प्राविधिक शिक्षा, तालीम, स्वरोजगार र रोजगारीका अवसरको प्रवर्द्धन गरिने
काठमाडौं । प्राविधिक शिक्षा तथा व्यावसायिक तालीम परिषद् (सीटीईभीटी)ले बुधवारदेखि जनसचेतना अभियान शुरू गरेको छ । देशमा प्राविधिक तथा व्यावसायिक शिक्षा एवम् तालीम र स्वरोजगार एवम् रोजगारीका अवसरको प्रवर्द्धन गर्न अभियान शुरू गरिएको हो । ‘शीप हुन्छ हातमा रोजगारी साथमा’ नाराका साथ शुरू गरिएको अभियानअन्तर्गत विद्यार्थी, प्रशिक्षार्थी, समुदाय, उद्योग तथा वाणिज्यको क्षेत्रलाई केन्द्रित गरी प्राविधिक तथा व्यावसायिक शिक्षा एवम् तालीमको महत्त्वबारे प्रचारप्रसार गरिनेछ ।
प्राविधिक तथा व्यावसायिक शिक्षा एवम् तालीमको सम्बन्धमा जनचेतना अभिवृद्धि गर्न, सम्बन्धित उद्यमी र प्राविधिक तथा व्यावसायिक शिक्षा तालीमबीचको सम्बन्ध बलियो बनाउन सीटीईभीटीको संस्थागत रणनीतिअनुसार यो अभियान सञ्चालन गरिएको बताइएको छ । बीपी मेमोरियल पोलिटेक्निकल इन्स्टिच्युट, धनुषा (निर्माण व्यवसाय), पोखरा टेक्निकल स्कूल (पर्यटन) र टीकापुर पोलिटेक्निकल इन्स्टिच्युट, कैलाली (कृषि)मा यो अभियान सञ्चालन हुँदैछ ।
अभियानबाट प्राप्त सिकाइलाई अन्य शिक्षालयमा लागू गरिने सीटीईभीटीले बताएको छ । आजको आवश्यकता उत्पादनमुखी प्राविधिक शिक्षा भएकोले अभियानका रूपमा सञ्चालन गरिएको सीटीईभीटीका सदस्यसचिव पुष्परमण वाग्लेले बताए ।
जनसचेतना अभियानमार्फत विद्यालयहरूमा विद्यार्थीलाई भविष्यका बारेमा मार्गनिर्देशन, विभिन्न उद्योगमा विद्यार्थीहरूको अध्ययन भ्रमण, स्थानीय उद्योग वाणिज्य महासंघको सहकार्यमा रोजगार मेला, सामुदायिक अभियान र लक्षित समूहका युवा, उनीहरूका परिवारका सदस्य तथा अभिभावकलाई प्राविधिक तथा व्यावसायिक शिक्षा एवम् तालीमका लाभबारे सूचना प्रवाह गरिनेछ ।
यस्तै प्राविधिक तथा व्यावसायिक शिक्षा एवम् तालीम र रोजगारका बीचमा सेतुका रूपमा उक्त अभियानले सरकारी तथा निजीक्षेत्रका रोजगारदाता, नीति निर्मातालगायत सरोकारवालाको साझा मञ्च सृजना गर्ने आयोजकको लक्ष्य छ । प्राविधिक तथा व्यावसायिक शिक्षा एवम् तालीम प्रवर्द्धक रोजागारदाताले सहकार्य गर्ने साझा मञ्च उक्त अभियान भएको नेपाल उद्योग वाणिज्य महासंघका कार्यकारी सदस्य एवं रोजगारदाता काउन्सिलका उपाध्यक्ष भरत आचार्यले बताए ।
काठमाडौंमा शुरुआत गरिएको यो अभियान माघ २६ गते जनकपुर, माघ २९ गते पोखरा र फागुन ४ गते टिकापुरमा शुरू गरिने सीटीईभीटीले जानकारी दिएको छ । अभियानडेली बाट