साताका उत्कृष्ट झिल्काहरू- २१

साताका उत्कृष्ट झिल्का कविताको २१ औँ शृङ्खला सम्पन्न भएको छ । झिल्का साहित्य समाज नेपालको आयोजनामा उक्त शृङ्खला हरेक हप्ता सञ्चालन गर्ने गरिन्छ । झिल्का कविताको उन्नयन, विकास र प्रवर्द्धन गर्ने हेतुले यस शृङ्खलाको सुरुवात गरिएको यसका परिकल्पनाकार एवम् प्रवर्तक वसन्त अनुभवले बताउनुभयो ।

यस शृङ्खलाका लागि हरेक हप्ताको आइतवारदेखि शुक्रवार अपरान्हसम्म झिल्का कविता फेसबुक समूहको भित्तोमा प्रेषित गरिएका झिल्का कविताहरू मध्ये उत्कृष्ट तीन जना झिल्काकारहरूका ३/३ झिल्काहरू छ्नोट गरी प्रकाशन गर्ने गरिन्छ । जसको संयोजन झिल्काकार एवम् झिल्का कविता अभियन्ता धनुष न्यौपानेले गर्दै आउनुभएको छ ।

साताका उत्कृष्ट झिल्का कविता शृङ्खला- २१ का लागि झिल्काकारत्रय सुनगाभा पोखरेल, लक्ष्मी रिजाल र लोक बहादुर क्षेत्री लामिछानेका उत्कृष्ट झिल्का कविताहरू छनोटमा परेको संयोजक न्यौपानेले बताउनुभयो ।

साताका उत्कृष्ट झिल्काहरू

———<•>———
[१]
१//
लालीगुराँस फुल्दा वनमा
भिरपाखा देखिन्छन् रङ्गिन
माया फुल्छ मनमा ।
२//
ढकमक्क लालीगुराँस फुलेको
सुन्दर रमाइलो वनमा
देखेर मन भुलेको ।
३//
थाकेर शरीर लखतरान
कहिलेकाही गल्छ अचम्मैले
आराम नपाउँदा ज्यान ।
✍️
सुनगाभा पोखरेल

नेपालगन्ज

[२]
१//
हाम्रा हुन् भानु
प्रेरणाका अद्भुत श्रोत
भाषाका एक रानु ।
२//
आयो असाध्यै पानी
खेत तिर्खाएको हुनाले
मान्न थालेँ रानी ।
३//
भोजन जुटाउन वर्षको
असारमा रोपाइँ गरेर
आयो समय हर्षको ।
✍️
लक्ष्मी रिजाल

रुपनगर, सप्तरी, मधेस

[३]
१//
बाटो कसरी पहिल्याउने
रोज्न आफ्नो खुसी
नेताले जहिल्यै अल्मलाउने ।
२//
छ चारैतिर काँडा
पन्छ्याउदै थाकिसकेँ म
भिरपाखा र डाँडा ।
३//
हिँड्दा बाटो एकसुरले
असरल्ल भेडाले अल्झाउँदा
विकास छेक्छ झुरले ।
✍️
लोक बहादुर क्षेत्री लामिछाने
~~~~