अवैध रूपमा बाहिरी देशमा लैजान लागिएको साउदी रियालसहित २ जना पक्राउ परेका छन्।
एयर अरेवियाको उडानद्वारा काठमाडौंबाट सर्जाह जान लागेका तनहुँ जिल्लाको भिमाद नगरपालिका-२ का २६ वर्षीय मानबहादुर थापा र रौतहटको राजपुर-६ का ३० वर्षीय शेख फैयाजलाई पक्राउ गरिएको हो।
थापाको पाइन्टको खल्तीबाट ५०० दरको ५० थान साउदी रियाल अर्थात २५ हजार र फैयाजको पाइन्टको खल्तीबाट ५०० दरको १०० थान अर्थात ५०हजार रियाल सहित पक्राउ गरिएको प्रहरीले जनाएको छ।
त्रिभुवन अन्तर्राष्ट्रिय विमानस्थलको अन्तर्राष्ट्रिय उडानतर्फको प्रस्थान ह्याण्ड ब्यागेज चेकिङ एरियामा शरीर जाँच गर्दा लुकाएर बाहिरी देशमा लैजान लागेको अवस्थामा शनिबार पक्राउ गरिएको र आइतबार अनुसन्धानको लागि राजस्व अनुसन्धान विभागमा बुझाइएको प्रहरीलको भनाइ छ।