टुक्का माथि टुक्का- ११०

  • २ मंसिर २०८०, शनिबार २१:०४ मा प्रकाशित
  • काठमाडौँ। साप्ताहिक ‘टुक्का माथि टुक्का’ व्यङ्ग्यात्मक टुक्का लेखनको ११० औँ शृङ्खला सम्पन्न भएको छ ।
    अभ्यासमा नेपाल लगायत विश्वका ५३ जना नेपाली भाषी टुक्काकारहरूको सहभागिता रहेको कार्यक्रम संयोजक/ प्रशिक्षक एवम् टुक्का साहित्य समाजका उपाध्यक्ष वसन्त अनुभवले बताउनुभयो । टुक्का साहित्य समाजको आयोजनामा उक्त शृङ्खला विगत लामो समय देखि नियमित रूपमा सञ्चालन हुँदै आएको छ।

    टुक्का कविताको उन्नयन, विकास र प्रवर्द्धन गर्ने हेतुले समाजले विविध किसिमका कार्यक्रम गर्दै आइरहेको छ । टुक्का लेखनमा पृथकता एवं फरकपन भित्राउने सिलसिला अन्तर्गत यस शृङ्खला सञ्चालन गरिदै आएको समाजका संस्थापक अध्यक्ष, टुक्का प्रवर्तक एवम् कार्यक्रमका परिकल्पनाकार ताराप्रसाद चापागाईंले बताउनुभयो ।

    टुक्का लेखनका लागि एक व्यङ्ग्यात्मक टुक्का राखिने र त्यसैमा आधारित रहेर गहन भावको एक एक टुक्का सहभागीले राख्नुपर्ने संयोजक अनुभवले जनाउनुभयो ।

    ‘टुक्का माथि टुक्का’ व्यङ्ग्यात्मक टुक्का लेखनको ११० औँ शृङ्खलाको लागि प्रतिनिधि टुक्काको रूपमा समाजका उपाध्यक्ष वसन्त अनुभवले समसामयिक विषयमा लेख्नुभएको व्यङ्ग्यात्मक टुक्कालाई राखिएको संयोजक अनुभवले बताउनुभयो ।

    अभ्यासका लागि राखिएको प्रतिनिधि टुक्का

    के भयो त ? ए आरिसे ! थोरै अश्लील बोल्दा,
    ह्वारह्वार्ती नै गिफ्ट झर्थ्यो, भित्री वस्त्र खोल्दा ।

    वसन्त अनुभव
    घोराही, दाङ

    सहभागी टुक्काकारहरूले अभ्यासका क्रममा सृजना गर्नुभएको टुक्काहरू



    १)
    छाडा अश्लील भिडियोमा हुन्छ साह्रै दम,
    तुरुन्तै   भाइरल  बन्छ   हुन्न  भ्यूज  कम ।
    – वसन्त अनुभव
    घोराही उपमहानगरपालिका १४, दाङ

    २)
    छोप्ने अङ्ग चट्ट छोप, ढाक्ने ठाउँ ढाक,
    सभ्य बन्दा गाह्रो हुन्न, टार्नलाई छाक।
    – मन्दिरा सेढाई
    मलेखु,धादिङ

    ३)
    केस सारा लुकाएर चोखिनु छ सधैँभरि,
    सबै पोल खुले हाम्रो टिक्छ सत्ता कसोगरी?
    – रामशरण न्यौपाने, भक्तपुर

    ४)
    जमाना पनि यस्तै भएछ अश्लील चित्र हेर्ने,
    भ्युज सङ्गै गिफ्ट बढ्दा सबैले उसलाई घेर्ने।
    – तोया नाथ चापागाईं
    दमक,झापा,नेपाल

    ५)
    बिचार  गरी  चलाउनु सामाजिक सन्जाल,
    उत्ताउलो बन्न खोजेमा, हुन्छ धेरै जन्जाल।
    – नागेन्द्रप्रसाद यादव , दाङ

    ६)
    अश्लील भिडियो बनाउँछन्, हेर्नेलाई कति मजा,
    बल्ल टिकटक बन्द हुँदा झेल्दैछन् कतिले सजा।
    – कबिताहरी
    सुन्दर हरैंचा नगरपालिका १ मोरङ

    ७)
    अश्लील भिडियो हालेर बहाना पाइने भ्यूज,
    भाइरल त  भइयो तर राम्रो  होला यो न्युज?
    – अर्जुन प्रसाद चौलागाई
    रामेछापः-सुनापति-१
    हालः-अमेरिका,बोस्टन।

    ८)
    अश्लील भिडियो बनाइहाल भ्यूज आउँछ धेरै,
    भाइरल  हुने  बाटो  यही  हो  नभए हेर  मेरै ।
    – अच्युत घिमिरे, सर्पाङ, भुटान🇧🇹

    ९)
    अश्लीलताको त भयो जताततै धेरै कारोबार,
    हमाममा  सबै नाङ्गा  कस्लाई गरौँ  खबरदार ?
    – सुरेशकुमार पाण्डे दाङ घोराही १८

    १०)
    प्रतिभालाई  टिकटकबाट  प्रदर्शन गरी छिटै  भाइरल बन्ने,
    अश्लील अङ्गहरू हेर्न पाए मात्रै यो जमानाकाे मान्छेले आहा भन्ने।
    – राज कुमार राजभण्डारी “खाेटाङ्गे”
    मध्यपुर ठिमी ५संगम काेलाेनी भक्तपुर ।

    ११)
    सभ्य बनौँ शिष्ट बनौँ बनौँ हामी ज्ञानी,
    असभ्य हुँदा बर्बाद हुन्छ जिन्दगानी ।
    – बाबुराम पाण्डे
    अर्घाखाँची

    १२)
    कस्तो विकृति आयो भाइरल हुन शरीर बेच्नु पर्ने,
    उज्यालो छोडी अध्यारोमा अश्लील भिडियोले पैसा झर्ने ।
    – अम्विका अधिकारी
    झापा बिर्तामोड

    १३)
    जमानाले पनि कस्तो कस्तो चलन ल्यायो नि हे शङ्कर  भोला !
    सबैले अश्लील र जङ्गलीपन देखाए समाज कस्तो होला ?
    – सुशीला  शिखा
    काठमाडौं कागेश्वरी

    १४)
    शरीर मेरो, उपहार मलाई; तिम्रो टाउको किन दुखेको?
    मन लागे खोलन तिम्रा कपडा, आरिस गर्दै किन भुकेको?
    – राजेशराज गड्तौला
    कॅाडाघारी, काठमाण्डौ

    १५)
    नग्न तन देखाई अश्लीलता छर्ने,
    भन्दा धेरै दोषी हेरी लाइक गर्ने।
    – बिके मुखिया
    दार्जिलिङ भारत।

    १६)
    मैले अङ्ग देखाउँदा खै उसलाई गाह्रो पर्‍यो,
    सातो गयो सरकारको, टिकटक बन्द गर्‍यो !
    – विवश पारदर्शी
    झापा

    १७)
    अरूले छोटा लाउँदा संस्कृति बिग्रियो भन्छौ,
    फेरि अघि सरी किन विकृतिको बाटो खन्छौ ?
    – अनुग्रह राना मगर ‘पुष्प’
    पाँचखपन नपा – ६ संखुवासभा ।

    १८)
    अश्लील  टिकटक  बनाउँने  दियाै अधिकार,
    माेजमस्तीमा रमेकाको कसरी पो होला पार ?
    – जी.वि.चिन्तन घाेराही-१४ दाङ

    १९)
    गुम्सिएका कुण्ठा पाेख्न टिकटक लाइभ जाने,
    विकृतिले सिमा नाघ्याे अङ्ग देखाई मागी खाने ।
    – ताराप्रसाद चापागाईँ
    धुनिबेसी

    २०)
    छोप्ने अङ्ग  छोप्नुनै पर्छ सभ्य  बन्ने गर,
    सभ्यता हुँदा गाह्रो हुन्न छाक टार्न तर ।
    – बेदु न्यौपाने काठमाडौँ ✍️🇳🇵

    २१)
    मर्यादाको  पालन  गरे, सबैलाई नै राम्रो हुन्छ,
    स्वाभिमान ओझेल पर्दा, देख्नेको मन कति रुन्छ।
    – सञ्जना शर्मा

    २२)
    आउँदै थियोे बुढ्यौँलीमा जवानीको रङ्ग,
    अब कसले हेर्ला नि! चाउरिएका अङ्ग ?
    – होम प्रसाद नेउपाने
    धरान,सुनसरी ।

    २३)
    किन आरिस गर्छौ, अर्काले कमाउदा?
    हाँसखेल   गर्दै   साथीभाइ  रमाउदा ।
    – बुद्धिमान दनुवार ( सुरुङ्गेली कान्छो )
    कनकाई ४ झापा

    २४)
    आओ हेर भनी भनी गोप्य अङ्ग देखाएका थिए,
    गोप्य अङ्ग  भङ्ग गरेर नै  जिन्दगीमा मस्ती लिए ।
    – समुद्र
    जल्जला ७ गण्डकी

    २५)
    अश्लीलता बाटो रोज्नेहरू हुन् गतिछाडा र घाँडा
    कुसन्देश  दिनेलाई  भनिनेछ   समाजका  काँडा ।
    – प्रेम थापा “मन”बागलुङ

    २६)
    खुशी भएकी छु  टिकटक मरेकाेमा,
    मागी खाने मान्छेहरू पछि परेकाेमा।
    – सविता पाण्डे

    २७)
    हेर्नेकै चाहनामा देखाउँदै सम्पत्ति आर्जन हुन्छ भने हाँसेर,
    प्रदर्शनबाटै नाम र दाम कमाउने थलाे  हुँदैनथ्यो  मासेर ।
    – रामप्रसाद पुरी, बादेल, खाेटाङ ।

    २८)
    अश्लील तस्वीर पाेस्ट्याएर लाइक कमेन्ट हेर्ने,
    असभ्यताकाे बिल्ला भिरी कस्ताे कामुक स्वाद फेर्ने ?
    – त्रिलाेचन भण्डारी
    मेचीनगर, झापा

    २९)
    चालीस कटेपछि मेरो, जवानी आउँदै थियो,
    कुन पापीको आँखा लाग्यो, टिकटक खोसी दियो।
    – एवाइ प्रभात

    ३०)
    विकृतिले सीमा नाघ्दा टिकटक पनि बन्द भयो,
    विकृतिको व्यापार गरी कमाउनेको धन्दै गयो ।
    – ध्रुव श्रेष्ठ
    खोटाङ, हाल काठमाडौँ ।

    ३१)
    सहिद   घोषणा   टिकटकको   नै हुने  भयो,
    सारा नेपाली दुखी छन् खुसी जति सबै गयो ।
    – कार्की डिबी माकुम
    सुनवल -४, नवलपरासी

    ३२)
    टिकटक बन्द भयो,  नत खति नत क्षति,
    टिकटकले बिगार्दैथ्यो मान्छेको बरु मति ।
    – चिरञ्जीवी श्रेष्ठ
    धनकुटा ।

    ३३)
    जवानी  सबैलाई  आउँछ  नाङ्गो तन  नदेखाउनू,
    मौका अवसर आउँछ उच्छृङ्खलता नलेखाउनू ।
    – चुडामणी देवकोटा
    चनपा १३ काठमाडौ
    हाल सिमरा बारा

    ३४)
    गाेप्य  अङ्ग  प्रदर्शन  गरी  नपर दङ्ग,
    कदापि हजुर मान्न सकिन्न सभ्य ढङ्ग ।
    – प्रद्युम्न चालिसे ,
    भक्तपुर कटुञ्जे।

    ३५)
    कति  बेला  के देखाउँछन्  हुदैनथ्यो टुङ्गो,
    देख्नासाथ उफ्रिहाल्थ्यो भए नि पातेबुङ्गो l
    – बाबुराम गौतम, गुल्मी

    ३६)
    अनुशासित  सभ्य भई  बोल्ने गर  नानी,
    इज्जतसँग पैसा साट्ने आजै छोड बानी ।
    – पुष्पा सुवेदी
    नेपालगञ्ज, बाँके ।

    ३७)
    गर्न त गर   मानव   अति   साह्रो नगर,
    अश्लील शब्द व्यवहारले खल्ती नभर।
    – शोभा आचार्य गौतम
    काठमाडौँ

    ३८)
    देखाउँदा  अश्लीलता  गडगडाहट ताली आउँथ्यो,
    देखाउनेको लाजभन्दा नि हेर्नेलाई लाज लाउथ्यो।
    – यामनाथ आचार्य🇳🇵
    पर्वत

    ३९)
    झुठो बाेल्दैन भन्छन् सत्य देखाउँछ ऐेनाले,
    केही दिन पख खुलिहाल्छ भन्नुभा’छ बाले ।
    – दिनेश कोइराला

    ४०)
    कहिले कोही देखिए हेर सबैमा त्यो बाधा,
    आखिरी किन मानिसलाई बनाए लौ आधा ।
    – आर्त अकुलीन

    ४१)
    अर्को आउँछ  हेरिराख  एउटा टिकटक गए,
    सबै पाप नै सफा चट्ट हुन्छ साथमा धन भए !
    – इन्दिरा देवकोटा

    ४२)
    राम्रा कुरा समेट्नु है सामाजिक सञ्जाल भित्र,
    लाज पचाउन थालेपछि यस्तै हुन्छ बिचित्र।
    – पुष्पा राई, खोटाङ।

    ४३)
    जवानीमा लगाम लगाऊ हैन सोझालाई मोस्ने,
    टिकटक हटाई  नागरिकको हक किन खोस्ने ?
    – इन्दु श्रेष्ठ

    ४४)
    दुरूपयोग   गर्नुहुन्न   पाएँ   भनी   ठाउँ,
    मर्यादालाई बुझ्नसके पो चम्किन्छ नाउँ ।
    – पद्मा काश्यप पाण्डे, मोरङ

    ४५)
    विकृति छाडी संस्कृति पनि हेर,
    टिकटके   मनलाई  आजै  फेर ।
    – नन्दलाल आचार्य
    सिद्धार्थटोल, उदयपुर ।

    ४६)
    तस्बीरहरू अश्लील राख्दा अति भाइरल हुने ठान्यौ,
    इज्जतको सवाल छैन हराएको पो आज बल्ल जान्यौ ।
    – जमुना आचार्य सिन्धुपाल्चोक

    ४७)
    छोटामोटा कुरा गरी  समय नफालौँ,
    टिकटक बिर्सेँ आगोमा घिउ नहालौँ ।
    – लक्ष्मी रिजाल, कञ्चनरूप-१२, रूपनगर, सप्तरी

    ४८)
    गिफ्ट पाए जानीजानी खुस्काउने बस्त्र,
    आजभोलि ङिच्च परे मुस्काउने अस्त्र ।
    – निरज कोइराला, इटहरी

    ४९)
    भुइँकाे टिप्न खोज्दा गाेजीकाे पाेखिन्छ,
    बिचार   नगरेमा     पाइला    राेकिन्छ ।
    – रबि पाैडेल,दक्षिण भारत पाण्डेचरि ।

    ५०)
    लाज नै पचाएर देखायौ गोप्य अङ्ग,
    मजाले चलेको टिकटक भयो भङ्ग ।
    – बिके माकजू ,भक्तपुर ।

    ५१)
    देखाउँछु  खोलेर अङ्ग छैन डराउनु,
    लुकीलुकी हेर्नेहरूले किन कराउनु ?
    – प्रदीप के रिमाल

    ५२)
    आफ्नो नाङ्गो शरीर देखाई पैसा तान्नुपर्ने,
    टिकटक नै बन्द भयो अब कसो पो गर्ने ?
    – सरिता सेढाई, धादिङ

    ५३)
    उम्लिएकाे जवानीको रङ्ग,
    टिकटकमा देखाए अङ्ग ।
    -सहयात्री शाेभा अर्याल
    बुटवल , रुपन्देही

    Leave a Reply