काठमाडौं , पुष ०८
सरकारले आसन्न प्रतिनिधिसभा निर्वाचनलाई शान्तिपूर्ण, निष्पक्ष र व्यवस्थित रूपमा सम्पन्न गर्न सुरक्षा व्यवस्था थप सुदृढ बनाउन जिल्ला सुरक्षा समितिहरूलाई निर्देशन दिएको छ।गृहमन्त्री ओमप्रकाश अर्यालको अध्यक्षतामा बसेको केन्द्रीय सुरक्षा समितिको बैठकले निर्वाचनसँग सम्बन्धित सबै सुरक्षा संयन्त्रलाई पूर्ण रूपमा सक्रिय बनाउने निर्णय गरेको हो। बैठकले केन्द्र, प्रदेश र जिल्ला तहमा गठन गरिएका सुरक्षा संयन्त्रबीच प्रभावकारी समन्वय र सहकार्यमा सुरक्षा परिचालन गर्न निर्देशन दिएको छ।निर्वाचन प्रचारप्रसारका क्रममा सामाजिक सञ्जालको दुरुपयोग हुन सक्ने जोखिमलाई ध्यानमा राख्दै त्यसको निगरानी प्रणालीलाई थप प्रभावकारी बनाउने निर्णयसमेत बैठकले गरेको छ। सामाजिक सञ्जालमार्फत गलत सूचना, घृणात्मक अभिव्यक्ति तथा निर्वाचन आचारसंहिता विपरीत गतिविधि भएमा तत्काल कारबाही गरिने गृहमन्त्रीको सचिवालयले जनाएको छ।बैठकमा नेपाल प्रहरी, सशस्त्र प्रहरी बल, नेपाली सेना र राष्ट्रिय अनुसन्धान विभागले आ–आफ्नो सुरक्षा तयारीबारे जानकारी गराएका थिए। निर्वाचनलाई लक्षित गरी लागू गरिएको ‘एकीकृत निर्वाचन सुरक्षा योजना’ अनुसार मतदानपूर्वदेखि मतगणनासम्म सुरक्षा व्यवस्था मिलाइने सरकारको भनाइ छ।