साहित्यकार म्यामराज राईको पहिलो लघुकथा संग्रह ‘हाम्रो बाटो’ माथि शनिबार विमर्श कार्यक्रम सम्पन्न भएको छ । कार्यक्रमको आयोजना भने हतुवागढी सार्वजनिक पुस्तकालय तथा इश्वरमान राई प्रतिष्ठानले गरेको थियोे ।
लघुकथाकार राईकै गृह क्षेत्र भोजपुरको हतुवागढी-१ सगरमाथा माविको सभाहलमा कार्यक्रमको आयोजना गरी ‘हाम्रो बाटो’ लघुकथा संग्रहमाथि साहित्यिक विमर्श गरिएको हो ।
उक्त साहित्यिक विमर्श कार्यक्रमको अध्यक्षता हतुवागढी सार्वजानिक पुस्तकालय तथा ईश्वरमान राई प्रतिष्ठानका अध्यक्ष इन्द्र थापाले गर्नुभएको थियो भने हतुवागढी गाउँपालिकाका अध्यक्ष प्रेम कुमार राईको प्रमुख आतिथ्यता एवम् भूतपूर्व सांसद तथा भूतपूर्व राष्ट्रपतिका आर्थिक सल्लाहकार धनहर्क राईको विशिष्ट आतिथ्यता रहेको थियो।
कार्यक्रममा हतुवागढी गा.पा.उपाध्यक्ष सुनिता किराँती, वडाध्यक्षद्वय सुरेशकुमार राई र मोहन राई, अग्रज कवि एवं उपन्यासकार चन्द्र राई ‘तारा’, पात्लेपानी कला साहित्य प्रतिष्ठानका संस्थापक अध्यक्ष एवं गजलकार विश्वजित चाम्लिङ लगायत २५ जना बढी अतिथिहरूको सहभागीता रहेको थियो ।
कार्यक्रममा आफ्नो मन्तव्य राख्दै प्रमुख अतिथि प्रेम कुमार राईले कृतिकार म्यामराज राईको प्रशंसा गर्दै उहाँको कृति हाम्रो बाटोले समाजको यथार्थ चित्रण गरेको बताउनुभयो।
लघुकथाकार म्यामराज राईको हाम्रो बाटो लघुकथा संग्रह प्रकाशनले हतुवागढीमा नयाँ उमङ्ग ल्याउनुका साथै साहित्य लेखन र पठन संस्कृतिको विकासमा ईट्टा थप्ने काम गरेको आयोजकले जनाएको छ ।
कार्यक्रममा अन्तरक्रिया गरी लघुकथा संग्रहका विविध पाटो बारे छलफल तथा टिप्पणी गरिएको थियोे । गजलकार एलबि प्रधानको सहजीकरणमा सञ्चालित अन्तरक्रिया कार्यक्रममा कवि तथा साहित्यिक पत्रकार प्रकाश दिप्साली, अध्यापक प्रकाश बान्तावा र अध्यापक मञ्जु नेपाल सहभागी हुनुभएको थियो ।
साहित्यकार म्यामराज राईले साहित्यिक यात्रामा तय गरेको बाटो
भोजपुर जिल्लाको हतुवागढी गाउँपालिका वडा नं. ६ होम्ताङमा जन्मिएका म्यामराज राई एक कुशल साहित्यकार हुन् । उनले साहित्यका विविध विधामा कलम चलाउने गर्दछन्। लघुकथा, कथा, गीत, गजल, कविता लेख्न विशेष रुचि राख्ने राई हाल वैदेशिक रोजगारको क्रममा जापानमा रहेका छन्। जापानमा रहेर पनि उनले नेपाली भाषा र साहित्यको विकासमा अतुलनीय योगदान दिदै आएका छन् ।
औपचारिक शिक्षा अन्तर्गत स्नातक तहसम्मको अध्ययन पूरा गरेका राई आदिवासी जनजाती लेखक/साहित्यकार महासंघ, जापान शाखाका सचिव, नमस्ते आधुनिक लघुकथा मञ्चका प्रशासक/सदस्य रहेका छन् । आठ वर्ष अघि जापान पुगेका उनी अध्ययन र रोजगारका क्रममा उतै बस्दै आएका छन्।
निरन्तर साहित्यको सेवा लागेका राई साहित्य पोष्ट साप्ताहिक लघुकथा प्रतियोगिता २०७८ को पच्चिसौँ हप्तामा उत्कृष्ट तीनमा पर्न सफल भई पुरस्कृत भएका थिए। साथै उनी लघुकथा समाज, प्रदेश एकले आयोजना गरेको लघुकथा प्रतियोगिता, २०७८ मा द्वितीय र प्रथम बृहत् ऐतिहासिक टुक्का प्रतियोगिता, २०७८ मा प्रथम बनेर पुरस्कृत हुन पुगेका थिए ।
लघुकथा लेखनमा बलियो छाप बनाएका राईले खिम्दुङ राई कल्याणकारी समाज, भोजपुर(२०७८) बाट प्रशंसा पत्र, लघुकथा श्रव्य दृश्य प्रतिष्ठान (२०७८) बाट उत्कृष्ट लघुकथाकारको सम्मानका साथै नमस्ते आधुनिक लघुकथा मञ्च (२०७८) र हाम्रो लघुकथा पाठशाला(२०७८) को वार्षिकोत्सवको अवसरमा सम्मान पत्र प्राप्त गरेका छन्।
कृतिका हिसाबले हाम्रो बाटो लघुकथा संग्रह उनको पहिलो कृति बन्न पुगेको छ । यद्यपि उनका थुप्रै अन्य कृतिहरू प्रकाशनका संघारमा छन् । उनले वि.सं. २०६२ सालमा ‘आशिर्वाद’ शीर्षकमा लघुकथा लेखेर लघुकथाको श्री गणेश गरेका थिए । उनको म्यानेजर शीर्षकको लघुकथा २०७५ सालमा हतुवाहेराल्ड अनलाइनमा प्रकाशित भएको थियो ।