साप्ताहिक ‘टुक्का माथि टुक्का’ व्यङ्ग्यात्मक टुक्का लेखन शृङ्खला- १२०

काठमाडौँ। साप्ताहिक ‘टुक्का माथि टुक्का’ व्यङ्ग्यात्मक टुक्का लेखनको १२० औँ शृङ्खला सम्पन्न भएको छ ।
अभ्यासमा नेपाल लगायत विश्वका ५७ जना नेपाली भाषी टुक्काकारहरूको सहभागिता रहेको कार्यक्रम संयोजक/ प्रशिक्षक एवम् टुक्का साहित्य समाजका उपाध्यक्ष वसन्त अनुभवले बताउनुभयो । टुक्का साहित्य समाजको आयोजनामा उक्त शृङ्खला विगत लामो समय देखि नियमित रूपमा सञ्चालन हुँदै आएको छ।

टुक्का कविताको उन्नयन, विकास र प्रवर्द्धन गर्ने हेतुले समाजले विविध किसिमका कार्यक्रम गर्दै आइरहेको छ । टुक्का लेखनमा पृथकता एवं फरकपन भित्राउने सिलसिला अन्तर्गत यस शृङ्खला सञ्चालन गरिदै आएको समाजका संस्थापक अध्यक्ष, टुक्का प्रवर्तक एवम् कार्यक्रमका परिकल्पनाकार ताराप्रसाद चापागाईंले बताउनुभयो ।

टुक्का लेखनका लागि एक व्यङ्ग्यात्मक टुक्का राखिने र त्यसैमा आधारित रहेर गहन भावको एक एक टुक्का सहभागीले राख्नुपर्ने संयोजक अनुभवले जनाउनुभयो ।

‘टुक्का माथि टुक्का’ व्यङ्ग्यात्मक टुक्का लेखनको १२० औँ शृङ्खलाको लागि प्रतिनिधि टुक्काको रूपमा समाजका उपाध्यक्ष वसन्त अनुभवले समसामयिक विषयमा लेख्नुभएको व्यङ्ग्यात्मक टुक्कालाई राखिएको संयोजक अनुभवले बताउनुभयो ।

अभ्यासका लागि राखिएको प्रतिनिधि टुक्का

घरले भन्छ जा जा आइज नै भन्छ वनले
त्यागौँ भन्छु लोभ मोह तर मान्दैन मनले ।

वसन्त अनुभव
घोराही, दाङ

सहभागी टुक्काकारहरूले अभ्यासका क्रममा सृजना गर्नुभएको टुक्काहरू

[१]
लिएर के आएका थियौ जान्छौ के लिएर
खाली हात जाने सबै गंगाजल पिएर ।
✍️ वसन्त अनुभव
घोराही उपमहानगरपालिका १४, दाङ
[२]
उमेर ढल्किदै जाँदा पनि लोभी पापी भए
त्यही भएर विलाप गर्दै मामाघर गए ।
✍️ डम्बर थामी ‘अनुपम ‘
कालिन्चोक गा. पा. -६, दोलखा ।
[३]
उमेरले नेटाे काट्याे उस्तै छ व्यथा बल्झिएकाे
मन बाँध्न नसकेर लाेभ माेहमा अल्झिएकाे ।
✍️ ताराप्रसाद चापागाईँ
धुनिबेसी ।
[४]
आखिर घमण्ड केका लागि एकदिन छ मर्नु
सम्पूर्णमा सत्मार्गमा चल्दै दिव्य ज्ञान छ छर्नु ।
✍️ केसर बाेहरा ( सङ्घर्ष )
सुदूरपश्चिम अछाम । हाल भारतबाट ।
[५]
मान्छेको मन लोभी पापी अहङ्कारी भयो
काम क्रोध मोह हुँदा आफ्नै हुर्मत गयो ।
✍️ गुणनिधि घिमिरे अमेरिका
[६]
बुढेसकालमा छैनन् कोही साहारा
छोराछोरी भए विदेशीको आहारा।
✍️ तेजप्रसाद खनाल दाङ।
[७]
पापको भाडो भरिएन है दिदीबहिनी दाजुभाइ,
लोभ लालचले कहिल्यै पनि नछोड्ने भो हामीलाई ।
✍️ नवशिला,
नवदेव मार्ग, लालभित्ती, मोरङ।
[८]
जति कमाए नि आखिर घाटमै हो जाने
सुनाम कमाऔँ केही छैन नि मर्दा लाने ।
✍️ अर्जुन प्रसाद चौलागाई
रामेछापः-सुनापति-१ हालः-अमेरिका,बोस्टन।
[९]
नाङ्गै आयौ नाङ्गै जान्छौ आखिर लोभ किन
लोभ मोह नत्यागे होला मरण कठिन ।
✍️ सरिता सेढाई धादिङ
[१०]
जति यो उमेर जान्छ उति लाेभ लाग्ने
इज्जत सबै फाली भिखारी बनी माग्ने ।
✍️ राज कुमार राजभण्डारी “खाेटाङ्गे”
मध्यपुर ठिमी ५ संगम काेलाेनी भक्तपुर ।
[११]
उमेरमा सङ्घर्ष मात्र बुढेसकालमा दुःख पाइयो
छोराछोरी विदेशमा लाठी टेकेर अस्पताल धाइयो ।
✍️ अम्बिका अधिकारी
झापा बिर्तामोड
[१२]
सहनुपर्छ घाम र पानी कर्म यो गरेर
जीवन भन्नु आखिर यस्तै जानु छ मरेर !
✍️ आर्त अकुलीन
[१३]
निहुँ खोज्छ जिउले मनले भिरको बाटो रोज्दैछ
खान लाउन नपुगेर अरूको कमाइ खोज्दैछ ।
✍️ होम प्रसाद नेउपाने
धरान,सुनसरी ।
[१४]
झरेको दाँत कमजोर आँत अस्पष्ट वात
खोज्छ सधैँ खुसीको रात अनि पैसाको खात ।
✍️ ध्रुव श्रेष्ठ
हाल काठमाडौ ।
[१५]
मान्छे सारै लोभी भयो, आजकल किन ?
सक्छौ दाम हैन नाम कमाएर हिन ।
✍️ शंकर कार्की
थाहा नगरपालिका ३ मकवानपुर।
[१६]
उमेर हुँदा हुन्न हाेस जाेसमा के के गर्ने ?
बुढाे भयाे उमेर गयाे पछुताई भो मर्ने ।
✍️ जी.वि.चिन्तन घाेराही-१४ दाङ
२०८०/१०/२० बिहान ६:१५
[१७]
लोभको घैँटो भर्नलाई भयो हानथाप
अहिले आएर लाग्यो मलाई ठूलो पाप ।
✍️ रचना मोक्तान “यात्री”
नमोबुद्ध न. पा.-५, काभ्रे ।
[१८]
मनले भन्छ गरौँ गरौँ तर तनले सकेन गर्न
बुढेसकाल लागे पनि सकिएन कसैगरी मर्न ।
✍️ प्रेम थापा “मन”बागलुङ
[१९]
खै के कुरा गर्नु र अब मरिजाने तनको
छोडिदिनुहोस् लोभ मोह नासिजाने धनको ।
✍️ अनुग्रह राना मगर ‘पुष्प’
पाँचखपन नपा – ६ संखुवासभा ।
[२०]
कुकुर भन्छ सन्तान बढुन् बिरालाे भन्छ याे घरका जति सबै मरून्
विचरा अग्रगामीहरू जीवनभर सत्तामा नबसेर के पाे गरून् ।
✍️ प्रद्युम्न चालिसे
भक्तपुर कटुञ्जे ।
[२१]
लाेभ र रागले दिदैन आनन्द र चैन
जीवन निरन्तर जल्दैछ बनेर मैन ।
✍️ दीपा समभाव
काठमाडौँ
[२२]
उमेर बुढो भए नि जवान हुने मन
लोभी नयन युवतिकै पछि लाग्छ तन !
✍️ इन्दिरा देवकोटा
[२३]
हिजोभन्दा त आज झनझन बढ्दै छ सास
साच्चै अब बाँचुला भन्ने पनि कमै छ आस ।
✍️ गणेश नेपाली
बगनासकाली-१,बगनास,पाल्पा।
[२४]
सचेत ती मान्छेले पाएको यति हो ज्ञान
लोभकै पछाडि दौड्दा दौड्दै सकियो ज्यान !
✍️ बि.कुलुङ
दार्जिलिङ रंगबुल
[२५]
त्यागौँ सबले रिसराग र लोभ मनबाट
अनि मात्र मुक्ति मिल्छ लौकिक जीवनबाट ।
✍️ बाबुराम पाण्डे
अर्घाखाँची
[२६]
काम, क्रोध, लोभ एकै परिवारका दाइभाइ,
जति सङ्घर्षले जोगायो उति खर्चिने कमाइ ।
✍️ अच्युत घिमिरे
सर्पाङ, भुटान🇧🇹
[२७]
उमेरसँगै लाेभ ,माेह चुलिएर जान्छ
तेराेमेराे भन्दाभन्दै यमराजले तान्छ ।
✍️ त्रिलाेचन भण्डारी
मेचीनगर, झापा
[२८]
जीवनले आखिरमा पुर्‍याउँछ कहाँ ?
भावीले नै लेखेकोमा पुर्‍याउने त्यहाँ ।
✍️ कार्की डिबी माकुम
सुनवल-४, नवलपरासी
[२९]
मनभित्र काम लोभ मोह र तृष्णा हुन्छ
निस्काम कर्म गर्नेले वैकुण्ठ लोक छुन्छ !
✍️ समुद्र
जल्जला७गण्डकी
[३०]
यताउता गरि राख्छु परिवार पाल्न
कसै गरी सकिएन चुहिएको टाल्न ।
✍️ प्रदीप के रिमाल
इटहरी आठ।
[३१]
घर अनि सन्तानको कति धेरै माया
जीवनको अन्तिममा हुन्छ दायाँबायाँ ।
✍️ विवश पारदर्शी
झापा,
[३२]
कुराले टिपेर दिन्छन् सहजै आकाशको तारा,
सधैँको भोलि थपाथप भाखा कुरौटेको पारा ।
✍️ कृष्णकुमार वैद्य
बनेपा ९, काभ्रे
[३३]
पहिले त्यो लोभी भई सोर्‍यौ पुस्तौँ धन
बुढो भयौ हार खायौ पछुतायो मन ।
✍️ बेदु न्यौपाने 🇳🇵
[३४]
मनले जे भनोस् तनले खोजेको गर्छु
मुखको गाँस छिनाई भड्खारामा पर्छु ।
✍️ नन्दलाल आचार्य
सिद्धार्थटोल, उदयपुर ।
[३५]
आफूलाई सम्पत्तिले बनाए जस्तै ठान्छ
दुख्ने गरी बन्चराले आफ्नै खुट्टामा हान्छ ।
✍️ गंगा खड्का
बूढानीलकण्ठ ,काठमाडौँ
[३६]
उमेरले नेटो काट्दा, कपाल हुन्छ फुली सेतै
जता लोभ मोह पाप , अझै नजर जान्छ तेतै ।
✍️ यामनाथ आचार्य
पर्वत
[३७]
जति गरे नि मन मान्दैन
लोभ बाहेक अरू जान्दैन ।
✍️ शशीश्री आचार्य
बौद्ध कुमारीगाल काठमाडौं
[३८]
वृद्ध अवस्थाले सतायो कि क्या हो खोजिरहेछौ तातो घाम,
लोभ मोह सब त्यागेर जप्नु बरु हरे कृष्ण हरे राम ।
✍️ भगवती दवाडी
दमक,झापा
[३९]
जति उमेर बढ्दै जान्छ, उति लोभ नै लाल्चा,
मनलाई पनि जान्नुपर्छ लगाउन ताल्चा ।
✍️ शोभा आचार्य गौतम
काठमाडौँ
[४०]
मेरो पनि त्यही हाल छ, मनको कुरा खोलेँ
केही पनि भन्दिनँ आज, तिम्रै पक्षमा बोलेँ ।
✍️ पुष्पा सुवेदी
नेपालगंन्ज,बॅाके।
[४१]
समयसँगै बदलिनु पर्‍यो कहाँ जान्छ कली वनमा
खुसी उनै छ कली बखतमा लोभ मोह जस मनमा ।
✍️ मुक्ति काफ्ले
कोक्राझार, असम, भारत।
[४२]
गरिबी अभावमा जीवन सकियो
जीउँदै मरेको आभासमा परियो ।
✍️ कला ढकाल
झापा दमक
[४३]
उमेरले नेटाे काटिसक्यो केही धान्दैन याे तनले
आँखा लोभी देखेजति आफ्नै बनाउँ भन्छ यो मनले ।
✍️ सुशीला शिखा
काठमाडौं कागेश्वरी
[४४]
घरबारी र परिवारको माया अपार
छुट्दैन लोभ मोह तृष्णा जाग्दैछ सपार ।
✍️ कमला देवकोटा, पाल्पा
[४५]
उमेर हुँदा नै कमाऊ, झल्केर वा सल्केर
इच्छा भएर के गर्नु ? गयो जोबन ढल्केर ।
✍️ मोती सुब्बा
दार्जिलिङ, भारत।
[४६]
पापको घैँटो भरिसक्यो प्रभु, चाँडै लैजाउ माथि
तिम्रो कर्तुत देख्दाखेरि लानुपर्ने तिम्लाई साथी।
✍️ कबिताहरी
सुन्दर हरैंचा नगरपालिका १ मोरङ
[४७]
मन हुन्छ सदा लोभी, कुरा कहॅा मान्छ
मान्छेको जातै त्यस्तै, भेटेको सबै खान्छ ।
✍️ राजेशराज गड्तौला
कॅाडाघारी, काठमाण्डौ
[४८]
वनले बोलाउँछ मात्र सिकाउँदैन त्याग्न मोह
कसरी बिती जान्छ जीवन गर्दैमा धनको जोह।
✍️ सुस्मिता अधिकारी
काठमाडौँ
[४९]
काेपिलामै हुन्छ हेर्नुहोस् वयस्क बोट
परिश्रम गरेमा मिल्छ हजुर नोट !
✍️ श्री कृष्ण धामी – बझाङ
[५०]
पाल्नेले फाल्न खोज्छन् किन बुढेसकालैमा
माया होइन डुब्नै पर्ने आँसुको खालैमा ।
✍️ संगीता खरेल
चन्द्रागिरी ८ काठमाडौँ
[५१]
लोभको भाँडो भरिँदैन पुग्दैन हेर धनले
आखिर जानैपर्छ छाडी नमाने पनि मनले ।
✍️ मन्दिरा सेढाई
मलेखु,धादिङ
[५२]
लाेभी मन, पापी आँखा हरे ! भन्छ संसार मेरै भए
भन्दाभन्दै जानै छ एकदिन, सबैले छाडेरै गए ।
✍️ रामप्रसाद पुरी, बादेल, खाेटाङ ।
[५३]
काशी जानेबेला भैसक्यो, मोह माया गर्छौ कति
भजन कीर्तन गर्दै बस्ने बेला बिग्रेछ मति ।
✍️ बुद्धिमान दनुवार (सुरुङ्गेली कान्छो )
कनकाई ४ झापा
[५४]
आँखा लोभी र मन पापी संसार यस्तै होला
बुढेसकालमा पेट पाल्न बोक्नुपर्छ झोला ।
✍️ पद्मा काश्यप पाण्डे, मोरङ
[५५]
बाँचुन्जेल तेरोमेरो मरे के पो छ र
दुई दिनको जिन्दगी छैन केही भर ।
✍️ दीपा तिम्सिना -ईलाम
[५६]
जति बुढेसकाल लाग्याे उति लाेभ लाग्ने
बाउ बाजेको इज्जत फाली भए नि माग्ने ।
✍️ सहयात्री शाेभा अर्याल
बुटवल , रुपन्देही
[५७]
छाेडी जाने चाेला याे लाेभ लाग्छ किन धेर ?
नेत्र बल्छन् त्यत्तिँकै अरूकाे धन देखेर ?
✍️ हरिगाेपाल प्रधान
काभ्रेपलाञ्चाेक बनेपा १४ सँगा धजार