कपिलवस्तु ,पुष ०७
कपिलवस्तु जिल्ला प्रतिनिधि सभा सदस्य निर्वाचन क्षेत्र नम्बर १ बाट नेपाली कांग्रेसका उम्मेदवार अतहर कमाल मुसलमानले आगामी फागुन २१ गते हुने प्रतिनिधि सभा निर्वाचनलाई देशको भविष्य निर्धारण गर्ने महत्वपूर्ण अवसरका रूपमा चित्रण गर्दै मतदातासँग समर्थनको अपिल गरेका छन् ।
मतदातालाई सम्बोधन गर्दै उनले देश अहिले ऐतिहासिक मोडमा उभिएको उल्लेख गर्दै लोकतन्त्रलाई अझ सबल, जनउत्तरदायी र परिणाममुखी बनाउने जिम्मेवारी आम नागरिकको काँधमा आएको बताए । उनले प्रतिनिधि सभा निर्वाचन केवल सत्ता प्रतिस्पर्धा मात्र नभई देशको दिशा र जनताको भविष्य निर्धारण गर्ने निर्णायक अवसर भएको धारणा व्यक्त गरे ।
नेपाली कांग्रेसले लोकतान्त्रिक मूल्य, समावेशिता, सामाजिक न्याय र जनताको सर्वोच्चतालाई केन्द्रमा राख्दै समयअनुसार आफूलाई परिमार्जन गर्दै आएको दाबी गर्दै उनले परिवर्तनलाई नेतृत्व गर्ने र चुनौतीलाई अवसरमा बदल्ने पार्टी नेपाली कांग्रेस रहेको बताए ।
कपिलवस्तु क्षेत्र नम्बर १ लाई अपार सम्भावनाको भूमि भएको उल्लेख गर्दै उनले यहाँका उर्वर कृषि भूमि, परिश्रमी किसान, सिर्जनशील युवा, सांस्कृतिक विविधता र सामाजिक सद्भाव नै विकासको आधार भएको बताए । ती सम्भावनालाई व्यवहारिक विकासमा रूपान्तरण गर्न इमानदार नेतृत्व र दृढ इच्छाशक्ति आवश्यक रहेको उनको भनाइ छ ।
उनले शिक्षा र स्वास्थ्य सेवामा सर्वसुलभ पहुँच सुनिश्चित गर्ने, युवालाई रोजगारी र उद्यमशीलतासँग जोड्ने, कृषि आधुनिकीकरण गर्ने, पूर्वाधार विकासलाई तीव्रता दिने तथा सुशासनमार्फत जनताको विश्वास मजबुत बनाउने प्रतिबद्धता जनाए ।
नेपाली कांग्रेसको तर्फबाट कपिलवस्तु क्षेत्र नम्बर १ मा उम्मेदवारी दिएका मुसलमानले आफू पदको आकांक्षाभन्दा पनि स्थानीय जनताको समस्या, पीडा र चाहनालाई संसदसम्म पुर्याउने साझा अभियानका रूपमा निर्वाचनलाई लिएको बताए ।
उनले मतदाताको विश्वास, साथ र समर्थनले मात्र कपिलवस्तु क्षेत्र नम्बर १ लाई विकास, समृद्धि र सम्मानको नयाँ उचाइमा पुर्याउन सकिने भन्दै लोकतन्त्र, विकास र समृद्धिको पक्षमा एकजुट हुन सबैसँग आग्रह गरेका छन् ।