कपिलवस्तु, कार्तिक १८ —
जिल्लामा हालै सरुवा भएर आएका प्रहरी निरीक्षकहरू (इन्स्पेक्टर) शान्ति–सुरक्षा सुदृढ गर्ने जिम्मेवारी सम्हाल्नुभन्दा पनि स्वागतमा रमाउन व्यस्त देखिएका छन् । स्थानीय तहका कार्यालयदेखि निजी संघसंस्था र व्यवसायिक संस्थासम्म धाउँदै उनीहरू खादा, दोसल्ला, फूलमाला र डायरी लिन पुगेका छन् ।
नयाँ सरुवा भएर आएका इन्स्पेक्टरहरूको स्वागत गर्ने लहर यति बढेको छ कि, प्रहरीभन्दा बढी स्थानीय तहका जनप्रतिनिधि र संघसंस्था तिनको आगमनलाई ‘औपचारिक अवसर’का रूपमा उपयोग गरिरहेका छन् । प्रहरी प्रशासनका विषयमा स्थानीय टिप्पणीहरू पनि बढिरहेका छन् — “स्वागतमा त सक्रिय, काममा कति सक्रिय हुने हुन्?” भन्ने खालका ।
प्रहरी प्रधान कार्यालयले असोज २८ गते ६ सय ६५ जना निरीक्षकको सरुवा गरेपछि कपिलवस्तुमा पनि नयाँ इन्स्पेक्टरहरूको समूह आएको हो। सरुवापछि सुरु भएको यो ‘स्वागत संस्कृतिले’ जिल्लामा प्रहरीको प्राथमिकता र पेशागत मर्यादाबारे प्रश्न उठाएको छ ।
सबैभन्दा पहिले इलाका प्रहरी कार्यालय पिपराका निरीक्षक अर्जुन पौडेलले वाणगंगा नगरपालिकामा पुगेर नगर प्रमुख चक्रपाणी अर्यालबाट कार्तिक ११ गते स्वागत पाए । पाँच दिन नबित्दै उनले उद्योग व्यापार संघ, जितपुरको अर्को स्वागत पनि थापे ।
त्यस्तै, वडा प्रहरी कार्यालय चन्द्रौटाका निरीक्षक सन्तोष घिमिरे पनि पछाडि परेनन् । उनले कार्तिक ९ गते शिवराज नगरपालिकाका प्रमुख अजय थापाबाट स्वागत पाए र चार दिनपछि कार्तिक १३ गते महाराजगन्ज नगरपालिकाका प्रमुख अब्दुल कलामबाट अर्को स्वागत थापे ।
उही दिन महाराजगन्जमै सशस्त्र प्रहरी सुरक्षा बेसका निरीक्षक गंगाराम भट्ट पनि स्वागत कार्यक्रममा सहभागी भए। उनी पनि हालै सरुवा भएर आएका अधिकारी हुन् ।
स्थानीय नागरिकहरू भन्छन् — “प्रहरी निरीक्षकहरूले जिम्मेवारीभन्दा बढी प्रोटोकल र स्वागतमा चासो देखाइरहेका छन् ।” उनीहरूको भनाइमा, जनसुरक्षाका मुद्दा गौण बन्दै, औपचारिकता प्रमुख बन्दै गएको छ ।
सुरक्षा सुदृढीकरणको समयमा प्रहरी निरीक्षकहरूको यस्तो ‘स्वागत–दौडधुप’ ले संगठनभित्रको अनुशासन र प्राथमिकताबारे गम्भीर प्रश्न उठाएको स्थानीय टिप्पणीहरूमा उल्लेख छ ।
सभार :- कान्तिपुर
