शुक्र मोक्तान
साउदी अरब | विश्व व्यापी महामारीको रूपमा फैलिएको CoViD-19 कोरोना भाईसका कारण वैदेशिक रोजगार तथा उच्च शिक्षाको लागी विभिन्न देशमा पुगेका नेपाली नागरिकहरू स्वदेश फर्किन नपाई अपठेरोमा परेकाहरूलाई नेपाल सरकार मन्त्रिपरिषदको निर्णय अनुसार चार्टर्ड उडान मार्फत प्राथमिकताका आधारमा नेपाली नागरिकलाई स्वदेश फर्काउने पहिलो र दोस्रो चरणको उक्त कार्य पुरा गर्दै यही असार २८ बाट औषिजन्य कार्गो उडान बाहेक अन्य चार्टर्ड उडानहरू तिन दिनको लागी स्थगित गरेको छ।
यसै क्रममा साउदी अरबबाट कोरोना लगायत विभिन्न कारणले स्वदेश फर्किन नसकेका नेपाली नागरिकहरू मध्ये ४ हजार १ सय ८३ जना नेपाली नागरिकहरू स्वदेश फर्किएका छन् भने उक्त यात्रुहरू संगै साउदी अरबको विभिन्न शहरमा विभिन्न कारणले मृत्यु भएकाहरू मध्ये नेपाली दूतावास रियाद र नेपाली महावाणिज्य दूतावास जेद्धाले कागजी प्रकृया पुरा गरी अन्तिम संस्कारको लागी ६० जनाको शव स्वदेश पठाएको छ। गैर आवासीय नेपाली संघको निरन्तर पहल, नेपाली नियोग दूतावासको समन्वय र नेपाल सरकारको सहजीकरणमा साउदीमा १८ जुनबाट चार्टर्ड उडान सुरू भएको थियो भने जुलाई ११ मा हिमालय एयरले दम्माम बाट अन्तिम उडान गरेको थियो।
स्वदेश फर्किएका नागरिकहरूमा साउदी अरबको पूर्वी शहर दम्माम बाट हिमालय एयरको १० वटा उडान मार्फत १५ सय ३५ जना र नेपाल वायुसेवा निगमको दुई वटा उडान मार्फत ४ सय ४ जना गरी १९ सय ३९ जना स्वदेश फर्किएका छन् जस मध्ये ५८ जना डिपोर्टेशनको लागी कारागारमा रहेको नेपालीहरू रहेका छन् साथै उक्त यात्रुहरू संगै विभिन्न कारणले साउदीको पूर्वि शहर दम्माममा मृत्यु भएकाहरू मध्ये नेपाली दूतावासले प्रकृया पुरा गरी अन्तिम संस्कारको लागी १५ जनाको शव स्वदेश पठाएको छ।
त्यस्तै साउदी अरबको राजधानी रियादबाट नेपाल वायुसेवा निगमको ६ वटा चार्टर्ड उडान मार्फत १५ सय ७ जना यात्रु संगै नेपाली दूतावासले प्रकृया पुरा गरी अन्तिम संस्कारको लागी राजधानी रियाद क्षेत्रमा रहेको ३९ जनाको शव स्वदेश पठाएको छ। त्यसै गरी साउदी अरबको पश्चिमी क्षेत्र जेद्धा बाट नेपाल वायुसेवा निगमको ३ वटा चार्टर्ड उडान मार्फत ७ सय ३७ जना यात्रु संगै नेपाली महावाणिज्य दूतावास जेद्धाले प्रकृया पुरा गरी अन्तिम संस्कारको लागी ६ जनाको शव स्वदेश पठाएको छ।
यस चार्टर्ड उडान अवधिमा स्वदेश फर्किएका नागरिकको अवस्था र व्यवस्थापनको समिक्षाको लागी भन्दै नेपाल सरकारले स्वदेश फिर्तिको लागी गर्दै आएको सहजीकरणको चार्टर्ड उडानहरू तिन दिनको लागी स्थगन गरेको छ भने नेपाली दूतावास रियादले दिएको जानकारी अनुसार तेस्रो चरणको उडान यही जुलाई १६ मा साउदीको दम्मामबाट ४ वटा र रियादबाट २ वटा गरी उक्त दिन ६ वटा उडान हुने र २० जुलाईमा साउदीको रियादबाट २ वटा र दम्मामबाट २ वटा गरी उक्त दिन नेपाल वायु सेवा निगमको विमानले ४ वटा उडान गर्ने तय भएको छ।
