साताका तीन लघुकथाको पन्ध्रौँ शृङ्खलामा नमस्ते आधुनिक लघुकथा मञ्चमा यो साता प्रेषित गरिएका चुनाव विशेष लघुकथाहरू मध्ये निम्न तीन लघुकथाहरू (हाम्रा बा’को भोट कस्ले खसाल्यो?, हैकम र चुनाव) छनोट गरी प्रकाशन गरिएको छ।
१] लघुकथा : हाम्रा बा’को भोट कस्ले खसाल्यो ?
✍️ चिन्तु गिरी
कुरो त्यस्तै सतचालीस पछिको हो । बिहान मैले मत खसालेर घर फर्केँ। खाना खाएर ४:३० तिर फेरि उहीँ बुथमा पुगेँ ।
समय सकिन केही बेर थियोे । एकातिर चर्को चर्को आवाज आयो ।म त्यतैँ लागेँ । आठ/दश जना खैलाबैला गर्दै थिए । एउटा रिसले चिच्याउँदै थियो ” छत्तीस सालमा बितेका हाम्रा बा’को भोट कसले खसाल्यो ?”
स्याङ्जा
२]लघुकथा: हैकम
✍️ विनाेद नेपाल
स-साना कुरामा पनि सधैँको कचकचले हैरान भएपछि उनीहरू बसेर आ-आफ्ना कुरा राख्ने, सरसल्लाह गर्ने र आइन्दा यस्ता समस्या दाेहाेरिन नदिने निर्णयमा पुगे।
निर्धारित समयमा बैठक सुरु भयाे । पहिले जेठाेले आफ्ना कुरा राख्ने सहमति अनुसार उनले कुरा थाले । पत्नीले उनका कुरा ध्यानपूर्वक सुन्न थालिन् ।
उनी घडी हेर्दै बाेल्दै गरिरहेका थिए । अरूलाई बाेल्ने समय नै नदिई आफूमात्र बाेलिरहेका उनी लामाे समय धाराप्रवाह बाेले । बाेल्नुपर्ने बाेलिसकेपछि घडी हेर्दै एकाएक राेकिए ।
‘हजुरकाे बाेल्नु,भन्नुपर्ने सबै सकियाे जस्ताे छ’ पत्नीले भनिन् ‘अब त म बाेल्न पाउँला नि हैन् ?’
‘माैन अवधि सुरु भयाे’ उनले भने, ‘अब बाेल्न मिल्दैन, आचारसंहिता लाग्छ ।’
२०७९।०१।२७
३] लघुकथा – चुनाव
✍️ मिसु श्रेष्ठ
‘कस्तो जमाना आयो है ! सानो खर्चले नजितिने।´
‘त्यही त, यी पैसामा बिक्ने नेपाली जनताहरू !’
‘जनताको बानी बिगार्ने यिनै नेता त हुन् नि !’
‘बाध्यता छ नि यार ! अरुले खर्च गरेपछि आफूले नगर्दा मत प्रभावित भइहाल्ने।’ नेताले तितो ओकल्यो।
‘ल ल ढुक्क भएर बस्नु । हाम्रो गाडीले यथेष्ट मतदाता ओसारी सकेको छ । सब तयारी पूरा भयो । जित पक्का !’ नेतालाई धाप मार्दै निकटस्थ कार्यकर्ताले आश्वासन दियो ।
“चुनाव आइरहोस् ! रङ्गीचङ्गी मान्छे देख्न पाइने । गाउँमा चहलपहल पनि बढ्ने । यस्तै भइरहे त बाँदर, मृगले बाली क्षति नि गर्दैनथ्यो । जताततै गाडी !” बूढो स्वर सुनियो ।
“अँ त्यसमाथि जता जाँदा नि पैँसो नलाग्ने ।”
“ह्या बूढी ! त्यस्तो नि सधैँ होला त !? चुनाव सकेपछि पैसा त लागिहाल्ला नि ! गाडी त चल्ला के !?” बुढोले आशङ्का व्यक्त गर्यो।
“हैन बुढा ! तिमीले त पैसा लिन्नौ जस्तो लाग्या’थ्यो।”
“यी पैसा धेर भएकाहरू ! हामीले मागेका हौँ र छिँढीसम्म आएको लक्ष्मीलाई अवहेलना त गर्नुभएन नि ! फेरि नलिए पनि कसले पत्याउँछ र ?”
“भोट त यिनैलाई हाल्यौ त ?”
“यिनले हात समातेका छन् र ! गोप्य मतदान हो, मन परेको ठाउँमा हालिन्छ नि !”
पिँढीबाट कानमा ठोक्किएको आवाजले नेताजीको कदम टक्क अडिए।
काँडाघारी, काठमाडौँ