जेठ २४, दाङ
लुम्बिनी साहित्य सङ्गमका उपाध्यक्ष तथा साहित्यकार डा. कृष्णराज डि.सी. द्वारा रचित लक्ष्मणरेखा महाकाव्यको समीक्षात्मक कार्यक्रम सम्पन्न भएको छ। घोराही दाङको सर्वोदय पुस्तकालयमा भएको उक्त कार्यक्रममा सर्वोदय पुस्तकालयका अध्यक्ष सुशिल गौतमले अध्यक्षतामा गर्नु भएको थियो भने कार्यक्रमको प्रमुख अतिथिको रूपमा नारायणप्रसाद शर्मा रहनुभएको थियो।त्यसैगरी विशिष्ट अतिथिमा पुरूषोत्तम खनाल रहनुभएको थियो। कृतिको समीक्षा नेपाल संस्कृत विश्वविद्यालयका उप प्राध्यापक किशोर चन्द्र गौतमले गर्नुभएको थियो। राप्ती साहित्य परिषदका अध्यक्ष कमलमणि देवकोटाको स्वागत मन्तव्यबाट सुरू भएको उक्त कार्यक्रममा लुम्बिनी साहित्य सङ्गमका महासचिव तेजप्रसाद खनालले उपस्थित सम्पूर्ण अतिथिहरूलाई संस्थाको तर्फबाट धन्यवाद! मन्तव्य व्यक्त गर्नुभएको थियो भने स्रष्टा कृष्णराज डि. सीलाई बधाई तथा शुभकामना दिनुभएको थियो। स्रष्टा डि. सीले आफ्नो छोटो धारणा पनि प्रस्तुत गर्नुभएको थियो ।
गत फागुन १७ गते काठमाडौंमा लोकार्पण भएको उक्त कृतिको थप समीक्षात्मक भिडियोहरू सलाइड मार्फत पनि प्रस्तुत गरिएको थियो। यस महाकाव्यमा २२ सर्ग,१५ सय श्लोक र १४ प्रकारका वार्णिक छन्दको प्रयोग गरिएको छ। जम्माजम्मी २ सय ६१ पृष्ठ रहेका छन्। कार्यक्रममा विभिन्न विशिष्ट व्यक्तित्वहरूको उल्लेखनीय उपस्थिति रहेको थियो। कार्यक्रमको आयोजना सर्वोदय पुस्तकालय घोराही दाङ,राप्ती साहित्य परिषद् केन्द्र,लेखक संघ दाङ,लुम्बिनी साहित्य संगम लुम्बिनी प्रदेशद्वारा संयुक्त रूपमा गरिएको थियो ।
कार्यक्रमको सहजीकरण आदिम के. सी. ले गर्नुभएको थियो।कार्यक्रममा १०० भन्दा बढीको उपस्थिति रहेको थियो।उक्त कृतिको प्रकाशन लुम्बिनी साहित्य सङ्गमले गरेको थियो।कार्यक्रम निक्कै भव्य र सभ्य रूपमा सम्पन्न भएको थियो।