कपिलवस्तु ,माघ ०८
कपिलवस्तु जिल्लामै सबैभन्दा बढी मतदाता रहेको प्रतिनिधिसभा निर्वाचन क्षेत्र नम्बर १ मा यसपटकको चुनाव असाध्यै रोचक र जटिल बन्दै गएको छ । राजनीतिक दल र स्वतन्त्र गरी कुल ३४ जनाले उम्मेदवारी दर्ता गराएपछि यो क्षेत्र जिल्लाकै सबैभन्दा भीडभाड भएको चुनावी मैदान बनेको छ । एक लाख ४७ हजार ६५९ मतदाता रहेको यो क्षेत्रमा हरेक मतको मूल्य निर्णायक मानिएको छ ।
मुख्य दलका प्रभावशाली उम्मेदवारसँगै साना दल र स्वतन्त्र उम्मेदवारको बाक्लो उपस्थितिले मत विभाजनको सम्भावना बढाएको छ । यही कारण ठूला दलहरू संगठन मजबुत बनाउन र परम्परागत मतदाता जोगाउन आक्रामक प्रचारमा उत्रिएका छन् । गाउँ–गाउँ, टोल–टोलमा हुने भेटघाट, घरदैलो अभियान र साना आमसभाले क्षेत्रको राजनीतिक तापक्रम दिनानुदिन बढाइरहेको छ ।
उम्मेदवारहरूले विकास, रोजगारी, शिक्षा, स्वास्थ्य, कृषि, सिँचाइ तथा सडक पूर्वाधारलाई मुख्य एजेन्डा बनाउँदै मतदातासँग भोटको अपिल गर्दै आएका छन् । केही उम्मेदवारले विगतमा पूरा नभएका योजनालाई स्मरण गराउँदै यसपटक अवसर दिन आग्रह गरिरहेका छन् भने केहीले पुरानो राजनीतिक अभ्यासको आलोचना गर्दै ‘परिवर्तन’ र ‘नयाँ सोच’को नारा अघि सारेका छन् ।
यस क्षेत्रमा विगतमा देखिएको दलगत मतबाहेक व्यक्तिगत प्रभाव, स्थानीय समीकरण र जातीय–सामुदायिक सम्बन्धले पनि चुनावी नतिजामा भूमिका खेल्ने गरेको छ । त्यसमाथि स्वतन्त्र उम्मेदवारको संख्या धेरै हुँदा अन्तिम परिणाम अनुमान गर्न गाह्रो बन्दै गएको छ ।
गत निर्वाचनमा एमाले नेता बलराम अधिकारीले भारी मतान्तरसहित जित हासिल गरेकाले यसपटक पनि एमाले आफ्नो पुरानो आधार जोगाउने रणनीतिमा देखिन्छ । अर्कोतर्फ कांग्रेससहित अन्य दलहरू भने यही क्षेत्रलाई प्रतिष्ठाको लडाइँका रूपमा लिँदै जित हात पार्ने दाउमा छन् ।
कुल मिलाएर, कपिलवस्तु निर्वाचन क्षेत्र नम्बर १ को चुनाव यसपटक केवल उम्मेदवार र दलको प्रतिस्पर्धा मात्र नभई मतदाताको चेतना, असन्तुष्टि र अपेक्षाको परीक्षा बनेको छ । अन्ततः मतदाताले कसलाई विश्वास गर्छन् भन्ने कुराले मात्र होइन, कति मत कसरी विभाजित हुन्छ भन्ने तथ्यले पनि नतिजा तय गर्ने देखिन्छ ।