साउन २५, रियाद (साउदी अरब) । साउदी अरबको सरकारी तेल कम्पनी साउदी अराम्कोको मुनाफा बढेर करीब चार गुणामा पुगेको छ ।
विश्व बजारमा तेलको माग सुध्रिएसँगै मूल्य बढ्दा कम्पनीको मुनाफा आकाशिएको हो । कोभिड–१९ का कारण लगाइएको प्रतिबन्ध खुकुलो पारिएको, खोप कार्यक्रम अगाडि बढेको, स्टिमुलस उपायहरु अपनाइएको र आर्थिक गतिविधि सुचारु हुन थालेको अवस्थाले कम्पनीको मुनाफा बढाउन टेवा दिएको कम्पनीले बताएको छ ।
यो वर्ष शुरु भएयता कच्चा तेलको भाउ ३० प्रतिशतभन्दा धेरैले बढेको छ । यस वर्षको बाँकी अवधिको प्रदर्शन प्रति कम्पनीका प्रमुख कार्यकारीले सकारात्मक मूल्यांकन गरेका छन् । यस वर्षको दोस्रो त्रैमासमा कम्पनीले २५ अर्ब ५० करोड डलर खुद मुनाफा कमाएको छ । यो गत वर्षको सोही अवधिको तुलनामा २८८ प्रतिशत धेरै हो ।
यसले विश्वभर ऊर्जाको मागमा आएको सुदृढ पुनःबहाली उजागर गरेको कम्पनीका सीईओ आमिन नासेरले एक विज्ञप्तिमा भनेका छन् ।एक्जोन मोबिल, रोयल डच शेल लगायत अन्इ ठूला कम्पनीको मुनाफामा पनि उच्च वृद्धि भएको तथ्यांक सार्वजनिक भएका थिए । एजेन्सी