‘टुक्का माथि टुक्का’ व्यङ्ग्यात्मक टुक्का लेखन अभ्यास शृङ्खलाको तेस्रो भाग शनिबार सम्पन्न

काठमाडौ, २३ असोज । ‘टुक्का माथि टुक्का’ व्यङ्ग्यात्मक टुक्का लेखन अभ्यास शृङ्खलाको तेस्रो भाग शनिबार सम्पन्न भएको छ । अभ्यासमा ४७ जना टुक्काकारहरूले सहभागिता जनाउनुभएको थियो । टुक्का साहित्य समाजको आयोजनामा उक्त अभ्यास शृङ्खला सञ्चालनमा ल्याइएको हो ।

टुक्का कविताको उन्नयन, विकास र प्रवर्द्धन गर्ने हेतुले समाजले विविध किसिमका कार्यक्रम गर्दै आएको छ । टुक्का लेखन अभ्यासमा पृथक एवं फरकपन भित्राउने सिलसिला उक्त शृङ्खला सञ्चालनमा ल्याइएको समाजका अध्यक्ष एवं कार्यक्रमका परिकल्पनाकार ताराप्रसाद चापागाईंले बताउनुभयो ।

उक्त व्यङ्ग्यात्मक टुक्का लेखन अभ्यास शृङ्खलाको संयोजकमा समाजका सक्रिय टुक्काकार वसन्त अनुभव रहनुभएको छ । अभ्यासका लागि एक व्यङ्ग्यात्मक टुक्का सञ्चालकका तर्फबाट राखिने र त्यसैमा आधारित रहेर गहन भावको एक एक टुक्का सहभागीले राख्नुपर्ने संयोजक अनुभवले जनाउनुभयो । उहाँका अनुसार उक्त अभ्यास शृङ्खला साप्ताहिक रूपमा सञ्चालन गरिने छ ।

‘टुक्का माथि टुक्का’ व्यङ्ग्यात्मक टुक्का लेखन शृङ्खलाको तेस्रो भागको अभ्यास लागि समाजकी सचिव एवं वरिष्ठ टुक्काकार विमुन्स पौडेलले हुलाक दिवसका सन्दर्भमा लेख्नुभएको व्यङ्ग्यात्मक टुक्कालाई राखिएको थियो ।

अभ्यासका लागि राखिएको टुक्का

के खसाल्यो बाकसभित्र झिल्के मोरोले
गोप्य पत्र खोल्यो झ्याप्पै मेरो छोरोले।

सहभागी टुक्काकारहरूले अभ्यासका क्रममा सृजना गर्नुभएको टुक्काहरू

१
लोग्ने विदेश काखमा छोरो झिल्केसँग लाग्दा,
वित्यास पार्यो बुढेसकालमा जवानी जाग्दा ।
✍️
वसन्त अनुभव
घोराही उपमहानगरपालिका १४, दाङ ।

२
उमेर भर्खर नौ,दश भयो छोरो झिल्केको,
हातमा कागज बोकेर कता होला मिल्केको।
✍️ पुर्णबहादुर श्रेष्ठ “हृदयङकृत”
पनौती,३काभ्रे

३
घरमा आफ्नाे हुँदाहुँदै बाहिर खाेज्नुपर्ने,
गतिछाडा मनुष्यलाई कस्ले अब के गर्ने ?
✍️ ताराप्रसाद चापागाईं, धुनिबेशी

४
आमाको नाममा आएको पत्र छोरोले खोलेछ,
परदेशी बुवाको पत्र हो आमालाई पोलेछ।
✍️ म्यामराज राई, भोजपुर हाल जापान

५
नलेख्न भनेको झिल्केलाई पटक्कै लेख्न छाडेन प्रेमपत्र!
बाउ छोराले उठिबास लगाए भने फेरि पर्छु अलपत्र!
✍️प्रमोद भट्टराई ‘प्रतीक’
कौशलटार, भक्तपुर

६
चिठ्ठी पत्र बोकेर आयो हुलाकी,
बिहे गर्छु भन्नेले कत्ति झुलाकी।
✍️होम प्रसाद नेउपाने
धरान,सुनसरी

७
हुलाक आफै खबर बनेको छ,हराएर,
उल्टै उसलाई खोज्नुपर्छ,आज कराएर।
✍️चिरञ्जीवी ढकाल
ने ग उ म न पा-२०, राँझा एयरपोर्ट बाँके

८
मेरो लागि प्रेमपत्र हुनसक्छ सासुआमा,
बाकसमा नयाँ कपडा अनि चिटिक्क जामा।
✍️कल्पना थामी
सिन्धुपाल्चोक

९
कलियुगमा छोरीभन्दा आमा दामी हुनेरैछन् ,
लगाएका लुगाहरुले घुँडा मात्रै छुनेरैछन् ।
✍️गंगा खड्का
बूढानीलकण्ठ काठमाडौँ

१०
कस्तो तीर चलायो नजरले मुटुको भित्ता भित्तामा पोल्दैछ,
आवरण भित्रको पर्दा खुलेर जाँदा नौटंकी आफै खोल्दैछ।
✍️ शरद प्रधानाङ्ग
विराटनगर-७

११
आफ्नै दिलको मान्छेलाई गोप्य पत्र लेखेको
पठाएको प्रेम उसकै बुढीले झ्याप्पै देखेको
✍️ तारा घिमिरे संखुवासभा

१२
श्रीराम बनेर ति आज गोप्य चिट्ठी खसाले
पतिले परदेशदेखि नै दिलमा बसाले ।
✍️इन्दिरा देवकोटा
कपिलवस्तु न .पा .३

१३
हुलाकीको फुरफुर गर्ने त्यो जमाना गयो,
इन्टरनेट आजको संचार माध्यम भयो।
✍️बिके मुखिया
दार्जीलिङ,भारत।

१४
चिठ्ठी खोली हेर्दा मेरो भाग्य खुली गयो,
मन्त्री बन्ने सपना त्यो बल्ल पूरा भयो।
✍️घनश्याम पौडेल, सृजना चोक
पोखरा

१५
उनकाे मेराे मन मिल्याे , हुन्थ्याे है भेट लुकिचाेरी ,
एक दिन भेटे उनका बाउले बाँधिदिए डाेरी ।
✍️प्रद्युम्न चालिसे, भक्तपुर

१६
इन्टरनेटको जमानामा कहाँबाट आयो पत्र?
सित्तैमा भेटे कलियुगीले खाने रैछ अलकत्र।
✍️अरुण कुमार भुजेल
गोरूबथान,कालेबुङ्ग।

१७
छोडेर गयो हुलाकी दाइले दुई पत्रे कागज खामको,
आएको रहेछ मेरै घरबाट चिट्ठी परदेशी नामको।
✍️बादल गुरुङ वियोगी
संखुवासभा, हाल काठमाडौं

१८
ओहो ! छोरो मोरोले के हरि बिजोक बनायो
पत्रभित्र पक्कै धक्का दिने चीज पो जनायो ।
✍️ इश्वरी अधिकारी, लमजुङ

१९
ओझेल भए चिठीपत्र आधुनिकताको छाया,
भङ्गालिएको छ विश्वास अलपत्र भए माया।
✍️बी.कुलुङ, दार्जिलिङ

२०
अब पत्र लेख्न बानी हरायो
मोबाइलले यो सबै गरायो ।
✍️ नीमा छिरिङ्ग भोटिया
जलढक्का/ कालेबुङ

२१
खुसी र हर्ष चिठ्ठीमा पठाए लेखेर ,
आम्मै ऊ त मुर्छा परेछ फोटो देखेर ।
✍️कान्छी बिनिता विश्वकर्मा
बुढिगंगा नगरपालिका ९बाजुरा

२२
खतम भयो बर्बाद भयो लौन पेटै पोल्यो
बाउको नामको प्रेमपत्र छोराले पो खोल्यो !
✍️मन्दिरा सेढाई
मलेखु, धादिङ

२३
जाम छन् हुलाक ईन्टरनेटले बुझाएन तिम्रो सुर,
दिलको पत्र सिधै हातमा थमाइपाऊँन ए हजुर !
✍️धनु शर्मा, पाेखरा

२४
घाँटी हेरेर हाड निल भन्छे, हैन! दशैमा हड्डि खानु की मासु?
सितनसम्म खान नदिने तिम्री छोरी अब फिर्ता लैजाउ सासू।
✍️अबजस चन्द्र, झापा

२५
चिठी थियोे मायालुकाे भाषा थियाे आसकाे ,
छाेराे आयाे खाेलिदियाे सङ्कट् पर्याे बासकाे ।
✍️ रामकृष्ण दवाडी, पोखरा

२६
लभलेटर बक्समा खसालेथेँ च्यान्टी मोरीलाई,
झुक्किएर पर्न गएछ लौन नी तिम्रो छोरीलाई।

✍️लक्ष्मी श्रेष्ठ
बिर्तामोड झापा

२७
त्यो प्रेमपत्र बुबाको थियो,
आम्मै छोरालाई कस्ले दियो?
✍️जगत थापा बझाङ्ग

२८
आफ्नैहरू बिच दोहोरो चरित्र,
बुढेसकालमा बाहिर न भित्र।

✍️ गृष्मा पौड्याल
टोकियो जापान ।

२९
रगतले पत्र लेख्दा हात काटेर पनि दुखेन,
पठाएँ मेरो प्यार हुलाकमार्फत अझैँ पुगेन।
✍️ लक्ष्मण समिर, भुरिगाउँ बर्दिया।
हाल: काठमाडौं।

३०
दिल भित्रको राजालाई चिट्ठी लेखि हुलाकमा पठायोको थिइ जोइले ,
बिचैमा हुलाकको डाकबाट बक्स खोलेर पत्र हेर्यो अर्कैको पोइले ।
✍️ बेदु न्यौपाने, काठमाडौ

३१
कस्तो पत्र रहेछ हुलाकीलाई नदिइ राख्यौ बाकसमा,
सुटुक्क पढ्दा छाेराले डरायौं त्यतिविधि करुण रसमा ।
✍️रिना योल्मो, दार्जीलिङ

३२
मनै नहुँदा नहुँदै पनि मलाई पठाएर पेमपत्र,
निष्ठुरी मान्छे रहेछ बैमानी लगेर पार्याे नि अलपत्र।
✍️सहयात्री शाेभा अर्याल
रुपन्देही १४ बुटवल

३३
चिठ्ठी आएको देख्दा लागेको थियो उमङ्ग,
पढ्दा छोरोले लाजले भए मत झसङ्ग ।
✍️ सरस्वती श्रेष्ठ इटहरी

३४
बुढेसकालमा प्रेम बस्यो गोप्य पत्र लेखे,
गोप्य पत्र लुकाउदा बाउ छोराले नै देखे।
✍️ दुर्गा आचार्य, मोरङ

३५
राम्री देखायो नजर बसायो लेपले
वृद्धवृद्धा नै तरुनो बनायो एपले ।
✍️रिजाल विनोद
मोरङ

३६
प्रेमपत्र लेख्याथ्यो बुढेसकालमा,
पक्राउ पर्यो त्यै पनि पर्यो जालमा ।
✍️विवश पारदर्शी
झापा भद्रपुर -२

३७
पहिलो त छोरोले पत्र पढेर निकै हसायो,
तिम्रो याद गाढा बनेर आयो नयन रसायो ।
✍️ नीमा छिरिङ्ग भोटिया
जलढक्का /कालेबुङ

३८
दिलभित्रको राजालाई पत्र लेखेको
लुकाएर पठाउँदा छोराले देखेको ।
✍️ दुर्गा भट्टराई, मोरङ

३९
बुढेसकालमा फोन मेसेज पराइसँग सत्र,
खुच्चिङ्ग पर्यो पाप करायो छोरोको हातमा पत्र ।
✍️ मिसु श्रेष्ठ
काँडाघारी , काठमाडौं

४०
जाल,झेल,छल, कपट गर्नेको कमि छैन हेर्नुस् प्रिय जन,
गरेर खाएको पनि डाहा ईर्ष्या गर्दछन् बुझ्नुस् सम्पुर्ण मन ।।
✍️रिता खराल,रुपन्देही

४१
पत्र लेखी बहिनीले दाजुको हात पर्यो,
हाम्रो अनौठो पिरतीले लौन यो के गर्यो ।
✍️ अनिल खग्रास, पर्वत

४२
पसिना बगेको छ त्यो अजनबी सहरमा,
बाध्य उहीँ परिस्थिति उहीँ डुल्ने रहरमा ।
✍️ नवीन जोशी, कैलाली

४३
मैले चिठी पठाएकी बाटैमा खै कता हरायाे?
माेबाइल , कम्प्युटरले हातमै भेट गरायाे ।
✍️ लक्ष्मी घिमिरे दहाल
दमक, झापा

४४
पत्र खसाल्ने झिल्के साच्चै रहेछ हरामी
छोरा अघि पत्र फाली गरेछ बदनामी ।
✍️ पुष्पासायरा, बिराटनगर ।

४५
खामभित्रको चिट्ठी मेरै थियो होला भन्ने,
मेरो नि सोच मात्रै रह्यो म उसको बन्ने ।
✍️अभागी सिन्धुली

४६
हिजो चिठी पठाउने हुलाक थियो समाधान,
आज इमेलले गर्यो त्यसलाई नै व्यवधान ।
✍️भगवती दवाडी, झापा

४७
लेख्याथिएँ गोप्य कुरा हामी प्रेम गरौँ भनी
थाहाभयो लौरो खाइयो ढाडमा गनि गनि ।
✍️राजेशराज गड्तौला
रतुवामाई- १०, मोरङ हाल- प्रवास

:::::: जय टुक्का साहित्य :::::