रौतहट, २१ जेठ। शुक्रवार सामाजिक सञ्जालमा भाइरल एउटा भिडियोमा एक युवकलाई डोरीले बाँधेर कुटपिट गरिरहेका छन् । एक पुरुषले उनलाई लट्ठीले खुट्टामा र शरीरमा पिटिरहेको अरू धेरै मानिसले हेरिरहेका छन् । कुटाइ खाने युवक रौतहटको दुर्गा भगवती गाउँपालिका–५ का विकास पासवान हुन् ।
कक्षा ११ मा पढ्ने उनलाई बाँधेर कुटपिट गर्ने वडा नम्बर-४ बस्ने किन्सीदेव गिरी हुन् । किन्सीदेवसँगै उनका छोराहरू सन्तोष गिरी, छोटु गिरीलगायतको समूहले बाँधेर पिटेको प्रत्यक्षदर्शीले बताएका छन् । प्रेम पत्र पठाएको आरोप घटना बिहीबारकै भए पनि प्रहरीले अझै घटना बाहिर ल्याएको छैन।
दुर्गाभगवती–५ का वडाध्यक्ष धर्मनाथ चौधरीले ती युवकले स्थानीय युवतीलाई प्रेम पत्र लेखेपछि घटना भएको आफूले सुनेको बताए । ‘केटीलाई चिठीसिठी पठायो भन्ने कुरा सुन्नमा आएको छ, खास कुरा के हो मलाई पनि थाहा छैन’ उनले भने, व्यस्त भएकाले राम्रोसँग बुझ्न पाएको छैन ।’ कुटपिटको भिडियो सामाजिक सञ्जालमा भाइरल भएपछि प्रहरीले पनि घटनाबारे जानकारी पाएको छ । वडाध्यक्ष चौधरीले घटनामा संलग्न दुवै पक्षलाई प्रहरीले बोलाएको छ ।
‘म पनि जानुपर्ने थियो, वडाको अनि आफ्नै काम धेरै भएकोले त्यहाँ जान पाएको छैन’ उनले भने । घटनामा संलग्न फरार जिल्ला प्रहरी कार्यालय रौतहटका प्रहरी उपरीक्षक (एसपी) सिद्धिविक्रम शाहले कुटपिटबारे उजुरी परेको बताए । पीडित युवकको स्वास्थ्य जाँच गरिएको र घटनामा संलग्नहरू फरार रहेको एसपी शाहले बताए ।
‘घटनामा संलग्नको खोजी भइरहेको छ, अहिले अनुसन्धानकै क्रममा छौँ, साँझसम्म केही आउँला’ एसपी शाहले भने । युवक दलित समुदायको भएकाले गाउँका गैरदलितहरुले कुटपिट गरेको स्थानीयको दाबी छ।
स्रोत : गोठालो खबर
