कपिलवस्तु ,माघ ०८
कपिलवस्तु जिल्लामै सबैभन्दा बढी मतदाता रहेको प्रतिनिधिसभा निर्वाचन क्षेत्र नम्बर १ मा यसपटक चुनावी माहोल तातिएको छ । एक लाख ४७ हजार ६५९ मतदाता रहेको यो क्षेत्र जिल्लाकै निर्णायक मानिँदै आएको छ, जहाँ हरेक चुनावमा राजनीतिक समीकरणले फरक मोड लिने गरेको छ ।
यस निर्वाचन क्षेत्रमा कांग्रेसबाट अतहर कमाल मुसलमान, एमालेबाट विश्राम चौधरी, नेपाल कम्युनिस्ट पार्टीबाट कृष्णबहादुर कुवर, राष्ट्रिय स्वतन्त्र पार्टीबाट मोहन आचार्य, जनमत पार्टीबाट नरेन्द्र प्रसाद चौधरी तथा स्वतन्त्र उम्मेदवार आशिष शर्मा चुनावी मैदानमा उत्रिएका छन् । पुराना अनुभवी नेता र नयाँ अनुहारबीचको प्रतिस्पर्धाले चुनावी रस्साकस्सी थप चर्किएको छ।
उम्मेदवारहरूले आ–आफ्ना एजेन्डा बोकेर घरदैलो, टोलभेटघाट र आमसभामार्फत मतदातासँग प्रत्यक्ष संवाद गर्दै आएका छन् । विकास, रोजगारी, शिक्षा, स्वास्थ्य, कृषि तथा सिँचाइजस्ता मुद्दालाई केन्द्रमा राख्दै उनीहरूले आफ्नो पक्षमा मत मागिरहेका छन् । केही उम्मेदवारले अधुरा पूर्वाधार सम्पन्न गर्ने प्रतिबद्धता जनाएका छन् भने केहीले सुशासन, पारदर्शिता र वैकल्पिक राजनीतिको नारा अघि सारेका छन् ।
गत निर्वाचनमा यही क्षेत्रबाट एमाले नेता बलराम अधिकारीले भारी मतान्तरसहित विजय हासिल गरेका थिए । त्यसैले यसपटक पनि एमालेले आफ्नो पकड जोगाउने प्रयास गरिरहेको देखिन्छ । अर्कोतर्फ कांग्रेसले संविधान सभा सदस्यसमेत रहिसकेका अतहर कमाल मुसलमानलाई अघि सार्दै क्षेत्र फिर्ता ल्याउने रणनीति बनाएको छ ।
नयाँ दल र स्वतन्त्र उम्मेदवारको सक्रियताले परम्परागत दलमाथि दबाब बढेको छ । मतदातासामु विकल्प बढ्दा अन्तिम निर्णय कसको पक्षमा जान्छ भन्ने विषयले चुनावी चासो अझ बढाएको छ । अन्ततः उम्मेदवारका एजेन्डा, संगठनको शक्ति र मतदातासँगको पहुँचले कपिलवस्तु–१ को नतिजा तय गर्ने देखिन्छ ।
