उमेश कुशवाहा, १३ भदौ, वीरगञ्ज
भारतको बिहार राज्य अन्तर्गत पश्चिमी चम्पारण जिल्लाको लौरियामा जन्मिएका ३७ वर्षीय आनन्द सिंह हाल वीरगञ्ज–७, रेशमकोठीमा बसोबास गर्दै आएका छन्। डकर्मी (मिस्री) को काम गर्दै आएका सिंह एक दशकअघि घरको प्लास्टर गर्ने क्रममा लडेर गम्भीर रूपमा घाइते भए। स्पाइनल कोर्ड इन्जुरीका कारण उनी पूर्ण रूपमा शारीरिक अपांग भई विगत १२ वर्षदेखि ओछ्यानमै जीवन बिताउँदै आएका छन्।
दुई सन्तानका पिता सिंहको जीविकोपार्जनको जिम्मेवारी उनकी श्रीमतीले काँध लिएकी छिन्। उनी अरूको घरमा चुलोचौका तथा मजदुरी गरेर गुजारा चलाइरहेकी छन्।
यो कठिन परिस्थितिबारे जानकारी पाएपछि ‘उपकार सेवा नेपाल’की अध्यक्ष विद्या कुमारी सरावगी स्वयं सिंहको निवासमै पुगेर ह्वीलचेयर हस्तान्तरण गरेकी छन्।
कार्यक्रममा संस्थाका सदस्य सुमन बगेडिया, अंकुर शर्मा, समाजसेवी प्रकाश थारु, श्रवण रायमाझी, स्थानीय रितेश गुप्ता, कुन्दन पुडासैनी, अमर सर्राफलगायतको उपस्थिति रहेको थियो।
यसअघि पनि उपकार सेवा नेपालले विभिन्न दुर्गम क्षेत्रहरूमा पुगेर असहाय, निसहाय तथा अपांग व्यक्तिहरूलाई आवश्यक सहयोग गर्दै आएको छ।