कीर्तिपुरमा घरबेटीको कुटाइबाट एक जनाको मृत्यु भएको छ।
कीर्तिपुर नगरपालिका ७ बस्ने ६६ वर्षीय प्रेमलाल महर्जनले आफ्नै घरमा बहालमा बसेका बारा कलैयाका ४८ वर्षीय शम्भु चौधरीमाथि कुटपिट गरेका थिए।
महर्जनले काठको भाटाले हिर्काउँदा शम्भु गम्भीर घाइते भएको महानगरीय प्रहरी वृत्तका प्रहरी नायब उपरीक्षक (डिएसपी) रूकेश तन्डुकारले बताए।
आज दिउँसो उनीहरूबीच विवाद हुँदा झडप भएको हो। त्यहीक्रममा बहालमा बसेका पुरूष घाइते भएका थिए’ उनले भने।
चौधरीले केही दिनअघि मात्रै महर्जनको घर छाडेर अन्तै बस्न थालेका थिए। तर आज चौधरीले मापसे गरी महर्जनको घरमा झगडा गर्न पुगेको प्रहरीले जनाएको छ।
घाइते भएका उनको उपचारका लागि कीर्तिपुर अस्पताल लगिएको थियो। उनको उपचारकै क्रममा मृत्यु भएको डिएसपी तन्डुकारले जानकारी दिए। प्रेमलाल महर्जनलाई प्रहरीले पक्राउ गरेको छ।
मृतकको बाहिरी चोट भने नदेखिएको डिएसपी तन्डुकारले बताए।
‘उनको बाहिर चोट भने देखिएको छैन। भित्री चोट देखिन्छ’ उनले भने, ‘पोष्टमर्टम रिपोर्ट आएपछि पूर्ण विवरण आउँछ।’ आजको सेतोपाटिले छापेको छ।