दोहा, दुबई, मलेसिया जाने विमान शुक्रबार साँझ त्रिभुवन अन्तर्राष्ट्रिय विमानस्थलमा यात्रु कुरेर बसेका थिए । विमानस्थल बाहिर पार्किङमा संचालनमा ल्याइएका निजी ल्याबमा श्रमिकहरु आरटी–पीसीआरको रिपोर्ट कुरिरहेका थिए । नजिकिँदो तिहारको याममा खादा, माला र रातो बिदाइको टीकाले सजिएका नेपालीहरु हातमा पासपोर्ट र टिकट बोकेर पार्किङ क्षेत्रमा आइएमएस समूहले बनाएको भवनमा रहेका आधा दर्जन ल्याबमा लाइनमा देखिए ।
निजी सुरक्षागार्ड पीसीआर गर्ने र रिपोर्ट लिने यात्रुको लाइन मिलाइरहेका थिए । ल्याबका कर्मचारी र्यापिड पीसीआर टेस्टका लागि नाम टिप्ने र प्रतिव्यक्ति २ हजार रुपैयाँ संकलन गर्दै स्वाबको स्याम्पल लिइरहेका थिए ।
श्रम गन्तव्यमा जाने नेपाली युवायुवतीलाई बिदाइ गर्न आएका परिवारका सदस्यहरुको अनुहार मलिन देखिन्थ्यो । कतिपयका साना नानीबाबु केही घन्टामै जन्मभूमि छाड्नै लागेका तन्नेरी बा–आमाको छातिमा टासिएका देखिन्थे । केही हात समातेर विदेशिन लागेका अभिभावलाई छाडिरहेका थिएनन् ।
र्यापीड पीसीआरका लागि नमुना दिनेहरु र रिपोर्ट लिनेहरुको भद्रगोल भीडमा एकाएक देखापर्छन् पर्यटनमन्त्री प्रेमबहादुर आले । उनी त्यहाँ प्रहरीलाई जानकारी नदिई केही संचारकर्मीसहित छड्केमा पुगेका थिए । मन्त्री गाडीबाट ओर्लिनेबित्तिकै र्यापीड पीसीआर गरिसकेका दुई जना युवाको हातबाट बिल लिन्छन् । ‘कति तिर्नुभयो ?’ ती युवाहरुले मन्त्रीलाई भन्छन् ‘दुई हजार रुपैयाँ ’ पार्किङको अर्को ठाउँमा अर्को समूहलाई उनी सोध्छन् । उनीहरुले पनि पर्यटनमन्त्री आलेलाई ‘दुई हजार रुपैयाँ तिर्यौं । पीसीआर गराउन साहै कष्ट र महँगो भयो !’ भन्छन् ।
त्यही भिडबाट रुकुमका झुपकुमार मल्लले मन्त्री छड्केमा आएको थाहा पाएपछि गुनासो राखे । ‘कसैले यता भन्छ, कसैले उता भन्छ । सर हामीलाई यहाँ लुट्ने काम भइरहेको छ । दुख पाइयो,’ यात्रुहरुका कुरा सुनेपछि आलेले भने, ‘मैले वैदेशिक रोजगारमा जानेहरुबाट धेरै गुनासो सुनेर आएको हुँ । बाहिर १ हजारदेखि १२ सयमा हुने काम यहाँ २ हजारमा हुनु भनेको ठगी हो । म यसलाई समाधान गर्छु ।’
५ दिनअघि मात्रै नागरिक उड्डयन प्राधिकरणको महानिर्देशकमा नियुक्त भएका राजकुमार क्षत्रीलाई पनि साथै लिई पुगेका उनले यात्रुहरुलाई देखाउँदै र उनीहरुकै बीचमा त्यहाँका ल्याबहरुको मूल्य अनुगमन गरी तत्काल ठगी गर्नेलाई कारबाही गर्न निर्देशन दिए । ‘डीजी’साप पीसीआरमा भइरहेको लुट तुरुन्त बन्द गराउनुहोस् । आइतबारबाट १ हजारदेखि १२ सय रुपैयाँ कायम गराउनुहोस् । जुन ल्याबले मान्दैन कारबाही गर्नुहोस् ।’
क्षत्रीले मन्त्रीको निर्देशनअनुसार आइतबारदेखि ल्याबमा भइरहेको जाचको अनुगमन गरी मूल्य घटाउने बताए । उनले विमानस्थलका महाप्रबन्धक प्रतापबाबु तिवारीलाई आइतबार नयाँ मूल्य लागू गर्न पत्र पठाउने बताए । हाल काठमाडौंबाट दुबईका लागि हुने उडानमा नेपाली तथा विदेशी वायुसेवाहरुले उड्नुभन्दा २ देखि ६ घन्टाअघिसम्मको आरटी–पीसीआर जाँच गरेको रिपोर्ट अनिवार्य माग्छन् । त्यस्तै नेपाल वायुसेवा निगमले हङकङको उडानमा ६ घन्टा अगावैको आरटी–पीसीआर नेगेटिभ अनिवार्य गरेको छ । कोरोना संक्रमण कायमै रहेकाले विभिन्न मुलुकहरुले कोरोना जाँच र खोप लगाएको प्रमाणलाई यात्रामा अनिवार्य गरेका छन् । विमानस्थलमा नियमन नहुँदा प्रयोगशालाहरुले महँगो शुल्क लिई परीक्षण गर्दै आएका छन् ।
आले यसअघि कात्तिक १ गते आन्तरिक विमानस्थलको निरीक्षणमा पुगेका थिए ।
