काठमाडौं । हुन्डाई ग्रान्ड आई १० नेपालको लागि नयाँ नाम होइन । वार्षिक ८ सयदेखि हजार यूनिटसम्म बिक्री हुँदै आएको छ । अब भारतीय बजारमा ग्रान्ड आई १० को नयाँ मोडल सार्वजनिक भइसकेको छ ।
कम्पनीले ग्रान्ड आई १० नियोस गत अगस्टमा बजारमा ल्याएको भएपनि यसलाई नेपाली बजारमा ल्याउन यसको आधिकारीक बिक्रेता लक्ष्मी इन्टरकन्टिनेन्टल्सले ढिला गरिरहेको छ । यसो गर्नुको मुख्य कारण यसमा रहेको इन्जिन बताइएकाे छ ।
हुन्डाईले आफ्नो नयाँ मोडल नियोसमा बीएस ६ इन्जिनको प्रयोग गरेको छ । उक्त इन्जिनमा लाग्ने मापदण्ड अनुसारको इन्धन नेपालमा आउन सुरु नभएकाले यसलाई तत्काल नेपाल नल्याएको जनाएको छ ।
नेपाल आयल निगमले आगामी चैत १९ गतेबाट बीएस ६ मापदण्डको इन्धन ल्याउने जनाएसँगै नयाँ वर्ष २०७७ मा ग्रान्ड आई १० नियोस नेपाल आउने छ । यस्तोमा उक्त मोडलमा रहेका केही महत्वपूर्ण फिचरहरु यस प्रकार रहेका छन् ।
एक्सटेरियर
ग्रान्ड आई १० को एक्सटेरियरलाई स्पोर्टी र फन्की लुक्स दिएर नियोस तयार गरिएको छ । नयाँ कारमा १५ इन्चको अलोय ह्वील लगाइएको छ भने पछाडि नयाँ बम्पर दिइएको छ ।
रिडिजाइन इन्टर्गेटेड एलइडी डिआरएलएस, एलइडी फग ल्याम्प, स्लिकर डिजाइन, नयाँ हेडल्याम्प, क्यासकेडिंग ग्रिल जस्ता परिवर्तन नयाँ नियोसमा पाउन सकिन्छ । यसमा दिइएको मेसिन कट अलोय ह्वील, सार्पर हेडलाइट र न्यू टेलाइटले कारलाई निकै आकर्षक बनाएको छ ।
इन्टेरियर
प्रिमियम फिचर समेटिएको कारमा इन्स्ट्रुमेन्ट कन्सोल, इन्फोटेनमेन्ट सिस्टम, स्टेयरिंग ह्वीललाई नयाँ स्वरुप दिइएको छ । ड्याश बोर्डको बीच भागमा राखिएको इन्फोटेनमेन्ट सिस्टमले एप्पल कारप्ले र एन्ड्रोइड अटो सपोर्ट गर्नेछ ।
कम्पनीले हुन्डाई भेन्यूमा दिइएको कनेक्टेड कार टेक्नोलोजी यसमा पनि प्रयोग गरेको छ । कारमा ८ इन्च टचस्क्रिन इन्फोटेनमेन्ट रहेको छ । साथै, अटोमेटिक क्लाइमेट कन्ट्रोल, यूएसबी चार्जर, रियर एसी भेन्ट, कुल्ड ग्लोबबक्स, रियर पार्किङ क्यामरा लगायतका फिचर उपलब्ध रहेका छन् यसको लम्बाई ३८०५ एमएम, चौडाई १६८० एमएम, उचाई १५२० एमएम रहेको छ । २४५० एमएम ह्वीलवेश भएको यो कार पुरानो मोडल भन्दा ४० एमएम लामो, २० एमएम फराकिलो रहेको छ । यसको ह्वीलवेश समेत रेगुलर मोडलको २५ एमएम लामो रहेको छ ।
इन्जिन
ग्रान्ड आई १० नियोसमा १.२ लिटर कप्पा इन्जिन दिइएको छ । यसले ८३ बीएच पावर उत्पादन गर्छ भने इन्जिनमा ५ स्पीड म्यानुअल ट्रान्समिसनको साथै अटोमेटिक ट्रान्समिसन उपलब्ध रहेको छ । यस्तै, यसमा उपलब्ध यु टु १.२ लिटर सिआरडिआई डिजेल इन्जिनले ७२ पीएस पावर प्रदान गर्छ ।
प्रतिस्पर्धी मोडल
यसले फिचर तथा मूल्यका आधारमा मारुती सुजुकी स्विफ्टसँग सिधा प्रतिस्पर्धा गर्नेछ ।
भेरियन्ट र कलर
नयाँ इरा र आस्टा भेरियन्ट बाहेक नियोस यसको रेगुलर मोडलकै भेरियन्टमा उपलब्ध हुदै आएको छ । नियोस बिभिन्न ६ कलर अप्सनमा उपलब्ध रहेको छ ।
माइलेज
पेट्रोल भेरियन्ट अन्तर्गत पाँच स्पीड म्यानुअल ट्रान्समिसन युक्त मोडलले प्रतिलिटर २०.७ किलोटिर माइलेज दिने एआरएआईले प्रमाणित गरेको छ । साथै, पाँच स्पीड एएमटी भेरियन्टले प्रतिलिटर २०.५ किलोमिटर माइलेज दिने दाबी कम्पनीले गरेको छ ।
त्यस्तै, दुबै ट्रान्समिसनमा उपलब्ध डिजेल भेरियन्टले प्रतिलिटर २६.२ किलोमिटर माइलेज दिने एआरएआईले प्रमाणित गरेको छ ।