जन्मदर्तामा बालिग ‘कानुनले नागरिकताको उमेरलाई नै आधिकारिक मान्छ’
काठमाडौं । बलात्कार आरोपित सन्दीप लामिछानेविरुद्ध प्रहरी अनुसन्धान जारी छ । उनीविरुद्ध दुईपटक म्याद थप गरिएको छ । यही असोज २४ गते पहिलोपटक सात दिनको म्याद थप गरिएको थियो । पहिलोपटक सात दिन र बिहीबार पाँच दिन हिरासतमा राखी अनुसन्धान गर्न जिल्ला अदालत काठमाडौंले अनुमति दिएको छ ।
गएको भदौ २१ गते प्रहरी वृत्त गौशालामा सन्दीपविरुद्ध बलात्कारको जाहेरी परेको थियो । सन्दीपले भदौ ५ गते होटेल काठमाडौं इनमा लगेर एक नाबालिगमाथि पटक–पटक बलात्कार गरेको जाहेरीमा उल्लेख छ ।
जाहेरी परेको समयमा सन्दीप जमैकामा थिए । उनले सामाजिक सञ्जालमार्फत आफूमाथिको आरोप अस्वीकार गर्दै आएका छन् । तर, भदौ ५ गते राति सन्दीप पीडित किशोरीसँग सो होटेलमा प्रवेश गरेको र भोलिपल्ट बिहान बाहिरिएको सीसीटीभी फुजेट प्रहरीले फेलापारेको छ । प्रहरीले त्यसलाई सबैभन्दा ठूलो प्रमाण मानेको छ । त्यसबाहेक पीडितको बयान, होटेल कर्मचारीको बयान पनि प्रहरीले संकलन गरेको छ ।
आफूमाथि आरोप लागेको एक महिनापछि सन्दीप अमेरिकाबाट नेपाल फर्किएका थिए । उनले त्यसको पूर्वजानकारी सामाजिक सञ्जालमार्फत दिएका थिए । प्रहरीले उनलाई असोज २० गते त्रिभुवन अन्तर्राष्ट्रिय विमानस्थलबाटै नियन्त्रणमा लिएको थियो ।
सन्दीप र उनका कानुन व्यावसायीले योजनाबद्ध तरिकाले फसाइएको जिकिर गर्दै आएका छन् । सन्दीप र उनका कानुन व्यावसायीले पीडित भनिएकी किशोरी नाबालिग नभएको जिकिर समेत गरेका छन् ।
पहिलोपटक म्याद थपका क्रममा सन्दीपलाई ‘फसाउन’कै लागि नाबालिग देखिने गरी जन्मदर्ता बनाएको जिकिर उनका कानुन व्यवसायी सुधा रिजालले गरेकी थिइन् । जाहेरवालाको दुईवटा जन्मदर्ता भेटिएको भन्दै उनले अहिलेको जन्मदर्तामा जाहेरवाला नाबालिग नरहेको देखिएको बताएकी थिइन् ।
तर, जन्मदर्ता र नागरिकताको विषयले घटना अनुसन्धानमा असर नपर्ने अनुसन्धानमा संलग्न अधिकारीहरू बताउँछन् । प्रहरी अनुसन्धानका क्रममा पनि पीडितको नागरिकता र जन्मदर्तामा फरक जन्ममिति रहेको खुलेको एक अधिकारीले बताए ।
अनुसन्धानमा संलग्न एक अधिकारीले बाह्रखरीसित भने, “नागरिकताअनुसार जाहेरवाली नाबालिग नै देखिन्छ । जन्मदर्ताअनुसार उनको उमेर १८ कटेको देखिन्छ । कानुनले ठोस प्रमाण भने नागरिकतालाई नै मान्छ । यसले मुद्दाको अभियोगमा तात्विक असर पार्दैन । अभियोग लग्दा यस विषयलाई खुलाएर नै पनि लग्न सकिन्छ ।”
केही दिनअघि नेपाल क्रिकेट संघ (क्यान)का अध्यक्ष चतुरबहादुर चन्दले पनि एक टेलिभिजन अन्तर्वार्ताका क्रममा पीडित बालिग भएको जानकारी पाएको बताएका थिए ।
उमेरको विवाद ठूलो नभएको र अभियोग प्रमाणित भए सजायको भागीदार हुनुपर्ने सरकारी कानुन व्यवसायी बताउँछन् । कानुनले नागरिकताको उमेरलाई नै आधिकारिक मान्ने उनीहरूको भनाइ छ ।
प्रहरी वृत्त गौशालाबाट सन्दीपविरुद्ध अनुसन्धान अघि बढाइएको छ । प्रहरी अधिकारीहरूले सन्दीपविरुद्ध अभियोग प्रमाणित हुने प्रमाण नै आफूहरूले संकलन गरेको जिकिर गर्दै आएका छन् ।