरु रहेका छन् । यसरी प्राप्त हुने १५ मिनेटको रोमिङ सेवा ग्राहकले भारत, कतार, युएई, मलेसिया, कुवेत, ओमान र दक्षिण कोरियामा प्रयोग गर्न सक्छन् ।

यो सिम अर्थात योजनाअन्तर्गत ग्राहकले निःशुल्क रुपमा ‘कल आयो पैसा पायो’ अफरमा सहभागी हुन सक्छन् । यसमा मेन ब्यालेन्स कमरहेको अवस्थामा पनि मिस्ड कल दिन सकिने सुविधा रहेको छ । साथै कुनै पनि भारतीय नम्बरमा लोकल कलको दर कर बाहेक १ दशमलव ९९ रुपियाँ प्रतिमिनेटमा कल गर्न सकिने सुविधा रहेको छ ।यो सिम सुचारु गरेको दोस्रो दिनको मध्यरात सम्ममा गरेको १ सय रुपियाँभन्दा माथिको पहिलो रिचार्जमा ग्राहकले बोनस टक टाइम र डेटा प्राप्त गर्दछन् । जस्तै कुनै ग्राहकले सय रुपियाँको पहिलो रिचार्ज गरेमा उसले सय मिनेट एनसेल नेटवर्कभित्र कल गर्न सकिने बोनस टक टाइम र सात दिनको समयसिमा रहेको सय रुपियाँ एमबी डेटा प्राप्त गर्दछ । ग्राहकले प्रत्येक रिचार्जमा १२ महिनासम्म प्राप्त गर्ने १० प्रतिशत बोनसबाट पेएजयूगो अन्तर्गत सेवा प्रयोग गर्न सक्छन् । बोनस प्रयोग गर्ने समयावधि सात दिन रहेको छ ।

यो सिमबाट ग्राहकले आफ्नो मेन ब्यालेन्स कम भएको अवस्थामापनिमलेशिया, कतार, यूएई, साउदी अरब, भारत, जापान, दक्षिण कोरिया वा बहराइनमा रहेका आफ्ना परिवारका सदस्यको नम्बरमा मिस्ड कलदिन सक्नेछन् । यतिमात्र होइन, यो सिम सुचारु गर्ने ग्राहकले ‘कल आयो पैसा पायो’ योजनामा निःशुल्क सहभागी हुँदै हरेक अन्तर्राष्ट्रिय आगमन कलमा बोनस प्राप्त गर्न सक्नेछन् ।

पहेंलो धातुको मूल्य ओरालो लाग्ने क्रम जारी छ। लगातार ओरालो लागिरहेको सुनको मूल्य आज पनि तोलामा रु ९०० ले घटेको छ।

स्थानीय बजारमा आज छापावाला सुन रु ९०० ले घटेर तोलामा रु ८५ हजार ६०० मूल्य निर्धारण भएको छ । छापावाला सुन बिहीबार तोलामा रु ८६ हजार ५०० मा कारोवार भएको थियो।

यसैगरी तेजाबी सुन तोलाको रु ८५ हजार १५० मूल्य निर्धारण भएको छ । तेजाबी सुन बिहीबार तोलामा रु ८६ हजार ५० मा कारोवार भएको थियो। यस्तै चाँदीको मूल्य तोलामा रु ३५ ले घटेको छ। तोलामा रु एक हजार २८५ मा बिहीबार कारोवार भएको चाँदी आज भने रु एक हजार २५० मूल्य निर्धारण गरिएको नेपाल सुनचाँदी व्यवसायी महासङ्घले जनाएको छ।

सञ्चारकर्मी रवि लामिछाने लगायतले नयाँ टेलिभिजन च्यानल ल्याएका छन्।
लामिछाने म्यानेजिङ डाइरेक्टर छन्। उक्त टिभीको नाम ‘ग्यालेक्सी फोरके’ हो।

नेपालमा पहिलो फोरके टिभी आफूहरूले ल्याएको लामिछानेले बताए।
मंगलबार काठमाडौंमा एक कार्यक्रम गरी लामिछानेले नेपालमा थप एक सञ्चार माध्यम थप भएको बताए।

जनताका आवाजलाई प्राथमिकता दिने र मनोरञ्जनात्मक कार्यक्रम दिन टेलिभिजन ल्याइएको उनले बताए।

संवाददाता

कोभिड १९ का कारण मध्यपूर्वका देशहरुमा समस्यामा परेका नेपाली कामदारहरुको उद्वार गर्न मध्यपूर्वका गैर आवासीय नेपाली संघ राष्ट्रिय समन्वय परिषदहरुले विभिन्न चरणहरुमा भुक्तानी लिएको थियो । कोभिड- १९ को कारण मध्यपूर्वमा कार्यरत नेपाली कामदारहरुलाई समस्या परेको भन्दै एनआरएनए मार्फत अन्तराष्ट्रिय श्रम संगठन (आईएलो) ले दिएको रकम विभिन्न चरणहरुमा भुक्तानी लिएका थिए। गैर आवासीय नेपाली संघले अन्तराष्ट्रिय श्रम संगठन (आईएलो) को सहयोगमा मध्यपूर्वका मुलुकहरु र मलेशियामा कोरोनाका कारण समस्यामा परेका नेपाली कामदारहरुको सहयोग र उद्वारको लागि ५ करोड रकम सम्झौता गरेको थियो ।

अन्तराष्ट्रिय श्रम संगठन (आईएलो) बाट प्राप्त उक्त रकममा भ्रष्टाचार गरेको भन्दै सामाजिक संजालहरुमा  आलोचना भए पछि संघले उद्दार राहत कार्यमा उठेको टिका टिप्पणीप्रति संघ संवेदनशील रहेको जनाएको छ भने  गैर आबासीय नेपाली संघ (एनआरएनए) आईसीसीले सुपरिबेक्षण समिति गठन गरेको जनाएको छ ।  संघका प्रबक्ता डिबी क्षेत्रीले एक विज्ञप्ति जारी गर्दै सचिब आरके शर्मा, कोषाध्यक्ष महेश श्रेष्ठ र महिला सँयोजक भोमा लिम्बु सहितको ३ सदस्यीय समिति गठन गरेको जानएको छ  । समितिले बिभिन्न मुलुकहरुमा उपसमिति गठन गरी खर्चको अनुगमन गर्ने जनाएको छ ।

उक्त बिज्ञप्तिमा विभिन्न देशहरुबाट हालसम्म १६५ जनाले हावाइ टिकट सेवा, २४५ जनालाई पिसिआर सेवा र ४५३ जनालाई कानूनी परामर्श सेवा, २७१३ जनालाई गन्तब्य मुलुकहरुमा खाना तथा बासको ब्यवस्था, ३४७९ जनालाई दुतावाससंग सम्बन्धित विभिन्न प्रकारका कागजी प्रक्रिया तथा अन्य आवश्यक कुराहरुमा समन्वयात्मक सहयोग पु-याईएको जनाईएको छ |

एनआरएन आईसीसीले जारी गरेको बिज्ञप्ति

प्रेस विज्ञप्ति:

कोभिड १९ को महामारी पछि गैरआवासीय नेपाली संघ (एनआरएनए) ले  उद्धार र सहयोगको काम जारी राखेको छ । विश्वका ५० भन्दा बढी देशमा रहेका नेपालीहरुलाई प्रत्यक्ष रुपमा सहयोग गर्दै आएको छ । संघले विदेशमा रहेका नेपालीहरुको सहयोगार्थ संयुक्त राष्ट्र संघका निकाय सम्म आफ्नो आवाजलाई बुलन्द गरेको थियो ।

सोही आवाजको कदर गर्दै मध्यपूर्वमा रहेका नेपाली श्रमिकहरुको उद्धारको लागि संघले सकृय रुपमा काम गर्दे आएको छ । कोरोना महामारीको चुनौतीकाबीच संघका सबै संयन्त्रहरु परिचालित गरिएका छन् । सोको जानकारी संघका पदाधिकारीहरुलाई  वेलाबेलामा दिइएको छ ।

श्रमिकहरुको उद्धारका बिषयमा बिभिन्न व्यक्तिहरुबाट सामाजिक संजालमा आएका विभिन्न खाले कुरा प्रति संघको गम्भिर ध्यानाकर्षण भएको छ ।

राहात तथा उद्धारको लागि भएका खर्चहरु पारदर्शि होस भनेर सचिवालमा छुट्टै संयन्त्र राखिएको छ र जसको सुपरिवेक्षण गर्नका लागि अन्तर्राष्ट्रिय कार्यकारी सचिवालयको निर्णय अनुसार सचिव आरके शर्मा, कोषाध्यक्ष महेश कुमार श्रेष्ठ र महिला संयोजक भोमा देवी लिम्बु भएको ३ जनाको समिति गठन गरिएको छ ।  उक्त समितिले प्रत्येक राष्ट्रिय समन्वय परिषदमा एक उपसमिति मार्फत अनुगमनको तयारी गरेको छ । साथै संघले यस कार्यक्रमको समग्र रुपमा स्वतन्त्र लेखापरीक्षण गराउने कार्यका लागि प्रक्रिया समेत अगाडि बढाईसकेको कुरा समेत सहर्ष जानकारी गराउँदछौं । विदेशमा रहेका नेपालीहरुको राहत तथा उद्धार प्रकृया अझै जारी रहेकाले सम्पूर्ण आर्थिक विवरणहरुको अभिलेख राख्नेक्रम जारी रहेको बेलामा आएका विभिन्न खाले टिकाटिप्णीहरु प्रति संघ संवेदनशील छ ।

राहत तथा उद्धारका क्रममा कुनै कमिकमजोरी भेटिएको र आर्थिक हिनामिनामा कुनै व्यक्ति संलग्न भएको देखिएमा कानून बमोजिम कारवाहीको प्रकृया अघि बढाइने छ । त्यसैले कुनै पनि भ्रममा नपरि संघले जारी राखेको उद्धार प्रकृयामा सहयोग गर्न आग्रह गर्दछौं ।

हाल सम्म मध्यपूर्वका बिभिन्न देशबाट १६५ जनाले हवाई टिकट सेवा, २४५ जनालाई पिसिआर सेवा, ४५३ जनालाई विभिन्न प्रकारका कानुनी परामर्श सेवा, २७१३ जनालाई गन्तब्य मुलुकहरुमा खाना तथा बासको ब्यवस्था, २४९ जनालाई पुनःरोजगारीमा फर्काउनका लागि आवश्यक सहयोग एवं समन्वय, ३४७९ जनालाई दुतावाससंग सम्बन्धित विभिन्न प्रकारका कागजी प्रक्रिया तथा अन्य आवश्यक कुराहरुमा समन्वयात्मक सहयोग पु-याईएको छ ।

साथै नेपालमा आईसकेपछि समेत अति आवश्यक भएका नेपाली श्रमिकहरु ९५७ जनालाई त्रिभुवन अन्तर्राष्ट्रिय विमानस्थलबाट आआफ्नो घर सम्म जानका लागि यातायात खर्च समेत सहयोग प्रदान गरिएको छ र प्रदेश १, २ र ७ का विभिन्न १४ वटा स्वास्थ्य संस्थाहरुका कोरोना क्वारेन्टिन सेन्टरहरुका लागि विभिन्न प्रकारका मेडिकल सामग्रीहरु समेत प्रदान गरिएको छ ।

साथै दातृसंस्थाको सहकार्यमा मलेशियाका जेलमा रहेका १७ जना र अन्य एक जना गरी १८ जना नेपाली कामदारहरुलाई नेपाल फर्काउन सकिएको छ । ती १८ जना ब्यक्तिहरु ज्यादै समस्यामा रहेका र धेरै बर्षदेखि मलेशियाका जेलमा समेत रहेको अवस्थामा एनआरएनएले सकुशल नेपाल फिर्ता गराएर परिवारको जिम्मा लगाएको छ ।

डिबि क्षेत्री

प्रवक्ता

गैरआवासीय नेपाली संघ ।

पृथ्वी राजमार्ग अन्तर्गतको मुग्लिन–पोखरा सडक खण्डमध्ये पहिलो चरणमा दुई लेनको ४१.४५ किलोमिटरलाई चार लेनमा विस्तार गरिने भएको छ। सडक विभाग मातहतको आयोेजना निर्देशनालय एडिबीले आँबुखैरेनी–जामुने खण्डको ठेक्का सम्झौता गरेको हो। यो खण्डको ठेक्का चाइना कम्युनिकेसन कन्सट्रक्सन कम्पनीले पाएको छ।  

चिनियाँ कम्पनीले ४१.४५ किलोमिटर विस्तार गर्ने ठेक्का ६ अर्ब २१ करोड रूपैयाँमा पाएको हो। आयोजना निर्देशक सुशीलबाबु ढकालले आँबुखैरेनी–जामुने खण्ड विस्तार गर्न ठेक्का सम्झौता भइसकेको बताए। ‘ठेक्का सम्झौता भएको ४२ महिनाभित्रै दुई लेनलाई चार लेनमा विस्तार गर्ने योजना छ,’ उनले भने, ‘ठेकेदार कम्पनी र आयोजनाबीच सम्झौता भइसकेको छ। ठेकेदार कम्पनीले आगामी अप्रिलदेखि काम थाल्ने योजना बनाएको छ।’

सरकारले दुई लेनको पृथ्वी राजमार्ग बजार क्षेत्रमा ६ लेन र अन्य क्षेत्रमा चार लेनमा विस्तार गर्न लागेको हो। यो खण्ड एसियाली विकास बैंकबाट १.५ प्रतिशत ब्याजदरमा सहुलियत ऋण लिएर विस्तार गर्न लागिएको हो।

मुग्लिन–पोखरा सडक ९३ किलोमिटर छ। पहिलो चरणमा ४१.३ किलोमिटर मात्रै विस्तार गर्न लागिएको हो। अन्य खण्डको पनि ठेक्काको तयारी गरिरहेको आयोजना निर्देशनालय एडिबीले जनाएको छ। आयोजना निर्देशक ढकालले सडक विस्तार गरेसँगै बिजुलीको पोल सार्ने लगायत काम हुने बताए। ‘डाँडा कटान सुरु गरेपछि बिजुलीको पोल सार्ने काम सुरु गर्नेछौं,’ उनले भने, ‘ठेकेदार कम्पनीले पनि तोकिएको समयभित्रै निर्माण सक्ने प्रतिबद्धता जनाएको छ।’  

मुग्लिन–पोखरा सडक आयोजनाको पूर्वी खण्डका प्रमुख नरेन्द्र सुवेदीले आँबुखैरेनी–जामुने खण्डमा पर्ने रुख कटानको लागि रुख गणना सुरु भइसकेको बताए। ‘अहिले सडक विस्तार गर्ने साइटमा पर्ने रुखको गणना भइरहेको छ,’ उनले भने, ‘केही समयभित्रै वन कार्यालयसँग समन्वय गरेर रुख कटान सुरु गर्नेछौं।’  

यो खण्ड निर्माण सकिएको पाँच वर्षसम्म ठेकेदार कम्पनीले मर्मतसम्भार गर्ने जिम्मेवारी तोकिएको छ। मुग्लिन–आँबुखैरेनी खण्डको सात किलोमिटरको अहिले विस्तृत परियोजना प्रतिवेदन डिपिआर निर्माण भइरहेको छ। आँबुखैरेनी–मुग्लिन खण्डमा मस्र्याङ्दी जलविद्युत् आयोजना भएकाले पनि सो क्षेत्रमा अर्काेतर्फ पनि सडक विस्तार गर्ने योजना बनाइएको छ।

जामुने–पोखरा खण्डको पनि केही महिनाभित्रै ठेक्का आह्वान गरिने आयोजनाले जनाएको छ। आयोजनाले पोखरा–मुग्लिन खण्डको भौगोलिक बनावट र जनघनत्वलाई समेत मध्यनजर गरी सडक चौडा गर्न लागेको हो। घना बस्ती भएको स्थानमा ६ लेन र अन्य स्थानमा चार लेनको सडक बनाइनेछ। यो सडकको दुवैतर्फ साइड ड्रेनेजको काम गरिनेछ। पैदल यात्रुको लागि एक–एक मिटरको फुटपाथ हुनेछ। नागरिक न्युज ।

उडान सेवा बन्द गरिसकेका एयरलाइन्सहरुले नागरिक उड्डयन प्राधिकरण र विमानस्थल कार्यालयलाई तिर्नुपर्ने सेवा शुल्क तथा रोयल्टी ९ करोड बाँकी देखिएको छ। 

आन्तरिक उडानका ११ एयरलाइन्सबाट ९ करोड ६८ लाख रुपैयाँ उठान बाँकी रहेको नेपाल नागरिक उड्डयन प्राधिकरणले जानकारी दिएको छ। 

प्राधिकरणले आज एक सार्वजनिक सूचना जारी गर्दै बन्द भएका एयरलाइन्सका सञ्‍चालकहरुलाई तत्काल बाँकी रकम भुक्तान गर्न भनेको छ। 

सूचना प्रकाशित भएको मितिले ३० दिन भित्रमा रकम र नियमानुसार लाग्ने विलम्ब शुल्क समेत बुझाउन प्राधिकरणले सञ्‍चालकहरुलाई निर्देशक पनि दिएको छ। 

यदि प्राधिकरणले निर्धारण गरेको रकम तिर्न नपर्ने कुनै प्रमाण भएमा सो समेत पेश  गर्न आग्रह गरेको छ। 

यदि बाँकी शुल्क नतिरेमा सञ्‍चालकहरुलाई कालोसूचीमा राखिने प्राधिकरणले चेतावनी दिएको छ। यसरी कालोसूचीमा राखेपछि भविष्यमा हवाई सेवा, विमानस्थल तथा प्राधिकरणसँग सम्बद्ध कनै किसिमको काम कारबाही तथा व्यापार व्यवसायमा सहभागी हुन नपाउने प्राधिकरणले बताएको छ। 

यी एयरलाइन्सहरु कुनै पनि अहिले सञ्‍चालनमा छैनन्। यस्ता एयरलाइन्सले उडान गर्दाको समयमा विमानस्थललाई तिर्नुपर्ने रकम नतिरेकाले बाँकी रहेको हो। 

सबैभन्दा धेरै बक्यौता रहेको नेकोन एयर रहेको छ। जसले ४ करोड ७० लाख रुपैयाँ तिर्नुपर्ने छ। त्यस्तै कस्मिक एयरको ३ करोड ४७ लाख रुपैयाँ बाँकी रहेको छ।