‘फूलहरू हतियार उठाऊ’ – कविता

- देवकी के.सी.

अबेला नगर फूलहरू
हतियार उठाउन
आफ्नै अस्तित्वको खातिर
तिम्रा अस्तित्त्व लुटेर भमराहरू
निर्धक्क नाचिरहेछन्
यो मुलुकको
प्रजातन्त्र
लोकतन्त्र
र गणतन्त्रको
कानुनले
बलत्कारी भमराहरूलाई छोएन
बरु
समाजमा बहिस्कार भए
कुमारी आमा बनेका फूलहरू
के प्रजातन्त्र
भमराहरूको मात्र हो ?
के लोकतन्त्र
भमराहरूको मात्र हो ?
के गणतन्त्र
भमराहरुको मात्र हो ?
के फूलहरु अनागरिक हुन् ?
किन बिर्सिए भमराहरूले ?
माटो जोगाउन
रणमैदानमा उत्रिएका
गर्भवती फूलहरूको गाथा
पितृसत्तात्मक जराले जेलिएका
उन्मत्त भमराका मस्तिष्कहरू
निरिह नठान फूलहरूलाई
फूलहरू
धैर्यवान भएका हुन्
हिजो माटो जोगाउन
रगत बगाउने फूलहरू
युद्धमैदानमा
उत्रिएका छन् आज
आफ्नै अस्तित्त्व जोगाउन
सङ्कल्प गरेका छन् फूलहरूले
कठघरामा
बन्दी नभएसम्म
युद्धविराम नगर्ने !!!???

• देवकी के.सी., काठमाडौँ