उदक साहित्य समाज नेपालको आयोजनामा प्रथम उदक वाचन कार्यक्रम मिति २०७८ साल कार्तिक महिनाको ७ गते आइतबारका दिन सम्पन्न भएको छ ।
कार्यक्रमका प्रमुख अतिथि विश्व नेपाली साहित्य प्रतिष्ठानका अध्यक्ष तथा खोरिया काव्यिक विधाका प्रवर्तक जनार्दन अधिकारी धड्कनले काव्यिक विधा उदक परिष्कृत हुँदै गइरहेकोले यसलाई आफूले अनुसन्धानात्मक रूपमा हेरेको बताउँदै प्राकृतिक बिम्बको प्रयोग गरी शीर्षक दिएर बिभिन्न फरक शैलीमा समेत लेख्न सकिने बताउनुभयो ।
कार्यक्रमका विशिष्ट अतिथि वेदका विज्ञ वरिष्ठ साहित्यकार तिलकप्रसाद लुइटेलले सानोमा सिङ्गो विश्व माथि उकास्ने सामर्थ्य राख्ने उदकमा अब उदक यात्रीहरूले भाव पक्षको गहनतामा जोड दिनुपर्ने धारणा सहित शुभकामना मन्तव्य व्यक्त गर्नुभएको थियो ।
उदक साहित्य समाज नेपालका सल्लाहकार चक्रप्रसाद अधिकारीले शुभकामना मन्तव्य व्यक्त गर्दै पूर्वीय साहित्यको शब्द टिपेर उदक प्रवर्तक आर्त अकुलीनले अपनत्वको महसुस गराएर साहित्यिक भोक मेटाउने काम गर्नुभएको धारणा राख्नुभएको थियो ।
सो समाजकी उपाध्यक्ष सविता केसीले उपस्थित सम्पूर्ण अतिथिलाई स्वागत मन्तव्य सहित रचना वाचन र शुभकामना व्यक्त गर्नुभएको थियो ।
जम्मा २९ जनाको सहभागिता रहेको उक्त उदक वाचन कार्यक्रममा उदक यात्री हिमाल अम्मै, लक्ष्मी बस्याल, देवेन्द्र शाक्य, वसन्त अनुभव, सरस्वती वली, धनराज अविरल, इन्दिरा ज्ञावली, मणिराज सिंह, बालकृष्ण खनाल, चन्द्रावती अधिकारी, सोमनाथ लुइटेल, सुरेशचन्द्र घिमिरे, उर्मिला पन्त, तिला लेकाली, बासुदेव ज्ञावली, दुर्गाप्रसाद अधिकारी, रोशन पराजुली, श्रद्धा आचार्य, मन्दिरा सेँढाइ, बादल गुरूङ, सरस्वती श्रेष्ठ, लक्ष्मीप्रसाद मिश्र, कमला देवकोटाले आफ्ना उत्कृष्ट रचनाहरू वाचन गर्नुभएको थियो ।
कार्यक्रम उदक साहित्य समाज नेपालका अध्यक्ष आर्त अकुलीनको सभापतित्व एवं सचिव अबोध निर्मलको सञ्चालनमा भएको थियो ।