लगानीयोग्य रकमको अभावपछि बैंकहरुले निक्षेपमा ब्याजदर बढाए
अधिकांश वाणिज्य बैंकले बचत तथा मुद्दती खातामा दिने ब्याजदर बढाएका छन् ।
लामो अवधिका लागि स्रोत सुनिश्चित गर्न मुद्दतीमा ११ प्रतिशतभन्दा बढी ब्याजदर दिने घोषणा बैंकहरुले गरेका छन्।
आजदेखि लागू हुनेगरी बचत तथा मुद्दती खातामा ब्याजदर बढेको सूचना बैंकहरुले सार्वजनिक गरेका छन्। लगानीयोग्य रकमको अभावपछि बैंकहरुले निक्षेपमा ब्याजदर बढाएका हुन्। पछिल्ला साता कर्जा प्रवाह निक्षेपभन्दा उच्च दरले बढेको छ, जसले गर्दा लगानीयोग्य रकमको अभाव देखिएको छ।
असोजको सुरुआती तीन सातामा वाणिज्य बैंकहरुमा ८४ अर्ब निक्षेप थपिँदा १ खर्ब ११ अर्ब कर्जा प्रवाह भएको नेपाल बैंकर्स एसोसिएसनको तथ्यांक छ। असोज २२ गतेसम्म आउँदा वाणिज्य बैंकहरुको कुल निक्षेप ४२ खर्ब ५५ अर्ब पुगेको छ भने कुल कर्जा ३९ खर्ब ८३ अर्ब पुगेको छ।
कोरोनाको असर न्यून हुँदै गएकाले कर्जाको माग अझै बढ्ने अनुमानपछि बैंकहरुले स्रोत जुटाउन निक्षेपमा ब्याजदर बढाएका हुन्।
एनआइसी एसिया बैंकले व्यक्तिगत मुद्दतीमा सबैभन्दा धेरै ११.१० प्रतिशत ब्याज तोकेको छ। सुपर चमत्कारिक मासिक निक्षेप खातामा बैंकले ११.१० प्रतिशत ब्याजदर तोकेको छ।
त्यस्तै १ देखि १० वर्षसम्मका लागि सर्वश्रेष्ठ मुद्दती खातामा बैंकले त्यति नै ब्याजदर तोकेको छ।
सिभिल बैंकले व्यक्तिगत मुद्दतीमा १ वर्ष बढी अवधिका लागि १०.११ प्रतिशत ब्याजदर तोकेको छ। एनएमबिले ३ महिनाभन्दा बढी अवधिका लागि व्यक्तिगत मुद्दतीमा ९.५७ प्रतिशत ब्याजदर तोकेको छ। कुमारीले ६ महिनाभन्दा बढी अवधिको लागि व्यक्तिगत मुद्दतीमा ९.८ प्रतिशत ब्याजदर दिनेछ। सिद्धार्थले ३ महिना बढी अवधिको लागि १०.३ प्रतिशत तोकेको छ।