कपिलवस्तु, पुष ७
कपिलवस्तु निर्वाचन क्षेत्र नम्बर १ का प्रतिनिधि सभा सदस्य उम्मेदवार तथा नेपाली कांग्रेसका नेता अतहर कमाल मुसलमानले निर्वाचन सुशासनको आधार भएको र लोकतन्त्रको वास्तविक शक्ति जनतामा निहित रहेको बताएका छन् ।
नेता मुसलमानले आफू ठूलो नभई देश र जनता नै ठूलो भएको उल्लेख गर्दै आज उठिरहेका जनआवाजहरूलाई गम्भीर रूपमा आत्मसात् गरी आत्मसमीक्षा गर्दै अघि बढ्ने समय आएको बताए । उनले सत्य, इमानदारी र निष्ठालाई आफ्नो राजनीतिक यात्राको मूल आधार बनाएको उल्लेख गरे ।
यसअघि संविधान सभा सदस्य रहँदा आफूले यस क्षेत्रका लागि उल्लेखनीय काम गरेको र त्यसपछि लिडो संस्था मार्फत पनि क्षेत्रका जनताको हरेक सुख–दुःखमा उभिएर निरन्तर सेवा गर्दै आएको उनले बताए । आफ्ना राजनीतिक मूल्य–मान्यता, नैतिक अडान तथा पार्टीका साथीहरू र आम मतदाताबाट प्राप्त माया, भरोसा र विश्वासकै बलमा यसपटक प्रतिनिधि सभा सदस्य निर्वाचनमा उम्मेदवार बनेको उनको भनाइ छ ।
नेपाली कांग्रेसको आधिकारिक उम्मेदवारका रूपमा रुख चुनाव चिन्ह लिएर निर्वाचनमा सहभागी हुँदै मुसलमानले पार्टीका सम्पूर्ण नेता–कार्यकर्तालाई एकताबद्ध भई चुनावी अभियानमा जुट्न आग्रह समेत गरेको छन् ।
