पहिलो शृङ्खला भाग १ (एक) मा छजना स्रष्टाको पञ्चाङ्ग ।
‘टुक्का माथि टुक्का’ व्यङ्ग्यात्मक टुक्का लेखनको ६२औँ शृङ्खला शनिबार सम्पन्न
काठमाडौ, १७ कार्तिक। साप्ताहिक ‘टुक्का माथि टुक्का’ व्यङ्ग्यात्मक टुक्का लेखनको ६२ औँ शृङ्खला मङ्सिर १७ गते शनिबार सम्पन्न भएको थियो।
अभ्यासमा नेपाल लगायत विश्वका ४२ जना नेपाली भाषी टुक्काकारहरूको सहभागिता रहेको कार्यक्रम संयोजक/ प्रशिक्षक एवम् टुक्का साहित्य समाजका उपाध्यक्ष वसन्त अनुभवले बताउनुभयो । टुक्का साहित्य समाजको आयोजनामा उक्त शृङ्खला विगत लामो समय देखि नियमित रूपमा सञ्चालन हुँदै आएको छ।
टुक्का कविताको उन्नयन, विकास र प्रवर्द्धन गर्ने हेतुले समाजले विविध किसिमका कार्यक्रम गर्दै आइरहेको छ । टुक्का लेखनमा पृथकता एवं फरकपन भित्राउने सिलसिला अन्तर्गत यस शृङ्खला सञ्चालन गरिदै आएको समाजका संस्थापक अध्यक्ष, टुक्का प्रवर्तक एवम् कार्यक्रमका परिकल्पनाकार ताराप्रसाद चापागाईंले बताउनुभयो ।
टुक्का लेखनका लागि एक व्यङ्ग्यात्मक टुक्का राखिने र त्यसैमा आधारित रहेर गहन भावको एक एक टुक्का सहभागीले राख्नुपर्ने संयोजक अनुभवले जनाउनुभयो ।
‘टुक्का माथि टुक्का’ व्यङ्ग्यात्मक टुक्का लेखनको ६२ औँ शृङ्खलाको लागि समाजका उपाध्यक्ष वसन्त अनुभवले समसामयिक विषयमा लेख्नुभएको व्यङ्ग्यात्मक टुक्कालाई राखिएको संयोजक अनुभवले बताउनुभयो ।
अभ्यासका लागि राखिएको प्रतिनिधि टुक्का
डाक्टर इन्जिनियर छोराछोरी, लन्डनमा छन् दासी,
महल छन् खास दुई चारवटा, म त सुकुमबासी ।
✍️वसन्त अनुभव
सहभागी टुक्काकारहरूले अभ्यासका क्रममा सृजना गर्नुभएको टुक्काहरू
[१]
राजधानीको मुटुको बस्ती, छोड्नुहुन्न खास,
झुत्रा झात्री बेरौँ आङमा, नहुन्जेल निकास ।
🌑वसन्त अनुभव
घोराही, दाङ
[२]
नगर है हेँला भनेर हामीलाई काठमाण्डौँको सुकुम्वासी,
घर हेर हाम्रो तिम्राभन्दा राम्रो, बनाउँला तिमीलाई दासी !
🌑पवन कुमार बुढाथेाकी
[३]
डाक्टर इन्जिनियर छोराछोरी अरूनै छन् दासी,
गाडी एउटा तीनवटा भवन म त सुकुम्वासी।
🌑बेदु न्यौपाने
काठमाडौ
[४]
बाध्यता वा कहरले, गाउँ छोडेर आइयो सहर,
छ यो मनमा सुकुम्वासी हुकुमवासी हुने रहर।
🌑होम प्रसाद नेउपाने
धरान,सुनसरी ।
[५]
सुनका सिक्री गलामा औँलामा औँठी गाँसी,
घर घडेरी चिल्ला गाडी, म त सुकुम्वासी ।
🌑मन्जु जोशी
डिलासैनि बैतडी
[६]
धन्न पार्टीको सदस्यता मगाएँ,
र, सुकुमवासीमा नाम सजाएँ।
🌑म्यामराज राई
हतुवागढी- ६,भोजपुर
[७]
सबले ठगे सुकुमवासी भै देशलाई पर्याे भार,
नक्कलीकै चलखेल ज्यादा सक्कलीलाई भयाे मार ।
🌑ताराप्रसाद चापागाईँ
धुनिबेसी
[८]
सुकुम्वासी भन्दै भित्रभित्रै चलखेल,
कति गर्न जान्या राजनीति तालमेल ।
🌑अनुग्रह राना मगर ‘पुष्प’
पाँचखपन नपा – ६ संखुवासभा
[९]
हातमा छ आइफोन घाँटीमा छ ठूलो सिक्री,
सुकुम्वासी हामीहरू हामीलाई के को फिक्री ।
🌑सरिता सेढाई
धादिङ
[१०]
सुख दु:ख गर्दै आइयो काठमाण्डौको माटोमाथि ।
सुकुमवासी बन्यो अचेल के गर्नु नि अरू साथी ।
🌑सुशान्त सुनिता
[११]
सुकुमवासी सधैँलाई त हुँदैन होला,
सरकार नियम नबनाई भयो भोला।
🌑सुरेशकुमार पान्डे
[१२]
छोराछोरी अमेरिका अष्ट्रेलिया गएका छन् काममा,
यहाँ हामी सबै आन्दोलित छौँ सुकुम्वासीको नाममा ।
🌑डम्बर थामी ‘अनुपम’
कालिन्चोक गा.पा.-६, दोलखा ।
[१३]
म त गाउँले धनी आएँ शहरमा , लालपूर्जा लुकाएर
सुकुम्वासी बनी मौका छोपी अझ कुर्लिन्छु घोक्रो सुकाएर ।
🌑प्रेम थापा “मन”
[१४]
तीन तले घर छ, एक बिघा जमिन, म हुँ सुकुम्वासी,
नक्कली सुकुम्वासी, भएको छ देशमा डन हुकुम्वासी।
🌑एवाइ प्रभात
धनकुटा हाल मोरङ
[१५]
टाटा सुमो गाडी टहरा अगाडि भएका सुकुमवासी,
छत नभएर खाडीमा बेचिने हामी चैँ महल वासी ।
🌑राजेशरज गड्तौला
रतुवामाई- १०, मोरङ
हाल- प्रवास
[१६]
सुकुम्वासीको अर्थ गयो अब मासी,
जो सुखसँग बस्छ उहीँ सुकुम्वासी ।
🌑पुष्पा सुवेदी
[१७]
छोराछोरी अष्ट्रेलिया कोही छन् जापान टोकियो,
सच्चा सुकुम्वासी भइयो असली बिल्ला बोकियो!
🌑ईमानसिंह के.सि.
ब्यास ९,तनहुँ हाल ठूलो भर्यागं,नागार्जुन-२
[१८]
हुन्छन् भव्य निवास बस्न जसका कङ्गाल सोही हुने ।
कस्तो तुच्छ स्वभाव वा नियम हो जानिन्न केही मुने ।।
(शार्दूलविक्रीडित छन्दमा)
🌑चूडा निर्भीक
[१९]
अँध्यारोमा लुकिछिपी धन्दा गर्ने गर्छु देश मासी,
गाडी महल छन् तर पनि बनेको छु सुकुम्वासी ।
🌑बाबुराम गौतम
गुल्मी
[२०]
धनी सम्पन्न भएपनि ट्याग लागेको छ सुकुम्वासीको,
कसरी हटाउने हो यो ट्याग आदेश छ हुकुम्वासीको।
🌑दीपक ठटाल जलन
खरसाङ
[२१]
सुकुम्वासीको छोराछोरी डाक्टर इन्जिनियर हुनु गलगाँडो,
घर घडेरी र सुनको सिक्री नै भयो उनिहरूकै लागि घाँडो ।
🌑रबि श्रेष्ठ
सन्धिखर्क-१, अर्घाखाँची,
हाल : बुटवल, रुपन्देही, नेपाल !
[२२]
लालपुर्जा छन् कोही कसैको, भन्छन् म हुँ सुकुम्वासी,
सरकारी जग्गा हडप्न खोज्छन्, देखिन्छन् हुकुम्वासी।
🌑कबिताहरी
सुन्दर हरैंचा नगरपालिका १ मोरङ
[२३]
देशको सुरक्षा गर्दा पनि न घर छ न ठहर छ मेरो ,
सरकारमा बस्नेले भन्छ फेरि के हो नागरिकता तेरो ?
🌑राजेन्द्र प्रधान ‘पासा,’
दार्जिलिङ, भारत ।
[२४]
विदेश जान्न काम गर्छु यै माटो माथि,
आमा बुवा कति रोए बुझ सबै साथी !
🌑आर्त अकुलीन
कैलाली
[२५]
हुने खाने धनीमानी गर्छन् नाटक सुकुम्वासी,
लाज सरम पचाएर भर्छन् पनि रुवाबासी ।
🌑त्रिलोचन भण्डारी
मेचीनगर, झापा
[२६]
म त सुकुम्वासी पो हुँ छैन गाँस कपास,
चारतले घर भए नि ! जान्छु वनवास ।
🌑रचना मोक्तान “यात्री”
नमोबुद्ध न. पा. – ५, काभ्रे ।
[२७]
भन्छन् सुकुमवासी हाै घर घडेरी, सुविधा सम्पन्न छ साथमा,
छाेरा र छाेरी डाक्टर छन् विदेशमा सार्वजनिक जग्गा हातमा ।
🌑शाेभा अाचार्य गाैतम
काठमाडौ
[२८]
होलान् कति सक्कली, कति नक्कली सुकुमवासी,
गाउँ छोडेर शहर बस्ने, होलान् हुकुमवासी !
🌑बिबस पारदर्शी
भद्रपुर झापा,
[२९]
हातमा बाला घाँटीमा सिक्री, सुकुमवासी नेता,
देशद्रोही, ठग, दलालका महल राता सेता।
🌑नवशिला
बेलबारी-२,लालभित्ती,मोरङ।
[३०]
सुकुम्वासी बन्न छोराछोरी हुनेपर्ने डाक्टर इन्जिनियर गाडी,
हातमा आइफोन गलामा सिक्री लगाए सजिलो हुन्छ रातो साडी ।
🌑बुद्धिमान दनुवार
सुरुङ्गा ४ झापा
[३१]
महल छन् सहरमा, बस्छु झुपडीमा हाँसी,
राज्यले दया गरी भन्छ अहो! सुकुमवासी।
🌑खग्रास
[३२]
लालाबाला साना हुँदा चारैतिर सम्पत्तिको रवाफ र हर्ष,
डाक्टर इन्जिनियर सन्तान भएका सुकुम्वासी वर्षौवर्ष ।
🌑अम्विका अधिकारी
झापा विर्तामोड
[३३]
पैदल हिड्न लाज लागेर गाडी किने टक्क,
सित्तैमा पाए सुकुम्वासी हुँ तिमी किन बक्क ?
🌑निरज कोइराला
बेलका १ उदयपुर, हाल इटहरी
[३४]
ठूलाे रूखकाे ओत लागेस् भन्नुहुन्थ्याे सदैव बाले ,
झण्डा बाेकी भएको छु सुकुम्वासी म दलकाे भाले ।
🌑प्रद्युम्न चालिसे
कटुञ्जे भक्तपुर ।
[३५]
मस्तिमा छन्, बदनाम गरिरा’छन् केही हुकुम्वासीहरू,
पीडा र अभाव झेलिरहेका छन् खास सुकुम्वासीहरू ।
🌑मित्र `उराठी´ गाैतम
अमरपुर,गुल्मी हाल तिलाेत्तमा न पा-२,रुपन्देही
[३६]
छोराछोरी जर्मनी र अस्ट्रेलियामा नै छन् हेर मेरा,
सित्तैमा करोडौँको जग्गा हडप्छु कसले खोज्छ डेरा ?
🌑अस्मिता सापकोटा
भरतपुर ४,चितवन
[३७]
सन्तान जति विदेशी भए आशा राखी रेमिन्ट्यासको,
बुढेसकालमा एक्लै हुन्छन् भर छैन पक्कै अबको।
🌑अर्जुन प्रसाद चौलागाई
रामेछाप:-सुनापति-१
हाल:-अमेरिका,बोस्टन।
[३८]
आखिर वास्तविकता नदेखाई लालपुर्जा लुकाएर,
स्वघोषित सुकुमवासी कराउँदैछन् घोक्रो सुकाएर।
🌑अच्युत घिमिरे
भुटान बाट 🇧🇹
[३९]
छोरा छोरी मोज गर्छन्, युरोपका बासी,
आफू सुकुम्वासी भन्छन्, पजेरोमा हाँसी।
🌑अजयकुमार झा
जलेश्वर, महोत्तरी
[४०]
बस्तीका सुकुम्वासीको नाम लिँदै भवन ठड्याएर ,
आन्दोलन रोइकराई कृत्रिम गरिबी अड्याएर ।
🌑जमुना आचार्य
सिन्धुपाल्चोक
[४१]
भाेट बैंक, भर्ती केन्द्र बनाउन कार्यकर्ता आफैँ म हुकुम्वासी,
काठमाण्डौँकाे घडेरीकाे दाम सुन्दा हुनुपर्ने सबै सुकुम्वासी ।
🌑रामप्रसाद पुरी
बादेल,खाेटाङ ।
[४२]
हुकुमवासी सुकुम्वासी बन्छ शक्ति हुँदा,
कसको मन पोलेको छ? सुकुम्वासी रुँदा
🌑गोपे दाजु
पाँचथर
