रियाद साउदीअरब । स्वास्थ्य विमा र ईकामा नभई स्वास्थ्य उपचार नपाईएका नेपाली श्रमिकलाई लक्षित एक दिने निःशुल्क स्वास्थ्य शिविर सम्पन्न भएको छ। साउदीअरबको पूर्वीय प्रान्तको औद्योगिक क्षेत्र जुबैल स्थित गल्फ एसियन मेडिकल सेन्टरमा गैर आवासीय नेपाली संघ राष्ट्रीय समन्वय परिषद साउदीले कार्यक्रमको आयोजना गरेको थियो।
उक्त सिविर बाट १ सय ५१ जना नेपाली श्रमिकहरूले स्वास्थ्य परिक्षण तथा औषधिउपचारको सेवा प्राप्त गरेका छन्। सेवा ग्राहीले उक्त निःशुल्क स्वास्थ्य सिविर बाट रक्तचाप, मधुमेह, यूरिक एसिड, मृगौला सम्बन्धी र कलेजो सम्बन्धीत प्रयोगशाला परिक्षण गराएका थिए ।
कार्यक्रममा स्वास्थ्य सेवाको साथै उपस्थित श्रमिकहरूलाई स्वास्थ्य सम्बन्धी सचेत पनि गराएको थियो। गल्फ एसियन मेडिकल सेन्टरका MBBS DNB डा. सैयद अश्फकले स्वस्थ रही एलोपैथिक औषधीय उपचार बाट टाढा रहँदै स्वस्थ रहने तरिका बारे जानकारी दिएका थिए भने उक्त कार्यक्रममा नेपाली दूतावास रियादको प्रतिनिधित्व गर्दै पूर्वी क्षेत्र दम्मामका लागी जन सम्पर्क अधिकारी नारायण पासवानको उपस्थिति रहेको थियो।
त्यसै गरी उक्त सिविरमा स्वयंसेवकको भूमिकामा एनआरएनए आईसीसी मध्यपूर्व सहसंयोजक राजेन्द्र अर्याल, एनआरएनए साउदीका संस्थापक सदस्य तथा संरक्षक राजु सैयद, एनआरएनए आईसीसी सदस्य तेज बहादुर थापा, याशमिन वैगम,एनआरएनए एनसीसी साउदीका अध्यक्ष डमर यादव, उपाध्यक्ष रबिना अर्याल, सल्लाहकार रामदूलार मण्डल लगातका पदाधिकारीहरू, हेल्प मधेशका तर्फ बाट कासिन्द्र पासमान लगायतका पदाधिकारीहरू, तमुधी साउदीअरबका अध्यक्ष खेम गुरूङ्को उपस्थिति रहेको थियो ।
