Category: कला /जीवनशैली

काठमाडौँ । नेपाली फिल्म क्षेत्रमा नयाँ वर्षलाई सबैभन्दा ठूलो अवसर मानिन्छ । नयाँ वर्षमा रिलिज भएका फिल्मले लगानी सुरक्षित मात्र गर्दैनन्, व्यावसायिक नाफा पनि आर्जन गर्ने गरेका छन् । त्यही भएर नयाँ वर्षमा फिल्म रिलिजका लागि निर्माताहरूमा तँछाड–मछाड हुने गर्छ ।
कोरोनाको कहर अगाडिका वर्षको कुरा गर्ने हो भने यो समय तीन वा सोभन्दा बढी सङ्ख्याका फिल्म रिलिज हुन्थे । यसरी रिलिज भएका सबै फिल्मले व्यावसायिक नाफा कमाएका थुप्रै उदाहरण छन् फिल्म क्षेत्रमा ।
फिल्म रिलिजका लागि राम्रो मानिएको नयाँ वर्ष नजिकिँदै गर्दा नेपाली फिल्म हल लगभग खाली हुने देखिएको छ । नयाँ वर्षमा राम्रा र नयाँ फिल्म हेर्ने दर्शकको चाहना अधुरै रहने भएको छ ।
हुन त केही दिनअगाडिसम्म नयाँ वर्षका लागि भन्दै ‘लप्पन छप्पन–२’, ‘कृष्णलीला’ र ‘मनसँग मन’ नामका तीन फिल्म आउने तयारीमा थिए । तर, रिलिज मिति नजिकिँदै गर्दा सबै फिल्मले रिलिज स्थगित गरेका छन् ।हुन त पहिले नै अड्किएर राम्रो समय रिलिज हुन कठिन मानिएका फिल्म ‘बेस्ट फ्रेन्ड’ र ‘श्री’ अहिले रिलिज हुने तरखरमा छन् । अन्तिम समयमा यी पनि रिलिज हुन्छन् हुँदैनन् यसै भन्न सकिने अवस्था छैन ।
निर्माताहरूले नयाँ वर्षमा फिल्म रिलिज स्थगित गर्नुको कारण बलिउड, हलिउडमा पनि नयाँ फिल्म रिलिज नहुनु, कोरोनाको कहर र व्यावसायिक कारण भनेका छन् । केही निर्माताले भने फिल्म हल सञ्चालक र सरकारलाई पनि दोष देखाएका छन् ।
नयाँ वर्षका लागि फिल्म के ? यो समय दर्शकले नयाँ फिल्म हेर्न पाउने कि नपाउने ? अहिले सबैको मनमा उब्जिएका प्रश्न हुन् । यिनै प्रश्न हामीले फिल्म क्षेत्रका विभिन्न सङ्घसंस्थाका प्रतिनिधिसँग पनि राखेका थियौँ । उनीहरूको जवाफ जस्ताको त्यस्तै ।

काठमाडौं । अभिनेत्री प्रियंका कार्कीले आफु गर्भवती भएको तस्बिर सार्वजनिक गरेकी छिन् । अभिनेत्री कार्कीले पति आयुष्मान देशराज जोशीसँगै गर्भवती भएको तस्बिर सार्वजनिक गरेकी हुन् । इन्स्टाग्राममा राखिएको तस्विरसँगै अभिनेत्री कार्कीले लेखेकी छिन्, ‘तपाईंहरुले अब सोध्न रोक्न सक्नुहुन्छ, हामी गर्भवती छौं ।’

नेपाली चलचित्रका सफल नायक अनमोल केसी आजबाट २७ बर्षमा प्रवेश गरेका छन् । वि.सं २०५० साल चैत्र १७ गते जन्मिएका अनमोल आज आफ्नो जन्मदिन मनाउँदैछन् । पिता भूवन केसी र आमा सुस्मिता केसीको कोखबाट जन्मिएका अनमोलले चलचित्र ‘होस्टेल’बाट नेपाली चलचित्र क्षेत्रमा नायकको रुपमा डेब्यू गरेका थिए । यसपछि सबैजसो चलचित्रमा सफलता व्यहोर्दै अगाडि बढेका अनमोल नेपाली चलचित्रका सबैभन्दा महंगा नायक समेत हुन् ।
आज जन्मदिनमा खास कार्यक्रम केही पनि नभएको बताउने अनमोल परिवारसँग नै सेलिव्रेशन गर्ने बताउँछन् । अनमोलले जन्मदिनको अवसरमा मन्दिरमा पुगेर पूजा गरेको बताए । आजबाट चलचित्र ‘ए मेरो हजुर ४’को बाँकी छायांकन सुरु हुने सेड्यूल भएपनि मौसमका कारण शुक्रबार सरेको केसीले बताए । उनै, अनमोल केसीसँग जन्मदिनको अवसरमा अनलाइनखबरका लागि ‘विजय आवाज’ले गरेको कुराकानी यसप्रकार छः
१. चलचित्र क्षेत्रमा आएपछि आफ्ना कती सपना पुरा भए जस्तो लाग्छ ?
सपना त मानिसको धेरै हुन्छ । मुख्यकुरा मेरो परिवार नै यही क्षेत्रमा भएका कारणले गर्दा, हामी जे छौं चलचित्र क्षेत्रकै कारणले गर्दा छौं । मुख्यकुरा त दर्शकले दिनुभएको माया नै मुख्य कुरा हो । सपना त हरेक दिन नयाँ नै देख्छु । तर, यो क्षेत्रले जती मलाई दिएको छ, यसबाट म खुशी छु ।
२. नेपाली चलचित्र क्षेत्रले तपाइबाट ठूलो आशा पनि गरेको छ । तपाइलाई भने, नेपाली चलचित्र क्षेत्रलाई कहाँ पुर्याउने लक्ष्य छ ?
कोभिडपछि चलचित्र क्षेत्रलाई पुरानै अवस्थामा फर्काउन मन छ । फेरि दर्शकलाई हलसम्म ल्याउने वातावरण बनाउनुपर्छ । यसका लागि मैले मेरो चलचित्रमा सक्दो मिहिनेत पनि गरेको छु । अर्कोतिर, मलाई बलिउड वा हलिउडमा करिअर खोज्न भन्दा पनि नेपाली चलचित्रलाई मेकिङ र सब–टाइटलको माध्यमबाट विश्वस्तरमा पुर्याउन मन छ ।
३. अनमोलसँग काम गर्न निकै गाह्रो छ भन्छन् नी मेकरहरु ? के तपाई काम गर्न असजिलो नै हो ?
मलाई साइन नगरुन्जेलसम्म मात्र गाह्रो हो । साइन गरेपछि म एकदमै सजिलो छु । चलचित्र साइन गर्दा धेरै कुरा सोचेर काम गर्नुपर्छ । दर्शकको अपेक्षा ममाथि के छ भन्ने पनि मैले वुझ्नपर्छ । त्यहीमाथि अहिलेसम्म, एउटा पनि चलचित्रले कमजोर व्यापार गरेको छैन । यसैले, आफूले जानेको, वुझेको अनुसार म सोचेर मात्र काम गर्छु । यसरी काम गर्दा कतिपयको मन दुख्छ, कतीले इगोको रुपमा लिनुहुन्छ । तर, म त आफ्नो काममा इमान्दार भएको हुँ । धेरै चलचित्र गर्दा फाइदा त मलाई नै हो । यसैले, ममाथि दर्शकले गर्नुभएको भरोसा अनुसार मैले काम गर्नुपर्छ भन्ने सोच हो । यो कुरामा म अडिग नै छु ।
४. के तपाइलाई आफ्नो अडानमा सधै कायम रहन सक्छु जस्तो लाग्छ ?
मेरो बर्षमा एउटा मात्र चलचित्र गर्नुपर्छ भन्ने सोच होइन । राम्रो कथा आयो भने बर्षमा २–३ वटा पनि गर्छु । राम्रो कुर्नुपर्ने अवस्था आयो भने ३ बर्षमा एउटा पनि गर्न सक्छु ।
५. तपाइलाई चलचित्र असफल हुन्छ कि भन्ने डर कती लाग्छ ?
यो त भैहाल्छ नी । चलचित्र एउटा नायकको कारणले मात्र चल्ने होइन । निर्माता, निर्देशक, कलाकार, प्राविधिक, लेखक, सबै टिमको सहकार्यमा नै चलचित्र चल्ने हो । एउटा चलचित्रको उडान सूरु भएपछि त्यसको सुरक्षित ल्यान्डिङको प्रतिक्षा हुन्छ । चलचित्र रिलिज नभएसम्म मलाई डर लाग्छ नै । अघिल्लो चलचित्र भन्दा व्यापार कस्तो हुने हो भन्ने डरले सताउने गर्छ ।
६. पछिल्लो समय, तपाइलाई ७५ लाखमा चलचित्रको अफर आयो भन्ने खबर सार्वजनिक भएको छ ? यसमा कती सत्यता छ ?
यो कुरा सत्य नै हो । मलाई सो चलचित्रको निर्माण टिमले अफर गर्नुभएको छ । तर, अब सबै कुरा मिल्दै गयो भने म उक्त प्रोजेक्टमा हुन पनि सक्छु । तर, अहिलेसम्म चलचित्र साइन गरेको छैन । तर, उक्त प्रोजेक्टमा काम गर्ने संभावना बढी छ ।
७. अनमोल केसीको पारिश्रमिक किन यत्ती महंगो हुँदै गएको हो ?
मैले सुरुको दिनदेखि नै निर्मातालाई मेरो पारिश्रमिक यति हो भनेर माग गरेको छैन । सायद, उहाँहरुले मेरो ब्रान्ड भ्यालू बुझेर आफै अफर गर्नुभएको होला । मैले बोलेको भरमा दिनैपर्छ भन्ने त कही पनि छैन । सबैले आफ्नो डिमाण्ड राख्न त पाइन्छ । तर, डिमाण्डलाई म्याच गर्ने रिजल्ट दिन पनि आवश्यक छ ।
मेरो चलचित्रले सो रिजल्ट दिएकाले पनि मलाई महंगो पारिश्रमिकमा अफर गर्नुभएको होला । सुरुको दिनदेखि मैले पैसा हेरेको छैन । पैसाको पछि भागेको भए त मैले बर्षमा थुप्रै चलचित्रमा काम गर्थेँ होला । म पैसाको पछि भाग्ने मानिस नै परिनँ ।

नेपाली चलचित्रमा सिरिजको लहर धेरै वर्ष पहिलेदेखि सुरु भएको हो । अहिले पनि चलचित्रमा सिरिज निर्माणको क्रम जारी छ । पछिल्लो समय गीतमा पनि चलचित्रकै शैलीमा सिरिजको लहर चलिरहेको छ ।
केही वर्ष पहिलेसम्म चलेको एल्बमको नाममा २–३ थपेर अर्को एल्बम ल्याइन्थ्यो । राजेशपायल राईले ‘दर्शन नमस्ते’ एल्बममा समावेश गीत चलेपछि ‘दर्शन नमस्ते’लाई ब्राण्ड बनाएर ‘दर्शन नमस्ते ४’सम्म ल्याए। अन्य थुप्रै गायक गायिकाले चलेको एल्बमलाई निरन्तरता दिए ।
अहिले भने कुनै एक गीत चल्यो भने त्यही नाममा अर्को गीत बनाउन गायक–गायिका तथा लगानीकर्ताहरूलालायित देखिएका छन् । यसको पछिल्लो उदाहरण हो, ‘माया गरौँला २–ब्रेकअप गरौँला’ ।६ महिना अगाडि सार्वजनिक भएको ‘माया गरौँला’बोलको गीतलाई स्रोता–दर्शकले रुचाएका थिए । सोही गीतको नामलाई ब्राण्ड बनाएर केही दिन अगाडि ‘माया गरौँला २ – ब्रेकअप गरौँला’ सार्वजनिक भयो ।
एक साता अघिमात्रै ‘कमल फूल हिलैमा २’शीर्षकमा गीतको भिडियो युट्युबमा सार्वजनिक भएको छ ।एक वर्षअघि ‘कमल फूल हिलैमा’ शीर्षकमा गीत सार्वजनिक भएको थियो । जुन गीतले सांगीतिक बजारमा चर्चा पाएपछि सोही नाममा ‘कमल फूल हिलैमा २’सार्वजनिक गरिएको हो ।
त्यसअघि ‘पानी पधेँरो २– कुरै बुझ्दैन’ शीर्षकमा गीत सार्वजनिक भएको थियो । सात महिनाअघि ‘पानी पधेँरो’ गीत सार्वजनिक गरिएको थियो । जसलाई स्रोता–दर्शकले रुचाएपछि एक महिना अघिमात्रै त्यही नाममा ‘पानी पधेँरो २– कुरै बुझ्दैन’ गीत सार्वजनिक गरिएको हो ।
कलाकार शिशिर भण्डारी ‘फोटो फिरिममा २’शीर्षकमा नयाँ गीत सार्वजनिक गर्ने तयारीमा छन् । यसअघि ‘फोटो फिरिममा’ गीतको मेल र फिमेल दुवै फर्सनलाई स्रोता–दर्शकले निकै रुचाएका थिए । दुई भर्सनलाई स्रोता दर्शकले रुचाएपछि उनी ‘फोटो फिरिममा २’ सार्वजनिक गर्ने तयारीमा पुगे ।
गीतको सिरिज ल्याउनमा गायक टंक बुढाथोकी अगाडि मानिन्छन् । उनले थुप्रै गीतको सिरिज बनाएका छन् । हाल उनी ‘तोरी तेल लाएर कपाल कालो भो–३’ ल्याउने तयारी गरेका छन् । उनले यसअघि ‘तोरी तेल लाएर कपाल कालो भो’ र ‘तोरी तेल लाएर कपाल कालो भो–२’ ल्याइसकेका थिए ।
त्यस्तै उनले ‘कसरी कसरी’, ‘धन बिनाको मन ठूलो की’ बोलको गीत चलेपछि यसको सिरिज ल्याएका थिए ।  गायिका सुनिता दुलाल ‘बाँसको कप्टेरो–२’गीतको तयारीमा छिन् । डेढ महिना अगाडि सुनिताले ‘बाँसको कप्टेरो’ सार्वजनिक गरेकी थिइन् । गीत औसत चलेको थियो ।
यी पछिल्ला केही उदाहरण भए । त्यसअघि पनि अघिल्लो गीतको नामको पछाडि २–३ थपेर थुप्रै गीतसार्वजनिक भएका छन् । गायक पशुपति शर्माको गीत ‘लुटन सके लुट’ चर्चासँगै विवादमा तानियो । उनले गीत ‘प्राइभेट’ गराए । उनले यसपछि सोही गीतको नाम जोडेर ‘लुटन सके लुट–२ – जता नी चोर’ र ‘लुटन सके लुट ३ – कठै मेरो देश’ सार्वजनिक गरे ।
गायक रमेशराज भट्टराईले ‘बहुला’ शीर्षकमा धेरै सिरिज ल्याइसकेका छन् । प्रकाश सपूतले ‘दोहोरी ब्याटल’को चर्चापछि ‘दोहोरी ब्याटल–२’ ल्याए । त्यस्तै ‘बोल माया’को चर्चापछि त्यसको प्रिक्वेल बनाए, ‘गलबन्दी’ ।
‘माछिले खाने खोलीको लेउ’, ‘को होला त्यो’ ‘कहिले भेट्ने खै’, ‘बीच्च बीच्चमा’ लगायतका गीतको सिरिज बनेका छन् । ‘फुलबुट्टे सारी’ गीतको चर्चापछि यसका अनेक भर्सन निस्किए ।
किन बनिरहेका छन् गीतका सिरिज ?
गीत सिरिज बनाएकाहरूको धारणा भने फरक–फरक छ । कोही ‘ब्राण्ड’का कारण भएको बताउँछन् भने कोही गीत तथा दर्शक–स्रोताको माग भएको बताउँछन् । गायक तथा निर्देशक सरोज वली आफू ‘ब्राण्ड’का कारण सिरिज बनाएको बताउँछन् । ‘त्यो एउटा बाध्यता हो । ब्राण्डले गीत चल्छ कि भन्ने हो’, उनले अनलाइनखबरसँग भने, ‘पहिलोब्राण्डले अर्को गीत चलाउँछ कि भन्ने उद्देश्यले नै हो ।’
गायक टंक बुढाथोकी भने ‘ब्राण्ड’कै कारण सिरिज नल्याएको दाबी गर्छन् । उनले आफ्नो सन्दर्भमा स्रोता–दर्शक तथा गीतको माग रहेको बताउँछन् । उनले भने,‘सिरिज ल्याउँदा पब्लिसिटीमा सजिलो हुन्छ । तर ब्राण्ड बेच्न भन्न मिल्दैन् । मेरो सन्दर्भमा गीत, दर्शक–स्रोताकै माग हो ।’
आफैमाथि विश्वास नभएको हो : डा. कृष्णहरी बराल
गीतको सिरिज ल्याउनुलाई आफैप्रति विश्वासको कमी भएको ठान्छन्, गीतकार डा. कृष्णहरी बराल । आफ्ना नयाँ गीत (सिर्जना)प्रति विश्वासकोकमी हुँदा गीतमा पनि सिरिजको लहर चलेको उनी बताउँछन् । उनले कलाकारहरू नयाँ कुरामा लाग्नुपर्ने बताउँदै एउटा चलेपछि त्यसको पछाडि दौडिनु आफ्नो नयाँ सिर्जनाप्रति विश्वास गर्न नसक्नु रहेको प्रतिक्रिया दिन्छन् ।
‘एउटा गीत चलेपछि त्यहि नाममा अर्को गीत ल्याउनु सांगीतिक विकासका हिसाबले राम्रो हुँदै होइन’, उनी भन्छन् । एउटा चलेपछि अर्को पनि चल्ला भन्ने मोहमा गीतमा सिरिजको लहर चलिरहेको बरालको बुझाइ छ ।

निर्देशक दीपाश्री निरौलाले फागू पूर्णिमा नजिकै आउँदै गर्दा यस सम्बन्धी गीत सार्वजनिक गरेकी छिन् । ‘धनियाँ के होली’ बोलको गीतमा दीपा र सुमित खड्काको स्वर छ । निरज श्रेष्ठको संगीत रहेको यो गीतमा दीप नारायण राजवंशीको शब्द छ ।
सार्वजनिक गीतको भिडियोमा दीपकराज गिरी, दीपाश्री निरौला, केदार प्रसाद घिमिरे, किरण केसी, शिवहरि पौडेल, जयनन्द लामा, रवि डंगोल, अनुराग कुँवर, सुमन गिरीको अभिनय छ । दीपाश्रीकै निर्देशनमा तयार भएको यो भिडियोमा हरि हुमागाँइको छायांकन, विपिन मल्लको सम्पादन, शिशिर खातीको कोरियोग्राफी छ । गीतको भिडियोलाई दर्शकले रुचाएका छन् ।

शनिबार एक कार्यक्रमको आयोजना गर्दै हाँस्य कलाकार तथा निर्देशक दीपाश्री निरौलाले ‘धनियाँ के होली’ बोलको गीत सार्वजनिक गरिन् । यो गीतलाई ‘छक्का पन्जा’ टिमले निर्माण गरेको हो । दीपाश्रीले भिडियोको निर्देशन गरेकी हुन् ।
यो गीतको भिडियोमा ‘छक्का पन्जा’को सिरिजमा देखिने अधिकांश कलाकार देखिएका छन् । तर, कलाकार जितु नेपाल भने देखिएका छैनन् । दीपकराज गिरी, केदार घिमिरे, दीपाश्री निरौलादेखि किरण केसी, रवि डंगोल, शिवहरि पौडेल लगायतका कलाकार गीतको भिडियोमा छन् ।

छक्का पन्जा’ टिम र कलाकार जितु नेपालविच सम्बन्ध विग्रिएको खबर सार्वजनिक भएको केही महिना भयो । जितु आफैले सम्बन्ध विग्रिएको खबरलाई अस्विकार पनि गर्दै आएका थिए । तर, जितु र दीपाश्री विभिन्न कार्यक्रममा एकसाथ देखिएपनि दिपकराज गिरी र जितु भने एकसाथ देखिएका छैनन् । शुक्रबार शुभारम्भ भएको ‘कान्तिपुर सिनेप्लेक्स’को उद्घाटन कार्यक्रममा पनि जितु र दिपकराजविच बोलचाल भएन ।
अब, ‘छक्का पन्जा’ टिमको गीतमा नै जितु नदेखिनुले के कुरा प्रष्ट हुन्छ भने यो टिममा फाटो आइसकेको छ । जितुले संचालन गर्दै आएको ‘मुन्द्रेको कमेडी क्लब’बाट दीपाश्री निरौला बाहिरिएपछि ‘छक्का पन्जा’ टिम र उनीविच सम्बन्ध विग्रिएको हो ।