कपिलवस्तु — ४८ घण्टादेखि बेपत्ता रहेकी दुई वर्षीया मन्शा ओझाको शव मर्थी खोलामा मृत अवस्थामा फेला परेको छ ।
इलाका प्रहरी कार्यालय पकडीका प्रहरी निरीक्षक सुभाष खतीवडाका अनुसार शनिबार बिहान घरअगाडि खेल्दै गर्दा हराएकी बालिका ओझाको शव सोमबार बिहान मर्थी खोलामा भेटिएको हो ।
बालिकाको शव घरबाट करिब तीन किलोमिटर टाढा, मायादेवी गाउँपालिका–१ र शुद्धोधन गाउँपालिका ६ को सिमानामा पर्ने मर्थी खोलामा फेला परेको प्रहरीले जनाएको छ ।
घटनापछि जिल्ला प्रहरी कार्यालय कपिलवस्तुको टोली घटना स्थलमा पुगेर शवलाई नियन्त्रणमा लिई पोष्टमार्टमका लागि तौलिहवा अस्पताल पठाएको छ ।
प्रहरीका अनुसार घटनाबारे थप अनुसन्धान भइरहेको छ ।
अचानक यस्तो दु:खद घटना भएपछि ओझा परिवारमा गहिरो शोक छाएको छ । गाउँमा समेत शोक र स्तब्धता छाएको स्थानीयहरूले बताएका छन् ।