Category: लोकप्रिय

वसन्त अनुभव
चिराघाट, दाङ, १ जेठ २०७७
दाङ जिल्लाको विजौरीमा अवस्थित प्रादेशिक आयुर्वेद चिकित्सालयले शान्तिनगर गाउँपालिकाको क्वारेन्टाइन स्थलमा पुगि त्यहाँ रहेका विरामी, स्वास्थ्यकर्मी लगायत सुरक्षाकर्मीलाई कोरोना सम्बन्धि सचेतना ब्रोसर सहित जडिबुटीजन्य औषधि वितरण गरेको छ ।

प्रदेश सरकार, सामाजिक विकास मन्त्रालय बुटवलले जारी गरेको कोरोना रोकथाम तथा नियन्त्रण सम्बन्धि श्रोत सामग्री बमोजिम क्वारेन्टाइनमा रहेका ब्यक्तिहरुलाई औषधिजन्य जडिबुटी बितरण गरिएको हो ।

जडिबुटी वितरण कार्यक्रमका प्रमुख अतिथी एवं शान्तिनगर गाउँपालिकाका अध्यक्ष कमानसिङ डाँगीले मन्तव्य दिनुहुदै आयुर्वेद सबैभन्दा पुरानो मौलिक एवं राष्ट्रिय चिकित्सा भएकोले यसलाई वैकल्पिक चिकित्सा भन्न नहुने भन्नुभयो । साथै आयुर्वेद चिकित्सालाई राज्यले प्राथमिकतामा राख्न नसकेकोमा चिन्ता व्यक्त गर्नुभयो ।

कार्यक्रमको सभापति एवं प्रादेशिक आयुर्वेद चिकित्सालय, विजौरीका निमित्त निर्देशक डा रामकामेश्वर ठाकुरले औषधिजन्य जडिबुटीहरु जस्तै गुर्जो, तुलसी, अमला, भुइअमला, यष्ठिमधु आदिले कसरी हाम्रो रोगप्रतिरोधात्मक क्षमता बढाउछ भन्ने बारेमा जानकारी गराउनु भयो ।

कोरोना संक्रमणको महामारीले सारा विश्वलाई नै गाजिरहेको छ । कोरोना विरुद्ध न अहिलेसम्म कुनै भ्याक्सिन निकाल्न सकिएको छ न उपचारका लागि औषधि नै । कोरोनाको कहरलाई आँखा चिम्लेर सहनु सिवाय अर्को विकल्प देखा परेको छैन ।

कोरोनालाई मार्ने औषधि नबने पनि जडिबुटीजन्य औषधिको सेवन, विभिन्न योग प्राणायाम, ध्यानका माध्यमले मानव शरीरमा रोगप्रतिरोधात्मक क्षमता अभिवृद्धि गरि कोरोनाबाट बच्न सकिने प्रादेशिक आयुर्वेद चिकित्सालय विजौरीका आयुर्वेद चिकित्सक डा गोकर्ण दाहालले बताउनु भयो ।

कार्यक्रममा शान्तिनगर गाउँपालिकाका प्रमुख प्रशासकीय अधिकृत नर बहादुर बिक, प्रादेशिक आयुर्वेद चिकित्सालयका कविराज निरीक्षक वसन्त केसी, शान्तिनगर गापा प्रवक्ता, विभिन्न वडाका वडाध्यक्षहरु, स्वास्थ्यकर्मीहरु लगायतका ब्यक्तिहरुको उपस्थिति रहेको थियो ।

कार्यक्रमको संचालन शान्तिनगर गापा स्वास्थ्यशाखा प्रमुख हरि बहादुर पुनले गर्नुभएको थियो । कार्यक्रममा गुडुची, अमला, यष्ठिमधु आदि जडिबुटीजन्य औषधि वितरण गरिएको थियो भने बाकी औषधि स्वास्थ्यशाखा प्रमुख हरि पुनलाई हस्तान्तरण गरिएको थियो ।

वसन्त अनुभव
घोराही, दाङ, ३१ वैशाख
दाङ जिल्लाको घोराहीमा रहेको राप्ती स्वास्थ्य विज्ञान प्रतिष्ठानमा नवजात शिशु सघन कक्ष तथा बाल सघन कक्ष र १० बेडको आईसीयु Intensive Care Unit (ICU) को एकसाथ उद्घाटन गरिएको छ । प्रदेश ५ का मुख्यमन्त्री शंकर पोखरेलले बुधवार आज आयोजित एक कार्यक्रममा रिबन काटेर उद्घाटन गर्नुभएको हो ।

उद्घाटन पछि शुभकामना मन्तव्य दिनु हुदै मुख्यमन्त्री पोखरेलले अबदेखि प्रतिष्ठानबाट विरामी रेफर भएर बाहिर जाने होइन, अन्यत्रबाट रेफर भइ यहाँ आउने गरि काम गर्नुपर्ने बताउनु भयो ।

उहाले राप्ती स्वास्थ्य विज्ञान प्रतिष्ठान सबैको साझा अस्पताल तथा एकेडेमीक संस्था भएकोले यसको सेवा, शिक्षा तथा अनुसन्धान कार्यलाई सफल पार्न सम्पुर्ण दंगाली जनता एवं जनसमुदायले आ-आफ्नो स्थानबाट आवश्यक सहयोग गर्नुपर्ने औल्याउनु भयो ।

साथै मुख्यमन्त्री पोखरेलले विश्वव्यापी संक्रमणको रुपमा रहेको नोवेल कोरोना भाईरस (COVID-19) परिक्षण गर्नका लागि आवश्यक PCR मेशिन भित्र्याउन सफल भएकोमा प्रतिष्ठानकी उपकुलपति प्रा.डा. संगीता भण्डारीको प्रशंसा सहित धन्यवाद समेत व्यक्त गर्नुभयो ।

वसन्त अनुभव

दाङ, ३१ बैशाख
कोभिड १९ को महामारी विश्वको लागि ठूलो चुनौती बन्न पुगेको छ यतिबेला । विश्वका अधिकांस मुलुकहरूमा कोरोनाले आफ्नो गहिरो प्रभाव देखाइरहेको छ ।

कोरोना भाइरसको महामारीका कारण विश्वमा अहिलेसम्म लगभग तीन लाख (२ लाख ९१ हजार) मानिसहरुले अकालमा मृत्युवरण गरिसकेका छन भने साढे बयालीस लाख (४२ लाख ५५ हजार २ सय ९१ जना) संक्रमित हुन पुगेका छन । सर्वाधिक कोरोना संक्रमित हुने र मृत्यु हुनेमा अमेरिका पहिलो स्थानमा पर्दछ ।

हालसम्म अमेरिकामा संक्रमितको संख्या १३ लाख ६७ हजार ९ सय २७ जना रहेको छ भने मृत्यु हुनेको संख्या ८२ हजार २ सय ४६ जना रहेकोे छ । कोरोनाका संक्रमित संख्यालाई हेर्दा अमेरिका पछि रुस, स्पेन, बेलायत, इटाली आदि मुलुकहरू शिर्ष स्थानमा पर्दछन ।

नेपालको छिमेकी मुलुक भारत कोरोना संक्रमित बिरामीको हिसाबले विश्वको १२ औ स्थानमा र मृत्यु भएका विरामी संख्याको हिसाबले १६ औ स्थानमा पर्दछ । भारतमा हालसम्म कोरोना संक्रमितको संख्या ७४ हजार २ सय ४३ जना र मृत्यु हुनेको संख्या २ हजार ४ सय १५ जना पुगिसकेको छ ।

नेपालमा पनि कोरोना संक्रमितको संख्या दिन दुई गुना रात चार गुणा भने जस्तै तिब्र गतिमा वृद्धि भइरहेको छ । हालसम्म नेपालमा कोरोना संक्रमणका कारण कसैको मृत्युु भएको पुष्टि नभएपनी पछिल्लो समय यसको वृद्धिदर हेर्दा चिन्ताजनक रहेको छ ।

नेपालमा अहिले कोरोना संक्रमितको संख्या २१७ जना पुष्टि भइसकेको छ । विगतका तुलनामा कोरोना परिक्षणको दायरा वृद्धि गरिएतापनि पर्याप्त मात्रामा हुन सकेको छैन ।

कोरोना भाइरसको महामारी रोकथाम र नियन्त्रण गर्ने कार्य निकै चुनौतीपुर्ण कार्य हो । नेपालको छिमेकी मुलुक चीनको वुहान प्रान्तमा कोरोना ब्रेक भइ विश्वका अन्य मुलुकमा फैलिन शुरु गर्दा बखत देखि नै नेपालले आवश्यक सतर्कता अपनाउन जरुरी थियो ।

तर त्यतिबेला सरकारले यसतर्फ खासै चासो दिन उचित संझेन । गत माघ महिनामा नेपालमा पहिलो कोरोना संक्रमित पुष्टि हुँदा पनि सरकारले गंभिरतापुर्वक लिन सकेन। बरु स्वास्थ्य संबन्धी सुरक्षा सामग्री खरिद प्रकरणमा करोडौं रकम कमिसन खान थालेको समाचार पत्रपत्रिका लगायत संचार माध्यममा छताछुल्ल हुनपुग्यो ।

सरकारले कोरोना महामारीको संकेत पाउनु बित्तिकै उच्च सतर्कता अपनाउनु पर्दथ्यो । त्रिभुवन अन्तर्राष्ट्रिय विमानस्थल लगायत मानिस आवतजावत गर्ने सिमानाकामा कडा चेकजाँच , निगरानी गर्नुपर्थ्यो । तत्काल अन्तर्राष्ट्रिय हवाई र स्थलगत यातायात बन्द गरिनुपर्थ्यो ।

तर विविध कारणबश सरकारले त्यसो गर्न सकेन । बरु पछि हतारहतारमा आकस्मिक लकडाउन लागू गर्‍यो । कम्तिमा १ हप्ताको समयसिमा राखेर कामकाजको सिलसिलामा घर बाहिर गएका नेपालीहरुलाई घर फर्कन सूचना प्रवाह गर्नुपर्थ्यो ।

भारत लगायत अन्य मुलुकमा रहेका नेपालीहरु जो घर आउन चाहन्छन तिनलाई समयसीमा तोकि सूचना जारी गरि स्वेदेश फर्कन समय दिनुपर्थ्यो ।

भारत लगायत तेश्रो मुलुकबाट भित्रने वा भित्राइएका नेपालीहरुलाई कडा चेकजाँचका साथै अनिवार्य १४ दिनको क्वारेन्टाइन बस्ने ब्यवस्था गरिनु पर्थ्यो । तर सरकारले त्यसो नगर्दा लकडाउन भनेको केहो भनेर नबुझेका र कहिले नभोगेका नेपालीहरु लकडाउन भएको १ हप्ता पनि नबित्दै अत्तालिए र हिडेर भए पनि घर फर्कन थाले ।

बाटोमा यातायातका साधन, गाडी नगुडे पनि हुलकाहुल हिडेका मानिसहरूको भिडले बाटो कहिल्यै सुनसान हुन पाएन । मानिसहरू भोकप्यास निद्रा थकाइ केही नभनी २/३ हप्ता हिडेर भएपनी घर पुग्ने प्रयास गरे र पुगे पनि । सरकारले तमासे भै हेर्नू सिवाय केही गर्न सकेन । पछिल्लो समय केहि स्थानीय सरकार, ब्यक्ति, संघसंस्थाहरुको प्रयासमा ती पैदल यात्रुलाई खाना, खाजा, पानी र यातायातको व्यवस्था गरि पठाउने गरेको देखियो । त्यहाँ नत सामाजिक दुरि कायम गरेको देखियो नत मुखमा मास्क नत साबुनपानीले हात धुने नै गरेको देखियो । त्यतिबेला संक्रमण फैलने उच्च जोखिम रहदारहदै पनी भाग्यवश भयावह रुप देख्नु परेन ।

लकडाउन जारी गरि नाकाहरु बन्द गरिदा रोजगार, अध्ययनका लागि भारतमा रहेका नेपालीहरु आफ्नो घर स्वेदेश फर्कन बाट बन्चित भए । अलपत्र परेका नेपालीहरु नाका छलेर लुकिछिपी हिडेर नेपाल प्रवेश गरे । एकजनाले महाकाली नदि पौडेर पार गरि नेपाल आएको हामी सबैले देखे सुनेकै कुरो हो । भारतमा कोरोना संक्रमण तिब्र गतिमा फैलिरहेको बेलामा नेपालीहरु यसरी नेपाल प्रवेश गर्दा आफुमात्र नछिरी कोरोना पनि भित्राएको भन्ने बेला बेलामा नेपालमा भेटिएका कोरोना पोजिटिभ केसले प्रमाणको पुष्टि गर्दछन ।

भारतमा भएको धार्मिक कार्यक्रममा सहभागी भएर फर्किएका नेपाली मुस्लिम धर्मगुरु (जमाती ) हरुलाई सहज रुपमा नेपाल प्रवेश गर्न दिई क्वारेन्टाइनमा राखी कोरोना परिक्षण गरि छोड्नु पर्नेमा जारी लकडाउनका कारण उनिहरु नाकाबाट नेपाल प्रवेश गर्न पाएनन। परिणामस्वरुप उनिहरु लुकिछिपी नेपाल प्रवेश गरि घर, मस्जिदमा लुकेर बस्ने गरेको देखिन्छ । भारतबाट नेपाल आउँदा आफुसँगै ल्याएको कोरोना रुपि कोशेलि अन्जानमै आफ्ना आफन्त, सहकर्मी, साथी, परिवारमा बाड्न पुगे । जुन पटकपटक पुष्टि हुने कोरोनाको परिणामले देखाईरहेको छ ।

नेपालको परिप्रेक्षमा कोरोना रोकथाम तथा नियन्त्रणका लागि गर्नुपर्ने उपायहरु

भारत लगायत अन्य मुलुकबाट नेपाल फर्कन चाहने नेपालीहरुलाई उनिहरुको स्वेदेश फर्कन पाउनु पर्ने नैसर्गिक अधिकारको संरक्षण गर्दै जतिसक्यो चाडो नेपाल ल्याउने ।

नेपाल आएका ती नेपालीहरुलाई अनिवार्य १४ दिनको क्वारेन्टाइनमा बसाली पिसिआर परिक्षण गरेर मात्र नेगेटिभ रिपोर्ट आएकालाई स्वा.क.को निगरानीमा ७ दिने सेल्फ होम क्वारेन्टाइनमा बस्ने व्यवस्था मिलाउने ।

क्वारेन्टाइन स्थलमा अव्यवस्थित खानपान, बसाई आदिका कारण विगतमा क्वारेन्टाइनमा बसेका व्यक्तिहरु बस्न नचाहने, भाग्ने गरेकाले अत्यावश्यक सुविधा सम्पन्न, सामाजिक दुरि कायम हुने गरि खाने बस्ने व्यवस्था भएको क्वारेन्टाइन स्थल बनाइनु पर्ने ।

सिमानाबाट नेपाल प्रवेश गर्ने नेपालीहरुलाई क्वारेन्टाइनमा राख्नका लागि सिमाना नजिक नै क्वारेन्टाइन स्थल निर्माण गर्ने ।

कोरोना संक्रमितहरुलाई जनरल अस्पतालमा नराखी कोरोना विशेष अस्पतालमा राखेर उपचार गरिनुपर्ने । सकभर ठूलो क्षमताको अस्पताल निर्माण गरि सबै संक्रमितलाई एउटै अस्पतालमा राखी उपचार गर्ने ।

कोरोना संक्रमणको जोखिमका दृष्टिले नेपालका रेडजोनमा परेका जिल्लाहरुका सम्पुर्ण आमनागरिक, स्वास्थ्यकर्मी, सुरक्षाकर्मी, सरसफाइकर्मी आदिको अनिवार्य कोरोना जाँच गरिनु पर्ने ।

एकपटक कोरोना संक्रमित भै निको भएर घर फर्किएका ब्यक्तिहरुको पनि निरन्तर फलोअप गर्ने ।

कोरोनाका कारण भन्दा पनि भोकमरी, चिन्ता, भय, तनावका कारण मान्छे नमरुन भन्ने कुरोलाई मध्येनजर गर्दै स्थानीय परिस्थिति अनुकुल विवेकपुर्ण तरिकाले लकडाउन कडा वा लचिलो बनाउने ।

रेडजोनमा परेका बाहेकका जिल्लामा उच्च सतर्कताका साथ लकडाउन खोल्दा उचित हुन्छ । जनजीवन सामान्यिकरण गर्ने।

संक्रमित भेटिएको स्थानीय निकायलाई परिस्थिति सामान्य नहोउन्जेल सिल गर्ने ।

सकभर एकजिल्लाबाट अर्को जिल्ला आवागमन निषेध गर्ने ।
घर बाहिर निस्कदा अनिवार्य मास्क लगाउने, सामाजिक दुरि कायम गर्ने र गराउने । मास्क नलगाउनेलाई दण्डको व्यवस्था गर्ने ।

खाद्यान्न लगायत सम्पुर्ण सामग्री ढुवानी गर्ने साधनलाई अनिवार्य डिसइन्फेक्ट गरेर मात्र प्रवेश अनुमती दिने । सामान पनि डिसइन्फेक्ट गरेर मात्र ग्रहण गर्ने ।

कोरोना अस्पताल वा क्वारेन्टाइन स्थलमा रहेका विरामीहरुको रोग प्रतिरोधात्मक क्षेमता अभिबृद्वी गर्न र तनाव व्यवस्थापन गर्नका लागि जडिबुटीजन्य औषधि, योग, प्राणायाम, ध्यान जस्ता क्रियाकलाप व्यापक बनाउने ।

वसन्त अनुभव

तुलसीपुर, ३० बैशाख
दाङ जिल्लाको तुलसीपुरमा अवस्थित राप्ती आयुर्वेद चिकित्सालयले तुलसीपुर उपमहानगरपालिका द्वारा गुरुजजुर मावि रक्षाचौरमा स्थापित क्वारेनटाईनमा बसेका ब्यक्तिहरुलाई योगाभ्यासका साथै जडिबुटीजन्य औषधि वितरण गरेको छ ।

कोरोनाका कारण हुने मानसिक तनाव व्यवस्थापन गर्न र शरीरमा रोग प्रतिरोध क्षमता अभिवृद्धि गर्ने उद्वेश्यले क्वारेन्टाइनमा बसेका १८ जना ब्यक्तिलाई मंगलबार योगाभ्यास सहित गुडुची लगायत जडिबुटिजन्य औषधि वितरण गरिएको हो ।

प्रदेश सरकार, सामाजिक विकास मन्त्रालय, बुटवलद्वारा कोरोना नियन्त्रण तथा रोकथाम सम्बन्धमा जारी निर्देशिका बमोजिम क्वारेन्टाइनमा बसेकालाई योगाभ्यास र जडिबुटीजन्य औषधि वितरण गरिएको राप्ती आयुर्वेद चिकित्सालयका प्रमुख डा. मदनकुमार बिसिले जानकारी दिनुभयो ।

साथै उहाँले यस किसिमको योग, ध्यानले कोरोना संक्रमण वा संक्रमणको आशंका तथा डरका कारण उत्पन्न हुने मानसिक तनाव कम गर्न सहयोग मिल्ने र जडिबुटीजन्य औषधिले शरीरमा रोग प्रतिरोध क्षमता वृद्धि गर्ने भएकोले कोरोना रोगको रोकथाम तथा नियन्त्रणमा कोशेढुंगा सावित हुने बताउनु भयो ।

साथै उहाँले विश्वमा कोरोना भाइरसलाई मार्ने औषधि बनिनसकेको अवस्थामा यस किसिमको जडिबुटीजन्य औषधिले पनि कोरोना भाइरसलाई सिधै मार्ने नभई रोग प्रतिरोधात्मक क्षमता बढाउने मात्र भएकोले कोरोनालाई शतप्रतिशत निको पार्छ भनी भ्रममा नपर्न सर्वसाधारणलाई आग्रह गर्नुभयो ।

तसर्थ जडिबुटीको प्रयोगबाट रोग प्रतिरोधात्मक क्षमता बृद्धि गर्ने, योग, प्राणायाम, ध्यानबाट तनाव व्यवस्थापन गर्ने उद्देश्यले रक्षाचौर क्वारेन्टाइन स्थलमा यस किसिमको कार्यक्रम संञ्चालन गरिएको र अन्य क्वारेन्टाइन स्थलमा पनि कार्यक्रम गर्दै जाने जानकारी उहाँले दिनुभयोे ।

यसका साथै राप्ती आयुर्बेद चिकित्सालय दोघरेले कोरोना संक्रमणबाट बच्न जनचेतना मुलक पर्चा पम्पलेटहरु वितरण गर्दै आएको पनि उहाँले बताउनु भयो ।

कार्यक्रममा राप्ती आयुर्वेद चिकित्सालयका प्रमुख डा मदन कुमार बिसी, कैलाश न्यौपाने, आश्मा केसी, शारदा पोख्रेल, महेश वली लगायतका स्वास्थ्यकर्मी तथा कर्मचारीहरुको उपस्थिति रहेको थियो ।

वसन्त अनुभव
काठमाडौ, ३० बैशाख
नेपालमा आज एकै दिनमा अहिलेसम्म सम्मकै सबैभन्दा धेरै ८३ जना ब्यक्तिहरुलाई कोरोना संक्रमण पुष्टि भएको छ । मंगलबार विहान मात्र ५७ जनामा कोरोना संक्रमण पुष्टि भएको जानकारी प्राप्त भएकोमा फेरि साँझ २६ जनामा कोरोना संक्रमण भएको पुष्टि हुन पुगेको छ । योसँगै नेपालमा कोरोना संक्रमितको संख्या २१७ पुगेको स्वास्थ्य तथा जनसंख्या मन्त्रालयले जनाएको छ ।

मन्त्रालयबाट जारी प्रेस बिज्ञप्ति अनुसार पर्साका २२, २८, २८, ३२, ४५ र ६० वर्षीय महिला तथा १६, २२, २४,२५, २५, २८,२८, ३२, ५९, ५५,६१, र ६१ वर्षीय पुरुषमा कोरोना पुष्टि भएको छ ।

त्यस्तै धनुषाकी २० वर्षीया महिला र ४० वर्षीय पुरुष तथा महोत्तरीका १६ र ३५ वर्षीय पुरुषमा कोरोना संक्रमण पुष्टि भएको मन्त्रालयका सहप्रवक्ता समिरकुमार अधिकारीद्वारा हस्ताक्षरित विज्ञप्तिमा उल्लेख छ ।

साथै काठमाडौंकी ३३ वर्षीया महिला, सर्लाहीका ४५ वर्षीय पुरुष तथा भक्तपुरका २५ वर्षीया महिला र २७ वर्षीय पुरुषमा कोरोना पुष्टि भएको विज्ञप्तिमा उल्लेख छ ।

थप २६ जना नव संक्रमित मध्ये पर्साका १८ जना, धनुषाका २ जना, महोत्तरीका २ जना काठमाडौका १ जना, सर्लाहीका १ जना र भक्तपुरका २ जना रहेका छन । सबैजना स्वास्थ्यकर्मीको सम्पर्कमा रहेको र निजहरूको स्वास्थ्य अवस्था सामान्य रहेको विज्ञप्तिमा उल्लेख छ ।

वसन्त अनुभव
दाङ, ३० बैशाख
कोभिड १९ को संक्रमण रोकथाम तथा नियन्त्रणका लागि भनेर गत चैत्र ११ गते देखि जारी लकडाउन शिथिल हुँदै गइरहेको छ । अझ भन्नुपर्दा दाङ जिल्लाका स्थानीय बजार क्षेत्रहरुमा हुने गरेको मानिसहरुको भिडभाड देख्दा लकडाउन अघोषित रुपमा अन्त्य भइसकेको होकि भन्ने भान हुन्छ ।

अमेरिका जस्तो सुविधा सम्पन्न विकसित राष्ट्र त कोरोनाको कहरलाई थेग्न नसकेर फटफटाईरहेको छ भने हाम्रो हाल के होला ? हालसम्म नेपालमा कोरोना संक्रमित संख्या २१७ जना पुगिसकेको छ । संक्रमितहरुको संख्या अझै द्रुतत्तर गतिमा बढ्ने देखिन्छ । हालसम्म कोरोनाका कारण कुनै पनि व्यक्तिको मृत्युु भएको पुष्टि नभए पनि निकट दिनमा नहोला भन्न सकिन्न । जब कोरोनाबाट रोगि, बुढापाका, कमजोर व्यक्तिहरु संक्रमित हुने छन तब अहिलेसम्मको रेकर्ड कायम रहि राख्ने स्थिति रहने छैन । त्यतिबेला सुर्ताउनु सिवाय केही बाकी हुनेछैन ।

सामाजिक दुरी कहिँकतै कायम भएको देखिदैन । कुनै कुनै मेडिकल, खाद्यान्न पसल, लगायतका पसल अगाडि सामाजिक दुरी कायम राख्नका लागि एक मिटरको फरकमा गोलो घेरा बनाएको देखिए पनि पालना भएको देखिदैन ।

नेपालमा कोरोना संक्रमितको संख्या दिनप्रतिदिन गुणात्मक रुपले बढिरहेको छ । हामीमा डर त्रास भने पटक्कै छैन । सायद वीर गोर्खालीका सन्तान भएर होला हामी कोरोनालाई खुला चुनौती दिइरहेका छौ ।

सरकारले गरेको लकडाउनको अवज्ञा गर्दा आफुलाई ठूलो मान्छे संझन्छौ । लकडाउनका पालना गराउन हिडेका सुरक्षाकर्मीहरुलाई ढुंगामुढा गर्न समेत पछि पर्दैनौ । कोरोना संक्रमित व्यक्तिहरुले आफुलाई रोग लागेपनी अरुलाई नलागोस भन्ने तर्फ सचेत हुनुको साटो उपचारमा संलग्न स्वास्थ्यकर्मी, सुरक्षाकर्मीहरु माथी थुक्ने, जाइलाग्ने गरेको सुन्ने गरिन्छ ।

कति संक्रमितले आफ्नो झुठो अरुलाई खुवाएर रोगलाई बढावा दिदै गरेको समाचारमा देख्ने र सुन्ने गरिन्छ ।नेपाल भुमिमै रुपैया पैसामा आफ्नो थुक लगाएर फाल्दै हिडेका मानिस भेटिएको धेरै भएको छैन । साच्चै हामीमा मानवियताको संकट परेकै हो त ?

देश गंभिर परिस्थितिबाट गुज्रिरहेको छ । संक्रमणको जोखिम कम गर्न लकडाउन गर्नुपर्ने बाध्यता रहेको छ । यस्तो बेलामा नागरिकहरुलाई साह्रो गाह्रो नपर्ने त कुरै भएन । जस्तै कठिन परिस्थितिमा पनि धैर्य र संयमता अपनाई हामी जसरी पनि सुरक्षीत रहनु वा बाच्नु ठूलो कुरो हो । बाचेपछी त भोलि हाम्रो सबै रहरहरु पूरा गरौला नि ।

अत्यावश्यक काम पर्दा वा आपतकालीन अवस्थामा त घर बाहिर निस्कनु पर्ने हुन्छ ।घरमा खाद्यान्न सिद्विएको बेला, बिरामी परेको बेला, त्यस्तै अन्य अतिआवश्यक काम परेको बेला घर बाहिर निस्कनु पर्दा संबंधित सरोकारवाला निकायलाई जानकारी गराएर निस्कदा ठिक हुन्छ । तर पनि कतिपय मानिसहरुले पास लिनुपर्छ भन्ने जानकारी नभएर वा पाउन नसकेर आपतकालीन काम पर्दा निस्केका हुन्छन ।

सुरक्षाकर्मीले पनि परिस्थितिको गांभिर्यतालाई ख्याल गरि सजकताका साथ उक्त व्यक्तिलाई जान दिनु पर्दछ। माथिको आदेश भन्दै लठ्ठी बर्षाउनु कदापि मानवीयता होइन । यस्तो परिस्थितिमा स्वविवेक र संयमताको निकै खाचो पर्दछ । सर्वसाधारण हामी जन्ताले पनि सुरक्षाकर्मी, स्वास्थ्यकर्मीहरु हाम्रै सुरक्षाका लागि आफ्नो ज्यानको बाजि लगाई मैदानमा उत्रिएका छन भन्ने कदापि भुल्नु हुदैन ।

मुलुक यस्तो गंभिर मोडमा पुगेको छ । कोरोनाको कहर वर्षिएको छ । यस्तोबेलामा पनि कतिपय मान्छेहरु मानवीय संवेदना समेतको ख्याल नगरी भ्रष्टाचार, कालोबजारी, ठगीमा तल्लीन छन । कात्रोमा पकेट सिलाउन लागिपरेका छन । आफुखुशी सामानको मूल्य बढाउने, कृत्रिम अभाव श्रृजना गर्ने, राम्रो सामानमा कुहिएको र कमसल सामान मिसाएर बेच्ने, स्वास्थ्य र सुरक्षा सामग्री खरिदमा कमिसन खाने गरेका घटनाहरु सुन्नुर देख्नु पर्दा दु:ख लाग्ने गर्दछ । यस्तो बेला त कम्तीमा मानवताको ख्याल गरौ । लाज सरम, पापधर्म, इज्जतको केही त ख्याल गरौ ।

कोरोनाले विस्तारै आफ्नो पकड बनाउदै छ । नेपाल पनि कोरोना संक्रमणको पहिलो, दोश्रो हुँदै तेश्रो चरणमा प्रवेश गरिसकेको छ । लकडाउनको गंभिर अवस्थामा रिपोर्टिङ गर्ने पत्रकार र संक्रमितको उपचारमा संलग्न स्वास्थ्यकर्मी पनि कोरोनाबाट अछुतो रहन सकेनन । यस्तै परिस्थिति रहे ठूलो भयावह स्थिती नआउला भन्न सकिन्न ।

अमेरिका जस्तो सुविधा सम्पन्न विकसित राष्ट्र त कोरोनाको कहरलाई थेग्न नसकेर फटफटाईरहेको छ भने हाम्रो हाल के होला ? हालसम्म नेपालमा कोरोना संक्रमित संख्या २१७ जना पुगिसकेको छ । संक्रमितहरुको संख्या अझै द्रुतत्तर गतिमा बढ्ने देखिन्छ । हालसम्म कोरोनाका कारण कुनै पनि व्यक्तिको मृत्युु भएको पुष्टि नभए पनि निकट दिनमा नहोला भन्न सकिन्न । जब कोरोनाबाट रोगि, बुढापाका, कमजोर व्यक्तिहरु संक्रमित हुने छन तब अहिलेसम्मको रेकर्ड कायम रहि राख्ने छैन । त्यतिबेला सुर्ताउनु सिवाय केही बाकी हुनेछैन ।

अहिलेसम्म परिस्थिति हाम्रै हातमा छ । हामीले चाहायौ भने कोरोनालाई नियन्त्रण गर्न सक्दछौ । सबैले सरकारले जारी गरेको सुरक्षा सावधानीहरु अक्षरस: पालना गरौ । स्वास्थ्य मन्त्रालयले दिएको सुझावलाई अवलम्बन गरौ । आफ्नो टोल छिमेकमा भर्खरै कुनै परिचित वा अपरिचित, आफन्त जोसुकै आएको थाहा पाउने बित्तिकै क्वारेन्टाइन स्थलसम्म पुर्‍याउने काम गरौ । जाती, धर्म, नाता आदि कुनै कुराको प्रलोभनमा नपरी कोरोना नियन्त्रणमा योगदान दियौ । घरमा रहौ, स्वस्थ रहौ ।

बसन्त अनुभव

काठमाडौं, २९ बैशाख
कोरोना संक्रमितको संख्या नेपालमा दिन प्रतिदिन बढ्दै गइरहेको छ । आज मात्र २४ जना कोभिड १९ का नयाँ संक्रमित थपिएका छन । विहान र दिउसोमा ११ जना नयाँ कोरोना संक्रमित पुष्टि भए लगत्तै बेलुका थप १३ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार बेलुका थप भएका नयाँ संक्रमित कपिलवस्तु, रुपन्देही र बर्दिया जिल्लाका हुन । मन्त्रालयद्वारा जारी विज्ञप्तिका अनुसार कपिलवस्तुमा ६ जना, रुपन्देहीमा ६ जना र बर्दियामा १ जना गरी १३ जना संक्रमित थपिएका हुन्। यो सहित नेपालमा संक्रमितको संख्या १३४ जना पुगेको छ।

स्वास्थ्य तथा जनसंख्या मन्त्रालयका सहप्रवक्ता डा समिरकुमार अधिकारीद्वारा हस्ताक्षरित विज्ञप्ति अनुसार कपिलवस्तुको बुद्धभुमि नगरपालिका वडा नं. ७ र यशोधरा गाउँपालिका वडा नं. ८ का १५, १९, २३, ३०, ३२ र ३८ वर्षीय पुरुषमा कोरोना संक्रमण देखिएको छ ।

त्यस्तै रुपन्देही समरीमाई गाउँपालिका वडा नं. ७ र लुम्बिनी संस्कृतिक गाउँपालिका वडा नं. ६ का २४, २६, २७, ३०, ३२ र ४० वर्षीय पुरुषमा कोरोना संक्रमण देखिएको छ ।

र त्यस्तै बर्दियाको राजापुर नगरपालिका वडा नं. ५ का ११ वर्षीया किशोरीमा कोरोना संक्रमण देखिएको छ । साथै विज्ञप्तिमा सबैजना ब्यक्तिहरु स्वास्थ्यकर्मीको सम्पर्कमा रहेको र स्वास्थ्य अवस्था पनि सामान्य रहेको उल्लेख छ।