कपिलवस्तु, माघ १४
कपिलवस्तु प्रहरीले भारतबाट भन्सार छली चोरी निकासी गरी अवैध रूपमा नेपाल भित्र्याइएका साढे १७ लाख रुपैयाँभन्दा बढी मूल्यका फलफूल तथा सवारी साधन बरामद गरेको छ ।
जिल्ला प्रहरी कार्यालय कपिलवस्तुका अनुसार इलाका प्रहरी कार्यालय कृष्णनगरबाट खटिएको प्रहरी टोलीले सवारी साधन चेकजाँच गर्ने क्रममा भारतबाट नेपालतर्फ आउँदै गरेको लु ३ च १११७ नम्बरको पिकअप नियन्त्रणमा लिएको हो ।
पिकअप जाँच गर्दा भारतबाट भन्सार छली चोरी निकासी गरी अवैध रूपमा भित्र्याइएका ११३५ केजी फलफूल केरा, जुनार र अनार फेला परेको प्रहरीले जनाएको छ । बरामद फलफूलको बजार मूल्य १ लाख ४ हजार ८ सय रुपैयाँ रहेको छ भने पिकअपको मूल्य १५ लाख रुपैयाँ आँकलन गरिएको छ ।
बरामद गरिएका फलफूल र सवारी साधनको कुल मूल्य १६ लाख ४ हजार ८ सय रुपैयाँ रहेको प्रहरीले जनाएको छ । उक्त पिकअप दाङ राप्ती गाउँपालिका वडा नम्बर–०१ निवासी २५ वर्षीय मोहम्मद अकरमले चलाइरहेका थिए । घटनासम्बन्धी आवश्यक प्रक्रिया पूरा गरी पिकअप र फलफूलसहित संलग्न व्यक्तिलाई कृष्णनगर भन्सार कार्यालय पठाइएको जिल्ला प्रहरी कार्यालय कपिलवस्तुले जनाएको छ ।
यसै क्रममा भारतबाट भन्सार छली अवैध रूपमा नेपाल भित्र्याइँदै गरेका फलफूल फ्याँकेर फरार भएका व्यक्तिहरूले छाडेका १ लाख ९ हजार ३ सय रुपैयाँ मूल्य बराबरका केरा, जुनार र अंगुर समेत प्रहरीले बरामद गरेको छ ।
बरामद गरिएका फलफूललाई आवश्यक कारबाहीका लागि कृष्णनगर भन्सार कार्यालय पठाइएको जानकारी जिल्ला प्रहरी कार्यालय कपिलवस्तुका सूचना अधिकारी रिपेन्द्र कुमार सिंहले दिएका छन् ।
