कपिलवस्तु — तौलिहवा–भैरहवा सडकखण्ड अन्तर्गत मायादेवी गाउँपालिका–१ पकडी चौक नजिक बस्दै आएकी दुई वर्षीया बालिका मन्शा ओझा ३६ घण्टा बितिसक्दा पनि बेपत्ता छिन् ।
बालिकाका बुवा अमित कुमार ओझा आफ्नी श्रीमती र दुई सन्तानसहित पकडी चौकबाट करिब ५०० मिटर दूरीमा रहेको भाडाको कोठामा बस्दै आएका थिए । हिजो बिहान करिब ८ बजे घर अगाडि खेल्दै गरेकी मन्शा अचानक बेपत्ता भएकी थिइन् ।
बालिकाका बुवा ओझा डीएक्सएन (DXN) कम्पनी, धरमपानीयामा सुरक्षा गार्डको रूपमा कार्यरत रहेको प्रहरीले जनाएको छ ।
बालिका हराएको सूचना पाएपछि प्रहरीले विशेष खोजी अभियान सञ्चालन गरेको छ । घर वरिपरि, छिमेक तथा आसपासका क्षेत्रका बासिन्दासँग सोधपुछ गर्दै खोजी कार्य जारी रहेको प्रहरीले जनाएको छ ।
इलाका प्रहरी कार्यालय पकडीका प्रमुख, प्रहरी निरीक्षक सुभाष खतीवडाले भने, हामीले हरेक कोणबाट घटनालाई हेर्दै खोजी अभियान अघि बढाइरहेका छौं । विभिन्न स्थानमा प्रहरी टोली परिचालन गरिएको छ र सीसीटीभी फुटेज पनि जाँच भइरहेको छ ।
बेपत्ता बालिकाका बुवा अमितले बताएका अनुसार, यदि बालिका अपहरणमा परेकी भए पनि परिवारलाई अहिलेसम्म कुनै किसिमको फोन, सन्देश वा पैसाको डिमान्ड प्राप्त भएको छैन । प्रहरीका अनुसार, यो घटनाले रहस्यमय रुप धारण गरेको र जिल्ला बाहिरका अस्पताल तथा स्वास्थ्य संस्थामा समेत खोजी अभियान जारी रहेको जानकारी दिइएको छ ।
घटनालाई बुझ्नका लागि जिल्ला प्रहरी कार्यालय कपिलवस्तुका प्रहरी उपरीक्षक सन्तोष आचार्यले पनि आज बालिकाको घर परिवारलाई भेटेर खोजी अभियान जारी रहेको बताउनु भयो ।